Ndodhitë në Maqedoni 2008 - 2011

[RaPSouL]

Rexhepi ndërroi mendjen, ktheu në punë muftiun Bislimi

Vetëm dy javë pasi dha vendimin për shkarkim, kryetari i Bashkësisë Islame Sulejman Rexhepi ka ndërruar mendjen dhe ka kthyer në vendin e tij të punës muftiun e Shkupit Taxhedin Bislimi.

Në vendimin në të cilin i është dhënë dje pasdite Taxhedin Bislimit shkruan se Reis Ulemaja i Bashkësisë Islame të Republikës së Maqedonisë konform nenit 44 paragrafi 1 pika 2 e Kushtetutës së Bashkësisë Fetare Islame ka marrë vendim që Taxhedin Bislimi të autorizohet për kryerjen e detyrës mufti në Muftininë e Shkupit. Duke u thirrur në po të njëjtën Kushtetutë, Sulejman Rexhepi më 8 gusht të këtij viti me vendim po të ngjashëm shkarkoi Bislimin nga detyra pasi ky i fundit disa ditë më parë hapur kritikoi ndryshimet e fundit kushtetuese në këtë institucion fetar që u bënë me iniciativë të kreut të BFI- së Sulejman Rexhepi.

Nga kabineti i Sulejman Rexhepit për Alsat deklaruan se vendimin për kthimin në detyrë të Taxhedin Bislimit bëhet për hir të muajit të shenjtë të Ramazanit me qëllim të uljes së gjakrave dhe pajtimit.

Taxhedin Bislimi i cili asnjëherë nuk pranoi shkarkimin e tij është befasuar nga vendimi i ri që ka marrë gjatë ditës së djeshme.

Tensionet në Bashkësinë Islame në muajt e fundit erdhën si rezulat i ndryshimeve të fundit të Kushtetutës pa u respektuar parimet kushtetuese të këtij institucioni.

Kushtetuta u ndryshua nga vetë kreu i Bashkësisë Islame dhe disa muftive pa u thirrur organi kompetent - Kuvendi për të bërë këto ndryshime.



Alsat

[RaPSouL]

Gruevski: Në Maqedoni po rriten investimet e huaja

Nga Janari deri në muajin maj, investimet e huaja direkte kanë kapur vlerën prej 230, 7 milion euro, që është thuajse tri herë më shumë se në periudhën e njejtë të vitit të kaluar, deklaroi sot kryeministri Nikolla Gruevski i cili vendosi gur-themelin e qendrës së re tregtare, e cila do të ndërtohet në qendër të Shkupit, pas QT "Ramstor".

“ Kjo tregon se ekonomia e Maqedonisë është duke lëvizur në drejtimin e duhur dhe po shënon një trend të rritjes stabile të investimeve të huaja, që nuk ishte kararestikë për të kaluarën. Megjithate, në këtë plan, ka hapësirë për arritje akoma më të mëdha”, tha Gruevski.

Edhe të dhënat e bankës Popullore rezultojnë se investimet e huaja në vend gjithnjë e më tepër janë duke shënuar rritje.

Sipas bankës Popullore të Maqedonisë, më së shumti investime në vend janë realizuar në muajin shkurt dhe maj, ku kanë arritur shifrën 66, gjegjësishtë 68, 9 milion euro.

Nga agjencioni për investime të huaja komentojnë se rritja e investimeve direkte në vend është vërtetim se fushata qeveritare për tërheqjen e investitorëve ka filluar të japë rezultate.


(INA)

[RaPSouL]

Milovanoviq: Maqedonia nuk ka të ardhme të mirë pa NATO-n

Ambasadorja amerikane në Shkup, Xhilien Milovanoviq deklaroi se Maqedonia nuk do të ketë një të ardhme të mirë pa u anëtarësuar në NATO.

“Shkurt, nuk mendoj se ekziston çfarëdo qoft e ardhme për Maqedoninë e cila do të jetë pozitive, pa hyrje në NATO, edhe atë pa hyrje të përshpejtuar në NATO. Kjo është pjesë e kontinuitetit e progresit të vendit Tuaj, kjo është pjesë e integrimit në Evropë të cilin të gjithë e dëshironi dhe për këtë arsyje mendoj se, kjo duhet të jetë qëllimi dhe prioriteti kryesor i vendit”, tha Milovanoviq në një intervistë për Alsat-m.

