Berisha kerkon shkarkimin e Shefit te Shtabit

[Duaje Siveten]

Metropol, 15 Prill, 2008

Berisha kërkon shkarkimin e Hoxhës

15/04/2008 Kryeministri i propozon Topit ndryshimin e shefit të Shtabit të Përgjithshëm

Kërkesa drejtuar Presidentit bazohet në nenin 169, pika 3 e Kushtetutës

Kryeministri Sali Berisha i ka kërkuar Presidentit të Republikës shkarkimin nga detyra të shefit të Shtabit të Përgjithshëm të Forcave të Armatosura, gjeneral lejtnant Luan Hoxhës. Burime qeveritare bënë të ditur se kërkesa për shkarkimin e Hoxhës i është drejtuar Presidentit Topi dy ditë përpara Samitit të Bukureshtit.

Kërkesa

Kryeministri Berisha i ka propozuar Kreut të Shtetit shkarkimin e gjeneral lejtnant Luan Hoxhës nga posti i shefit të Shtabit të Përgjithshëm të FA-së, pas ngjarjes së ndodhur në Gërdec, më 15 mars 2008. Propozimi i Berishës është në përputhje me nenin 169, pika 3 të Kushtetutës, sipas të cilit “Presidenti i Republikës, me propozim të Kryeministrit, emëron dhe shkarkon shefin e Shtabit të Përgjithshëm”.

Burime qeveritare shprehen se kërkesa e Kryeministrit është dërguar pak ditë përpara zhvillimit të Samitit të Bukureshtit, ku Shqipëria mori ftesën për anëtarësim në NATO, dhe pak ditë pasi Presidenti mblodhi Këshillin e Sigurimit Kombëtar ku u analizua ngjarja e ndodhur në Gërdec. Megjithëse zyrtarisht institucioni i Presidencës nuk pranon të bëjë asnjë lloj komenti mbi një propozim të tillë, burime konfirmojnë se ajo po shqyrtohet.

Burimet qeveritare shprehen se kërkesa për shkarkimin e Hoxhës është konceptuar në kuadrin e reformimit të institucioneve të sigurisë, për të cilën Kryeministri Berisha, por edhe drejtues të tjerë të shtetit kanë vënë theksin menjëherë pas tragjedisë së ndodhur në Gërdec.

Kërkesa për shkarkimin e Hoxhës duket se bazohet në moszbatimin e urdhrave për ruajtjen e rajonit të Gërdecit dhe depove të municionit nga Komanda e Forcës së Bashkuar, e cila është një nga pjesët më të rëndësishme të Shtabit të Përgjithshëm.

Kritikat e Topit

Në mbledhjen e Këshillit të Sigurimit Kombëtar të zhvilluar një javë pas tragjedisë së Gërdecit, Presidenti Topi është shprehur kritik ndaj institucioneve të sigurisë dhe Shtabit të Përgjithshëm të FA-së. “Si shpjegohet që askush nuk na kishte vënë në dijeni për këtë gjendje në terren? E kam fjalën për SHIU-n, SHISH-n, Forcat e Armatosura, Policinë e Shtetit, shërbimet e autoritetit fiskal, ato të punës dhe të autoriteteve monitoruese të shëndetit paraprak, prej të cilave nuk ka patur as edhe një rresht të vetëm informacion mbi atë që ndodhte në Gërdec”, do të shprehej Topi në fjalën e mbajtur në këtë mbledhje, duke shtuar se është e pafalshme që askush nuk ka thënë asgjë, mbi një punishte të paligjshme dhe shumë të rrezikshme pranë aeroportit të vetëm ndërkombëtar dhe të autostradës kryesore të vendit.

Kuvendi i rikthehet çështjes së Gërdecit

Kërkohet raportimi i ish-ministrit Mediu

Kuvendi i rikthehet çështjes së Gërdecit, tragjedisë që shkaktoi 26 viktima, ndonëse çështja i ka kaluar për hetim Prokurorisë së Përgjithshme. Deputeti i Partisë Republikane, anëtar i komisionit parlamentar për Sigurinë Kombëtare, Artur Hasanbelliu, i propozoi dje komisionit ku ai bën pjesë të zhvillojnë një seancë dëgjimore për çështjen e Gërdecit me ish-ministrin e Mbrojtjes, Fatmir Mediun. “I propozoj këtij komisioni që të thërrasim për të raportuar lidhur me tragjedinë e ndodhur në Gërdec, ish-ministrin Mediu”, kërkoi Hasanbelliu gjatë mbledhjes së djeshme të komisionit. Mirëpo propozimi i tij u kundërshtua nga deputeti i Partisë Socialiste, nënkryetari i komisionit, Petro Koçi, i cili vlerësoi që për këtë çështje duhet të thirret titullari aktual. “Nuk ka kompetencë ish-titullari të vijë e të raportojë në komision. Mund të vijë kreu aktual i Ministrisë së Mbrojtjes për të na raportuar për këtë çështje”, tha Koçi. Por socialisti u shpreh dakord me kërkesën e deputetit tjetër të Partisë Demokratike, Baki Shehu, për zhvillimin e një seance dëgjimore për këtë çështje me kreun e SHIU-t. Ndërkohë që kryetari i komisionit, deputeti i PD-së Leonard Demi, premtoi, siç u shpreh ai, se “do ta zgjidhë këtë çështje”, por nuk dha asnjë përgjigje konkrete mbi kohën e zhvillimit të këtyre seancave.

