Centrali atomik, nis projekti

[drity]

Ambasadori i Iranit në Tiranë flet për çështjen e centralit bërthamor

.... Alibeman Eghbali Zarch, shprehet se Evropa dhe komuniteti ndërkombëtar nuk duhet të përdorin dy standarde ...

Problemi me Iranin nuk eshte deshira per te ndertuar nje central berthamor, por deshira per te pasuruar uranium.
Pra, normal qe per dy probleme te ndryshme do te kete dy standarde te ndryshme.

[brooklyn2007]

BRUKSEL- KE dha sot OK per ndertimin e centralit berthamor te Belenes, ne veri te Bullgarise.
Sofja parashikon ndertimin e ketij centrali me dy reaktore dhe kapacitet 1 000 megawat afro 100 kilometra nga centrali ekzistues i Kozloduit, dy nga gjashte reaktoret e te cilit jane ende autorizuar te funksionojne qe prej anetaresimit te Bullgarise ne BE me 1 janar te ketij viti.
Sic ben te ditur agjencia e lajmeve AFP, per çdo investim te ri qe lidhet me aktivitetet berthamore duhet njoftuar Komisioni Europian, i cili jep mendim per çdo vend anetar.
Miratimi i Komisionit do t'i mundesoje qeverise bullgare te kerkoje miliona euro financime.
Shume shoqata ekologjiste dhe nje ekspert berthamor bullgar i bene thirrje Komisionit ne fund te nentorit te mos miratoje ndertimin e centralit Belene, duke nenvizuar se ai do te ndertohet ne nje zone sizmike.
"Centrali, i parashikuar te jete operacional ne vitin 2013, pritet te ndertohet 14 kilometra nga fshati Svishtov, ku ne vitin 1977 gjeten vdekjen 120 persona si pasoje e nje termeti", nenvizuan ata.



http://www.balkanweb.com/sitev4/index.php?id=12787

P.S. Na e "futi" Bullgaria, po e ndertojne para nesh

[xhori]

teci i vlores dhe ky centrali jane fillimet e ndertimit te zones industriale te evropes perendimore ne ballkan

[ClaY_MorE]

Pritet që në vitet në vijim të ndërtohen 100 të tillë në gjithë globin

Pavarësisht kundërshtive, numri i tyre është rritur dhe bumi i vërtetë pritet të jetë Kina


Frika nga ndonjë katastrofë e re si ajo e Çernobilit ka rënë gradualisht dhe po zë vend ideja, se centralet bërthamore janë zgjidhja më e pranueshme për kapërcimin e kokëçarjes që sjell rritja e çmimit të naftës e ngrohjes globale.

Nëpër kabinetet e kryeministrave e presidentëve në të gjithë botën, po merren vendime për "copëtimin e atomit", si mënyra më e mirë për ta ruajtur ekonominë e vendeve të tyre nga çmimet e gazit e naftës, domethënë nga vendet që janë furnizuesit më të mëdhenj me këto burime energjie.

Vendimi i paradokohshëm i qeverisë së Britanisë së Madhe, për të miratuar ndërtimin e brezit të ri të centraleve elektrike bërthamore, gjykohet se do të ndikojë edhe te shtetet e tjera evropiane, që duan të jenë sa më të pavarura energjetikisht, duke u justifikuar se centralet elektrike bërthamore e pakësojnë emetimin e gazeve, të cilat paraqiten si fajtorët kryesorë për ndryshimet klimaterike.

Sipas Jon Hatonit, ministri britanik i Energjetikës, Britania e Madhe duhet të ndërtojë centrale bërthamore, sepse kjo do ta shmangë varësinë e madhe të saj nga importi i energjentëve, ndërsa rezervat e naftës në vendburimet e Detit të Veriut mund të pakësohen shpejt, citon "Rojters". Britania e Madhe tani prodhon 18% të energjisë nga centralet bërthamore.

