Kryeministri Berisha, politikani i parë shqiptar i ftuar në emisionin prestigjioz të BBC-së, “Hard Talk”
Kryeministri Berisha është politikani i parë shqiptar i ftuar në studion e BBC Ëorld Service, në emisionin “Hard Talk” (Bisedë e vështirë), emisioni më i shikuar dhe prestigjioz i BBC në botë.
Në këtë emision për 25 minuta, Kryeministri Berisha iu përgjigj pyetjes së gazetares së njohur të BBC-së Sara Montague për anëtarësimin e Shqipërisë në NATO, për luftën kundër korrupsionit në Shqipëri, për zhvillimet në rajon, aksidentin e Gërdecit dhe projektin e Shqipërisë për anëtarësimin e plotë në NATO dhe BE.
Sarah Montague: Shqipëria sapo ka marrë ftesën e anëtarësimit në NATO . Kryeministri i Shqipërisë e përshkruan atë si evenimentin më të madh politik të dy dekadave të fundit. Ai thotë se vendi që doli nga epoka e bunkerëve, telave me gjemba dhe kampeve të përqëndrimit, tani është vendi i demokracisë dhe ekonomisë së tregut të lirë. Megjithatë, vendi ka ende probleme me korrupsionin dhe, ende nuk ka mbajtur zgjedhje të gjykuara tërësisht si të lira dhe të ndershme. Kryeministri i Shqipërisë, Z. Sali Berisha është i ftuari im sonte.
Sarah Montague: Zoti Sali Berisha mirë se erdhët në “Hard Talk”!
Kryeministri Berisha: Faleminderit. Jam shumë i kënaqur që jam këtu sot.
Sarah Montague: Pse është i rëndësishëm për Shqipërinë anëtarësimi në NATO ?
Kryeministri Berisha: Mendoj se kjo ka një rëndësi të jashtëzakonshme për Shqipërinë për shumë arsye. Së pari, pas shumë shekujsh kombi im rikthehet në familjen, të cilës i përket. Së dyti NATO ka provuar se është mburoja e lirive në hapësirën e saj. Anëtarësimi në NATO do të thotë të kesh strehën më të mirë për liritë në të gjitha koherat. Imagjinoni një komb si Shqipëria, me të cilën për shekuj historia u soll si njerkë. Historia e kombit tim është historia e mbijetesës, që do të thotë e ardhme. Tani Shqipëria është e lirë, dhe të kesh një mburojë për liritë e saj do të thotë të ndërtosh të ardhmen. Por, NATO do të thotë më shumë për rajonin, sepse ishte NATO ajo që u dha fund konflikteve në Ballkan dhe jam i sigurtë se pa NATO-n, luftrat do të shtriheshin më gjerë se sa rajoni i Ballkanit.
Sarah Montague: Shqipëria e mori ftesën e anëtarësimit në NATO, por Maqedonia nuk arriti. Ju e keni përshkruar këtë si një problem shumë serioz. Ju e dini që tani Maqedonia do të shkojë drejt zgjedhjeve të parakohshme. Çfarë do të thotë kjo për Maqedoninë ?
Kryeministri Berisha: Mendoj se Maqedonia ka ndërmarrë reforma të thella. Ajo kishte një çështje specifike për të zgjidhur: mosmarrëveshjen me Greqinë për çështjen e emrit. Unë besoj se kjo çështje duhet të zgjidhet dhe është një interes jetik për Maqedoninë, që të marrë ftesën dhe të jetë anëtare e NATO-s.
Sarah Montague: Mosmarrëveshja ka të bëjë me çështjen e emrit, por nëse Greqia është e pakënaqur nga kjo dhe, nëse Maqedonia nuk mund të anëtarësohet në NATO çfarë nënkuptoni kur thoni se është një problem serioz?
Kryeministri Berisha: Përfundimisht do të ishte një ishull i paintegruar, i cili nuk do të ishte aspak i dobishëm për sigurinë në rajon. Por, unë jam optimist se do të gjendet një zgjidhje për çështjen e emrit.
Sarah Montague: Çfarë nënkuptoni me një ishull të paintegruar, doni të thoni se ...