Përfaqësuesit e Gërdecit

Problemet të zgjidhen sa më shpejt dhe drejt

Një përfaqësi e banorëve të zonës së Gërdecit njohën dje Presidentin Bamir Topi me problemet dhe pasojat që po përballen nga dita në ditë, pas tragjedisë së ndodhur në këtë fshat më 15 mars. Gjatë një takimi të zhvilluar në Presidencë, banorët e Gërdecit kërkuan nga Kreu i Shtetit një zgjidhje sa më të shpejtë dhe të drejtë të këtyre problemeve. Në takimin me Topin ishin të pranishëm punonjës të fabrikës së çmontimit të Gërdecit dhe familjarë të atyre që u prekën nga shpërthimi tragjik. Kreu i Shtetit, pasi u njoh me problemet e parashtruara nga banorët e Gërdecit, tha se është detyrim institucional dhe njerëzor njëkohësisht për t’u ofruar gjithë mbështetjen e mundshme për normalizimin dhe zgjidhjen sa më të shpejtë dhe transparente të situatës. Topi dha udhëzimet e nevojshme, në mënyrë që të sensibilizohen menjëherë të gjitha strukturat përkatëse dhe të prekurit nga shpërthimi i Gërdecit të marrin sa më shpejt një informacion të sinqertë, korrekt dhe transparent. Si pasojë e shpërthimit të ndodhur në Gërdec rreth një muaj më parë, humbën jetën 26 persona dhe u plagosën rreth 300 të tjerë. Shpërthimi i ndodhur në fabrikën e çmontimit të municioneve u shoqërua me dëme të mëdha materiale.

[Duaje Siveten]

shekulli.com.al Pre, 09 Maj 2008 22:38:00

Shkarkohen nga puna dy gjeneralë të "Gërdecit"

Oketa: Gjeneralet nuk kane zbatuar detyren. Ata mund ta evitonin tragjedine e Gerdecit.


Ministri i Mbrojtjes, Gazmend Oketa ka kerkuar lirimin nga detyra te dy gjeneraleve, te cilet sipas tij nuk kane zbatuar me perpikmeri detyren e tyre duke lejuar te shkaktohej nje tragjedi si ajo e Gerdecit.

Presidenti i Republikës, Bamir Topi pas kerkeses se Oketes ka dekretuar shkarkimin nga detyra dhe nxjerrjen në lirim të Gjeneral Major Shpëtim Spahiu, deri tani me detyrë Komandant i Forcës së Bashkuar dhe të Gjeneral Brigade Zija Bahja, deri tani me detyrë Komandant i Komandës Mbështetëse.

Te dy oficeret e liruar sot, mesohe se jane thirrur disa here ne prokurori per te deshmuar lidhur me ngjarjen e ndodhur ne Gerdec, ku nga shperthimi humben jeten te pakten 25 persona, u demtuan shume te tjere si dhe u shkaterruan mijera shtepi.

Dekreti i shkarkimit u nënshkrua nga Presidenti i Republikës në mbështetje të nenit 93 të Kushtetutës, të nenit 7, pika 8, të ligjit nr. 8671, datë 26.10.2000 “Për pushtetet dhe autoritetet e komandimit e të drejtimit strategjik të Forcave të Armatosura të Republikës së Shqipërisë” i ndryshuar, si dhe të nenit 18, të ligjit nr.9210, datë 23.03.2004 “Për statusin e ushtarakut në Forcat e Armatosura të Republikës së Shqipërisë”, me propozim të Ministrit të Mbrojtjes.

[Duaje Siveten]

Shekulli

Spahiu: Shkarkimin e mora vesh nga mediat

Flet gjenerali i shkarkuar: Nuk është e drejtë kjo për një gjeneral

Ka reaguar dje ndaj vendimit të Presidentit Topi dhe propozimit të ministrit Oketa, një nga gjeneralët e shkarkuar nga detyra.

