Mbikalimi, pas kritikave të Berishës, punë me tre turne
Paralajmërimi i kreut të qeverisë për penalizimin e firmave të ndërtimit që nuk respektojnë afatet e punimeve të përcaktuara në kontratë, duket se po jep rezultatet e para. Kjo vërehet mjaft qartë nëse të bie të kalosh në kthesën e Kamzës, ku po kryhen punimet për ndërtimin e mbikalimit në pikën e takimit të dy arterieve të rëndësishme të trafikut rrugor për në kryeqytet. E njohur si një nga pikat me ngarkesë trafiku të jashtëzakonshëm, kjo pikë ishte shndërruar në makth të vërtetë për drejtuesit e automjeteve, për shkak të bllokimit të rrugës nga zvarritja e punimeve nga firma që ka fituar kontratën.
Një ditë pas kritikave të kreut të qeverisë se do të anullohen kontratat me ato firma që shkelin afatet, këtu duket se gjithçka ka ndryshuar. Firma austriake "Alpin", e cila po punon për ndërtimin e këtij objekti, ka shtuar jo vetëm numrin e punëtorëve, por edhe turnet e punës, duke aplikuar punën me tre turne, për të arritur masën e punimeve të përcaktuara në kontratë. "Punimet po bëhen me tre turne, me kapacitet të plotë, madje edhe të dielave punohet si në ditët e zakonshme", shprehet tekniku i punimeve të kësaj firme, duke u shprehur i sigurt se objekti do të përfundojë brenda afateve të përcaktuara në kontratë. Megjithatë, ai saktëson se afati i parë për përfundimin e punimeve në muajin prill nuk mund të respektohet, për shkak të nisjes së punës me vonesë. "Në pamundësi që të nisnin punimet siç ishte parashikuar, firma u detyrua të kërkonte afate të reja përsa i përket përfundimit të objektit. Gushti i vitit 2008 është vënë si afat për mbarimin e punimeve në këtë segment", vijon më tej ai, duke shtuar se me ritmin e punimeve dhe angazhimin e të gjithë drejtuesve të kompanisë, afati i ri do të respektohet plotësisht. Punëtorët e firmës e vlerësojnë pozitivisht aplikimin e turnit të tretë të punës, për shkak të lehtësirave që krijohen për gërmime në rrugë si pasojë e rënies së qarkullimit të automjeteve. Natën, thekson tekniku i firmës ndërtuese austriake "Alpin", punimet avancojnë shumë, sidomos gërmimet, sepse trafiku bie, makineritë e rënda kanë më shumë lirshmëri që të veprojnë. "Këtu po punohet me një kapacitet të plotë, për të arritur objektivin tonë që t'i mbarojmë brenda afatit punimet në këtë rrugë shumë të rëndësishme për qytetarët", thekson më tej ai. Duke u ndërgjegjësuar për rëndësinë e jashtëzakonshme që ka kjo rrugë për qarkullimin pa probleme të fluksit të madh të mjeteve që hyjnë dhe dalin nga Tirana, veçanërisht lëvizjet për në qytetin e Durrësit, firma ka vënë në lëvizje të gjitha kapacitetet për përfundimin e mbikalimit brenda afateve.
Firma austriake "Alpin" po punon në këtë pikë nevralgjike të sistemit të qarkullimit hyrës dhe dalës në kryeqytetin e vendit, për ndërtimin e një mbikalimi që do të mundësojë lehtësimin e lëvizjes së automjeteve që vijnë nga Durrësi dhe nga Veriu i vendit. Ky projekt, me një vlerë rreth 7 milion euro, financim i qeverisë shqiptare, do t'i japë fund njëherë e mirë problemit të qarkullimit dhe do të evitojë në maksimum mundësinë e aksidenteve mes automjeteve që lëvizin në kahe të kundërta.
Miratimi i Ligjit të urbanistikës, në të cilin do të përcaktohen qartësisht penalizimet për shkeljen e afateve nga firmat ndërtuese që operojnë në ndërtimin e veprave publike, do të mundësojë, për herë të parë, përfundimin e rrugëve dhe veprave të tjera publike të paktën në afatet e përcaktuara, në mos para afateve. Gjithashtu, ligji do të përcaktojë bonuse financiare për ato kompani që përfundojnë punimet para afatit, duke stimuluar në këtë mënyrë ndërtimin e shpejtë të infrastrukturës, e cila përbën një nga pengesat themelore për zhvillimin e vendit. Ky ligj do të sanksionojë edhe punën me tre turne për kompanitë ndërtuese për periudhën 22 mars-22 tetor, në rastet kur aplikimi i turnit të tretë nuk përbën rrezik për jetën e punëtorëve. Miratimi i këtij ligji, për të cilin kanë nisur diskutimet me grupet e interesit, do të përmbushë një nga prioritetet kryesore të qeverisë, ndërtimin e një infrastrukture bashkëkohore dhe moderne të parametrave europiane.
Përgjigju Duke Cituar
Postuar më parë nga Jack Watson
Krijoni Kontakt