Ambasadorja amerikane është e bindur se kontesti me Greqin mund të zgjidhet para skadimit të mandatit të presidentit aktual të SHBA-ve, Xhorxh Bush, por si parakuasht për këtë është që udhëheqësia politike greke dhe maqedonase seriozishtë të fokusohen në çështejn e emrit.



(INA)

[RaPSouL]

Parlamenti miratoi rezolutën për të drejtat e refugjatëve të Egjeut

Parlamenti i Maqedonisë në seancën e sotme miratoi njëzëri dhe me aklamacion rezolutën e cila parasheh realizimin e të drejtave të refugjatëve politikë nga pjesa e Egjeut të Maqedonisë.

Për rezolutën në fjalë votuan të gjithë 88 deputetët që ishin të pranishëm në Parlament. Rezoluta parasheh që Qeveria e Maqedonisë ti ndihmojë refugjatët politikë nga pjesa e Egjeut të Maqedonisë që t’i realizojnë të drejtat e tyre për kthimin e pronave që u janë marrë gjatë Luftës së Dytë Botërore.

Propozues të "Rezolutës për refugjatët nga veprimet ushtarake në Republikën e Greqisë gjatë Luftës Qytetare dhe Luftës së Dytë Botërore" janë një grup deputetësh nga të gjitha partitë parlamentare.

Për duskutim lidhur me propozim rezolutën u paraqitën vetëm Ilia Dimovski nga VMRO-DPMNE-ja dhe Sllavica Gërkovska-Loshkova nga LSDM-ja.



(INA)

[RaPSouL]

Moska përgënjeshtron veten: Shkupi nuk shiti armë

Ambasadori i Rusisë në Shkup ka hedhur poshtë akuzat që erdhën një ditë më parë nga Moska se Maqedonia është në listën e 15 vendeve që kanë furnizuar Gjeorgjinë me armë. Vladimir Solocinski ka deklaruar se qeveria maqedonase nuk ka të bëjë me shitjen e armëve, por përgjegjës për arsenalin ofenziv në Gjeorgji janë SHBA dhe Ukraina.

SHKUP – Maqedonia nuk është në listën e 15 shteteve që kanë furnizuar me armë Gjeorgjinë. Këtë ka deklaruar ambasadori rus në Maqedoni Vladimir Solocinski pas akuzave të Rusisë.
“Qeveria e Maqedonisë nuk ka lidhje me shitjen e armëve. Për furnizime me armë të Gjeorgjisë dhe krijimin e një arsenali ofenziv përgjegjës janë SHBA-të dhe Ukraina, ndërsa nga Gjermania janë kontrabanduar armët”, deklaroi ambasadori i Federatës Ruse në Maqedoni, Solocinski.
Për më tepër në një deklaratë të bërë sot ambasadori i Moskës në Shkup ka kërkuar që Maqedonia të njohë pavarësinë e Osetisë Jugore dhe të Abhazisë.
Solocinski njoftoi gjithashtu se Rusia ka vendosur ndërprerjen e të gjitha programeve për bashkëpunim me Aleancën e Altantikut Verior, ndërsa është bllokuar edhe pjesëmarrja në misionet paqësore, duke përjashtuar mbështetjen logjistike të Aleancës në Afganistan.
Vetëm dy ditë më parë kreu i Shtabit të Ushtrisë Rusë, gjenerali rus Anatoly Nogovitsyn ka akuzuar të gjitha vendet ballkanike dhe ato të Europës Lindore se kanë furnizuar me armë Tbilisin e Gjerogjisë.
Ndërkohë ambasadori i Federatës ruse në Tiranë, Aleksandër Prishchepov kërkon të takohet me Presidentin shqiptar Bamir Topi dhe kryeministrin Sali Berisha. Në një konferencë për shtyp të dhënë sot paradite diplomati rus tha se “për tregtinë e armëve e kishte mësuar nga media shqiptare”.
Përfaqësuesi diplomatik i Moskës në Tiranë ka pranuar se emri i Shqipërisë është gjetur në listën e vendeve të cilat i kanë shitur armë Gjeorgjisë por, Prishchepov nuk ka lënë pa shtuar se shitja e armëve nuk është një vepër penale. Prishchepov theksoi se marrëdhëniet diplomatike mes dy vendeve nuk ka ndryshuar dhe për këtë ka kërkuar takim me Presidentin Topi dhe kryeministrin Sali Berisha.