Shpëtim Spahiu, me gradën Gjeneral Major, i cili ka kryer detyrën e Komandantit të Forcës së Bashkuar, ka bërë me dije dje se është njohur përmes medias lidhur me vendimin e Presidentit Bamir Topi për shkarkimin e tij nga detyra. "E mora vesh nga televizioni për shkarkimin. Nuk është e drejtë kjo për një gjeneral. Duhet të më kishin lajmëruar më parë", tha Spahiu. Si kundërpërgjigje, Ministria e Mbrojtjes thekson se një zyrtar apo një nëpunës i ministrisë njoftohet vetëm pasi ai shkarkohet nga detyra.

Gërdeci nuk ka kursyer as gjeneralët, përpos që ka prishur gjakun e republikanëve. Presidenti Topi ka firmosur dy ditë më parë propozimet e ministrit të Mbrojtjes, duke shkarkuar nga detyra Shpëtim Spahiun dhe Zija Bahjan. Çështja "Gërdeci" ka nisur të ndëshkojë gjeneralët, ku pretendimi i ministrit të ri të Mbrojtjes, Gazmend Oketa, ishte se "ata që nuk ushtruan mirë detyrën, mund të kishin shmangur tragjedinë". Me vendim të Presidentit, dy ushtarakë të lartë kanë mbetur pa spaleta e yje. Presidenti i Republikës, Bamir Topi, njëherazi Komandant i Përgjithshëm i Ushtrisë Shqiptare, ka firmosur propozimet e paraqitura nga ministri i Mbrojtjes, Gazmend Oketa, për lirimin nga detyra të Shpëtim Spahiut, me gradën Gjeneral Major, deri tani me detyrën e Komandantit të Forcës së Bashkuar, dhe Zija Bahjas, me gradën Gjeneral Brigade, me detyrë Komandant i Komandës Mbështetëse në Gërdec. Vetë ministri Oketa ka reaguar, pas dekretit të Presidentit, duke u shprehur se dy ushtarakët e lartë nuk zbatuan detyrat dhe mund të kishin shmangur tragjedinë e 15 marsit. Dy ushtarakët e lartë të Forcave të Armatosura janë thirrur më shumë se një herë në prokurori, ku janë marrë në pyetje për tragjedinë e Gërdecit para disa ditësh.

Në njoftimin e Presidencës theksohet se shkarkimet kanë ardhur pas propozimeve të kreut të Mbrojtjes, por nuk janë dhënë arsyet dhe motivet e shkarkimit. Gjithashtu, burime nga Presidenca i lidhin shkarkimet me tragjedinë e Gërdecit, por nuk përcaktojnë përgjegjësinë e ushtarakëve të lartë të saposhkarkuar. Dy gjeneralët Spahiu dhe Bahja kanë dëshmuar disa herë në organin e akuzës për ngjarjen e 15 marsit në Gërdec të Vorës, kur shpërtheu fabrika e demontimit të armëve. Si pasojë e shpërthimit humbën jetën 26 persona, u plagosën mbi 300 të tjerë, si dhe u shkatërruan qindra banesa e dhjetëra biznese. Deri tani, për tragjedinë e Gërdecit po hetohen në gjendje arresti në burg katër persona, ndër të cilët drejtori i ndërmarrjes MEICO, Ylli Pinari, dhe administratori i firmës "Albademil", Mihal Delijorgji. Ndërsa për ish-ministrin e Mbrojtjes, Prokuroria e Përgjithshme i ka kërkuar Kuvendit heqjen e imunitetit, me qëllim vijimin e hetimeve ndaj tij.

[Duaje Siveten]

Sot, Monday, 12 May 2008

Shkarkimi i gjeneralëve

Nga Orhan ZARSHATI

Pavarësisht nga çfarë u tha për shkarkimin e dy gjeneralëve me dekret të Presidentit, paraqitur nga Kryeministri me “propozimin” e Ministrit të ri të Mbrojtjes, “të urtit” Gazmend Oketa, me motivacionin se mund ta shmangnin tragjedinë, por nuk zbatuan detyrën; sidoqoftë në prapaskenë të aktit të shkarkimit qëndron aktori i madh, i politikës shqiptare, omnipotenti Sali Berisha.

Këtë herë, Presidenti Bamir Topi nuk u tregua burrë, si me mosdekretimin e projektligjit për legalizimet, megjithëse para përfaqësuesve të medias u shpreh përsëri kundër ndryshimeve, apo amendamenteve kushtetuese. Natyrisht Sali Berishës i duhet fasada e mirëkuptimit brenda të ashtuquajturit “koalicion i djathtë”, prandaj më mirë të sakrifikonte dy gjeneralë të pafajshëm dhe një nënkolonel, si ushtarakë të ndarë nga politika, me një fjalë ligjërisht apolitikë, sesa të dënonte menjëherë me burg një ish-ministër, aleat politik i tij.

