Lutjet që devotshmëria e Krishtërve ia ka kushtuar njinisë të Hyjit.

[ribaldi]

Lutja për shërim të brendshëm


O Zot Hyji, Ati im, të lutem, hyr në zemrën time
dhe më liro nga ato përvoja jetësore që më kanë ngarkuar.
Ti më njeh më mirë sesa unë vetveten.

Prandaj po Të lutem që të sjellësh dashurinë tënde
në çdo skutë të zemrës sime.
Kudo që në mua të zbulosh fëmijërinë e lënduar,
më prek me butësi, më ngushëllo dhe më liro nga çdo dhembje.
Kalo nëpër jetën time deri në momentin
kur jam ngjizur dhe liro trashëgiminë time trupore dhe shpirtërore,
që ka mundur negativisht të ndikojë në atë çast.

Bekoje fillimin e zhvillimit tim në kraharorin e nënës sime
dhe largo çdo gjë që më ka lënduar deri në këtë kohë.
Kompenzo dallimin në mes të dashurisë që kam marrë
dhe dashurisë që më është nevojitur.

O Atë,, të lutem, mbështjelle fëmijërinë time të hershme
me dritën tënde dhe shëro kujtimet që më kanë penguar.

Nëse pata nevojë për më shumë dashuri amënore,
dërgoje Nënën time Virgjër Marinë që të plotësojë atë që më mungon.

Nëse pata nevojë për më shumë dashuri atërore dhe siguri,
më trego se kam qenë i dëshiruar dhe i dashur prej Teje në mënyrë më të thellë,
më tërhiq kah vetja, që të ndjej mbrojtjen e duarve të Tua të forta.
Përtërije besimin tim dhe forcën time
që të ballafaqohem guximshëm me vështirësitë e kësaj bote,
sepse unë e di se dashuria e Atit tim do të më ngrisë nëse rrëshqas dhe rrëzohem.

Të falem nderit, o Atë, Hyji im!

[ribaldi]

NA RUAJ, O ZOT.

Na ruaj, o Zot, nga çdo shpirtvogëlsi,
që të jemi të mëdhenj në mendime, fjalë dhe vepra.
Na ndihmo që mos t’i kërkojmë gabimet
dhe ta braktisim kërkimin e vetvetes.

Që t’i lëmë anash të gjitha arësyetimet
dhe përvetësimet e së drejtës
dhe të ballafaqohemi me vetveten
sy më sy, pa vetëdhëmbshuri dhe gjykim.
Që kurrë të mos jemi të ashpër në gjykim,
dhe që gjithmonë të jemi fisnikë dhe zemërgjërë.
Që gjithmonë të kemi kohë për të gjitha gjërat
dhe të bëhemi të qetë, seriozë dhe bujarë.
Na mëso që t’i vëmë në jetë
nxitjet tona më të mira
që të ecim drejt përpara dhe të jemi të patrembur.

Na ndihmo që të kuptojmë
se ka pak gjëra në jetë që na dallojnë,
dhe që ka shumë asosh që na lidhin.
O Zot, na ndihmo
që të mos harrojmë
që të jemi të dhëmbshur
dhe të njerëzishëm. Amen

[ribaldi]

LUTJE NË VUAJTJE.

O Zot Ati ynë ,
nevojat e njerëzve ta kanë hapur zemrën ndaj çdonjërit prej nesh.
Ti kujdesesh për çdonjërin prej nesh kur jemi të humbur,
ndjen bashkë me ne në vetminë tonë dhe na ngushëllon në dhimbjen tonë;
të kemi më të afërmin kur jemi më të pafuqishmit.
Ti na do më shumë se që ne e duam vetveten,
fal më shumë se që ne mund t`ia falim vetvetes
dhe na thërret që ta shpallim dashurinë tënde si dimë më së miri.

