"Jehonë Anadrinie"

[Agim Metbala]

Hazir LUTA

LULE MES SHKËMBI

Sa i but bëhet guri
Nën puthjen e petaleve tua
Sa diell pikon qielli
Me gjoksit tënd shkëmb
Ata gurë të thepisur
Që vjellin zjarr
Në gjoksin tim
Vij si gjarpër i përdredhur
Vij një maje duke zvarritur
Në kodrat tua
Prej mishi
Prej gjaku

[Agim Metbala]

Besa HOXHA - BEQIRI

DËSHMI

Dëshmia e identitetit
Mbyti klithje e etje
Lumi vërshoi dashurinë

Lojërat e vdekura
Puthin djepin e zbrazët
Ninulat mbesin të varura në ajër

Hapat padukshëm vazhduan ecjen

[Agim Metbala]

Besa HOXHA- BEQIRI

METAMORFOZA

Ishim dy lumenj na gëlltiti një det
U bëmë ushqim i pangopshmërisë

Në fund të lojës
Shndërrohemi në një guacë
Shkelur nga koha

U bëmë guacë me margaritarë

[Agim Metbala]

Xhevdet KRASNIQI

DUKE PRITUR AGIMIN

Pas meje mbetën rrugët e ujosura
Dritat e qytetit
Salla
Publiku
Shoqëria

Gjumin atë natë nuk e doja
Se mbetej nata e vetmuar
Pa mua
Pa mërzinë time
Pa kujtimet e mia të hidhura

Drita ishte larg
Unë prisja
Prisja agimin

Tetor 1993

[Agim Metbala]

Xhevdet KRASNIQI


ETJA

Jam i etshëm për ngrohtësi
Për lumturi
Për një buzëqeshje
Qoftë edhe pas mesnate...

[Agim Metbala]

Xhevdet KRASNIQI


MURET E VETMISË

Guri i kokës sime nuk flet
Do të doja ta merrja nga rruga
Dhe ta godisja me të
Vetminë time të trishtë
Shshshtë...
Diçka po më godet në kraharor
Qenka tehu i vetmisë...