Rezultatet e Testit Kombetare ne Kosove

[LtB]

Mt. Sipas rezultateve të testit kombëtar, të publikuara nga MASHT-it Komuna e Deçanit, renditet e para, me kalueshmëri prej 67 për qind.


- Pas publikimeve te rezultateve nga MASHT-i, të testit kombëtar të maturantëve, maturantët e komunës së Deçanit, janë renditur të parët. Këtë e ka bërë të ditur, të mërkurën, Faik Doda, drejtor i DAKRS, në Deçan. Doda, duke u ndier i kënaqur me rezultatin e arritur dhe renditjen që ka kjo komunë në nivel shtetëror, ka treguar për nivelin e arritshmërisë të maturantëve të Deçanit në testin kombëtar. Siç bënë të ditur Doda, nga 445 nxënës që iu kanë nënshtruar testit kombëtar, 298 apo 67 për qind, kanë kaluar me sukses këtë test, ndërsa 147 apo 33për qind, nuk kanë arritur të marrin “vizën” nga ky testim. “Për arritjen e një suksesi të tillë, ka ndikuar puna e palodhshme dhe me përkushtim e personelit mësimor” ka vlerësuar Doda, duke shtuar se edhe puna e stafit drejtues të shkollave, ka bërë që të arrihet një rezultat i tillë. Po ashtu, Doda, ka nënvizuar së një rezultat i tillë është pritur, pasi që kemi pasur fatin të kemi një gjeneratë të tillë të nxënësve. Suksesi i arritur ka një vlerë të jashtëzakonshme, pasi që arrihet në shtetin tashmë të pavarur të Kosovës, ka thënë ai, ndërkohë që duke renditur shkollat më të suksesshme në komunë, në vendin e parë ka radhitur Shkollën Mesme Teknike “Tafil Kasumaj”, e cila sipas rezultateve, ka dalë e para në Kosovë.
Drejtori i kësaj shkolle Zenel Kasumaj, ka treguar për nivelin e arritjes së kalueshmërisë së nxënësve të tij, duke sqaruar se nga 138 nxënës që iu janë nënshtruar testit kombëtar, 81.16 për qind, kanë kaluar këtë test për të thënë se këtë shkallë të kalueshmërisë nuk e ka arritur asnjë shkollë si motër në Kosovë. Edhe Kasumaj, sikur Doda, suksesin e arritur e atribuon te puna me profesionalizëm dhe përkushtim e personelit mësimor. “Nuk është sukses i vetëm ky që kemi arritur, në 2004 në gara ballkanike, jemi renditur në vendin e dytë, por jemi edhe shkolla më e kompletuar në Kosovë, me kabinete pune” ka thënë Kasumaj. Ai ka shtuar se “kemi fituar një traditë, e cila ka një “regjim” pune dhe disipline”.
Doda dhe Kasumaj, këtë sukses e shprehin si stimulim për punën e mëtutjeshëm, me gjenerata tjera. Ndryshe faik Doda, ka nënvizuar nivelin e mirë të arritshmërisë të nxënësve edhe gjatë dy gjysmëvjetorëve të këtij viti shkollor. Në gjysmëvjetorin e parë të këtij viti, suksesi i arritur ishte 50.8 për qind, ndërsa në gjysmëvjetorin e dytë, falë punës dhe përkushtimit është ngritur në 82.8 për qind të kalueshmërisë, nga numri i përgjithshëm i nxënësve në tri shkollat e mesme të kësaj komune.
Kryetari I komunës së Deçanit, Musa Berisha, për rezultatin e arritur në testin kombëtar, ka përgëzuar gjithë personelin arsimor të shkollave të mesme dhe maturantët që arritën shkallë të lartë të suksesit, i cili sipas tij është garancë për rang më të lart të shkollimit.



A. Lushaj (KOHA DITORE)