Tiranë, 300 klinika stomatologjike pa licencë.

[DI_ANA]

Klinika dentare pa licencë e si pasojë konkurrencë e pandershme. Jo pak, por rreth 300 klinika stomatologjike, pas verifikimeve të ministrisë, kanë rezultuar të palicencuara. Të ndodhur përballë kësaj situate, kryetarja e Shoqatës së Stomatologëve, Rozarka Budina thekson se kemi të bëjmë me një konkurrencë të pandershme mes klinikave që punojnë në të zezë. Ndërkohë ajo bëri thirrje që të gjitha klinikat të licencohen pasi tashmë këto procedura janë thjeshtuar së tepërmi. Ndërkohë, burime pranë ministrisë pohojnë se nuk do të ri-licencohen klinikat që punojnë në katet e sipërme të pallateve dhe se po përgatitet harta e shpërndarjes së tyre.


Klinikat


Ministra e Shëndetësisë ka identifikuar rreth 300 klinika stomatologjike të palicencuara në Tiranë. Ky fenomen sipas Shoqatës së Stomatologëve duhet të marrë fund, pasi kemi të bëjmë me një konkurrencë të pandershme mes atyre stomatologëve që janë në rregull me ligjin dhe atyre që nuk i përfillin këto ligje. Kështu, pa dashur të japë shifra të sakta, kryetarja e kësaj shoqate e pranoi këtë problem dhe shton se tashmë procedurat e licencimit janë thjeshtuar por ajo që konkurron është cilësia e shërbimit.


"Ekzakt nuk e di numrin pasi është dikush tjetër që merret me këtë, por flitet që ka edhe klinika të palicencuara por tashmë nuk ka vend që të punojnë në të zezë. Një licencim ka kushte të lehtësuara shumë, pastaj, normal që duhet të japësh vlerat e tua, në mënyrë që të marrësh ri-licencimin",- pohon Budina duke shtuar se arsyetimi për të punuar pa licencë është shumë i vjetruar.

Ministria

Sipas të dhënave nga Sektori i Stomatologjisë në Ministrinë e Shëndetësisë, rreth 300 klinika nuk figurojnë në listën e ri-licencimeve. "Ministra e Shëndetësisë vendosi të mos ri-licencojë klinikat stomatologjike në katet e sipërme të pallateve dhe tashmë është duke ndërtuar hartën e shpërndarjes së tyre",- pohojnë burime të ministrisë, duke shtuar se ndaj këtij sektori do të ketë inspektime dhe rregulla korrekte. Ndërkohë stomatologët që punojnë me licenca të rregullta dhe derdhin taksat, kërkojnë që të merren masa ndaj stomatologëve që punojnë në të zezë, pasi po iu bëjnë konkurrencë të pandershme.


MSH: Mos bllokoni pa arsye linjën falas të Urgjencës


Përdorimi i linjës falas të Urgjencës nga njerëz të papërgjegjshëm, duke rrezikuar jetën e atyre që kanë nevojë, ka nxitur dikasterin e Shëndetësisë t'u bëjë thirrje qytetarëve që të mos e përdorin pa arsye këtë linjë. "Çdo qytetar që ka nevojë për një kujdes të shpejtë mjekësor, që kërkon ndihmë mjekësore ose që dëshiroj t'ju vijnë në ndihmë personave të tjerë në nevojë për kujdes emergjent shëndetësor, mund të telefonojë falas në numrin 127",- pohojnë burime pranë MASH, duke iu bërë thirrje qytetarëve që për shkak të rëndësisë që ka Urgjenca Shëndetësore, të mos bllokojnë linjën dhe thirrjet në numrin 127, pasi probleme të tilla mund të kenë pasoja negative për shëndetin e pacientëve në nevojë emergjente. Sipas tyre, çdo spital dhe Drejtori e Shëndetit Publik, është urdhëruar të publikojë në vende publike numrat e urgjencave të spitaleve rajonale e lokale.