"Nuk dua të kufizoj artificialisht atë pjesë të energjisë që prodhon Britania e Madhe nga centralet bërthamore, ose nga ndonjë burim tjetër që mundëson prodhim energjie, me më pak emetim gazi karbonik", tha Haton, duke iu drejtuar anëtarëve të Parlamentit.

Por, prapa arsyetimit ekologjik dhe luftës kundër ndryshimeve klimaterike, fshihet edhe përpjekja për ta shmangur varësinë e madhe nga gazi rus. Mbyllja vitin e kaluar e gazit rus për Ukrainën i bindi Italinë, Hungarinë, Francën, Gjermaninë dhe të paktën shtatë vende të tjera të Evropës Qendrore e Lindore, se janë shumë të varura nga gazi rus. Për më tepër, sipas vlerësimeve evropiane, BE-ja deri në vitin 2020, dy të tretat e nevojave energjetike do t‘i plotësojë me import, kryesisht nga Rusia.

Sipas analistëve evropianë, tensioni që krijoi Putini me Ukrainën, nëpër të cilën kalon një gazsjellës drejt BE-së, i ka dhënë mbështetje lobistëve të industrisë bërthamore, për të bërë programe ambicioze në këtë fushë.

Deri para pak kohësh, energjia bërthamore nuk ka pasur të ardhme të ndritur brenda BE-së, por tani në këtë aspekt, Franca, jo vetëm që nuk e ka nisur mbylljen e centraleve bërthamore, por e ka zhvilluar industrinë e tyre. Madje, 78% të energjisë elektrike, francezët e marrin nga centralet bërthamore. Ndërsa në botë, nga centralet bërthamore prodhohet 16% e energjisë së përgjithshme.


Qëndrimet e BE-së ndaj energjisë bërthamore janë të ndara. Kështu, Gjermania e Suedia vazhdojnë përgatitjen për ndërprerjen e prodhimit të energjisë bërthamore, ndërsa Bullgaria, Rumania e Sllovakia po nisin ndërtimin e tyre. Nga 27 vendet e BE-së, 12 prej tyre nuk kanë reaktorë bërthamorë. Këto vende janë Austria, Estonia, Letonia, Polonia, Portugalia, Malta, Qipro, Luksemburgu, Irlanda, Danimarka, Greqia e Bullgaria.

Nga 15 vendet e BE-së që kanë centrale bërthamore, Franca ka më tepër, 59 gjithsej, e pasuar nga Britania me 23, Gjermania 17, Suedia 10, Spanja 9, Belgjika 7, Sllovakia e Çekia nga 6, Hungaria, Rumania e Finlanda nga 4, ndërsa Lituania, Holanda e Sllovenia kanë nga 1.

"Po përballemi me rilindjen bërthamore. Energjia bërthamore nuk është më djalli. Djalli është qymyri", u shpreh Ana Loverzhon, drejtoreshë e përgjithshme e kompanisë bërthamore franceze, "Areva".

Këto fjalë i justifikon fakti, se edhe SHBA-ja, pas një pauze jo pak, por 30-vjeçare që nga avaria e centralit atomik "Ishulli tre milje" në Pensilvani, vendosi të fillojë ndërtimin e centraleve të reja.

Kina ka 5 centrale bërthamore dhe planifikon, që deri në vitin 2020, të lëshojë në punë më shumë se 30 centrale të tjera, në përpjekje për të bërë të mundur, sa më pak dëme për ambientin, të rrisë energjinë për ekonominë.

Ndërtimin e centraleve bërthamore e ka lajmëruar edhe Presidenti bjellorus, Aleksandar Lukashenko, ndërsa qeveria iraniane ka njoftuar se pas përfundimit të centralit bërthamor "Busher" do të shpallë tenderin ndërkombëtar për ndërtimin edhe të 19 centraleve bërthamore në vend.

Edhe pse fuqitë perëndimore të kryesuara nga SHBA-ja, kanë shqetësim vetëm programet bërthamore të Iranit e Koresë, analizat tregojnë se shqetësimi nuk mund të rezervohet vetëm për vendet në zhvillim.