Sali Berisha i ardhur në politikë, si trashëgimtar i një regjimi totalitar, nuk mund të mos vepronte sipas mendësisë së vjetër, të para viteve 90-të. Me aktin e shkarkimeve, Sali Berisha kreu një veprim të njohur dhe të dalë boje të politikanëve, më mirë sakrifiko të tjerët, që të shpëtosh veten. Ndërsa Presidenti, i cili duket se po e humb davanë me “shkrirjen e lëvizjes Topi” të disa deputetëve pro tij, u detyrua të nënshkruante dekretin e shkarkimit të dy gjeneralëve; përkatësisht gjeneral-major Shpëtim Spahiut, Komandant i Forcës së Bashkuar dhe gjeneral-brigade Zija Bahja, Komandant i Komandës Mbështetëse. Ndërsa nënkolonel Hysni Gjergji, Drejtor i Shërbimit Informativ të Ushtrisë, u shkarkua nga Kryeministri, si nomenklaturë e tij.

Me këto shkarkime, dirigjenti i tyre Sali Berisha na kujton veprimet e tmerrshme makabre të diktatorit Josif Stalin, i cili në vitin 1936 ekzekutoi si komplotistë grupin e mareshalëve dhe gjeneralëve sovjetikë të Tukaçevskit (hero i Luftës Civile të BS). Historiani i shquar i luftës, britaniku Xhon Kigan (John Keegan) në kreun “Barbarossa” të librit të tij “Lufta e Dytë Botërore” (LDB), e përshkruan shumë bukur kasaphanën e Stalinit për pastrimet e famshme në Ushtrinë e Kuqe në prag të LDB, që shpuri në uljen jashtë mase të fuqisë luftarake dhe që u bë shkak për humbjet kolosale të asaj ushtrie në fillimin e mësymjes naziste të vitit 1941 kundër BS. Po kështu, duke kopjuar Stalinin, veproi Enver Hoxha, kur dënoi grupin e gjeneralëve puçistë, në ushtri me në krye Beqir Ballukun, në vitin 1974.

Natyrisht, është mëse e kuptueshme, që në kohën e sotme, kur Shqipëria konsiderohet një shtet demokratik, as që mund të imagjinohen skenarë të tillë makabër, kundër kuadrove kryesore të ushtrisë, mbas tragjedisë së Gërdecit. Aq e vërtetë është kjo, saqë në listën e personave që po hetohen nga Prokuroria e Përgjithshme për ngjarjen tragjike të 15 marsit, nuk figurojnë emrat e dy gjeneralëve të shkarkuar. Përveç synimit për të shtyrë hetimet dhe për t’i dhënë një drejtim e ecuri tjetër ngjarjes, me qëllim që të harrohet, si shumë çështje të tjera; kjo tregon se në kohën e sotme, nuk mund të bësh kurban me jetën, me akuza falco, njerëz të pafajshëm për të mbuluar fajet e dështimet e tua.

Krimi i Gërdecit, ishte krim i qeverisë, prandaj fajtorët duhet të gjenden në gjirin e saj. Ish Ministri i Mbrojtjes, llafollogu Fatmir Mediu, person politik, qeveria e drejtuar nga despoti Sali Berisha, si fajtore kryesore, përsëri organ superior politik gjoja kolegjial, që të dy fajin ia hodhën Shtabit të Përgjithshëm të Ushtrisë, drejtuesve të tij, duke e larë veten nga mëkatet. Fatmir Mediu, në intervistën e Top Story me gazetarin Sokol Balla, e shfajësoi krejtësisht veten; ai ngarkoi në mënyrë të turpshme me faj ushtarakët duke aluduar për një diskordancë ndërmjet Ministrisë së Mbrojtjes, si një institucion i rëndësishëm politik i shtetit dhe Shtabit të Përgjithshëm të Ushtrisë, si një institucion tjetër i rëndësishëm teknik ushtarak i shtetit.

Që në fillim të shekullit të 19-të, mendimtari dhe teoricieni i madh i artit ushtarak, i taktikës dhe strategjisë ushtarake, i mbiquajturi Aristoteli i luftës, gjeneral-majori prusian Karl fon Klauzevic (Karl von Clausewitz, 1780-1831), në traktatin e famshëm të tij “Mbi luftën” (“Vom Kriege”, lexo “Fom Krige”) thekson se detyra e ushtrisë është të jetë në krye të progresit. Kështu në krye të progresit shoqëruar me reformat përkatëse, që duhet të bëjë shteti shqiptar, për tu anëtarësuar në strukturat euroatlantike, konkretisht në NATO, duhet të qëndrojë ushtria shqiptare, çka përputhet edhe me këtë përcaktim të gjeniut të luftës Klauzevic. Po Klauzevicit dhe jo Karl Marksit, as Vladimir Iliç Leninit, i përket përcaktimi i mirënjohur se lufta është vazhdimi i politikës me mjete të tjera.