Sipas Ministrisë së Shëndetësisë po hartohen udhëzues të praktikës klinike


Shëndetësi, mjekët, me 5 Udhëzues për të ndihmuar pacientët


Hartimi dhe zbatimi i Udhëzuesve të shkruar të praktikës klinike më të mirë. Bëhet fjalë për tekste të përpiluara në mënyrë periodike, për të ndihmuar mjekët dhe pacientët, në marrjen e vendimeve të sakta në lidhje me shëndetin e tyre në situata të përcaktuara, me synim arritjen e një kujdesi shëndetësor të standardizuar dhe cilësor në vendin tonë. Ky është programi mes Ministrisë së Shëndetësisë, në bashkëpunim me Bankën Botërore (BB) që kanë nisur krijimin e kësaj platforme. Kjo u bë e ditur dje gjatë Konferencës së Parë Kombëtare për Udhëzuesit e Praktikës Klinike të Bazuar në Evidencë. "Në vendin tonë është planifikuar që të fillojë njëherë përgatitja e 5 Udhëzuesve, si: mjekësia familjare, sëmundjet ishemike të zemrës, hipertensioni, diabeti dhe astma.

Pas përfundimit me këto fusha, puna do të vazhdojë hap pas hapi me patologjitë e tjera",- deklaroi drejtori i Politikave Shëndetësore pranë Ministrisë së Shëndetësisë, Edmond Stojku. Sipas tij, ndryshe nga praktikat e deritanishme të hartimit të Udhëzuesve Klinikë që janë kryer përmes spontanitetit të profesionistëve, Ministria e Shëndetësisë po merr për herë të parë përgjegjësitë organizative, koordinative dhe financuese për hartimin e udhëzuesve të tillë në nivel kombëtar. Nga ana tjetër, dikasteri i Shëndetësisë garanton se do të respektojë rigorozisht pacenueshmërinë e pavarësisë profesionale, duke siguruar që përmbajtja teknike, profesionale e rekomandimeve për aspektet konkrete të diagnozës, terapisë dhe riaftësimit, të hartohen nga vetë personeli mjekësor, akademikët dhe specialistët më të mirë.

"Shekulli"

[DI_ANA]

Nxënësit me sëmundje për shkak të mjedisit të tejndotur...

Sipas studimit të ISHP-së në shkolla kushtet higjienike, lagështira, mbipopullimi dhe faktorë të tjera kanë shkaktuar sëmundje




Mjedise me kushte higjienike tepër të rëndë, lagështirë dhe të mbipopulluara me nxënës. Këto shkaktarë dhe shumë të tjerë kanë sjellë ndikim tepër negativ mbi shëndetin e grup moshës 6-15 vjeç në institucionet arsimore. Ky është rezultati i studimit që u realizua gjatë vitit 2007-2008 nga Departamenti "Ekspertiza Shëndetësore dhe Shëndeti Mjedisor", në Institutin e Shëndetit Publik në bashkëpunim me Drejtorinë Rajonale të rrethit Tiranë. Studimi u drejtua nga specialistët Agim Shehi dhe Elida Mata, sipas të cilëve, qëllimi i studimit ka qenë vlerësimi i situatës higjieno-sanitare të mjediseve të brendshme në këto institucione dhe ndikimi i tyre në shëndet.