Verën që shkoi, publiku gjerman sulmoi ashpër firmën e administrimit të reaktorit gjerman, sepse raportoi me vonesë për rënien e zjarrit në centralin atomik, në afërsi të Hamburgut.

Te publiku shkoi me vonesë edhe lajmi për mbylljen urgjente të dy reaktorëve bërthamorë në Bullgari, ndërsa industria bërthamore japoneze ka akoma probleme me zbulimin e raporteve të rreme me rastin e kontrolleve të reaktorëve bërthamorë para pesë vitesh.

Mbështetësit e gjeneratës së re të reaktorëve bërthamorë, thonë se do të arrijnë të krijojnë reaktorë plotësisht të sigurt me mekanizmat më të mirë mbrojtës.

Por, jo vetëm aktivistët e organizatave ekologjike dyshojnë në deklaratat, se gjenerata e re e reaktorëve bërthamorë do të jetë më e sigurt se e para. Dyshimet i shprehu për AP edhe Hans Holger Rogner, shef i sektorit të planizimit dhe studimeve ekonomike në Agjencinë Ndërkombëtare për Energjinë Atomike.

Përkundër kësaj, Kombet e Bashkuara vlerësojnë se në këtë industri, për dy dekada prodhimi i energjisë do të dyfishohet.

Madje, as rritja e çmimit të uraniumit nuk do të ndikojë në këtë tendencë, sepse ai merr pjesë në çmimin e përgjithshëm të energjisë elektrike vetëm me 5%.


Biznes i madh për SHBA-në dhe Rusinë

Edhe pse në publik, industria nukleare nuk është shumë popullore, një numër i madh shtetesh marrin pjesë aktive jo vetëm në zhvillimin e kësaj dege të industrisë për nevojat e veta, por edhe për eksport.

Ditët e fundit, Presidenti francez, Nikolas Sarkozi, u ofroi ndihmë vendeve arabe në Gjirin Persik për zhvillimin e industrisë nukleare për qëllime paqësore, duke dashur të sigurojë punë me vlera miliarda dollarë për kompanitë franceze.

Që energjia atomike është biznes i mirë, e tregon edhe shembulli amerikan, nëpërmjet kompanisë bërthamore "Vestinghaus". SHBA-ja nuk i ka ndërtuar vetë centralet bërthamore, por rregullisht u miratojnë kredi vendeve të tjera për ndërtimin e tyre.

Vitet e fundit, edhe Rusia ka përmirësuar ekonominë e saj, duke shitur teknologji bërthamore dhe reaktorë në vende të ndryshme të botës. Presidenti rus, Vladimir Putin, ka miratuar përtëritjen ambicioze të industrisë bërthamore, me ndërtimin e 26 centraleve të reja. Rusia ka përfshirë në plan edhe ndërtimin e 60 centraleve bërthamore të destinuara për eksport në 20 vitet e ardhshme.

Ajo planifikon të ndërtojë më shumë centrale bërthamore lundruese, të cilat prej vitit 2010 do të sigurojnë ngrohje e energji për rajone të largëta, ku akoma nuk ka shkuar energjia.

Në Australi, e cila ka rezervat më të mëdha minerare të uraniumit në botë, deri tani nuk është ndërtuar asnjë central bërthamor, por brenda një dekade, atje do të lëshohet në punë centrali i parë bërthamor.

Ekspertët e energjetikës parashikojnë, që deri në gjysmën e parë të këtij shekulli, në kontinentin më të vogël të tokës, do të jenë në punë 25 reaktorë bërthamorë, që do të prodhojnë më shumë se një të tretën e energjisë në vend. Në vend të dytë për rezerva uraniumi është Kazakistani me 17% të rezervave botërore, ndërsa Kanadaja ka 9%.