O Zot, zemra jote është e prekur dhe plot dhembshuri kur ne vuajmë,
kur kemi nevojë për ndihmën tënde
dhe kur lusim njëri për tjetrin.
Po të lus, dëgjoje lutjen time dhe më jep atë që po të lus (këtu në heshtje thuaji njetet/qëllimet e tua).
Nëse ajo që po lus nuk është e mirë për mua
dhe për të tjerët më jep atë që ti mendon se është më së miri,
dhe që të mund të përhapi mbretërinë tënde të dashurisë në botën tonë. Amen

[ribaldi]

Lavdërim dhe Mirënjohje

Të gjitha lavdërimet, O Perëndia im, qofshin mbi Ty
që je burimi i çdo lavdie e madhështie,
madhërie e nderimi, sovraniteti e sundimi,
lartësimi e mirësie, frike e pushteti.
Cilindo që Ti dëshiron e afron pranë Oqeanit
Më të Madh dhe cilitdo që Ti dëshiron
i jep nderin që të njohë Emrin Tënd Më të Lashtë.
Nga të gjithë ata që janë në qiell e mbi tokë,
askush nuk mund t'i qëndrojë veprimit Të Vullnetit Tënd sovran.
Nga përjetësia Ti ke qeverisur gjithë krijimin
dhe do të vazhdosh përgjithmonë
të ushtrosh sundimin Tënd mbi të gjitha gjërat e krijuara.
Nuk ka Perëndi tjetër veç Teje, të Gjithëfuqishmit,
Më të Lavdëruarit, të Gjithëpushtetshmit, Urtiplotit.

Ndriçoji, O Zot, fytyrat e shërbëtorëve të Tu,
që ata të të shohin Ty;
që duke pastruar zemrat e Tyre
të hyjnë në oborrin e favoreve të Tua qiellore,
dhe të njohin Atë që është Manifestimi i Vetes Sate
dhe Agimi i Thelbit Tënd.
Me të vërtetë, Ti je Zoti i të gjitha botëve.
Nuk ka Perëndi tjetër veç Teje,
të Padetyruarit, Gjithënënshtruesit.

[ribaldi]

O Perëndi zemërdhembshur!

O Perëndi zemërdhembshur!
Të falënderoj, sepse Ti më ke hapur sytë
e më ke bërë të ndërgjegjshëm.
Ti më ke dhënë sy që të shikoj
e më ke dhuruar veshë që të dëgjoj,
më ke çuar në udhën e mbretërisë Sate
dhe më ke treguar shtegun Tënd.
Ti më ke rrëfyer rrugën e drejtë
dhe më ke futur në Arkën e Shpëtimit.
O Perëndi!
Më mbaj të patundur
dhe më bëj të qëndrueshëm e të vendosur.
Më mbro nga sprovat e dhunshme
dhe më ruaj e më streho
në fortesën e pamposhtur
të Besëlidhjes e të Testamentit Tënd.
Ti je i Pushtetshmi. Ti je Shikuesi.
Ti je Dëgjuesi.

O Ti Perëndi Zemërdhembshur!
Më dhuro një zemër që, si pasqyrë,
të ndriçohet nga drita e dashurisë Sate
dhe më jep mendime
që mund ta shndërrojnë këtë botë
në një kopësht trëndafilash
përmes zbritjes së hirit qiellor.

Ti je Zemërdhembshuri,
i Mëshirshmi.
Ti je Perëndia i Madh Mirëbërës.

[ribaldi]

Natë

O Perëndia im, Mjeshtri im, Qëllimi i dëshirës sime!
Ky, shërbëtori Yt kërkon të flejë nën strehën e mëshirës Sate
dhe të pushojë nën tendën e mirësisë Sate,
duke u lutur t'i japësh kujdesin Tënd e mbrojtjen Tënde.

Unë të lutem Ty, O Zoti im, për syrin Tënd që nuk fle,
t'i ruash sytë e mi nga soditja e çdo gjëje tjetër veç Teje.
Forcoje, pra, pamjen e tyre,
që të mund të shquajnë shenjat e Tua
dhe të shikojnë Horizontin e Revelacionit Tënd.
Ti je Ai, para revelacionit të gjithëfuqisë së të Cilit
është dridhur thelbi i pushtetit.