Kryeministri Berisha: Nëse Maqedonia nuk do të marrë ftesën e anëtarësimit në NATO, nëse nuk do të zgjidhet çështja e emrit me Greqinë, kjo do t`u jepte radikalëve të të gjitha grupeve etnike mundësi të proklamonin ambicjet e tyre. Kjo është një gjë shumë e rrezikshme për rajonin. Maqedonia është një vend shumë i rëndësishëm për paqen dhe stabilitetin në Ballkanin Jugor.
Sarah Montague: Pra ju po thoni se mungesa e një ftese për Maqedoninë, për anëtarësim në NATO, mund të çojë në një rrezik që grupe të ndryshme në Maqedoni mund të shkojnë drejt provokimit të dhunës?
Kryeministri Berisha: Sigurisht. Unë mendoj se radikalët janë në gjendje të provokojnë trazira. Por, mendoj se rruga për të ecur përpara është vendosja e një dialogu shumë të fortë për gjetjen e një zgjidhje. Të dy palët, Greqia dhe Maqedonia janë afër gjetjes së një zgjidhje. Gjatë drekës që unë pata me Presidentin Bush, ai u zotua se qeveria e tij do të bëjë gjithçka për gjetjen e një zgjidhje.
Sarah Montague: Por, mos është shumë vonë tani për t’u gjetur një zgjidhje për Maqedoninë? Ajo po shkon drejt zgjedhjeve të parakohshme.
Kryeministri Berisha: Mendoj se zgjedhjet e parakohshme mund të vijnë më tepër për shkak të problemeve të brendshme mes partive të koalicionit qeverisës. Ata kanë nënshkruar marrëveshjen e Ohrit, për zbatimin e së cilës partitë politike shqiptare në Maqedoni shprehen se duhet të bëhen disa hapa të mëtejshëm. Së dyti ekziston një presion i madh për shkak të mosmarrjes së ftesës në Samitin e Bukureshtit. Por, zgjedhjet janë një mekanizëm demokratik, pavarësisht se ato mund të vonojnë paksa procesin e reformave. Mendoj se pas tyre, bisedimet mes Greqisë dhe Maqedonisë do të intensifikohen.
Sarah Montague: Tani le të kalojmë në Shqipëri. Anëtarësimi në NATO nuk ka kushtëzuar gjë, por pritshmëria se reformat në Shqipëri do të vazhdojnë, mbetet ende e në fuqi. Një nga çështjet e diskutuara më shpesh të paktën si një nga kushtet për anëtarësimin në BE është se Shqipëria po lufton korrupsionin. Kjo është një nga zotimet tuaja, kur ju u zgjodhët, duke nënvizuar se “prioriteti ynë më madhor është rikthimi i besimit të qytetarëve tek qeveria”.
Kryeministri Berisha: Absolutisht po. Korrupsioni ishte shndërruar në sistem në Shqipëri. Ajo që qeveria ime bëri së pari është se doli jashtë konfliktit të interesit. Askush në administratën shtetërore nuk ka konflikt interesash, në një kohë kur në qeverinë e mëparshme ministrat kishin monopolet e tyre. Së dyti, ne e filluam luftën ndaj korrupsionit nga zyrat tona duke vendosur standarde që parandalojnë përdorimin e fondeve publike për qëllime private dhe personale. Kjo na mundësoi reduktimin e shpenzimeve operative për administratën nga 3 % në 2.1 % të GDP ose një ulje më shumë se 30 %. Së treti, ne reduktuam administratën e ministrive me 25 %, ulëm me 33 % punonjësit administrativë, me 16 % numrin e nëpunësve civilë ndaj dhe kemi qeverinë më të vogël për frymë në Evropë.
Sarah Montague: Po përse Transparency International, e cila harton barometrin global të korrupsionit konkludon se vitin e fundit Shqipëria ishte në listën e 20 vendeve më të korruptuara ?
Kryeministri Berisha: Unë kam patur një takim me përfaqësues të organizatës Transparency International gjatë vizitës së tyre në Shqipëri. Transparency International punon me perceptimin. Unë jam shumë i kënaqur që ata bënë këtë vizitë në Shqipëri. Unë i njoha ata me të gjitha rezultatet dhe me reformat që po ndërmarrim në vazhdim. Ne tashmë jemi një vend që aplikojmë prokurimet elektronike dhe ku kostoja e përgjithshme e prokurimeve është reduktuar me 20 %.
Sarah Montague: Nuk mund të themi se ata merren me perceptimin, pasi ata kanë pyetur njerëz dhe 71 % e tyre kanë dhënë rryshfet për një nga shërbimet në vitet e mëparshme.