Mjediset në shkolla


Studimi është realizuar në disa shkolla të Lagjes Nr.10 (Njësia bashkiake Nr.3 dhe Nr.4). Sipas specialistëve, ky studim është bazuar në matjen e treguesve mikroklimaterikë, tregues fizikë dhe mikrobiologjikë, si dhe tregues shëndetësor. Rezultatet e studimit kanë qenë tronditëse, pasi në 88% të klasave niveli i zhurmave është mbi vlerat standarde të OBSH (vlera standard është 35dB). Me tregues tepër negativ, sipas studimit ka rezultuar edhe koeficienti i ndriçimit, sepse në 64% të klasave koeficienti i ndriçimit (tregues i ndriçimit natyral) është nën vlerat standarde të OBSH (vlera standarde është 1/6-1/7). Kjo sipas specialistëve sjell pasoja negative mbi shikimin e nxënësve, pasi ndriçimi i dobët për orë të tëra ndikon drejtpërdrejt mbi shikimin e tyre. Mbipopullimin e klasave me nxënës duket se nuk e dëshmojnë vetëm ankesat e këtyre të fundit dhe stafit pedagogjik, por edhe vetë studimi i ISHP-së, të cilët e rendisin këtë fakt si ndër më problematikët, pasi kjo ndikon edhe negativisht, edhe mbi shëndetin e tyre. "Në 88% të klasave rezulton mbipopullim, ku vlera normë e sipërfaqes së klasës për një nxënës është 1.5m²-2m²", bëhet e ditur në studim, por si të mos mjaftonin këto studimi është tepër pesimist edhe sa i takon lagështirës në klasa, pasi në 67% të klasave vlera e lagështisë relative është mbi vlerat standarde të OBSH (vlera standarde është 40%-60%). Gjithashtu studimi ka treguar rezultate tepër negative edhe sa i takon ndotjes së ajrit në ambientet e brendshme, në 82% të klasave paraqitet kontaminim i lartë mikrobik i ajrit dhe në 66% të klasave kontaminim i lartë mykologjik i ajrit.


Impakti mbi shëndetin


Infeksione respiratore, vështirësi në frymëmarrje dhe alergji të ndryshme. Këto janë disa nga pasojat mbi shëndetin e nxënësve, për shkak të ndotjeve të ndryshme në mjediset e institucioneve arsimore. Sipas studimit të ISHP-së, rreth 26% e nxënësve kanë kaluar infeksione respiratore të rrugëve të sipërme dhe të poshtme, dhe rreth 11 % e nxënësve kanë pasur vështirësi në frymëmarrje, kryesisht gjatë 12 muajve të fundit. Shqetësimet e nxënësve për shkak të mjedisit ku bëjnë mësim janë shfaqur edhe me alergji, pasi rreth 20 për qind e tyre janë prekur nga këto alergji.


Rezultatet e studimit


88% e klasave rezultojnë me nivelin e zhurmave mbi vlerat standarde të OBSH (vlera standard është 35dB).

64% e klasave rezultojnë me koeficientin e ndriçimit (tregues i ndriçimit natyral) nën vlerat standarde të OBSH (vlera standarde është 1/6-1/7).

88% e klasave rezultojnë me mbipopullim, ku vlera normë e sipërfaqes së klasës për një nxënës është 1.5m²-2m².

67% e klasave rezultojnë me vlerën e lagështisë relative mbi vlerat standarde të OBSH (vlera standarde është 40%-60%).

82% e klasave paraqitet kontaminim i lartë mikrobik i ajrit dhe në 66% të klasave kontaminim i lartë mykologjik i ajrit


Pasojat e ndotjes


26% e nxënësve kanë kaluar infeksione respiratore të rrugëve të sipërme dhe të poshtme.

11% e nxënësve kanë pasur vështirësi në frymëmarrje, kryesisht gjatë 12 muajve të fundit

20% e nxënësve ishin alergjik.

"Shekulli"

[DI_ANA]

Spitali Ushtarak, bllokohen operacionet e planifikuara!!

Sipas shefave të SU-së, kanë marrë urdhër nga drejtori që të mos realizohet asnjë operacion i planifikuar


Asnjë operacion i planifikuar nuk është realizuar prej dy ditësh në Spitalin Ushtarak. Kështu, sallat e operacioneve janë bllokuar duke mos iu dhënë mundësinë kirurgëve të bëjnë ndërhyrje kirurgjikale, për të gjitha llojet e operacioneve të planifikuara. Këtë e pohojnë shefat e shërbimeve të Spitalit Ushtarak, sipas të cilëve, vetë drejtori ka urdhëruar të ndërpriten këto operacione, por ata nuk kanë marrë asnjë shpjegim për këtë. Gjithashtu, ata pohojnë se i kanë kërkuar drejtorit që urdhrin t'ua japë me shkrim dhe t'u jepet motivacioni i ndërprerjes së këtyre operacioneve. Ndërsa pacientët që kanë planifikuar operacionet janë detyruar të kthehen mbrapsht, me shpresën se do t'u jepet mundësia shpejt për të realizuar ndërhyrjet kirurgjikale.