Nuk ka Perëndi veç Teje,
Fuqiplotit,
Gjithënënshtruesit,
të Pakushtëzuarit.

[ribaldi]

I BEKUAR


"I bekuar është
trualli, dhe shtëpia,
vendi, dhe qyteti,
zemra, dhe mali,
streha, dhe guva,
lugina, dhe toka,
deti, dhe ishulli,
dhe livadhi,
ku emri i Perëndisë është përmendur,
dhe lëvdata e Tij është lartësuar."

[ribaldi]

Ti je Larguesi i çdo ankthi!


O Zot! Ti je Larguesi i çdo ankthi
e Davaritësi i çdo të keqeje.
Ti je Ai që mërgon çdo brengë
dhe çliron çdo skllav,
Shpëtimtari i çdo shpirti.
O Zot! Jepmë çlirim nëpërmjet mëshirës Sate
dhe më radhit mua midis shërbëtorëve të Tu
që kanë fituar shëlbim.

[ribaldi]

O Zoti ynë! Ne jemi të dobët


O Perëndi! O Perëndi!
Prej mbretërisë së padukshme të njëshmërisë Sate,
na shih të mbledhur në këtë takim shpirtëror,
që besojmë tek Ti,
që kemi besim në shenjat e Tua,
të patundur në Besëlidhjen e në Testamentin Tënd,
të prirur ndaj Teje,
të ndezur me zjarrin e dashurisë Sate
e të sinqertë në Kauzën Tënde.
Ne jemi shërbëtorë të vreshtit Tënd,
përhapës të fesë Sate,
adhurues të devotshëm të fytyrës Sate,
të përunjur ndaj të dashurve të Tu,
të nënshtruar para portës Sate
dhe që të lutemi Ty të na mbështesësh
në shërbimin ndaj të zgjedhurve të Tu,
të na përkrahësh me ushtritë e Tua të padukshme,
të forcosh shpatullat tona në shërbimin Tënd
dhe të na bësh të nënshtruar
e nënshtetas adhurues që komunikojnë me Ty.

O Zoti ynë! Ne jemi të dobët
dhe Ti je i Fuqishmi, i Pushtetshmi.
Ne jemi të pajetë
dhe Ti je Shpirti i madh jetëdhënës.
Ne jemi në nevojë,
dhe Ti je Mbështetësi, i Pushtetshmi.

O Zoti ynë!
Ktheji fytyrat tona ndaj fytyrës Sate të mëshirshme,
na ushqe nga tryeza Jote qiellore
me mirësinë Tënde të begatë,
na ndihmo me ushtritë e engjëjve të Tu më të lartë
dhe na mbështet nëpërmjet shenjtorëve të Mbretërisë Tënde.

Me të vërtetë,
Ti je Fisniku, i Mëshirshmi.
Ti je Zotëruesi i bujarisë së madhe
dhe, me të vërtetë, Ti je Zemërbuti e i Hirshmi.

[ribaldi]

O Ti Zot i Mbretërisë!

O Ti Zot i Mbretërisë!
Edhe pse trupat tanë janë mbledhur këtu së bashku,
zemrat tona të magjepsura janë çuar larg prej dashurisë Sate
dhe ne jemi rrëmbyer prej rrezeve të fytyrës Sate të ndritshme.
Edhe pse të dobët, ne presim revelacionet e pushtetit e të fuqisë Sate.
Edhe pse të varfër, pa pasuri ose mjete,
ne marrim nga thesaret e Mbretërisë Sate.
Edhe pse jemi pika,
ne dalim nga thellësitë e oqeanit Tënd.
Edhe pse jemi thërrmija,
ne vezullojmë nga lavdia e Diellit Tënd të shkëlqyeshëm.

O Ti Dhuruesi Ynë!
Dërgona ndihmën Tënde,
që çdo njeri i ardhur këtu
të bëhet një qiri i ndezur,
një qendër tërheqëse,
një thirrje e mbretërive të Tua qiellore,
gjersa, më në fund,
ta bëjmë këtë botë të poshtme
pasqyrimin e Parajsës Sate.