Po lind një Milosheviç i vogël në rajon?
Po lind një Milosheviç i vogël në rajon?
Dy javët që lamë pas, do të jenë javë që do të shënohen si javët të cilat do kenë shënuar rekordin e miratimeve të ligjeve nga ana e të zgjedhurve të popullit të FYROM-t dhe Parlamenti pati mundësi për hyrje në librin e Guinesit, pasi kishte miratuar çdo 14 sekonda një ligj. Çudi, por e vërtetë. Më me rëndësi në gjithë këtë shpejtësi miratimesh brenda dy javësh ka qenë e shumë përfolura Rregullorja e Parlamentit dhe miratimi i kësaj rregulloreje bëri shumë zhurmë, si zakonisht duke transferuar vëmendjen e opinionit për çështje madhore shqiptare si gjuha shqipe dhe duke lënë të kalojë në heshtje heqjen e të drejtës për bllokimin e një ligji i cili do të dëmtonte gjuhën shqipe, shqiptarët, qytetarët, fëmijët, flamurin, engjëllin dhe dreqin.
Ju kujtohet se vetëm para një viti një BDI-i opozitare e cila shfrytëzoi të drejtën e parashtrimit të një e më shumë amendamenteve për një propozim-ligj për të cilin mendonte se është ligj antishqiptar, si ligji për Policinë dhe disa ligje të tjera dhe parashtroi mbi një mijë amendamente? Ju kujtohet se vetëm para një viti një BDI, opozitare e cila paraqiti me shumë se dymijë amendamente për Rregulloren e Parlamentit për të cilën vlerësonte se është antikushtetuese dhe antishqiptare? Ju kujtohet të gjithëve pasi ishte një BDI-i e cila në të vërtetë kishte të drejtë dhe vlerësimet ishin të drejta, por për të dhënë këto vlerësime dhe për të bllokuar ligjet antishqiptare dhe konkretisht edhe Rregulloren e famshme të Paralementit, BDI-ja kishte mundësinë të bënte këtë, pasi Rregullorja e kaluar e cila ishte në fuqi e mundësonte këtë, pasi jepte mundësin e parashtrimit të një e më shumë amendamenteve për një propozim të caktuar.
Hiqet mundësia e bllokimit të ligjeve antishqiptare-antiqytetare
Miratimi i Rregullores së re të Parlamentit është më shumë i dëmshëm për heqjen e mundësisë për bllokim të ndonjë ligji me metoda demokratike për të cilin ligj mendohet se është jo i mirë dhe i dëmshëm për qytetarët, se sa lënia në fuqi të një rregulloreje me të cilën BDI-ja punoi katër vjet gjatë koalicionit me LSDM-në. Rregullorja e re e Parlamentit, nuk lejon parashtrimin më shumë se një amendamenti nga ana e një deputeti. Ky është problemi.
Fatkeqësisht, shumë “kritikë të ashpër të BDI-së”, si kategoria e nënkryetares së kësaj partie, nuk e panë të udhës t’i rreken problemit kryesor, heqjes së mundësisë demokratike për të bllokuar deputetët një ligj i cili vlerësohet se mund të dëmtoj një grup qytetarësh ose një bashkësi etnike se sa mos precizimit të përdorimit të gjuhës shqipe, kur dihet se ka një marrëveshje për përdorimin e gjuhës shqipe në mes Gruevskit dhe Ahmetit, marrëveshje e cila do të mundësojë nxjerrjen e një Ligji për përdorimin e gjuhëve të bashkësive etnike mbi 20 përqind, i cili do të mundësoj që: gjuha shqipe të flitet dhe të shkruhet në seanca parlamentare dhe përfaqësuesit e popullit të bashkësive etnike të kenë mundësi edhe të udhëheqin komisionet parlamentare. Ky ligj do të mundësojë që të gjithë ligjet, aktet tjera ligjore të cilët do të miratohen dhe do të propozohen për miratim të jenë edhe në gjuhën shqipe. Poashtu ky ligj do të mundësojë që edhe çdo propozim që do të vij nga qeveria, do të vij edhe në gjuhën e bashkësisë etnike e cila përbën më shumë se 20 përqind, pra gjuhës shqipe.
Rregullorja e re e Parlamentit e miratuar me aklamacion nga koalicioni VMRO-BDI, në nenin 3 të saj, ka hequr vetëm precizimin ku thuhet se deputeti ka të drejtë edhe të udhëheqë me komisionet parlamentare, fjali e shtuar nga PDSH-ja e cila nuk mori përkrahjen e VMRO-së. BDI-ja vitin e kaluar përveç që kundërshtonte këtë formulim ku flitet për përdorimin e gjuhës shqipe, kundërshtonte ashpër edhe shumicën e propozim rregullores së propozuar nga koalicioni i VMRO-PDSH-së.
