Shifra të frikshme: 3 të vetëvrarë në Fier, Berat, Tropojë
Një krim i tmerrshëm ka ndodhur dje në mëngjes në qytetin e Himarës. Një punëtor 24-vjeçar ka masakruar në mes të qytetit, në sy të dhjetëra njerëzve, një burrë 72-vjeçar. Policia e Vlorës njoftoi dje se Pirro Bollano, lindur e banues në Himarë, ka gjetur vdekjen pasi është goditur disa herë me sende të forta në kokë dhe në trup. Si autor i vrasjes është arrestuar një punëtor ndërtimi 24-vjeçar, banor i fshatit Fiershegan të Lushnjës. Zyrtarët e policisë nuk kanë dashur të japin shumë detaje për krimin dje, duke e përmbledhur gjithçka në termat standarde "vrasje për motive të dobëta".
Ngjarja e rëndë ka ndodhur rreth orës 09:00 në sheshin përballë filialit të "Albtelekomit", në skaj të shëtitores kryesore të qytetit të vogël. Dëshmitarë okularë në vendngjarje kanë treguar se 24-vjeçari Bledi Xhaferri ka marrë një gur në dorë dhe ka goditur 72-vjeçarin Pirro Bollano. Fillimisht ai e ka goditur të moshuarin pas koke dhe ky i fundit ka rënë në tokë. Pas kësaj ai ka vijuar të qëllojë të moshuarin edhe dy herë të tjera me gur, duke i çarë kafkën e më pas ka futur gishtërinjtë në kafkën e plakut duke nxjerrë prej andej trutë. Pasi ka mbaruar punë me kokën e 72-vjeçarit, monstra ka nxjerrë nga xhepi një thikë dhe i ka prerë barkun Bollanos, duke hapur organet e brendshme të tij. Pas kësaj ai është gjunjëzuar përpara trupit të pajetë dhe ka nisur të bërtasë me të madhe "Krishti u ngjall!".
Banorët të frikësuar janë futur brenda dyqaneve apo shtëpive, ndërsa një efektiv i policisë bashkiake të Himarës ka mundur t‘i afrohet 24-vjeçarit të gjunjëzuar dhe e ka neutralizuar atë. Mësohet se ka qenë pikërisht shefi i policisë bashkiake personi që e ka neutralizuar mostrën dhe më pas ka lajmëruar punonjësit e policisë së shtetit, të cilët kanë rrethuar menjëherë vendngjarjen, për të mos lejuar qytetarët të shohin trupin e masakruar. Policia nuk ka lejuar as të afërmit e 72-vjeçarit të afroheshin, pasi ai ishte shpërfytyruar.
24-vjeçari Bledi Xhaferri nuk ka bërë asnjë rezistencë. Ai është izoluar fillimisht në ambientet e postës së policisë në Himarë, ndërsa më pas është dërguar në dhomat e paraburgimit pranë Drejtorisë së Policisë së Vlorës.
Banorë të Himarës thanë dje se 24-vjeçari nga Lushnja kishte filluar punë përpara 10 ditësh në një firmë ndërtimi, ku 72-vjeçari Bollano bënte punën e mbikëqyrësit. Bledi Xhaferri njihej si person me probleme mendore, por deri dje nuk kishte shfaqur shenja agresiviteti. Ndërkohë, mësohet se 72-vjeçari Pirro Bollano ka qenë person pa probleme.
Vrasja
Policia: Sokol Kokoshi u qëllua me një plumb në shpatull nga kushëriri i gruas së tij
Berat, ekzekutohet me pistoletë një 35-vjeçar
Një 35-vjeçar ka gjetur vdekjen dje në mëngjes, pasi është qëlluar me armë zjarri në një nga lokalet e qendrës së qytetit të Beratit. Sokol Kokoshi, banor i lagjes "Donika Kastrioti", është qëlluar me armë zjarri ndërsa ka qenë duke pirë kafe me disa të afërm dhe vjehrrin e tij. Burime nga vendi i ngjarjes bëjnë me dije se rreth orës 09:00 nga jashtë lokalit kanë hyrë në lokal Ndriçim Veleshnja, i shoqëruar prej të afërmve të tij dhe ka qëlluar me armë zjarri pistoletë 35-vjeçarin që ishte duke pirë kafe. Një plumb ka përshkuar trupin e 35-vjeçarit Kokoshi, i cili megjithëse është dërguar urgjentisht në spital, nuk ka mundur të mbijetojë. Burime nga spitali i Beratit bëjnë me dije se 35-vjeçari nuk ka mundur të marrë as ndihmën e parë, pasi ka ndërruar jetë gjatë rrugës. Trupi i pajetë është dërguar më pas në morgun e spitalit, ku i është nënshtruar ekspertizës mjekoligjore. Ndërkohë, në vendin e ngjarjes, në lagjen "22 Tetori", shumë pranë qendrës së qytetit, kanë mbërritur ekspertët e policisë, që kanë nisur hetimet rreth ngjarjes. Policia bllokoi menjëherë lokalin ku ndodhi krimi. Në vendngjarje u gjetën katër gëzhoja të qitura nga një pistoletë. Nga dëshmitë në vendin e ngjarjes, policia mësoi se personi që qëlloi ndaj Kokoshit i ishte afruar tavolinës së tij dhe i kishte drejtuar armën duke qëlluar në distancë të afërt. Më pas ai është larguar me shpejtësi me një mjet tjetër. Jashtë lokalit policia ka bllokuar dhe mjetin me të cilin dyshohet të ketë ardhur autori, një "Alfa Romeo" me targa TR8837I, me ngjyrë të zezë. Sipas policisë, ende nuk dihen shkaqet e kësaj vrasjeje, por po hetohet në disa pista. Ekspertët e policisë kanë arritur të bëjnë identifikimin e autorit, i cili dyshohet se është 22-vjeçari Ndriçim Veleshnja, djali i xhaxhait të bashkëshortes së viktimës. Duke u nisur nga kjo lidhje, policia ka ngritur dyshimet se vrasja mund të ketë për shkak një grindje të ndodhur dy ditë më parë midis viktimës dhe vëllait të autorit. Dje në mëngjes, Sokol Kokoshi ishte takuar me vjehrrin e tij pikërisht për të sqaruar këtë zënkë. Sipas burimeve nga komisariati i policisë, autori i kësaj vrasjeje është shpallur në kërkim dhe po punohet për zbulimin e vendndodhjes dhe arrestimin e tij me akuzën e vrasjes.