Operacionet

Ndonëse sallat e operacioneve në Spitalin Ushtarak realizonin çdo ditë dhjetëra ndërhyrje, duket se prej 2 ditësh ka rënë qetësi absolute mbi këto salla. Vetëm rastet urgjente të traumave janë pritur në këto salla ,ndërsa ato të planifikuarat nuk janë marrë fare në konsideratë. "Jemi detyruar të ndërpresim operacionet, me urdhër të drejtorit. Në këtë mënyrë, pacientët e planifikuar për ndërhyrje kirurgjikale janë kthyer mbrapsht dhe kjo padyshim që nuk është aspak në dobi të tyre, por përkundrazi, këto vendime ndikojnë drejtpërdrejt në kurrizin e të sëmurëve",- pohon njëri nga shefat e shërbimit të Spitalit Ushtarak. Sipas shefave të shërbimit para pak ditësh drejtori kishte organizuar një mbledhje dhe i kishte urdhëruar ata gojarisht që të ndërpresin të gjitha operacionet e planifikuara. Ndërkohë ata pohojnë se në lidhje me këtë ndërprerje nuk morën asnjë shpjegim, duke mbetur të befasuar nga vendimi i marrë në mënyrë të papritur. "Kërkuam që drejtori të na jepte një urdhër me shkrim për ndërprerjen e operacioneve të planifikuara dhe të argumentojë mirë këtë vendim, pasi mendojmë se është absurd",- pohojnë shefat e Spitalit Ushtarak, duke shpjeguar se ky spital ka ofruar gjithmonë ndërhyrje për specialitete të ndryshme edhe për civilët. Gjithashtu ata shpjegojnë se pavijonet që janë të vendosura në këtë spital, por që nuk janë në varësi të spitalit, realizojnë ndërhyrje kirurgjikale ndërsa sallat e SU-së kanë mbetur të bllokuara. "Duhet të shpjegojmë se operacionet për politraumat nuk janë bllokuar por realizohen në mënyrë korrekte",- pohojnë shefat e shërbimit.

Pacientët

Të detyruar t'u drejtohen spitaleve për shkak të shëndetit duket se nuk kanë marrë shërbim por janë kthyer mbrapsht, pa e ditur se kur do të kthehen për të realizuar ndërhyrjet kirurgjikale. Kështu pacientët pohojnë se ndonëse kishin planifikuar datat për operacione, kirurgët u kanë thënë se sallat e operacioneve janë të bllokuara. "Kur erdha për të hequr gurët në tëmth, doktori me tha se nuk mund të futem në operacion pasi sallat janë të bllokuara dhe nuk e dinë se kur do të zhbllokohen",- tha njëri nga pacientët.


Sipas drejtorit të Spitalit Ushtarak, operacionet zhbllokohen të enjten. Tashmë, operacionet me një sistem të ri