Neni 3 i rregullores së Parlamentit të FYROM-t thotë: deputetet të cilët flasin gjuhë të ndryshme nga gjuha maqedonase dhe përbëjnë mbi 20 përqind, kanë mundësi që të flasin në gjuhën amtare. BDI-ja thotë se heqja e përkufizimit : ... dhe të udhëheq me komisione”, mundëson që ky nen të komentohet se deputetët kanë mundësi të flasin dhe të udhëheqin në të gjithë nivelet dhe jo vetëm në komisione por edhe në udhëheqjen e seancave parlamentare? Por problemi është se VMRO-ja do ta komentojë këtë nen si: deputët kanë të drejtën vetëm të flasin dhe jo të udhëheqin dhe në të gjithë komisionet dhe në të gjithë seancat parlamentare, shqiptarët nuk do të kenë mundësinë as të mendojnë se mund të udhëheqin në gjuhën shqipe. PDSH-ja me precizimin në propozim rregulloren e saj, kishte të drejtë në lidhje me precizimin për shkak se Nikolla Gruevski ishte kategorikisht kundër gjuhës shqipe.
BDI-ja në udhëkryq
Problemi i BDI-së është ky: nëse Gruevski edhe pse ka pranuar që të respektohet Kushtetuta dhe Marrëveshja e Ohrit dhe të miratojë Ligj për përdorimin e gjuhës shqipe dhe të njëjtën nuk e respekton, atëherë BDI-ja ka varrosur vetveten dhe shqiptarët, ndërsa PDSH-ja duhet të përshëndetet për insistimin e saj për precizim të nenit 3, gjegjësisht për precizim të përdorimit të gjuhës shqipe. Pritet të shihet, pasi deri tani BDI-ja është vetëm duke shërbyer në qeverinë e Gruevskit dhe kundërshërbimet ende nuk kanë filluar. Marrëveshja e Ahmetit me Gruevskin duhet të jetë reciproke, ndërsa nëse do të ndodh e kundërta atëher BDI-ja duhet t’u kërkojë falje shqiptarëve dhe të njejten duhet ta bëjë edhe PDSH-ja, PPD-ja dhe të zhduken si parti politike me të vetmin arsyetim: të paafta për të mbrojtur të drejtat elementare të popullit të tyre. Përderisa qeveria ende nuk ka filluar dhe përderisa ende qeveria e re nuk ka bërë as edhe një pune, hamendësimet mund të jenë të gabueshme.
Në fakt, BDI-ja në qeveri nuk ka çfarë të bejë nëse do të vazhdojë të jetë shërbyese e denjë e VMRO-DPMNE-së dhe diktatorit, snobit të radhës në Ballkan, Nikolla Gruevskit. BDI-ja edhe mund të arsyetohet në lidhje me miratimin e ligjit për përdorimin e gjuhës maqedonase dhe alfabetit të saj cirilik, por shqiptarët nuk duan arsyetim, për shkak se brodecasi im, nuk do ta shënojë kurrën e kurrës mbishkrimin e shitores së tij edhe në alfabetin cirilik dhe do të vazhdoj të jetë armiku i shtetit.
Ministria e Kulturës së FYROM-t, është pregatitur me inspektorë dhe policë për të filluar një aksion të largimit të të gjitha mbishkrimeve me alfabet latin në territorin e shtetit. Sipas paralajmërimeve, do te dënohen institucione, revista, firma, media, etj, te cilat nuk përdorin alfabetin cirilik dhe gjuhen maqedonase. Nëse ka një njeri normal në qeverinë e Gruevskit dhe nëse është vetë ai, pak me fiqir, si do të aplikojë këtë ligj, kur shkrimi cirilik shqiptarëve u ngjall neveri dhe një tentim në këtë drejtim vetëm se do të thellojë hendekun ndërmjet shqiptarëve dhe sllavo maqedonasve të cilët sipas të gjithë kushteve janë duke tentuar që të shkatërrojnë në themel FYROM-n. Shumica e qytetarëve pyesin, (pasi nuk duan t’i besojnë logjikës së tyre), po lind në të vërtet një Millosheviç i ri në Ballkan, apo kamë lajthitur? Dhe një Millosheviç i vogël po lind në të vërtet në Ballkan. Mjerë ne, të cilët nuk kemi guximin e studentëve serbë që qëndruan mbi një vit në rrugët e Beogradit për të rrëzuar diktatorin...
Nga Halit Ajdini
E Premte, 25 Korrik 2008
TRIBUNA
Përgjigju Duke Cituar
Postuar më parë nga Shkupi
Krijoni Kontakt