Bardhyl Mezini

[ixnpeL]

Gjyqi i rikave

Shkojnë në gjyq, zogjtë e patës.
Dëshmitar, lakuriqi i natës.
- Në burim,- tha,- rikat janë larë,
Në mesditë vetë i kam parë.

Ato sa e dëgjuan,
Të gjitha u revoltuan:
- Dëshmitarin kush e beson?
Ky n’errësirë jetën kalon.

Ia kthen dhelpra në juri:
- Argumentat s’kanë rëndësi.
Gjyqi bëhet sa për t’u parë,
Se vendimi është marrë,
Këtu e pesë ditë më parë.

Mbyllet, pra ,gjyqi formal,
Me vendimin kapital.

[ixnpeL]

Keci ilegal

Mama dhia që s’kish bri,
Shkon me cjapin pullali.

Burri i saj vesh e ka marrë,
Kur dhia ngeli me barrë.

Dhe i thotë:- Është ilegal,
Ndaj në dritë s’duhet të dalë.

- I thotë dhia:- Ç’është kjo fjalë?
Kecin tim quan ilegal?!

Ilegal, o burrëziu,
Jam unë dhe pullaliu.

[ixnpeL]

Kërriçi kureshtar

Pyet kërriçi kureshtar:
- Deputetët gënjeshtarë
Pse i zgjedhim ne atje?
Që të na gënjejnë ne?

- Deputet, more bir,
Bëhesh, po qe egërsirë.
I ke parë në parlament,
Bëjnë si të luajtur nga mentë.
Shajnë pareshtur, ofendojnë,
Njëri - tjetrin zënë qëllojnë.


Ndaj me votë ne i veçojmë,
Midis nesh të mos jetojnë.

[ixnpeL]

Turma

Lepuri sa ka vrojtuar,
Kaprojt duke vrapuar,
Futet shpejt në një ferrë,
Nga frika as frymë nuk merr.

Thotë iriqi kur e pa:
- Pse ke frikë, more vëlla?
Kaprolli, të gjithë e dimë,
Barin ka si ushqim.

Ia kthen lepuri i frikësuar:
- Kaq gjë e kam mësuar.
Ama turma më frikëson,
Se të shkel, të copëton…


Asaj llogjika s’i punon,
Dikush tjetër e drejton.

[ixnpeL]

Mos luaj me zjarrin

Majmuni një ditë mendoi,
Krokodilit t’ia punojë.
Nga dega përmbi lumë,
Hedh iriqin gjëmbashumë.

Krokodili i uritur,
Iriqin ka kollofitur.
Britmat larg u dëgjuan,
Se gjembat fytin ia shpuan.

Hidhet majmuni dhe qesh,
Por as vetë s’e mori vesh.
Kur po hidhej degën uli,
Krokodili dhëmbët ia nguli.

Kështu loja përfundoi,
Si iriqi e pësoi…

[ixnpeL]

Bizoni dhe tigri

Shtrihet bizoni për të pushuar,
I lodhur, se kish udhëtuar.
Shtrirë tigri, kur e pa,
Rast i mirë, tha, ta ha.

Fshehtas gjahut iu afrua,
Por bizoni shpejt u çua,
Siç qe me shpejtësi,
E qëllon atë me bri.

I sakatosur tigri thotë:
- Dhe në gjumë s’të hëngra dot.
Flet bizoni i çliruar,
Nga dueli që kish fituar:

- Sa të kem armiq si ty,
E bëj gjumin me një sy.

[ixnpeL]

Vetvrasja

Derrkucat më nuk duruan.
Te njeriu u ankuan:
- Nga ushqimi, që jep ti,
Më shumë ha derri i zi.

Tha njeriu, kur i dëgjoi:
- Kjo gjë mos t’ju shqetësojë.
Në ushqim kush lakmon,
Veten e tij dëmton.

…Se kasapi proferon,
Derrin, që më shumë peshon.

[ixnpeL]

Dy qetë dhe ujku

Vendos ujku në uri,
Shkon tek qetë përsëri.
Qetë shpejt janë bashkuar,
Ujkun për të përballuar.

Ujku që keq e pa,
I thotë më të fortit ka:
- Shokun ti e ke dembel,
Në krah përse i del?

Pastaj dhe ti do fitosh,
Vetëm arrën s’do punosh.
U bind i forti ka,
Shokun ujkut ia la.

Ende java pa kaluar,
Dhëmbët e ujkut ka provuar.

[ixnpeL]

Maska

Vesh hardhuca një lëkurë,
Që la gjarpëri përmbi gur.
Kafshët që janë friksuar,
Prej rrezikut janë larguar.

Lejleku sa e ka parë,
Atë në sqep e ka marrë
Dhe i thotë: - &Ccedilfarë ke fituar,
Që vetveten ke maskuar?

Thotë hardhuca e penduar:
- Lojën shtrënjt e kam paguar…

[ixnpeL]

Flutura

Bletën takoi një flutur,
I mburrej se ish e bukur.
Bleta me nektar ngarkuar,
I thotë fluturës krahëshkruar:

- Bukurinë kush s’ta mohon,
Por më thuaj:- &Ccedilfarë prodhon?
Prej vezëve që në rrush lëshon,
Dalin krimba me milion.

Nuk pa flutura nga ka shkuar,
Me pasardhësit është turpëruar.