Kryeministri Berisha: Është shumë shumë më i vogël. Ky është vetëm perceptim.
Sarah Montague: Nuk është perceptim pasi është Transpartency e cila ka pyetur qytetarët të cilët në përgjigjet e tyre thonë se...
Kryeministri Berisha: Përfaqësuesit e Transparency International gjatë takimit në zyrën time thanë se ishin të impresionuar me rezultatet e luftës ndaj koprrupsionit. Me këtë nuk dua të them se nuk ka korrupsion. Korrupsion ka, por ka nje lufte te forte kunder tij. Cilët janë sektorët ku ky fenomen është më i përhapur? Në tatime, në dogana në ekonominë informale.
Sarah Montague: Ku është e korruptuar Shqiperia?
Kryeministri Berisha: Gjatë tre viteve të fundit ne kemi miratuar në parlament buxhete suplementare të mbledhur nga lufta kundër korrupsionit. Këtë vit pavarësisht uljes drastike të taksave me vendosjen e taksës së sheshtë 10 %, ne kemi arritur të mbledhim 1.2 miliardë dollarë më shumë në buxhet.
Sarah Montague: A është Shqipëria e korruptuar tani?
Kryeministri Berisha: Ka korrupsion, por lufta kundër tij është shumë e suksesshme. Janë më tepër se 50 zyrtarë të niveleve të larta të arrestuar dhe të dënuar për korrupsion.
Sarah Montague: Vetëm 22 % e të anketuarve nga Transparency International thonë se lufta kundër korrupsionit do të njohë përmirësim në tre vitet e ardhshme. Krahasuar me fqinjin tuaj Kosovën ku 52 % e tyre shprehen se lufta kundër korrupsionit do të rritet.
Kryeministri Berisha: Së pari, është media që ka të drejtë të shkaktojë një zhurmë të madhe përsa i përket korrupsionit. Dhe kjo ka ndikimin e saj tek qytetarët, gjë e cila për të qenë realist është e pashmangshme. Por, me reformat e thella që kemi ndërmarrë rezultatet po bëhen gjithnjë e më të dukshme.
Sarah Montague: Ju jeni ndonjëherë kritik ndaj medias ?
Kryeministri Berisha: Unë nuk po kritikoj aspak median.
Sarah Montague: Kjo nuk është media, por janë njerëzit e pyetur që thonë një gjë të tillë.
Kryeministri Berisha: Këto jane sondazhe. Po nëse do të bazoheshim mbi sondazhe unë nuk do të kisha ardhur në pushtet në vitin 2005.
Sarah Montague: Por 71 % e të anketuarve thonë se kanë paguar rryshfet, 71 nga 100 të anketuar thonë se kanë paguar rryshfet për një shërbim në vitet e kaluara.
Kryeministri Berisha: Mund të them se ka rryshfet, por mund të them atë që po bëjmë ne për ta luftuar atë. Së pari, ne po dixhitalizojme proçedurat dhe lehtësojmë shërbimet.
Sarah Montague: Shumë njerëz mund të mendojnë se Ju kishit një fillim të mirë, bëtë ndryshime, por ajo që duket se ka lëkundur besimin e shumë njerëzve është ajo që ndodhi në Gërdec. Ndoshta gjëja më e mirë është t`ju pyes ju. A mund të na thoni se çfarë ndodhi?
Kryeministri Berisha: Aty ndodhi një shpërthim i tmerrshëm. Por, dua të qartësoj se ajo nuk ishte një bazë ushtarake, por një pikë demontimi e municioneve nga një kompani private.
Sarah Montague: E cila ishte vendosur në një depo ushtarake. Duhet të shpjegojmë se shpërthimi zgjati 14 orë ...
Kryeministri Berisha: Njëzet e katër persona vdiqën dhe 300 të tjerë u plagosën nga ky shpërthim, por ajo nuk ishte një bazë ushtarake. Ishte një pikë demontimi i municioneve nga një kompani private për të cilën ka nisur një hetim i plotë. Por ç`ndodhi më vonë? Ne u bëmë dëshmitarë të operacionit më të suksesshëm dhe më energjik të shpëtimit. Ushtria, policia dhe qytetarët tanë shpëtuan shumë jetë në një situatë shumë të rrezikshme. Reagimi ishte i mënjehërshëm, në nivelin e duhur dhe reduktoi në maksimum dëmet e shpërthimit.