Bumi më i madh pritet në Kinë

Në botë, momentalisht energjia bërthamorë prodhohet nga 439 instalime. Janë në ndërtim edhe 34 reaktorë, nga të cilët 4 në BE (dy në Bullgari e nga 1 në Finlandë e Francë).

Megjithatë, bumi më i madh nuklear pritet në Kinë, Indi e vende të tjera në zhvillim. Në plan për t‘u ndërtuar janë edhe 110 të tillë, nga Argjentina, Brazili, Republika e Afrikës së Jugut, Vietnami, Tajlanda, Egjipti e Turqia.

Sipas vlerësimeve të Ana Loverzhon, deri në vitin 2030, në botë do të ndërtohen diku mes 100 deri në 300 reaktorë të rinj.


Dhurata për terroristët

Mbështetësit e bërthamoreve, në qëndrimet e tyre, sqarojnë se centralet bërthamore janë më pak të dëmshme se termocentralet ose hidrocentralet, duke marrë parasysh se një central i tillë i fuqisë 1000 megavat në vit, prodhon 500 metra kub mbetje radioaktive, ndërsa një termocentral i të njëjtës fuqi, prodhon tetë milionë tonë dioksid karboni, 40000 tonë dioksid squfuri dhe 6000 tonë pluhura.

Në kohën e energjisë gjithnjë e më të shtrenjtë, lobistët e industrisë nukleare thonë se: "Kur të mos ketë energji, ose kur ajo të jetë shumë e shtrenjtë për ju, drejtohuni tek ekologjistët". Ndërsa kundërshtarët thonë se centralet bërthamore nuk janë përgjigjja për ngrohjen globale, sepse krijohen mijëra tonë mbetje. Këto u mbeten si trashëgimi vdekjeprurëse brezave të ardhshëm.




Gazeta Shqip

[Faik]

Centrali atomik në Shqipëri drejt realizimit

Agjensia Atomike Ndërkombëtare e Vjenës mbështet përgatitjen e kuadrit ligjor për ngritjen e një centrali atomik në Shqipëri
Deklaratë e nxituar, fishekzjarr prapagandistik apo përpjekje për të çvendosur vëmendjen e opinionit publik nga kriza e paparë energjitike. Kështu e motivoi opozita deklaratën e kryeministrit Berisha, në vjeshtën e kaluar, për mundësinë e ngritjes në Shqipëri të një centrali bërhamor, për të prodhuar energji elektrike.

Centrali atomik në Shqipëri drejt realizimit

Kur kryeministri e publikoi, vendi po jetonte kulmin e krizës, me ndërprerje të përditshme të energjisë apo dritës, që shkonin nga 6 deri në 8 orë. Në projektin e tij Berisha shihte jo vetëm daljen e Shqipërisë njëherë e mirë nga krizat kronike, por edhe shndërrimin e saj në një vend eksportues për fqinjët dhe me gjerë. Vizion i guximshëm për një vend që po shkatërrohej ekonomikisht nga mungesa e energjisë! Por, do të kalonin vetëm pak muaj deri kur nga njerëzit pranë kryeministrit do të publikohej lajmi se Agjensia Ndërkombëtare Atomike e Vjenës mbështet Shqipërinë në ëndrrën e saj atomike dhe se ka filluar puna për hartimin e kuadrit ligjor që do ta paraprijë projektin. Suzana Guxholli, këshilltare ekonomike pranë kryeministrit Berisha thotë: " Në fillim të shkurtit në Tiranë do të mbërrijë një ekspert nga Agjensia Ndërkombëtare Atomike e Vjenës. Deri tani është hartuar një draft për sigurimin nga rrezatimet bërthamore, që është pjesë e ligjit atomik.

