Kosova sivjet rrezikohet nga deficiti buxhetor

[bekimmarku]

Kosova sivjet rrezikohet nga deficiti buxhetor

Kosova sivjet rrezikohet nga deficiti buxhetor, apo mungesa e mjeteve financiare, thonë zyrtarët e qeverisë.Por, ekspertë dhe njohës të kësaj sfere, duke iu referuar pasqyrës së përgjithshme të të hyrave dhe shpenzimeve për periudhën nëntëmujore të këtij viti, paralajmërojnë të kundërtën. ...
Postuar: 04:33:37 / 01.11.2010


Buxheti i Kosovës edhe sivjet mund të përballet me suficit apo tepricë të mjeteve të pashpenzuara financiare. Kjo ndodhë për shkak të mosrealizimit të mirë të projekteve, thotë eksperti i ekonomisë, Muhamet Sadiku. Sipas tij, buxheti i Kosovës në vazhdimësi është përballur me suficit, që është bartur nga një vit në tjetrin.

“Kemi suficit të krijuar edhe gjatë këtij viti sepse raporti nëntëmujor tregon se kemi ngecje të konsiderueshme në realizimin e investimeve publike. Sado që pritet që në tremujorin e fundit të kemi pagesa më të mëdha dhe ky problem të zbutet prapë Kosova do të ketë suficit të konsiderueshëm buxhetor”, tha Sadiku.

Edhe Labeat Mustafa, nga Instituti i Financave të Kosovës, paralajmëron se Kosova do të ketë suficit, për shkak të shpërputhjes ndërmjet të hyrave dhe realizimit të shpenzimeve.

Nga ana tjetër, profesori i financave publike në Universitetin e Prishtinës, Artan Nimani, thotë se Kosova këtë vit do të ketë deficit, për shkak të nevojave të mëdha për projekte.

“Në bazë të të gjitha projeksioneve që i shoh dhe nga nevojat që ne i kemi, buxheti i këtij viti do të kalojë në deficit financiar, apo në një shtyrje të pagesave, dhe jo në ndonjë suficit për shkak të mosrealizimit të projekteve”.

Ndërkohë, udhëheqësi i organizatës antikorrupsion “Çohu”, Avni Zogiani, shfaq dyshime për keqpërdorime të mundshme të parasë publike, sidomos pas krizës institucionale në Kosovë:

“Kjo situatë vetëm sa e ka shtuar mundësinë e keqpërdorimeve të mëtutjeshme. Nuk është se ne kemi pasur ndonjë mirëqeverisje të buxhetit të Kosovës para se të shkaktohej një kaos i tillë, por sigurisht se kjo situatë do ta përkeqësojë shumë më shumë manipulimin e parasë publike”.

Ndryshe, zyrtarë të ministrisë së ekonomisë dhe financave, thonë se sivjet të hyrat e përgjithshme buxhetore gjatë pritet të jenë rreth një miliard e 134 milionë euro, ndërkaq shpenzimet e përgjithshme do të jenë një miliard e 312 milionë euro.
Deficiti i planifikuar prej 178 milionë eurosh pritet të financohet nga donacionet dhe pjesërisht nga rezerva buxhetore, që sivjet kap shifrën prej 248 milionë eurosh.

[bekimmarku]

Kjo esht kur ki tulifar njeri qe merret me menazhimin e bugjetit , mund te na kaploj nje kriz me e rend se greqin se qeshtu na me shku perpara shum veshtir e kem ...