Sarah Montague: Por, ajo që ndodhi pas këtij shpërthimi ishte se njerëzit u tmerruan kur panë se atje punonin edhe gra dhe fëmijë…
Kryeministri Berisha: Perfundimisht, ka patur nje papërgjeshmeri njerëzore atje. Kjo është e sigurtë.
Sarah Montague: Ishte qeveria që vendosi vendin për demontimin e municioneve. A ishte ky një gabim?
Kryeministri Berisha: Sigurisht që ishte një gabim i madh. Por, ajo nuk ishte nje bazë ushtarake.
Sara Montague: Më falni, por qeveria vendosi të kishte këtë pikë çmontimi të municioneve në një depo ushtarake gjashtë milje larg Tiranës. A ishte ky një vendim i qeverisë?
Kryeministri Berisha: Ky ishte një vendim i ministrisë.
Sarah Montague: Ishte një vendim i Ministrisë dhe ishte i gabuar?
Kryeministri Berisha: Sipas mendimit tim, ishte një gabim i pastër.
Sarah Montague:A kishit informacion se çfarë po ndodhte atje?
Kryeministri Berisha: Absolutisht jo.
Sarah Montague: Pra ju nuk kishit dijeni?
Kryeministri Berisha: Jo aspak.
Sarah Montague: Përse?
Kryeministri Berisha: Sepse në legjislacionin shqiptar Kryeministri nuk ka asnjë lidhje me dislokimin e ushtrise, asgje. Zinxhiri i komandave eshte ndryshe.
Sarah Montague: Zoti Kryeministër Berisha, kunati juaj ishte mbikqyrës i kësaj pikw dhe...
Kryeministri Berisha: Unë se kam takuar kurrë kunatin tim, por ai nuk ishte mbikqyrës i kësaj pike. Ai ishte një punëtor, i cili ishte kthyer nga emigracioni në Britaninë e Madhe, gjeti një punë atje dhe vdiq atje gjatë shpërthimit.
Sarah Montague: Pra ju nuk kishit dijeni se gra dhe fëmijë punonin në këtë pikë?
Kryeministri Berisha: Absolutisht jo.
Sarah Montague: Pas asaj që ndodhi atje opozita po kërkon dorëheqjen tuaj, sepse ka supozime se qeveria ka qenë në dijeni për këtë pikë? A mund të na garantoni se nuk ka pasur shitje ilegale te municione që duhet të ishin cmontuar?
Kryeministri Berisha: Së pari unë nuk kam asnjë dijeni për këtë. Së dyti ka nisur një hetim shumë intensiv në të gjitha aspektet. Së treti nëse ishte një gabim njerëzor apo cili ishte shkaku i shpërthimit duhet të hetohet. Kjo është gjithçka ajo që mund t`ju them.
Sarah Montague: Po Ministri i Mbrojtjes a ishte në dijeni?
Kryeministri Berisha: Ministri i Mbrojtjes ishte në dijeni sepse ai ka firmosur urdhërin, por ai nuk e dinte se çfarë po ndodhte në të vërtetë atje.
Sarah Montague: Ai dha dorëheqjen?
Kryeministri Berisha: Po, ai dha dorëheqjen dhe ky ishte një vendim politik.
Sarah Montague: Por ka njerëz që kërkojnë edhe dorëheqjen tuaj?
Kryeministri Berisha: Njerëz?
Sarah Montague: Opozita.
Kryeministri Berisha: Opozita kërkon çdo tre muaj që unë të jap dorëheqjen. Kjo është e drejta e saj. Opozita ka të gjitha instrumentet. E kam ftuar atë të paraqesë mocion mosbesimi në parlament.
Sarah Montague: Çfarë garancish mund t`u jepni shqiptarëve se do të kete hetim totalisht te hapur dhe publik për atë që ndodhi atje?
Kryeministri Berisha: Absolutisht. Do të ketë një hetim të plotë dhe të hapur. Skuadra e prokurorëve po asistohet nga 6 grupe ekspertësh AFA-s, të cilët kanë hetuar edhe për sulmet e 11 shtatorit.