Tani do të punohet për të hartuar gjithë ligjin“. Për këshilltaren e kryeministrit Berisha, Suzana Guxhollin, rruga drejt realizimit të ëndërrës atomike, për një Shqipëri që llamburit nga dritat dhe u shet njëkohësisht energji elektrike fqinjëve të saj, nuk ka të papritura.„ Në draftin që na ka dërguar Agjensia Nderkombëtare Atomike e Vjenës , tha Znj. Guxholi, janë pasqyruar të gjitha nenet e ligjit, i cili është i domosdoshëm për ndërtimin dhe funksionimin e centralit atomik në Shqipëri.“

Agjensia Ndërkombëtare Atomike në Vjenë ka kërkuar edhe ngritjen në Shqipëri të një Enti Rregullator për energjinë atomike, gjë që do të jetë veçse çështje kohe, nisur nga shpejtësia e progresit të projektit atomik. Gjithë sa publikohet është përgatitja e kuadrit ligjor dhe ngritja e Entit Rregullator për Energjinë Atomike. Ajo për të cilën nuk thuhet asnjë fjalë është se ku do ta sigurojë Shqipëria lëndën e shtrenjtë radioaktive për ta vënë në lëvizje mekanizmin e ndërlikuar por shpëtimprurës nga kriza: prodhimi i
energjisë elektrike nga energjia bërthamore. Në vjeshtën e vitit të kaluar qeveria e kryministrit Berisha hyri në negociata me kompaninë Westinghouse, e njohur në botë, si një nga më të specializuarat për ndërtimin e centraleve të tillla.
/F.F./Liria

[Sa Kot]

Gjeniale!

[Korcar-L1]

Ajo për të cilën nuk thuhet asnjë fjalë është se ku do ta sigurojë Shqipëria lëndën e shtrenjtë radioaktive për ta vënë në lëvizje mekanizmin e ndërlikuar por shpëtimprurës nga kriza: prodhimi i
energjisë elektrike nga energjia bërthamore.

Nga Rusia .... lol

[Legjion]

Nuk bohet gjo në Shqipëri pa infrastrukturën e duhur bërthamore dhe ekipet e nevojshme të specialistëve vendas. Mjaft fluturut me presh në bythë, me çdo deklaratë që lexoni majtas e djathtas. Ka probleme më akute veni në kët moment. Me u manipulu në kët farë feje, menoja se ndodhte vetëm në SHBA.

[Sa Kot]

Nuk bohet gjo në Shqipëri pa infrastrukturën e duhur bërthamore dhe ekipet e nevojshme të specialistëve vendas. Mjaft fluturut me presh në bythë, me çdo deklaratë që lexoni majtas e djathtas. Ka probleme më akute veni në kët moment. Me u manipulu në kët farë feje, menoja se ndodhte vetëm në SHBA.

Ahu ne duam centralin, thuj ca te dush ti...specialisti po vjen per konsultime!

[tonny2]

Përfaqësues të Forumit Ekonomik Botëror në Davos mirëpritën propozimin e kryeministrit për burimet alternative të energjisë


Qeveria, ligj për ndërtimin e centralit bërthamor


Mundësia e ndërtimit të një centrali bërthamor në Shqipëri do të konkretizohet me hartimin e një projektligji të posaçëm. Në këtë kuadër vlen të theksohet se, qeveria po ndërmerr përpjekjet maksimale për të finalizuar sa më shpejt kuadrin ligjor për ndërtimin e centralit bërthamor. Gjatë mbledhjes së djeshme të Grupit parlamentar të Partisë Demokratike, kryeministri Sali Berisha theksoi se, këtë projekt shumë të rëndësishëm e ka propozuar edhe në takimet e tij në Forumin Ekonomik Botëror në Davos. Kreu i qeverisë vlerësoi se, propozimi në lidhje me këtë çështje ishte pritur pozitivisht nga përfaqësues të këtij forumi. Kryeministri Berisha vuri në dukje se, projekti në fjalë do të sjellë rritje të ekonomisë në vend dhe madje do të ndikojë edhe në uljen e inflacionit. Lidhur me këtë çështje, kreu i ekzekutivit, Berisha, një tjetër gjë pozitive e ngritjes së centralit bërthamor në Shqipëri është edhe ulja e emetimit të gazit karbonik. "Gjatë takimeve kam shprehur hapur pikëpamjen se energjia nukleare, është mënyra më e mirë, më e shpejtë dhe më e fuqishme për të ulur emetimin e gazit karbonik. Unë u zotova se, në Shqipëri do të vazhdojmë përpjekjen për të bërë sa më të shpejt kuadrin ligjor dhe të proçedojmë në bazë të interesit të tregut për ndërtimin e centralit bërthamor, në kushtet e një sigurie të plotë", tha kryeministri, duke sqaruar rëndësinë e ndërtimit të këtij centrali.