(a.s/Balkanweb/INA)

[RaPSouL]

BPM parasheh rritje të ekonomisë në vend

Një studim i fundit i bankës Popullore të Maqedonisë parasheh deri në fund të vitit rritje ekonomike prej së paku 5,5 për qind, vazhdim të trendit të zvogëlimit të inflacionit, dhe rritje të konsiderueshme të deficitit tregtarë.

Sipas BPM-së pritet investim në deficitin tregtar që pjesërisht të kompensohet me investimet e drejtpërdrejta, që do të duhej të sjell deri te njëfarë zmadhimi të rezervave devizore.

Banka Popullore njofton se shkalla vjetore e inflacionit në Maqedoni në korrik të këtij viti arriti 9.5 për qind dhe është zvogëluar për 0.6 për qind krahasuar me muajin e kaluar, kur ishte 10.1 për qind.

Në muajin korrik është vërejtur gjithashtu rritje e importit prej 36.6 për qind, por edhe e eksportit për 10.9 për qind, me çka thellohet deficiti tregtar i Maqedonisë.


(INA)

[Coca-Cola]

Arrestime ne Tetove

Tetovë, 28 gusht - Në orët e para të së enjtes, me urdhër të Gjykatës së Tetovës, është bastisur ish godina e "Monopolit" ku gjendet shtëpia e Izair Samiut i njohur si Komandant Baci. Gjatë një aksioni policor janë arrestuar bashkëshortja e Bacit, Gjylere Hajredini, e bija Arta Abedini, Xhemile Osmani, Besnik Ibishi, Isak Mehmeti dhe pjesëtarë të sigurimit "Linuks", të cilët më vonë janë lëshuar.
Zëdhënësi i Ministrisë së Punëve të Brendshme Ivo Kotevski, ka konfirmuar aksionin, por nuk ka dhënë hollësi të shumta, sikurse edhe për praninë e madhe të forcave policore që të enjten kishin bllokuar aksin rrugor Tetovë-Shkup.
Brenda objektit forcat policore nuk kanë lejuar hyrjen. Persona të afërt me familjen e Komandant Bacit kanë deklaruar se në aksion kanë marrë pjesë mbi 300 forca policore ndërsa nuk kanë përjashtuar mundësinë që aksioni të ketë patur edhe prapavijë politike./ngjarjet.com/

[RaPSouL]

Qeveria vendos shënimin zyrtar të 100 vjetorit të Kongresit të Manastirit

Qeveria e Maqedonisë ka vendosur që shënimi i 100 vjetorit të Kongresit të Manastirit të organizohet nën patronazhin institucional.

Këshilli organizativ qeveritar i prirë nga zëvendëskryeministri Abdulhaqim Ademi brenda 15 ditëve do të realizojnë projektin rreth manifestimeve që do të jenë pjesë e jubileut të 100 vjetorit të Kongresit të Alfabetit të gjuhës shqipe.

“E një rëndësie të veçantë është se këtë vit është ngritur niveli i organizimit në nivel ministrash dhe akademikësh për shënimin e kësaj date historike”, deklaroi zëdhënësi i Qeverisë, Shefik Duraku.

Në kuadër të manifestimeve për shënimin e kësaj date parashikohet mbajtja e simpoziumeve, akademive shkencore dhe vizita në shtëpinë ku është mbajtur kongresi i Manastirit.

Zëdhënësi Duraku tha se udhëheqësi i Këshillit organizativ shqyrton mundësinë që kjo datë të shënohet në nivel kombëtar meqë këshille të tilla veç më janë formuar në Shqipëri dhe në Kosovë.

“Në takimin e parë që do ta ketë Këshilli organizativ me siguri kjo do të hapet si ide dhe nëse shihet mundësia se mund të realizohet kjo pse të mos bëhet”, theksoi Duraku.

Në Këshillin organizativ prej 9 anëtarësh përveç zëvendëskryeministrit marrin pjesë edhe tre ministra, i Kulturës, ai i Arsimit dhe ministri i Pushtetit lokal si dhe akademikët Ali Aliu, Luan Starova, Mateja Matevski, Gane Todorovski dhe Alajdin Abazi.