Mihaj: Misioni i SU-së, vetëm për politraumat dhe ushtarakët

Misioni i Spitalit Ushtarak është për të pritur vetëm politraumat dhe kujdesin shëndetësor ndaj ushtarakëve. Kështu u shpreh drejtori i Spitalit Ushtarak, Bedri Mihaj i cili pohon se ndërprerja e operacioneve të planifikuara ka ndodhur prej 2 ditësh dhe se tashmë do të ketë një sistem krejtësisht të ri për këto operacione. "Bllokimi i operacioneve të planifikuara ka ndodhur dje dhe sot, ndërsa të enjten do të zhbllokohen. Por tashmë do të veprohet me një sistem të ri, ç'ka do të sjellë një punë më të organizuar dhe korrekte",- pohon Mihaj duke shtuar se bllokimi i operacioneve të planifikuara ndodhi pikërisht për të shmangur konfuzionin në urgjencë. "Këto operacione do të bëhen me një miratim të ri, për të zbatuar ligjin. Kështu, do të ketë një riorganizim të ri, që do të thotë se do të bëhet mbi baza shkencore. Nuk do të bëhen operacione që nuk vijnë me epikriza dhe rekomandim nga mjekët e rretheve",- shpjegoi Mihaj, duke shtuar se nuk do të veprohet më si dikur, që pacientë të marrë nga rruga, apo forma të tjera, t'u nënshtrohen ndërhyrjeve kirurgjikale në Spitalin Ushtarak. Duke theksuar se ky spital, mision ka politraumat, ushtarakët, ish-ushtarakët dhe familjet e ushtarakëve, Mihaj la të nënkuptohej se civilët nuk do të përfitojnë më operacione të planifikuara, të paarsyetuara. Sipas tij, për këto kategori pacientësh, shteti nuk jep fonde për SUQU-në ndaj këta pacientë duhet t'i drejtohen spitaleve të rretheve apo Qendrës Spitalore Universitare "Nënë Tereza". "Nuk na japin asnjë fond për të mbuluar operacionet për të hequr gurët në veshka, gurët në tëmtha, operacione neurokirurgjie apo specialiteteve të tjera",- pohon Mihaj.


Thereska: 1 në 10 persona ka probleme me veshkat

Pacientët me gurë në vesha po vijnë gjithnjë në rritje dhe në dekadën pasardhëse mendohet se kjo sëmundje do të jetë më problematikja për vendin tonë. Madje, mjekët nefrologë pranë Qendrës Spitalore Universitare "Nënë Tereza" pohojnë se sëmundjet e veshkave do të kërkojnë më shumë se 80 për qind të fondeve për Shëndetësinë. Të ndodhur përballë problematikës që shfaqin sëmundjet e veshkave, mjekët kërkojnë që njerëzit të vizitohen dhe të bëjnë analiza, në mënyrë që të zbulojnë nëse kanë probleme me veshkat apo jo. "Mendohet se 1 në 10 persona vuajnë nga veshkat. Por, për fat të keq, në vendin tonë mungon kultura e shëndetit që njerëzit të bëjnë analiza të paktën 1 herë në vit, për të verifikuar nëse kanë probleme apo jo",- pohon shefi i Shërbimit të Nefrologjisë në QSUT, Nestor Thereska. Madje, mjekët e QSUT-së për shkak të numrit të lartë të pacientëve që vuajnë nga veshkat, kërkojnë që të shtohen Qendrat e Dializës pasi është e pamundur që qendrat që funksionojnë aktualisht dhe të përballojnë të gjithë pacientët.

"Shekulli"

[DI_ANA]

Pediatria, pacientët nxirren jashtë ende pa u shëruar!

Sipas mjekëve, në Pediatrinë e QSUT-së kapaciteti i shtretërve është ulur, pasi po rikonstruktohet. Ankohen prindërit

Sëmundja i ka përplasur në dyert e spitalit, por në vend që të shtrohen dhe të marrin mjekim të specializuar, janë të detyruar të kthehen prapa. Madje ka edhe raste kur pacientët e vegjël ende nuk janë shëruar plotësisht, por personeli shëndetësor është i detyruar t'i nxjerrë ata për t'u lënë vendin rasteve kur fëmijët janë rëndë. Kjo është situata aktuale në shërbimin e Pneumologjisë në Pediatrinë e Qendrës Spitalore Universitare "Nënë Tereza" ku sipas shefes së këtij shërbimi, Luljeta Kote, po punojnë në kushte emergjente për të shtuar pacientë. Sipas saj, kjo anomali ka ardhur për shkak të zvogëlimit të kapaciteteve, pasi spitali është në rikonstruksion. Të njëjtin shqetësim shprehin edhe shefat e tjerë të shërbimeve në Pediatri, të cilët bëjnë thirrje që punimet të mbarojnë sa më shpejt. Ndërkohë, prindërit ankohen se fëmijët e tyre për shkak të gjendjes shëndetësore duhet të marrin patjetër shërbim në spital.


