DËSHIRAT E KETRUSHIT
- Përralla e parë e dimrit 2003 -
Historinë e ketrit
që për ju e shkrova
në sirtar të Mjeshtrit
unë e arshivova…
nëse do t’a dini
“mjeshtri” kush është vallë
pak durim të kini
s’do ju sjell vërdallë!
…ishte seç na ishte
një ketrush i mirë
që plot endrra kishte
me emrin DËSHIRË.
Dëshirat e tija
Zgjoheshin pa gdhirë
Unë disa i dija
I mbaj mend shumë mirë!
U mendova gjatë
E thashë do t’i shkruaj?
Dhe në daltë e gjatë,
Është përralla e juaj!
Katër stinët e vitit
Sa herë që të ndrrojnë
Do ti sjellin ketrit
Telashe gjithmonë
Tani është dimër
Përjashta bën ftohtë
Nuk dëgjohet cinxër
Dielli s’ësht’ i ngrohtë
Veç gushkuqat dalin
Iso mbajnë me shokë
Në dëborën e malit
këndojnë kokë më kokë
E kërkojnë ushqimin
Nën borë me durim
Zogjt nisin marrshimin
Drejt Atdheut tim.
buzë Adriatikut
dhe buzë detit Jon
Nis përralla e ketrit
E ketrushit ton’
Pishat e Divjakës
Ku ketrushat rriten
Palmat e Sarandës
Sa shumë i çuditën…
Do pyesin voglushat
Ndoshta nga hutimi:
Pse palmat mee pishat
ngatrroj xhaxhi Gimi?
Hiç mos u nxitoni
Se do jua spjegoj
Dhe do më besoni
Lermëni të vazhdoj!
Ky ketrushi ynë
Aq shumë simpatik
Ia kishte vënë synë
Të bënte piknik.
Ua tha mendimin
Shokëve të pyllit
Dhe në të aguar
Me dëshirë të Yllit*
(Ylli është ketrushja)
(që ketri ëndrronte)
Me shokët e tija
Në Sarandë do shkonte!…
Pra e morrën rrugën
në Pishë Poro shkuan
Llogarasë iu futën
Udhën s’e ngatrruan
Se ishin pesë shokë
Ketra që të pesë.
Dimri ish i ftohtë
Ata besa –besë!
Donin të shikonin
Palmat e Sarandës
Dimrin t’a sfidonin
Dhe frikën e bandës!
Një bandë grabitqare
E përbërë nga dhelprat
Nuk kishin haber
Kush ishin pesë ketrat
Dolën u prenë udhën
Në Qafë të Muzinës
Kishin vënë pengesa
Rrugës së makinës(!)
Dhelprat hileqare
Prisnin me kujdes
Që ketrat udhëtare
Të vinin me Bens.
Mercedes a Xhipa
Me targa jeshile
Si s’u bije pika
Dhelprave debile…
Po ketrat nuk kanë
As veturë as xhip!
Ketrat veçse hanë
Arra e kikirik!
Nata seç na ra
Në qafë të Muzinës.
Banda seç u tha
Në rrugë të makinës.
Pesë ketrat e mira
Erdhën nga bregdeti
U dha ëmbëlsira
Fshati dhe qyteti.
Një koncert i bukur
U bë në Butrint
Këndonte një flutur
Sëbashku me prind.
Tek shkallët e lashta
Edhe unë u ula
Pesë ketrat në palma
Në skenë Inva Mula.
Magji zëri i Invës
Mbrëmjen e Koncertit
Kulmi i dëshirës
Iu plotësua ketrit!
………………….
Nëse vogëlushat
Kanë durim të presin
Do t’i marrin vesht
Dëshirat e ketrit!!!
Kjo që u tregova
Ish dëshirë e parë.
Ju prej të vërteti
Ketri në…përrallë!
Agim Doçi
Përgjigju Duke Cituar
Krijoni Kontakt