Lutjet që devotshmëria e Krishtërve ia ka kushtuar njinisë të Hyjit.

[ribaldi]

LUTJE DREJTUAR ATIT.
O Atë, na liro prej të gjitha të këqijave, domethënë nga i ligu,
nga personi fuqia e të cilit është krejt e keqe, nga djalli.
Ti e ke mundur djallin në ata që të kanë dëgjuar dhe të dëgjojnë.
Por tani ai vazhdon ti sundojë besimtarët dhe njerëzimin mbarë, që të mos arrijnë në shëlbim.
Edhe ne e ndjejmë presionin e tij: jemi në një kohë lufte.
Na liro prej tij dhe prej çdo ndikimi të tij në jetën tonë.
Bëj që kurrë të jemi robër të tij.
O Atë, na liro nga i keqi.
O Atë, na liro prej të gjitha të këqijave që na bën djalli.
Na liro prej të keqës të madhe dhe të vërtetë të shpirtrave tanë,
prej mëkatit, drejt të cilit ai na shtyn çdo ditë.
Na liro prej sëmundjeve të trupit dhe të shpirtit,
që ai shkakton apo shfrytëzon që të dyshojmë në dashurinë tënde dhe që ta humbim fenë.
Na liro prej të gjitha gjërave negative që na bëjnë magjistarët, magjistricët, dhe ndjekësit e shejtanit.
O Atë, na liro prej cdo të keqeje.
O Atë, liroji familjet tona prej të gjitha të këqijave që vinë nga i ligu:
prej ndarjeve bashkëshortore, mes prindërve dhe fëmijëve, mes vëllezërve,
prej dëmeve në punë dhe në profesion, prej shthurjeve morale dhe humbjes të fesë.
Liroji shtëpitë tona prej çdo të keqeje, dhe prej çdo gjeje
që mund të na bëjë të mendojmë për praninë e djallit në mesin tone.
O Atë, na liro prej çdo të keqeje.

[ribaldi]

UNË BESOJ NË TY.

Unë besoj në Ty, o Atë,
Hyji Dashuri, që na do me një mirësi pa kufi,
duke pritur prej nesh një përgjigje dashurie të pakufishme.
Unë të falënderoj për Birin tënd Krishtin Jezusin,
Fjalën e amshueshme që u bë njeri,
pra vëllain tonë
që me jetën vdekjen dhe ringjalljen e Tij
na ka shpëtuar dhe na ka bërë njerëz të rinj

Na jep Shpirtin e dashurisë,
që të mund të jetojmë mesazhin tënd,
që të formojë në ne fytyrën e Birit tënd
dhe të na japë fuqinë t’ua shpallim të gjithëve
që vullneti yt është që të gjithë të jemi të shenjtë.

Kisha e shenjte, nusja e Qengjit dhe nëna jonë
le të jetë për ne burimi i gjallë
ku mund të nxjerrim nga sakramentët,
që i kemi nga Apostujt, shërbëtorët e tu,
Hirin që na ndërron në bijtë e tu.

Na ndihmo që të realizojmë në kishën tende
qëllimin e jetës tonë, sipas vullnetit tënd,
që na thërret që të jemi të shenjtë,
kripa e tokës dhe drita për të gjithë.

Fjala jote le të jetë për ne dhe për të gjithë njerëzit
një thirrje e forte që të bashkëpunojmë ne të gjithë
për të realizuar sipas vullnetit tënd, një bashkëjetesë
në të cilën të gjithë duhan njeri-tjetrin, si vëllezërit,
dhe në të cilën familjet, të çliruar nga egoizmi,
të mund ta dëshmojnë me veprat dhe jo vetëm me fjalë,
që dashuria e krishtere
nuk është një utopi, por një mundësi.
Na ndihmoftë Maria, nëna jote dhe nëna jonë;
na ndihmofshin shenjtërit, miqtë tanë, që na kanë
paraprirë në rrugën e dashurisë.
Amen.

[ribaldi]

HYJI IM, UNË TË OFROJ KËTË DITË.

Hyji im, unë të jap këtë ditë
Ti ma ke dhënë mua, unë do ta kthej ty përsëri.
Ti më ke dhënë gjithçka jam dhe kam.
Ma ke dhënë mendjen time, trupin tim,
kohen time, forcën time, shëndetin tim,
miqtë e mi, familjen time, fenë time, gjithçka!
Dhe unë dua të rikthej gjithçka.
Dëshiroj ta rikthej për dashurinë
dashurisë tënde gjithçka jam dhe kam.
Ti me ke dhënë gjithçka për dashurinë.
Dhe unë dëshiroj ti rikthej Ty gjithçka për dashurinë.
Dëshiroj ta përdor gjithçka sipas vullnetit tënd,
si ti dëshiron që unë ta përdor.
Kështu është, Hyji im!
Programi është tashmë gati, pjesërisht:
koha e kushtuar mësimit,
punës, koha e kushtuar pushimit,
gjithçka dëshiroj ta përdor
me urti në përkim me vullnetin tënd.
Dua ta kryej vullnetin tënd në të gjitha këta aktivitete
me çdo njeri që do të takoj në kryerjen e këtyre aktiviteteve sot.
Dua të jem një mjet i paqes tënde, të dashurisë tënde, të drejtësisë tënde,
të besnikërisë tënde, të të vërtetës tënde, të jetës tënde!

[ribaldi]

PROVANIA HYJNORE.