Këto referenca ndaj thënieve të autorëve të njohur si analistë të shquar historikë për rolin e veçantë të ushtrisë, i bëmë për ta njohur dhe kuptuar më mirë mbështetjen e gjithanshme, që shteti shqiptar duhet t’i sigurojë ushtrisë, me qëllim që ajo të përmbushë sa më mirë rolin që ka marrë sot për përparimin e vendit. Por, kur asaj i vihen shkopinj në rrota për ta penguar në misionin e saj, me afera korruptive për shitje kontrabandë municionesh dhe armatimesh, me pasoja tragjike të pafalshme si ato të Gërdecit; krimi shtetëror e qeveritar me prapavijë politike, bëhen pengesë fatale në rrugën e përparimit të vendit dhe të ushtrisë së tij.

Më kujtohet një bisedë, gjatë ngjarjeve tronditëse të vitit të kobshëm 1977, me një ushtarak në pension, nënkolonel Turabiu, ish partizan i Brigadës së 6-të, kur i thashë se në popull qarkullon thënia, “Ty o Salë të qofshim falë, se na mbushe me gjeneralë”, mu kthye dhe më tha : “Jo, or jo, na mbushi me funeralë”! Politika, rolin tepër negativ të sajin në lidhje me ushtrinë, nuk e ka trajtuar me transparencë, për pasojë kjo pati dëme kolosale për ekonominë e vendit dhe jetesën e qytetarëve të thjeshtë, siç qe rasti i Gërdecit.

Nuk mund të anashkalohet me një fjali mjerane të Gazmend Oketës, se gjeneralët e shkarkuar, mund ta shmangnin tragjedinë, por ata nuk zbatuan detyrën! Kjo është një dëshmi tjetër, e cila tregon fytyrën mëkatare të politikanëve tanë, të cilët i kanë vënë në ankand e tendera interesat e larta të shtetit dhe të popullit shqiptar. Megjithëse ushtria dhe politika duhet të jenë rigorozisht të ndara, tek ne politika e ka në varësi të plotë ushtrinë.

[juanito02]

Sa gjate qe i bie mor mik. Se dihet qe Saliu per Shqiperine asnje dite ska punuar.
Un vetem nje fakt do te sjell. Rruga kukes morine qe po na shet Saliu aq pordhe vec kosovareve qe u untereson a nuk eshte e mbare edhe per serbet.
Bile komunistet e enverit se bene kete rruge vetem per aresye strategjike dhe lane rruget e veriut tone maja malesh qe ne asnje meyre te hynte lirshem ne Tirane Serbia ne rast lufte.
Nuk dua te them qe nuk duhet kjo rruge se cdo rruge qe behet i ka te mirat e veta.
Me aq lek po ta donte Shqiperine saliu kush bere nje rruge ne bregdet nga veriu ne jug e duke i dhene hov turizmit. Po shkoi e beri ate qe eshte kah Serbia.
Ketij njeru i do vene fshesa nga kombi une sa nuk eshte vone.
Ky ka krijuar nje diktarure ekonomike me program themelor varfermin dhe dobesimin e Shqiperise.
Mjere kush nuk e kupton

[Duaje Siveten]

Koha Jone E Premte, 30 Maj 2008

"Eshte biseduar per shkarkimin e Luan Hoxhes"

Presidenti i Republikes, Bamir Topi, nuk ka mohuar kerkesat e bera per shkarkimin e Shefit te Shtabit te Pergjithshem, Luan Hoxha, duke pohuar se "keto biseda jane komunikime qe nuk mund te behen publike".

"Por bashkepunimi midis ekzekutivit dhe institucionit te Presidentit ka nje mirekuptim per reformimin e ushtrise, aty ku u perzien kompetencat e Presidentit dhe Kryeministrit", deklaroi Topi. Ai gjithashtu ka shprehur bindjen e tij per emerimin ne postin e Prokurores se Pergjithshme, Ina Rama, ku midis te tjerash me kontaktet qe ka, ky institucion po ecen me hapat e duhura per zgjidhjen e ceshtjes se Gerdecit.

"Besoj se ceshtja e Gerdecit jane implikuar shume institucione. Qe do te thote, qe aty ka pasur autoritete civile, ushtarake, kane pasur detyrim qe te jene ne funksion edhe te ketij aktiviteti dhe ato qe kane te bejne me detyrimin per informimin, detyrimin per ndjekje ligjore dhe profesionale per nje biznes te caktuar", sqaroi Presidenti i Shqiperise.

