Regjisori nën diktatin e vëllait të madh
Nga Ali Podrimja
- Nga Notesi
Fajtor për çrregullime dhe gjakderdhje në Iliridë nuk është populli, por partitë e përçara e koçobashët e tyre, të cilët ranë në grackë të regjisorit që me mjeshtri e kishte përgatitur spektaklin. Përmes Alsatit informimet dhe detajet që jepeshin nga ajo se ç’ndodhte, nuk do harrohet pika e gjakut, pasojat e të cilës do të shihen më vonë. Qëllimi nuk ishte të fyheshin vetëm shqiptarët e Iliridës, por i gjithë kombi, t’i tregohet botës se të këtillë janë shqiptarët. Kjo do të ketë jehonë edhe tek shtetet e tjera që nuk e kanë pranuar ende Republikën e Kosovës. Turpi, pra, në Iliridë ishte edhe e keqja jonë. Mesazhi është i kapshëm. Regjisori nuk ishte i vetëm - vepronte në tutelën e vëllait të madh.
Habit posaçërisht organizimi i dobët i partive shqiptare. Nuk e kishin të qartë se forcat blu të armatosura deri në dhëmb paralajmëronin edhe të keqen. Kurdisja ishte e përsosur. Këtë do ta thotë në mbyllje regjisori. Sidoqoftë, nuk mund të liroheshin nga mendësia anadollake dhe mbeten rob të kuazipatriotizmit, u mungonte kapela e shokut Lenin dhe ndonjë citat nga kapot e komunizmit. Nuk ditën t’ia luajnë atij që i mbante frenat përmes pionëve e që përcillte lojën e votës ku rrëshqitën partitë shqiptare.
Si duket, koçobashët më tepër mendonin për punë të pista se për mirëqenien e qytetarëve. Të dhemb kur kujton eksodin biblik(1999), Ilirida kishte treguar atdhedashuri të shkallës së lartë ndaj kosovarëve që nuk mbahej mend. Eksodin e kishin përjetuar si fund të botës. Kisha parë pleq e të rinj tek derdhnin lot me shikim kah Kosova, ku nuk pranin zhurma e armëve e tymnajat. Nuk më kishte shkuar ndërmend se një ditë aty do të derdhet gjaku dhe për votën, pra për të drejtën qytetare, e mu për këtë shkaktar ishin partitë e paorganizuara, si dhe ata që i ndërsyen të shthururit për qëllime që i dinë vetëm koçobashët e bërë pikë e pesë. Kishin harruar se bashkëpunimi mes partive dhe toleranca zbut gjakrat dhe ia kthen besimin popullit. Po ashtu, habit pjesëmarrja e vogël e intelektualëve në parti. Pse ndodhi kjo? Ndoshta e dinë ata që gjenden në krye të tyre. T’i mbash në distancë intelektualët do të thotë se nuk pranon ide as mendime që vejnë shoqërinë në lëvizje, apo ndoshta u kanë frikën se mos u përzihen në punët e tyre “madhore” të çështjes.
Sipas raporteve që vinin nga Ilirida, e që ishin mjaft të zymta, për pak të ndodhte dhe vëllavrasja. Kjo do të ishte fundi i çdo gjëje. Zgjedhjet në Maqedoni mësim i mirë për ata që bëjnë ç’mos të përçajnë jo vetëm partitë, por edhe popullin. Më së paku kjo na duhet neve në kohën kur kërkojmë vend në familjen e madhe europiane. Regjisori në mbyllje deklaroi triumfalisht: te ne zgjedhjet ishin demokratike dhe pa kurrfarë trazirash, kurse ç’mund të bëjmë ne kur shqiptarët e këtij vendi nuk dinë të respektojnë rregullat demokratike. Ishte kjo një shuplakë për atë që ndodhi, e turpshme për partitë dhe fyese për elektoratin shqiptar. E, regjisori dëshiron të jetë edhe kryeministër i tyre.
tema
Përgjigju Duke Cituar
Krijoni Kontakt