Provania e mëshirshme të Atit,
Asgjë nuk është më shumë e përzemërte dhe e adhurueshme se Ti,
Që me kujdesi amërore i ushqen zogjtë e ajrit
dhe lulet e fushës, të pasurit dhe të skamnoret!

Ti i hap rrugët e Hyjit, dhe i kryen dëshirat dhe planet e Hyjit në botë!
Në ty mbetet besimi ynë, Provani e shenjtë të Zotit,
sepse Ti na do më shumë se sa ne duam vetveten!
Me ndihmën hyjnore, nuk dua më ti hetoj planet e tua,
nuk dua më ti lidh duart e tua;
nuk dua më të shtrembëroj ty me mendimet e mia;
por dua vetëm të braktisem krejtësisht në krahët e tua, i qetë dhe i thjeshtë!

Bëj që të pranoj Ty si Ti je,
me thjeshtësinë e fëmijëve,
me një besim të plot dhe të pakufishëm! Sepse është hyjnor!

PROVANIA!
Ma jep mua shërbëtorit tënd të mjerë, dhe punëtorit tënd,
jepu njerëzve që luten dhe punojnë në heshtje
duke e sakrifikuar jetën e tyre për të mirën e më të varfërve,
jepua dashamirësve tanë të dashur atë bujari e zemrës dhe të dashurisë
që nuk e vlerëson të mirën me kriteret krejt tokësorë:
atë dashuri që është e butë dhe e ëmbël,
që bëhet e gjithë për të gjithë,
që e gjen gëzimin e vet
duke ua bërë çdo të mirë të tjerëve në heshtje dhe me mirësi:
atë dashuri që ndërton dhe bashkon
në Jezusin me thjeshtësi dhe dëlirësi;
këtë dashuri na jep, o Atë!

O Provania Hyjnore dhe e shenjtë!
Frymëzuesja dhe nëna e asaj dashurie
që është shenjë karakteristike e Krishtit
dhe të nxënësve të tij,
ngushëlloji me bujari në tokë dhe në qiell
të gjithë ata që, në emër të Hyjit,
janë etër dhe nëna, vëllezër dhe motra
për ata që janë në vështirësi dhe në pikëllim.

[ribaldi]

O ATË I GJITHËPUSHTETSHËM.

O Atë i gjithëpushtetshëm,
i lutemi mëshirës sate!
na bëj të aftë jo vetëm për të dëgjuar fjalën tënde
por edhe për ta vënë në praktikë.
Shkatërro në ne gjithçka duhet të shkatërrohet,
dhe gjallëron gjithçka duhet të gjallërohet.
Bej, o Atë i shenjtë,
që të besojmë me zemër,
që ta shpallim me gojë,
që ta dëshmojmë me vepra
Besëlidhjen tënde me ne.
Kështu njerëzit,
duke parë veprat tona të mira,
do të të lavdërojnë Ty,
Ati ynë që je në qiell.


Origene (185-253)

[ribaldi]

Puna e pendimit

O Zoti im, po më vjen keq me gjithë zemër
për të gjitha mëkatet që i kam bërë.
Se kam bjerrë parrizin dhe kam merituar ferrin.
Por më fort se të kam fyer Ty, o E mira e pambaruar,
që kaq fort më ke dashur.
Mëshirë, o Zot! Më fal, o Zot!
Po të jap fjalën, me ndihmën tënde,
që mos të fyej më kurrë. Amen.

[ribaldi]

O ZOTI IM.

O Zoti im, të falënderoj që më ke ruajtur sonte.
Po të premtoj se sot, me ndihmën tënde,
nuk do të të fyej me asnjë mëkat.

O Zoti im, gjithçka që do të bëj
e gjithçka që do të vuaj në këtë ditë,
dua ta bëj dhe ta vuaj për dashurinë tënde
e si është dëshira i Zemrës së Jezu Krishtit,
që bëhet fli për ne në Meshën e shenjtë.

O Zot i gjithëpushtetshëm,
që na e dhe fatin ta presim edhe këtë ditë,
na ruaj me pushtetin tënd,
që sot mos të biem në asnjë mëkat,
por të rrjedhin fjalët e të drejtohen
mendimet dhe veprat tona
për të kryer gjithmonë drejtësinë tënde.
Nëpër Krishtin Zotin tonë. Amen.

[ribaldi]

Veprimi i fesë

O Zot Hyj,
unë besoj ngultas dhe i rrëfej të gjitha dhe secilën veças,
që Kisha e shenjtë katolike na mëson të besojmë.
Sepse Ti, o Hyj, i ke shpallur të gjithë këto,
i cili je e vërteta e amshuar dhe urtia,
e cila nuk mund të mashtrojë as të jetë e mashtruar.
Në këtë fe dua të jetoj dhe të vdes. Amen.

[ribaldi]

Veprimi i shpresës

O Zot Hyj,
unë shpresoj që përmes hirit tënd do të fitoj faljen e të gjitha mëkateve
dhe pas kësaj jete lumturinë e amshuar.
Sepse Ti ke premtuar, Ti, i cili je pafundësisht
i fuqishëm, besnik, i mirë dhe i mëshirshëm.
Në këtë shpresë dua të jetoj dhe të vdes. Amen.

[ribaldi]

Veprimi i dashurisë

O Zot Hyj,
të dua mbi gjithçka
dhe të afërmin për shkak Teje.
Sepse Ti je i tejetlartë, i pakufishëm
dhe e mira e përkryer, e denjë për çdo nderim.
Në këtë dashuri dua të jetoj
dhe të vdes. Amen.