Manifestime të këtij lloji për shënimin e kësaj date historike për shqiptarët janë mbajtur në vitin 2003 kur është shënuar 95 vjetori i Kongresit të Manastirit.


(INA)

[RaPSouL]

Komuna e Sarajit vëllazërohet me komunën bullgare të Kremikovcit

Kryetari i komunës së Sarajit, Bekim Fazliu dhe kryetari i komunës së Kremikovcit në Bullgari, Ivailo Panov nënshkruan sot Protokollin e vëllazërimit të dy komunave.

Sipas kryetarit të komunës së Sarajit, Bekim Fazliu, Protokolli përmban bashkëpunim në sfera të ndryshme, në ngritjen e investimeve të përbashkëta, në sferën e kulturës , arsimit dhe zhvillimin ekonomik.

“Poashtu me këtë marrëveshje vëllazërimi në qendër të vëmendjes janë stimulimi dhe zhvillimi i turizmit, bizneseve të vogla dhe të mesme, këmbimin tregtar, vendosjen e marrëdhënieve fqinjësore mes qytetarëve të të dy komunave dhe ruajtjen e vlerave të përbashkëta historike të të dy vendeve”, deklaroi për agjencinë e lajmeve INA, kryetari i komunës së Sarajit.

Kjo është marrëveshja e parë e vëllazërimit të komunës së Sarajit me një komunë të Republikës së Bullgarisë.


(INA)

[RaPSouL]

Ligji për energjetikë i dëmshëm për qytetarët

Pas kundërshtimit të Ligjit për energjetikë nga ana e EVN-së, ka reaguar edhe Presidenti Branko Cërvenkovski, i cili dy herë refuzoi ta dekretojë atë.

Me këto ndryshime vendi rrezikon të ballafaqohet me krizë energjetike, ka thënë Cërvenkovski, duke shtuar se së shpejti këtë do ta ndjejnë edhe qytetarët e Maqedonisë. Shefi i shtetit tha se ndryshimet e fundit ligjore do të shkaktojnë rritje të çmimit të energjisë elektrike.

“Nuk dua të parashikoj punë të këqija , por për fat të keq shumë shpejtë do ta shohim se cili do të jetë çmimi i këtij ligji, çmimi do të jetë rritje radikale e çmimit të energjisë elektrike në Maqedoni, diçka që do të prekë të gjithë qytetarët e Maqedonisë, të gjitha ndërmarrjet dhe do të shkaktojë një zinxhir të ri të inflacionit në Maqedoni”, tha Presidenti Branko Cërvenkovski.

Ditë më parë EVN reagoi ndaj ri-miratimit të ligjit për energjetikë të cilin e vlerësoi si diskriminues dhe me pasoja negative të cilat do të bien në kurriz të qytetarëve. EVN në reagimin e saj tha se Qeveria nuk kishte marrë parasysh vërejtjet e tyre por as ato të ekspertëve, ndërsa përgatitjen e ligjit e cilësuan jo-transparente dhe kundër parimeve të BE-së.

Qeveria i hodhi poshtë këto pretendime të EVN-së dhe akuzoi atë për manipulim të qytetarëve. Kryeministri Gruevski shkoi më tej duke thënë se synimi kryesor i Qeverisë me ndryshimet e Ligjit për energjetikë është pikërisht mbrojtja e qytetarëve nga monopolizimi që EVN është duke zbatuar në tregun energjetik.

“Ne e kryejmë punën tonë, ajo punë ndonjëherë është në kundërshtim me dëshirat e monopoleve, ata janë monopol në Maqedoni dhe kanë dëshirë të kenë profite më të mëdha, në dëm të qytetarëve dhe shtetit dhe jashtë parimeve për punë të Bashkimit Europian”, tha kryeministri Nikolla Gruevski.

Ligji i ri për energjetikë u rivotua të hënën për të tretën herë me radhë, pasi u refuzua për dekretim dy herët e para nga Presidenti Cërvenkovski. Edhe pse Qeveria Gruevski tha se ai është përgatitur me pëlqimin e Bashkimit Europian një gjë e tillë asnjëherë nuk është konfirmuar nga zyrtarët në Bruksel.



Alsat