Berisha: Të shkarkohet prokurori i Gërdecit
Zamir Shtylla, një ndër prokurorët që merret me hetimin e tragjedisë së Gërdecit, ku person nën hetim është dhe ish-ministri i Mbrojtjes Fatmir Mediu, rrezikon të heqë dorë nga hetimet nëse ndaj tij regjistrohet procedimi.
TIRANE- Zamir Shtylla, prokurori që kryeson hetimet për tragjedinë e Gërdecit, është vënë në shënjestër të Qeverisë. Kryeministri Sali Berisha, nëpërmjet Ministrisë së Brendshme, ka vendosur të marrë në ndjekje penale pikërisht prokurorin që merret me hetimin e tragjedisë së Gërdecit, Zamir Shtyllën. Njeriu që ka në dorë fatin e ish- ministrit të Mbrojtjes, Fatmir Mediu, që po hetohet për tragjedinë e rëndë të 15 marsit në Gërdec, ku humbën jetën 26 qytetarë të pafajshëm si dhe u gjymtuan dhjetëra të tjerë, nuk duhet të merret më me çështjen.
Nëse regjistrohet ndaj Zamir Shtyllës procedimi penal, atëherë ky duhet të heqë dorë nga të gjitha çështjet që ka aktualisht në shqyrtim, qoftë kjo edhe ajo e Gërdecit.
Ngjarja
Bujar Nishani kërkon procedim penal për Zamir Shtyllën, pasi ky i fundit, sipas ministrit, ka tentuar të marrë në pyetje shtetasin serbo-boshnjak Damir Fazliç. Bashkë me Zamir Shtyllën kërkohet edhe penalizmi i Elio Mazrekut, zv/prokuror në Prokurorinë e Rrethit Tiranë. Arsyeja e vetme sipas ministrit, që duhet të penalizohen prokurorët, është se këta të fundit kanë telefonuar shefin e policisë kufitare dhe i kanë kërkuar informacione për Damir Fazliç, dhe për ta informuar këtë të fundit se prokuroria kërkon ta pyesë.
Por historia ishte shumë e thjeshtë. Oficerët e policisë gjyqësore nuk po kontaktonin dot me shefin e Komisariatit të Rinasit, pasi ky ishte shumë i zënë me shoqërimin e Fazliç, për t’i dhënë këtij të fundit fletëthirrjen e prokurorisë. Në këto kushte, drejtori i hetimeve në Prokurorinë e Përgjithshme, ka kontaktuar në telefon shefin e policisë kufitare. “Çdo gjë është bërë sipas ligjit, edhe kjo telefonatë”, - sqaron zëdhënësja e Ina Ramës.
Deklarata
Zamir Shtylla nuk e ka të vështirë të rrëfejë ngjarjen për “GSH”. “Kisha një shqetësim nga Prokuroria e Tiranës, që Damir Fazliçit nuk po i komunikohej ftesa për paraqitje. Duke qenë në postin e drejtorit të hetimit dhe ndjekjes penale në Prokurorinë e Përgjithshme, është detyrë funksionale e imja që t’u jap ndihmë prokurorive në Tiranë dhe rrethe. Në këto kushte, duke u bazuar dhe në kodin e procedurës penale, telefonova drejtorin e Drejtorisë Rajonale të Kufirit të Qarkut Tiranë, për ta vënë në dijeni se ndaj Fazliç ishte lëshuar një ftesë paraqitje që duhet t’i komunikohej”, - deklaroi Shtylla, duke saktësuar se mbetej më tej në dorën e Fazliç nëse donte të paraqitej ose jo në prokurori. Ky veprim është cilësuar nga Ministria si antikushtetues dhe në kundërshtim me ligjet e vendit. “Ministria e Brendshme ka nisur një hetim të plotë për të vendosur para përgjegjësisë ata që mendojnë se mund të ndalojnë me telefon qytetarët e huaj në këtë vend”, - thuhet në njoftimin zyrtar të këtij dikasteri. Madje Nishani shkon dhe më tej, duke e akuzuar prokurorinë se ka synuar të përdorë policinë për krijimin e një skandali të madh ndërkombëtar me këtë shtetas të huaj, por që në fakt dyshohet për afera korruptive dhe pastrim parash në vendin tonë. Gjithashtu, ai deklaroi se do të kërkojë ndjekje penale për dy prokurorët, Shtylla dhe Mazreku. Por kundërpërgjigja e kryeprokurores Ina Rama ka qenë e menjëhershme dhe e ashpër. Sipas saj, prokuroria është penguar që t’i komunikojë ftesën për paraqitje serbo-boshnjakut, Damir Fazliç, ndaj të cilit një ditë para se të mbërrinte në Tiranë ishte hapur një hetim. Shefja e organit të akuzës ka mohuar kategorikisht që ndaj serbo-boshnjakut të jetë lëshuar një urdhër shoqërimi. Konflikti mes qeverisë dhe Ina Ramës duket se këtë herë është jo vetëm për të mbrojtur Fazliç, i cilësuar si sekseri i Ballkanit, por edhe për të goditur prokurorin që së shpejti do të vendosë për deputetit Republikan Fatmir Mediu. Zamir Shtylla ka hetuar për dosje të rëndësishme dhe ka në dorë, atë që pa frikë mund të konsiderohet si “dosja e shekullit”, atë të tragjedisë së Gërdecit.
(s.g/GazetaShqiptare/BalkanWeb)
Përgjigju Duke Cituar
Postuar më parë nga Brari
Krijoni Kontakt