Sipas tij, ne mbledhjen e Keshillit te Sigurimit ka pasur nje analize te hollesishme te gjithe ngjarjes dhe eshte bere nje analize ne Ministrine e Mbrojtjes, por nuk eshte bere ne institucionet e tjera, duke theksuar se, mund te kete perceptim qe prokuroria po ecen me hapa te ngadalta, por nga informacionet ajo po ecen me hapa te sigurt.

[Duaje Siveten]

Shekulli 5 Qershor 2008

Shefi I Shtabit të përgjithshëm takim me ambasadarin e Withers

Shefi I Shtabit të Përgjithshëm Luan Hoxha “thirret” në ambasadën e Shteteve të Bashkuara. Gjatë ditës së sotme ambasadari amerikanë pritet të ketë një takim me shefin e shtabit të Përgjitshëm. Lajmi bëhet I ditur nga burime të minitrisë së Mbrojtjestë cilat thonë se takimi me ambasadarin Withers është parashikuar gjatë ditës së sotme. Pas tragjedisë së Gërdecit, ambasadori amerikan ka zhvilluar një sërë takimesh ku gjithmonë ka shprehur shqetësimin e Shteteve të Bashkuara mbi hetimet për zbardhjen e kësaj tragjedie.

Takimi

Megjithëse prej pak ditësh Shefi I Shtabit të Përgjithshëm nuk ka qenë në Shqipëri në zyrën e tij ka mbërritur një ftesë që mban firmën e ambsadarit Amerikan Withers. Bëhet fjalë për një takim që pritet të zhvillohet gjatë ditës së sotmë ku shefi I Shtabit të Përgjithshëm është ftuar të marrë pjesë. Sipas ftesës amerikane gjithaçka është e argumentuar mbi një vizitë që do të zhvillojnë në Shqipëri, Komandanti I Gardës së New Jersey-t Glen Reith. Ashtu si në të gjitha takimet e fundit të ambasadorit amerikan nuk është çudi që pjesë e bisedës të jetë edhe tragjedia e Gërdecit. Kjo jo vetëm për faktin se Shefi I Shtabit të Përgjithshëm është vënë jo pak herë nën akuzë por edhe për shak të deklaratës së kryetares së kuvendit Jozefina Topalli.

Pak ditë më parë Kryetarja e Kuvendit, e cila është edhe drejtuesja e Këshillit, në emër të deputetëve të djathtë, i kërkoi dokumente shtese Kryeprokurores, duke e zvarritur akoma më shumë çështjen e imunitetit të Mediut. Kërkesa e kryetares së kuvendit argumentohej me dokumenta të shtabit të Përgjitshëm që sipas Topallit janë mbajtur të fshehta nga Prokuroria

Takimi I Shefit të Shtabit të përgjithshëm vjen pas deklaratës së ambasadorit amerikan në Tiranë, Xhon Uidhers I cili është shprehurmëse i qartë në qëndrimin e tij rreth hetimit për tragjedinë e Gërdecit.

Takimi I nesërm në ambasadën Amerikanë është ftesa më e rëndësishme që ka patur shefi I Shtabit të Përgjithshëm pastragjedisë së 15 marsit ku humbën jetën 26 persona dhe qindra të tjerë u plagosën. Fill pas kësaj ngjarje, Luan Hoxha nuk është dukur në publik, ndërkohë që Ministria I Mbrojtjes u përfshi në një konflikt të hapur ndërmjet forcave ushtarake dhe atyre civile.

Megjithëse është venë nën akuzë nga ish Ministri Mediuderi më tani dëshmi të vetme të Shefit të Shtabit të Përgjithshëm kanë qenë në Prokurorinë e Përgjithshme. Ndërkohë që hetimi I kësaj tragjedie duket se mbahet “peng” nga kuvendi I Shqipërisë. Kjo është vënë re edhe në mbledhjen e fundit të Këshillit të Rregullores dhe Imuniteteve ku deputetët e djathtë, përmes disa pyetjeve tejet sipërfaqësore, nuk trajtonin thelbin e çështjes, por mënyrën se si organi i akuzës kishte depozituar dosjen ndaj Mediut. Duket se kanë qenë pikërisht këto takime të cilat kanë detyryar ambasadorin amerikan të shprehet I qartë ndaj ecurisë së hetimeve të këtij procesi.Ambasadori amerikan i ka bërë apel Kuvendit, që çështjen e imunitetit të Fatmir Mediut ta trajtojë në mënyrë të menjëhershme. Madje, sipas ambasadorit Uidhers, qeveria amerikane do të shihte e alarmuar çfarëdo përpjekje për t’ia nënshtruar këtë hetim çfarëdo ndikimi të jashtëm.

