Simbolika kasandrine e Stipe Mesiç në parlamentin shqiptar ditën e votimit të ndryshimeve kushtetues
Monday, 21 April 2008-gazeta Sot
Nga Kastriot Myftaraj
Prania e Presidentit të Kroacisë Stipe Mesiç ditën e djeshme në Kuvendin e Shqipërisë, para votimit të ndryshimeve kushtetuese për sistemin zgjedhor dhe për zgjedhjen e Presidentit, duket sikur ishte një paralajmërim prej Kasandre për situatën që mund të krijojnë në Shqipëri këto ndryshime kushtetuese. Me emrin e Stipe Mesiç është e lidhur shpërbërja e federatës jugosllave, gjë për të cilën si katalizator shërbeu një bllokim i funksionimit të Kushtetutës që ndodhi në maj 1991.Në atë kohë, sipas Kushtetutës jugosllave, që parashikonte zgjedhjen me rotacion të kryetarit të presidencës kolektive federale, midis përfaqësuesve të gjashtë republikave dhe të dy krahinave autonome, i takonte përfaqësuesit të Kroacisë, që ishte pikërisht Stipe Mesiç, që të zgjidhej kryetar i presidencës kolektive federale, domethënë President i federatës jugosllave.
Kjo zgjedhje deri atëherë kishte qenë një formalitet i pastër, por këtë herë nuk ndodhi kështu, pasi votuan kundër përfaqësuesit e Serbisë, dy krahinave autonome, përfaqësuesit e të cilave i kishte imponuar Millosheviçi, si dhe përfaqësuesi i Malit të Zi që ishte njeriu i Millosheviçit. Kështu që mekanizmi kushtetues i funksionimit të federatës u bllokua dhe u vu në lëvizje procesi i shpërbërjes së saj. Çdo përpjekje e mëvonshme për ta kthyer procesin mbrapsht, duke imponuar bashkësia ndërkombëtare zgjedhjen e Mesiçit, doli se ishte një gjë pa vlerë dhe procesi i shpërbërjes eci deri në gjakderdhje.
Në Shqipëri, ndryshimet kushtetuese të miratuara dje, më pak se tre orë pas largimit të Mesiç nga parlamenti, mund të sjellin një situatë të ekuivalencës së bllokimit kushtetues të ekzistencës së federatës jugosllave. Ndryshimi i sistemit zgjedhor, në proporcional rajonal, do të çojë në shndërrimin e Shqipërisë praktikisht, në një federatë shumetnike, në nivel politik, edhe pse në letër do të mbetet një shtet unitar. Procesi do të iniciohet kur të jepen vende fikse në parlament për minoritetet etnike, gjë që është paralajmëruar, për shkak se dihet se me sistemin proporcional rajonal PBDNJ mbetet jashtë parlamentit. Kur të caktohet kuotë fikse në parlament për grekët, këtë gjë do ta kërkojnë edhe malazezët dhe maqedonasit, të cilët janë minoritete etnike të njohura. Dhe në rast se do t’ u jepet grekëve nuk mund t’ u mohohet malazezëve dhe maqedonëve. Por, kur t’ u jepet këtyre do të dalin ta kërkojnë edhe romët, egjiptianët, vllehët, boshnjakët, të cilët shteti nuk i ka njohur si minoritete legalisht, ama shoqatat e tyre ekzistojnë legalisht dhe pothuajse të gjithë ata kanë përfaqësues pranë Komitetit Shtetëror të Mbrojtjes së Minoriteteve. Pasi të jetë pranuar se minoritetet etnike duhet të kenë vende fikse në parlament nuk mund të mohohet kërkesa për regjistrim të popullsisë mbi bazë etnike dhe kjo do të thotë që të hapet “Kutia e Pandorës” e spekulimeve nga forca që kërkojnë të shpërbëjnë kombin shqiptar.
Disa njerëz më kanë thënë se, edhe pse sistemi proporcional rajonal e bart rrezikun që them unë, megjithatë kjo gjë nuk do të verifikohet në realitet, pasi procesi do të mbahet nën kontroll, edhe me ndihmën e faktorit ndërkombëtar dashamirës ndaj Shqipërisë. Ashtu qoftë, por dyshoj se do të ndodhë si me firmat piramidale, për të cilat thuhej se i kanë të huajt nën kontroll dhe do të lejojnë deri në atë pikë sa nuk bëhen të rrezikshme për ekonominë shqiptare, por ndodhi krejt ndryshe. Berisha dhe Rama, po marrin një përgjegjësi të madhe duke bërë gjithçka për të imponuar sistemin proporcional rajonal. Kjo gjë mund të rezultojë më e dëmshme se të gjitha veprimet që kanë bërë politikanët shqiptarë gjatë tranzicionit. Nëse për të mbështetur sistemin proporcional rajonal sillet si argument ai se ky model zgjedhor do të sjellë stabilitet politik, duhet ditur se nuk mund të ketë stabilitet politik atje ku krijohet artificialisht një proces destabiliteti etnik.
Ata që llogarisin të sigurojnë me anë të këtij ligji autokraci politike, të kamufluar me pretendimin e stabilitetit politik, duhet ta dinë se nuk mund të ketë autokraci atje ku ka destabilitet etnik, në rastin e Shqipërisë të nxitur artificialisht. Një shembull për këtë është Jugosllavia, precedentin e hidhur të së cilës na e kujton prania e Stipe Mesiç dje në parlamentin shqiptar. Millosheviçi tentoi të bëhet autokrati politik i Jugosllavisë, por nuk e arriti dot këtë gjë për shkak të destabilitetit etnik që shpërbëri Jugosllavinë, duke mbetur Millosheviçi autokrat vetëm në Serbi. Nuk mund të ketë stabilitet politik me një ligj zgjedhor që ndalon fragmentarizmin partiak të parlamentit dhe nxit fragmentarizmin etnik të vendit, e për pasojë edhe të parlamentit, gjë që do të ketë edhe pasoja politike, duke çuar në federalizmin, deri në shpërbërjen e vendit. Koha do të tregojë nëse prania e Stipe Mesiç në parlamentin shqiptar ditën e votimit për ndryshimet kushtetuese ishte një paralajmërim kasandrin, duke konsideruar se Kasandra ishte një fatthënëse që sipas mitologjisë bënte parashikime të kobshme , por të vërteta, që nuk merreshin parasysh nga ata njerëz të cilëve u thuheshin dhe në fatin e të cilëve do të verifikoheshin këto ngjarje.
Përgjigju Duke Cituar
Postuar më parë nga BARAT
)
Krijoni Kontakt