Kryeministri informoi deputetët mbi takimet e zhvilluara gjatë punimeve të Forumit të Davosit, në Zvicër. Kreu i ekzekutivit i cilësoi këto takime mjaft optimiste dhe vlerësuese për hapat pozitive, që vendi ka ndërmarrë në të gjitha fushat. Duke theksuar rëndësinë e këtij forumi, kryeministri theksoi se, Davosi është forumi i parë kryesor botëror për ekonominë, por paralel me këtë ka edhe problemet politike. "Davosi në filozofinë e tij trajton çështje globale, çështje të përgjithshme që i interesojnë ekonomisë botërore, që i interesojnë planetit. Në këtë kontekst, tema më kryesore të këtij viti ishin krizat globale si krizat financiare dhe ngrohja globale. Çështjet e tjera lidheshin me sigurinë ndërkombëtare të botës. Vetëkuptohet që, Shqipëria në univers ka një pozicion të sajin, padyshim modest, por prania aty përbënte një kënaqësi dhe rëndësi të veçantë", theksoi kryeministri. Berisha vuri në dukje se, ndryshimet e fundit në Shqipëri kanë tërhequr vëmendjen e të gjithë faktorëve ndërkombëtarë. "Gjatë takimeve të zhvilluara kam paraqitur realitetin e ri shqiptar, një realitet i ndryshuar dhe që ka bërë jehonë të padiskutueshme kudo në botë", u shpreh kreu i mazhorancës. Më tej, ai theksoi gjithashtu se, jehonë të padiskutueshme ka patur lufta me zero tolerancë ndaj krimit të organizuar dhe sukseset e kësaj lufte. "Lufta kundër korrupsionit, si dhe liria ekonomike e fiskale, për të cilat Shqipëria u rendit mjaft lart në saj të paketës së re dhe përpjekjeve të reja që po bën, kanë luajtur një rol të jashtëzakonshëm në këtë drejtim", tha kreu i qeverisë.


Vizitat e personaliteteve botërore, të rëndësishme për vendin


Kryeministri Berisha e cilësoi si një çështje me rëndësi të veçantë vizitat e personaliteteve të rëndësishme botërore në Shqipëri. Sipas tij, këto vizita thellojnë bashkëpunimin ekonomik dhe tregtar. Në këtë kuadër Berisha theksoi se, një nga synimet e takimeve të zhvilluara në Davos ishtë dhe sjellja në Shqipëri, e personaliteteve më të njohura nga të gjitha fushat. Duke iu referuar si një shembull mjaft pozitiv vizitës së Presidentit amerikan George Ë. Bush, kreu i qeverisë evidentoi rëndësinë që ka Shqipëria që të vizitohet nga personalitetet botërore. "Shqipëria ka shumë nevojë të vizitohet nga kryeministra, kryetarë shtetesh. Qeveria do të bëjë përpjekjet maksimale për të sjellë në Shqipëri personalitete botërore të të gjitha fushave, të botës akademike, të botës së artit, të botës së letrave", u shpreh kreu i shumicës. Duke u ndalur në çështjet që u trajtuan nga ky forum, Berisha u shpreh se, temë kryesore kanë qenë pasojat e ndryshimit të klimës, pasi të pakta janë vendet që kanë patur pasoja më të rënda nga ndryshimi i klimës se sa Shqipëria.


http://pdsh.ucoz.com/forum/