[Duaje Siveten]

Panorama, 14/06/2008

Berisha shkarkon Hoxhën, Topi s’e firmos

ADI SHKEMBI

Përplasja mes Kryeministrit Berisha dhe Presidentit Bamir Topi është shtrirë edhe te Forcat e Armatosura.

Burime pranë kreut të qeverisë bëjnë të ditur për gazetën, se prej disa javësh Berisha i ka propozuar Presidentit Topi shkarkimin e Shefit të Shtabit të Përgjithshëm të Forcave të Armatosura, Luan Hoxha.

Kërkesa e kreut të qeverisë ka ardhur pas përgjegjësisë që rezultojnë të kenë Forcat e Armatosura në shpërthimin tragjik të Gërdecit më 15 mars, ku mbetën të vdekur 26 persona dhe u plagosën rreth 300 të tjerë. Por po kaq kohë, kërkesa e Kryeministrit Berisha ka në zyrën e Presidentit Topi, i cili, në cilësinë e Komandantit të Përgjithshëm të Forcave të Armatosura, duhet të japë OK për shkarkimin e Luan Hoxhës.

Burimet bëjnë të ditur se kreu i shtetit ende nuk ka vendosur nëse do ta firmosë këtë kërkesë të Kryeministrit, por përplasjet e fundit mes tij dhe Berishës lënë shumë pak mundësi që Luan Hoxha të shkarkohet nga detyra.

Shkarkimet

Shefi i Shtabit të Përgjithshëm, Luan Hoxha, rezulton të ketë firmosur disa nga aktet nënligjore që kanë legjitimuar ngritjen e fabrikës së demontimit në Gërdec dhe pas dorëheqjes së ministrit të Mbrojtjes, Fatmir Mediu, Kryeministri Berisha ka kërkuar shkarkimin e tij. Madje, edhe ish-ministri i Mbrojtjes, Mediu, prezantimet e tij para mediave për fabrikën e Gërdecit, ka bërë përgjegjës Shefin e Shtabit lidhur me këtë çështje. Pak javë më parë kreu i qeverisë shkarkoi nga detyra, me propozim të ministrit të Mbrojtjes, Gazmend Oketa, ish-shefin e Shërbimit Informativ Shtetëror, ndërkohë që Presidenti Topi u përgjigj vetëm pak orë më vonë, duke shkarkuar dy nga gjeneralët e ushtrisë, Komandantin e Forcës së Bashkuar, Gjeneral Major Shpëtim Spahiu dhe Komandantin e Komandës Mbështetëse, Gjeneral Brigade Zija Bahja.

Përplasja

I pyetur në emisionin “Opinion” për marrëdhëniet me Kryeministrin Berisha, Presidenti Topi tha se, “unë besoj që me Kryeministrin, e kam thënë dhe herë tjetër dhe e konfirmoj edhe sonte, kemi pasur marrëdhënie njerëzore mbi bazën e komunikimit institucional. Pra, unë kam qenë që në fillim, ju e dini shumë mirë, kanë qenë raporte ku janë respektuar pozicionet e gjithsecilit dhe në mënyrë shumë të kujdesshme. Sot jemi në pozicione që patjetër në radhë të parë ne duhet t’i japim prioritet marrëdhënieve institucionale, pa harruar raportet njerëzore. Raportet njerëzore janë shumë influente, por janë edhe raportet institucionale me patjetër”.

Por rasti i fundit, kur pesë dekrete të kreut të shtetit janë bllokuar nga maxhoranca, tregon se marrëdhëniet mes tij dhe kryeministrit janë më të ftohta se çdo herë tjetër, që nga 24 korriku i vitit të kaluar, kur votat e maxhorancës e zgjodhën atë president. Kreu i qeverisë ka shprehur para deputetëve demokratë qëndrimin e tij kundër mënyrës se si Presidenti Topi ka proceduar për zgjedhjen e pesë anëtarëve të Gjykatës së Lartë.

Sipas Berishës, nuk ka ndodhur asnjëherë më parë që presidenti të mos konsultohet paraprakisht me partitë politike për emrat që ka çuar për votim në Parlament. “Në vendimin për dekretet e Presidentit, maxhoranca duhet të udhëhiqet nga vendimi i Gjykatës Kushtetuese, që kërkon konsultimin e Presidentit me Kuvendin. Nuk ka ndodhur asnjëherë dhe kjo është hera e parë që Presidenti të mos konsultohet më parë me maxhorancën dhe opozitën lidhur me dekretet”, është shprehur kreu i qeverisë. Berisha ka artikuluar para grupit të PD-së në dy mbledhjet e fundit se, “edhe gjatë kohës që ka qenë zoti Moisiu janë bërë negociata me kryetarët e grupeve parlamentare dhe në raste të veçanta edhe me kryetarët e partive”.