Vetëvrasjet
Viktimat, dy gra dhe një burrë
Tre të vdekur, njëri shpëton
Tri vetëvrasje kanë ndodhur gjatë paradites së djeshme në Berat, Fier dhe Tropojë, ndërsa në Përrenjas, një burrë që tentoi të digjte veten me benzinë, është shpëtuar në momentin e fundit.
Një 23-vjeçare nga qyteza e Urës Vajgurore në Rrethin e Beratit i ka dhënë fund jetës në mesditën e djeshme, duke u vetëvarur në kasollen e banesës së saj. Migena Vrani, nënë e një fëmije, u gjet e varur rreth orës 14:00 nga të afërmit. Policia nuk i ka ende të qarta shkaqet që e kanë çuar gruan e re drejt këtij akti.
Në Fier një 35-vjeçare nga lagjja "Afrim" e qytetit ka pirë disa kokrra fostoksinë të hënën në mbrëmje. Miranda Maloku është gjetur e shtrirë në anë të rrugës nga kalimtarë të rastit dhe është çuar në spital. Mjekët thanë se gruaja ishte në gjendje tepër të rëndë dhe në orët e para të mëngjesit të djeshëm ka ndërruar jetë në spital. Policia e ka pasur të vështirë të identifikojë gruan, deri sa në orën 04:00 të mëngjesit bashkëshorti i saj ka denoncuar humbjen e gruas. Gruaja kishte pak kohë që kishte ardhur me familjen nga Puka dhe prej disa javësh punonte në një rrobaqepësi. Gjendja e rëndë ekonomike si dhe lodhja në punë mendohet të jetë shkaku që e shtyu drejt vetëvrasjes. Ajo e ka pirë fostoksinën rrugës duke u kthyer nga puna.
Në Dragobi të Tropojës, një 65-vjeçar me emrin Hamdi Ismailaj është vetëvrarë pasditen e së hënës me pistoletë në shtëpinë e tij. Ismailaj kishte pak vite që ishte shpërngulur me banim në Tiranë bashkë me familjen, ndërsa këto ditë ai ishte kthyer i vetëm në shtëpinë e vjetër për pushimet e pranverës, siç u kishte rrëfyer disa fqinjëve para se të vetëvritej. Burime të policisë në Tropojë tregojnë se 65-vjeçari kishte qëlluar veten me një pistoletë model 56, duke e futur në gojë. Mësohet se burri i moshuar ka pasur probleme mendore.
Një tentativë vetëvrasjeje në Përrenjas ka përfunduar, fatmirësisht, pa sukses dje. I penguar nga komuna në biznes dhe i mbytur në kredi, pronari i një rezervati peshku i ka vënë vetes flakën, duke u lyer me benzinë. Ngjarja ka ndodhur rreth orës 08:00 të mëngjesit të djeshëm, kur 52-vjeçari Rakip Laçka tentoi t‘i japë fund jetës, duke u djegur brenda në makinën e tij. Një telefonatë anonime në polici ka çuar në vendngjarje shumë policë, të cilët të ndihmuar edhe nga familjarët e 52-vjeçarit kanë arritur ta nxjerrin atë nga makina dhe t‘i shuajnë flakët, pa arritur që ato të shkaktonin dëmtime të rënda. Laçka kishte marrë rreth 150 milionë lekë borxhe dhe kredi për ngritjen e një rezervati peshku, por së fundmi i ishte ndaluar furnizimi me ujë nga tunelet e Qafë Thanës.
Shqip
Përgjigju Duke Cituar
Postuar më parë nga Apollyon
Krijoni Kontakt