Varfëria ka mbërthyer shqiptarët, duke i çuar ata edhe më thellë në humnerën e mjerimit. Shkak nuk është mungesa e mundësive për të patur nivel jetese normal, por qeverisje e keqe e drejtuar nga Berisha dhe njerëzit e afërt të tij në pushtet, të cilët së bashku, duke shfrytëzuar pushtetin po grabisin gjithçka, po bëjnë korrupsion maksimal dhe po bllokojnë hapësirat për zhvillim ekonomik, ku si krizë evidentohet mungesa e punës dhe e prodhimit kombëtar. Janë 123 mijë familje pa ndihmë ekonomike dhe afro 181 mijë familje të tjera, me pagesë ndihme ekonomike, të tillë: 500 lekë në muaj për çdo individ jetim;1250 lekë në muaj, për familjet me 1 anëtarë; 2400 lekë në muaj, për familjet me 2 anëtarë; 3300 lekë në muaj për familjet me 4 anëtarë; 4300 lekë në muaj për familjet mbi 5 anëtarë. Është absurde të gjykosh faktin, që një familjeje me dy anëtarë, t'i jepen 2400 lekë ndihmë ekonomike në muaj, pra 80 lekë në ditë, më të cilat kjo familje duhet të ushqehet, duke pretenduar se me këtë bilanc ushqimor ditor përballohet jetesa. Me këtë vlerë ditore, rezulton që familja që "mbështetet" nga qeveria. të furnizohet me 30 lekë bukë, 10 lekë domate, 12 lekë djathë, 16 lekë vaj, 5 lekë kripë, 7 lekë sapun! Kjo tabelë “jetese” për familjet pa të ardhura është krijuar gjatë këtyre 17 vjetëve tranzicion, nga të gjithë pushtetet dhe qeverisjet. Pasqyra e varfërisë e shqiptarëve në nevojë është tepër e zymtë, shkatërruese për afro 325 mijë familje shqiptare, të cilat nuk janë objekt rehabilitimi ekonomik minimal prej asnjë programi qeverisës që prej vitit 1992, kur ekonomia kombëtare dhe marrëdhëniet e punës, pësuan ndryshim dhe dolën afro 1 milion e 100 mijë të papunë, të cilët u hodhën në rrugë nga asfiksimi, shkatërrimi dhe mbyllja e ndërmarrjeve e sektorëve të shërbimit publik. Është deklaruar, se do të vendosej minimumi jetik me 18 mijë lekë në muaj dhe se do të trefishohej skema e ndihmës ekonomike, gjë e cila do të mundësohej nga hapja e 220 mijë vendeve të punës, nga rritja 42% e investimeve të huaja dhe 70% e investimeve vendase. E ndërsa flitet për varfërinë, ende në parlament nuk ka nisur një nismë ligjore për të zbutur varfërinë. Në fakt edhe përpara pak ditësh, kryeministri Berisha, deklaroi se viti 2007 ka qenë “viti më i mirë ekonomik në historinë e Shqipërisë”. Por nuk tha, që Shqipëria ka një masivitet varfërie që rëndon ashpërsisht në jetën e mbi 300 mijë familjeve, të cilat figurojnë në nivelin e minimumit jetik zyrtar, të 50 mijë fëmijëve të rrugës, të 780 mijë të papunëve, të 580 mijë pensionistëve, të 49 mijë jetimëve, të 75 mijë invalidëve që jetojnë me pensione dhe pagesa sociale lëmoshë. Qeveria aktuale, ashtu si qeverisjet e mëparshme, ka deklaruar se "Shqipëria ka dalë nga lista e vendeve me varfëri ekstreme dhe se është shtuar 1 dollarë më shumë për frymë në muaj". Mirëpo, realiteti konfirmon të kundërtën dhe kjo duket në bilancin ushqimor që kanë shqiptarët në nevojë. Sërish u fol për rritje pensionesh. Po sa? Vetëm 750 lekë rritje në muja për pensionet e qytetit dhe 310 lekë në muaj rritje për pensioent e fshatit. Kur u tha, se u rritën pensionet, menduam që përfituan të gjithë.
Sa ditë jetohet me një pension pleqërie?