Sarah Montague: Ka pasur një investigim të New York Times për kompaninë amerikane AEY, e cila ka furnizuar me armë Afganistanin. Supozimi është se kjo kompani ka nënshkruar kontrata me disa vende ish-komuniste përfshirë edhe Shqipërinë.
Kryeministri Berisha: Po. Kompania amerikane ka pasur end-user-in nga Pentagoni. Kompania amerikane ka kontraktuar nje kompani qipriote. Po bëhet një hetim i plotë në Shtetet e Bashkuara të Amerikës, gjithashtu edhe në Shqipëri. E vërteta për municionet e vjetra është se askush nuk mund ta fshehë moshën e tyre, pasi një gjë e tillë është e pamundur.
Sarah Montague: A do ta përshkruanit veten si një të mbijetuar në politikë?
Kryeministri Berisha: Unë e përshkruaj veten si nje njeri me misione, e fillova dhe po vazhdoj. Unë jam shumë i lumtur që e shoh vendin si anëtar të NATO-s. Unë jam lideri i parë i opozitës në një vend ish-komunist që kam kërkuar anëtarësimin e vendit në NATO.
Sarah Montague: Disa thonë se ju jeni i vetmi politikan i mbijetuar nga periudha komuniste?
Kryeministri Berisha:Unë nuk kam qenë politikan në kohën e regjimit komunist. Kam qenë një studiues shkencor dhe kardiolog shumë i apasionuar.
Sarah Montague: Nuk është e qartë nëse ju keni qenë kardiologu i diktatorit komunist?
Kryeministri Berisha: Nuk kam qenë asnjëherë. Pasi nuk më është kërkuar të jem. Shokët e mi kanë qenë, por unë asnjëherë.
Sarah Montague: Por, A keni qene pjese e rretheve te tija te brendshme?
Kryeministri Berisha: Unë nuk kam qenë pasi nuk plotësoja kushtet e tij. Unë nuk plotësoja kriteret e përcaktuara nga vetë ai.
Sarah Montague: Ju keni qenë një anëtar i Partisë Komuniste, dhe President gjatë kohës së rënies së skemave piramidale?
Kryeministri Berisha: Unë jam angazhuar në themelimin e partisë së parë opozitare, me miqtë e mi në fillim të viteve `90. Përfundimisht ne vazhduam me reformat më të thella dhe të gjithanshme. Pati një zhvillim të skemave piramidale, askush nuk e ngriti zërin në rang kombëtar apo ndërkombëtar. Isha unë ai që vendosa ti shkatërroja ato, kur mora vesh se ishin skema piramidale. Njerëzit dhe opozita pretenduan se Partia Demokratike kishte gisht në këto skema. Unë shpalla zgjedhjet e parakohshme, nuk u largova nga vendi dhe pati një hetim 2-vjeçar dhe në fund qeveria e atëhershme u detyrua të pranonte se qeveria e Partisë Demokratike nuk ishte e përfshirë në skemën e piramidave.
Sarah Montague: Ju thatë se keni qenë për dy mandate president në vitet ‘90? U rikthyer më vonë në vitin 2005 si Kryeministër. Çfarë do të ndodhë në vitin 2009.
Kryeministri Berisha: Në vitin 2009, do të jenë shqiptarët ata që do të vendosin. Vendimi im i palëkundur është t`u mundësoj atyre të shprehin lirshëm qëndrimet e tyre.
Sarah Montague: A do të jetë OSBE e aftë të thotë se zgjedhjet e 2009-ës si të lira dhe të ndershme, për të cilat nuk ka qenë ende në gjendje ta bëjë një gjë të tillë?
Kryeministri Berisha: Sigurisht. Jam shumë optimist se do ta bëjnë një gjë të tillë. Në zgjedhjet lokale ka pasur vetëm probleme teknike, asnjë ndërhyrje politike. Opozita i cilësoi ato si të lira dhe të ndershme, por mangësitë kishin të bënin kryesisht me listën e zgjedhësve. Ne po punojmë për krijimin e regjistrit elektronik të shtetasve, kartave të identitetit dhe pasaportave biometrike.
Sarah Montague: Ju garantoni se do të ketë zgjedhje të lira dhe të ndershme në vitin 2009?
Kryeministri Berisha: Absolutisht po.
Sarah Montague: Dhe ju do të jeni Kryeministër pas kësaj?
Kryeministri Berisha: Këtë do ta vendosin shqiptarët.