Pacientët pa shtretër


Gjendja e tyre shëndetësore kërkon që ata të shtrohen në spital dhe të marrin ndihmën mjekësore të specializuar, por në fakt nuk ndodh kështu, pasi ata kthehen në shtëpi, ku do ta marrin edhe mjekimet, por pa kujdesin e personelit shëndetësor. "E vërteta është se kthejmë çdo ditë pacientë që për shkak të gjendjes së tyre shëndetësore duhet të shtrohen në spital. Por kapaciteti që kemi aktualisht në dispozicion, me shtretër, nuk na e bën të mundur që të mbajmë të gjithë pacientët që kanë nevojë për t'u shtuar në spital", shpjegon doktoreshë Luljeta Kota. Sipas saj, në spital aktualisht po mbahen vetëm rastet e rënda, ndërsa pacientëve të tjerë u jepet mjekimi dhe i dërgojnë në shtëpi, duke i porositur prindërit që t'i sjellin përsëri në spital për kontroll. Por ajo çka është më dramatike, është fakti se disa nga pacientët e shtruar detyrohen t'i nxjerrin nga spitali, edhe pse nuk janë shëruar plotësisht. "Jemi të detyruar të veprojmë në këtë formë, pasi nuk kemi ku të shtrojmë më as rastet e rënda që kërkojnë trajtim në spital në mënyrë të domosdoshme", pohon Luljeta Kota, duke shpjeguar se kapaciteti i shtretërve është ulur me 40, pasi spitali i Pediatrisë është në rikonstruksion.


Prindërit

Spitalin e shohin si të vetmen mundësi që fëmijët e tyre të marrin shërbim mjekësor, për shkak të gjendjes së rëndë që janë, por kjo duket se nuk është e mundur. Të shqetësuar për situatën e krijuar, prindërit e fëmijëve kërkojnë që fëmijët e tyre të shtrohen në spital, sepse nuk mund t'i trajtojnë në shtëpi. "Djalin e kam prej 4 ditësh me temperaturë të lartë dhe bronkopneumoni, por mjekët më thonë se nuk ka shtretër për ta shtuar dhe unë nuk di ku të mbytem me fëmijën esëmurë", pohonnjëri nga prindërit e pacientëve në Pediatri. Sipas prindërve, mjekët aktualisht bëjnë vizita dhe i dërgojnë në shtëpi me rekomandime se çfarë mjekimi do të ndjekin.

"Shekulli"


Ps....Ja te gjitha keto,per faj te moskokeçarjes se nje sistemi dhe pasoje gjithashtu e joaftesise te deputeteve dhe Parlamentit...Mjere populli yne!

[Marssi]

cilet jan shkaktaret e smundjeve ishemike

[eldonel]

Dhe klienti shkon ti ndreq dhembet dhe rastesisht prishen dhembet ku ngel pergjegjesia .

[[Perla]]

Lishence nuk kane, sherbimi eshte 0 dhe tarifat jane stratosferike :S

[IL__SANTO]

Une per vete shkova tek Dentisti ne shqiperi edhe mbasi me rregulloi dhemballen degjoja me mire nga veshet.

[alda09]

Une per vete shkova tek Dentisti ne shqiperi edhe mbasi me rregulloi dhemballen degjoja me mire nga veshet.

hhhhaaahhhaa santo do te kete shkulur ndonje kock qe ke pasur teper. Sherbimi me i rendesishem dhe ne kete gjendje eshte fatkeqesi.

[IL__SANTO]

hhhhaaahhhaa santo do te kete shkulur ndonje kock qe ke pasur teper. Sherbimi me i rendesishem dhe ne kete gjendje eshte fatkeqesi.

alda mos te zente halli ti besh ne shqiperi se te garantoj qe ske per te vuajtur me nga syte po shkove te mbushesh dhemball.