[Duaje Siveten]

Shekulli 16 Qershor

Presidenti dekreton shkarkimin e Gjeneralit Luan Hoxha

Presidenti i republikës, Bamir Topi ka dekretuar sot kërkesën e kryeministrit Sali Berisha për shkarkimin nga detyra të Luan Hoxhës, ish shefit të Shtabit të Përgjithshëm.

Orjeta Zhupa


Presidenti i republikës, Bamir Topi ka dekretuar sot kërkesën e kryeministrit Sali Berisha për shkarkimin nga detyra të Luan Hoxhës, ish shefit të Shtabit të Përgjithshëm.

Berisha ka kërkuar shkarkimin e të ashtuquajturit Gjeneral Lejtnant pasi sipas tij ai është një nga shkaktarët për tragjedinë e ndodhur në Gërdec.

Ndër të parët që u morën në pyetje menjëherë pas shpërthimit të Gërdecit ishte edhe Shefi i Shtabit të Përgjithshëm të Forcave të Armatosura, gjeneral-leitnant Luan Hoxha, i cili ka dëshmuar për rreth 6 orë në prokurori para zv/prokurorit Genc Qano.

Sipas këtyre burimeve, mësohet se përveç deklarimeve në lidhje me ngritjen e punishtes së çmontimit të fishekëve në Gërdec, gjeneral-leitnant Hoxha ka dorëzuar para prokurorisë edhe disa urdhra, shkresa zyrtare, raporte të shërbimit dhe procesverbale të ndryshme të firmosura nga zyrtaarë të ministrisë së Mbrojtjes.

Mësohet se ndër shkresat e dorëzuara në prokurori ndodhet edhe një leje-kalimi i lëshuar për agjentët e FBI-së, të cilët në shtator të 2007 ishin vënë në dijeni nga vetë Shefi i Shtabit gjeneral Hoxha mbi dyshimet që ai kishte për trafikimin e materialeve ushtarake nga aeroporti i Rinasit.

Kështu, pas vënies në dijeni për këto dyshime dy agjentë të FBI-së nga mesi i muajt shtator kanë kërkuar leje-kalimi për në zonën ushtarake të Rinasit për të inspektuar ngarkesat e avionëve që bëheshin me urdhër të ndërmarrjes MEICO dhe kërkesës së kompanisë "Albdemil". Sipas burimeve, mësohet se leje-kalimi është lëshuar me vetë firmën eLuan Hoxhës, pas kërkesës së agjentëve të FBI-së, të cilët ishin informuar mbi dyshimet e ngritura nga strukturat e Shtabit të Përgjithshëm për trafik të materialeve ushtarake.

Shefi i Shtabit të Përgjithshëm, Gjeneral-lejtnant Luan Hoxha, duket se i ka prishur marrëdhëniet me ish-ministrin Fatmir Mediu që prej dhjetorit të vitit 2006. Asokohe, ish-ministri kishte firmosur dy urdhra, njëri pas tjetrit, me anë të së cilëve i ndalonte Hoxhës shtesën e pagës, në rast se ai përfshihej në komisionet e tenderëve të kësaj ministrie.

Nga ana e tij, kreu i Shtabit të Përgjithshëm vendosi të "rebelohej", jo vetëm duke marrë paratë shtesë, por edhe duke mos i kthyer ato në buxhetin e Ministrisë së Mbrojtjes, pas urdhrit të dytë të Mediut.

Ish-ministri i Mbrojtjes i kishte justifikuar këto urdhra me raportin e Kontrollit të Lartë të Shtetit, që i kishte cilësuar paratë shtesë të Hoxhës të jashtëligjshme. Konflikti mes zyrtarëve më të lartë të Ministrisë së Mbrojtjes ka zgjatur për më shumë se një vit, ku vetëm pak ditë pas ngjarjes tragjike të Gërdecit, kreu i Shtabit të Përgjithshëm kishte paditur në gjyq ministrin Fatmir Mediu.

Sipas kërkesë-padisë së depozituar në mars të këtij viti pranë Gjykatës së Shkallës së Parë, mësohet se Luan Hoxha ka vazhduar të marrë shtesën mbi pagën, ndërsa ka paditur në Gjykatë ish-ministrin e Mbrojtjes, duke kërkuar shfuqizimin dhe ndryshimin e aktit administrativ të firmosur nga ai. Në kërkesë-padi, Hoxha i cilësonte këto dy urdhra si të paligjshëm dhe të pambështetur në sistemin e pagave të ushtarakëve në detyrë dhe rregullores së Shtabit të Përgjithshëm.

[Qyfyre]

Me miq i kanë marrë ato poste kështu që mirë ua bëjnë që i shkarkojnë. Nuk më vjen keq për këta "gjeneralë".