Sarah Montague: Si mendoni se do të gjykoheni gjatë viteve në vazhdim?
Kryeministri Berisha: Unë nuk punoj për historinë, por punoj për jetën e përditshme. Kjo është motoja ime. Unë do të bëj çdo gjë për anëtarësimin e plotë të Shqipërisë në BE, i cili është projekti tjetër më i madh për shqiptarët. Ne po implementojmë me seriozitet MSA-në në çdo fushë dhe pas kësaj ne do të jemi vend kandidat. Ne kemi strategjinë, kemi burimet dhe do të vazhdojmë të punojmë në mënyrë të vendosur për këtë.
Sarah Montague: Zoti Berisha ju faleminderit!
Kryeministri Berisha: Ju faleminderit!
Marre nga RD, 10 prill 2008,
Kreu i qeverisë është personaliteti i vetëm nga Shqipëria i ftuar në emisionin politik ndërkombëtar "Hard Talk"
Berisha prezanton arritjet e Shqipërisë në stacionin televiziv prestigjioz BBC
Kryeministri Berisha ishte dje në studion e Qendrës Televizive të BBC-së në Londër, ku mori pjesë në emisionin prestigjioz të këtij kanali, "Hard Talk". Kryeministri Berisha u intervistua nga gazetarja e njohur e BBC, zonja Sarah Montagnean, me ftesë speciale të kanalit BBC për emisionin e mirënjohur televiziv, "Hard Talk", duke qenë kështu personaliteti i vetëm i lartë politik shqiptar, i cili intervistohet në këtë emision politik të kanalit prestigjioz ndërkombëtar me qendër në Londër. Kjo intervistë, prej rreth 25 minutash, e cila do të transmetohet në valët e BBC World dhe BBC News 24, duke filluar nga dita e nesërme për 5 edicione, u përqëndrua në tema të rëndësishme për politikën e jashtme dhe të brendshme të Shqipërisë, në sfidat dhe arritjet e qeverisë shqiptare, si dhe në situatën rajonale dhe në marrjen e ftesës për anëtarësimin në NATO. Kryeministri Berisha theksoi rëndësinë e marrjes nga Shqipëria të ftesës për anëtarësim në NATO, duke u ndalur edhe në rëndësinë parësore që pati ndërhyrja ushtarake e NATO-s në konfliktin ballkanik të fundit të viteve '90-të për paqen dhe stabilitetin në rajon. Gazetarja e njohur e BBC-së, zonja Sarah Montagnean, nisur dhe nga lajmi më i fundit se në Maqedoni pritet të ketë një krizë qeveritare, u fokusua në përpjekjet e Maqedonisë për të marrë ftesën për anëtarësim. Kryeministri Berisha theksoi se është shumë e rëndësishme që Maqedonia, vend shumë i rëndësishëm për paqen dhe stabilitetin në rajon, e cila ka ndërmarrë reforma shumë të thella, të zgjidhë sa më shpejt çështjen e emrit mes saj dhe Greqisë, duke kaluar nëpër një proces dialogu të qartë dhe gjetjen e një zgjidhjeje të afërt. Bashkëbisedimi u ndal dhe në vazhdimin e reformave që Shqipëria ka ndërmarrë dhe që duhet të vazhdojë me vendosmëri, duke veçuar luftën kundër korrupsionit. Kryeministri Berisha theksoi se qeveria shqiptare sheh me përparësi vazhdimin e luftës kundër korrupsionit, dukuri që dikur ishte kthyer në sistem në Shqipëri, dukuri që ende ekziston në vend, por që sot po luftohet me vendosmëri dhe duke arritur rezultate të dukshme dhe të suksesshme. Më pas, gazetarja e BBC-së u ndal edhe në tragjedinë e Gërdecit. Lidhur me këtë, kryeministri Berisha theksoi se ky shpërthim i rëndë i ndodhur në një fabrikë të demontimit të municioneve do të hetohet me një investigim të plotë nga autoritetet kompetente dhe se të gjitha përgjegjësitë do të bëhen të qarta me transparencë dhe vendosmëri. Kryeministri Berisha u shpreh se është në bindjen dhe sigurinë e tij, se qeveria shqiptare do të vazhdojë me reformat për të realizuar projekte të tjera madhore për Shqipërinë, siç është anëtarësimi në Bashkimin Evropian.
Krijoni Kontakt