Pensionistët janë me pensione sa gjysma e minimumit jetik. Ata kanë shpenzime jetese e shëndetësore maksimale, të cilat në shumë raste e kalojnë vlerën mujore të pensionit. Dhe më kryesorja është, se 85% e kësaj kategorie pensionistësh dhe 100% e invalidëve, ndodhen jashtë mundësive fizike për të siguruar të ardhura nëpërmjet punësimit. Një fakt: 54% e pensionistëve shqiptarë dhe 67% e invalidëve, për të përballuar braktisjen financiare që po vazhdon t’u bëhet, vazhdojnë të punojnë në tregëti madje dhe në punë të rënda. Për të treguar se si jetojnë pensionistët shqiptarë, nuk do të përmendim statistikat e parfumosura zyrtare, por do të bëjmë vetëm një llogari të thjeshtë: Me pensionin maksimal 10 mijë lekë, (nëse shtrëngon “rripin”), një pensionist mund të jetoj vetëm 11 ditë me ushqim minimal, pa përfshirë shpenzimet e tjera të shërbimeve publike si telefon, mjekësi, transport, energji elektrike, ujë, veshje, higjenë etj. Pa përmendur këtu, kategoritë e tjera të individëve që trajtohen me pensione, si invalidët, jetimët, të cilët janë jashtë çdo standarti financiar për të mbajtur edhe frymën gjallë. Sipas një testimi të bërë, rezulton se, mestarisht 35 % e pensionit e “ha” farmacia për medikamente, ndërsa 8% e “ha” shërbimi urban, pa llogaritur këtu shërbimet e shumta dhe taksat publike që u ka "dhuruar" qeveria shqiptarëve, të cilëve u premtoi lehtësi dhe nivel të lartë jetese.
Paga e Berishës, sa 25 pensione qyteti ose 40 pensione fshati
Kryeministri që drejton "qeverinë në dietë", "qeverinë e mirëqenies" dhe "qeverinë e shërbesave" e ka pagën sa 25 pensione pleqërie qyteti, ose sa 40 pensione pleqërie fshati. Një pension minimal fshati, aktualisht është 6000 lekë, ndërsa një pension qyteti është 10 000 lekë. Dihet se si dhe sa mund të jetohet me këtë masë pensioni, ndaj tingëllon tallëse, kur qeveria thotë, se me “rritjen e fundit të pensioneve, rritet mirëqenia e pensionistëve dhe e shqiptarëve që përfitojnë pensione të ndryshme”. Ndërkohë që shqiptarët po e provojnë konkretisht se si jetohet me pensionet aktuale,ku masa e pensionit që ata marrin është e barabartë me 1/3 e vlerës së “kafes” që kryeministri gëlltit në mëngjes. Me këtë pension që jep qeveria, nuk mund të përballohet as jetesa minimale e 1 jave. Nëse themi, që shqiptarët me pagat zyrtare që marrin, jetojnë me 4 dollarë në ditë, një familje pensionisti rezulton të jetoj me 2 dollarë në ditë. Kjo “mirëqenie e lartë” ofruar prej qeverisë, nuk përligj aspak deklaratën zyrtare për rritje të nivelit të jetesës së njerëzve në nevojë, ku kategoria më e emergjente e varfërisë, krahas të papunëve, jetimëve, invalidëve e asistencialistëve janë edhe pesionistët.
Krahasim
Paga e një ministri është e barabartë me 15 pensione qyteti dhe me 23 pensione fshati
Paga e deputetit është e barabartë me 14 pensione qyteti dhe me 24 pensione fshati
Paga e presidentit është e barabartë me 30 pensione qyteti dhe 50 pensione fshati
Pagesa mujore telefonike e deputetit është 3 pensione qyteti dhe 5 pensione fshati
Ja disa nga arritjet e qeverisë Berisha
* Afro 120 mijë familje janë pa ndihmë ekonomike
* Afro190 mijë familje shqiptare janë të pastreha, nga këto 65 mijë të pranuara zyrtarisht si të pastreha
* Afro 180 mijë familje marrin ndihme ekonomike lëmoshë
* Pagesa mujore për një jetim është 500 lekë në muaj
* Pagesa sociale për një të papunë është 1250 lekë në muaj
* Pagesa sociale për familjet me dy anëtarë është 2400 lekë në muaj,
* Pagesa sociale për familjet me katër anëtarë është 3300 lekë në muaj
* Pagesa sociale për familjet mbi katër anëtarë është 4300 lekë në muaj
* Pensionet minimale 4 herë më të ulët se paga minimale
* Paga minimale, 2 herë më e ulët se minimumi jetik
* Afro 75 mijë invalidë dhe 7 mijë jetimë, jetojnë me 6 mijë lekë në muaj
* Paga minimale përballon vetëm 6 ditë jetesë për një famlje me 4 anëtarë
Shuma që përfitojnë qeveritarët në borde është e barabratë me pensionet e qytetit Poliçan
Përgjigju Duke Cituar
Krijoni Kontakt