Korrupsioni me patentat, arrestohen tre zyrtarë

[AlbaneZ]

Operacioni "Gërshërët e Ligjit" prangosin edhe dy instruktorë

Tre zyrtarë dhe dy pronarë autoshkollash kanë përfunduar në prangat e policisë kryeqytetase, pasi akuzohen për korrupsion, shpërdorim detyre dhe për falsifikim dokumentesh. Operacioni për kapjen e tyre u realizua pasditen e djeshme nga Task-Force, në bashkëpunim me skuadrën operacione të Drejtorisë së Policisë së Tiranës. Burimet zyrtare të Drejtorisë së Policisë së Tiranës bënë të ditur se specialistët e seksionit të Luftës Kundër Krimit Financiar, në bashkëpunim me Njësinë Operacionale, në kuadër të operacionit të koduar "Gërshërët e Ligjit", realizuan gjatë ditës së djeshme arrestimin në flagrancë të 5 personave. Sipas policisë, këta persona akuzohen për "korrupsion pasiv të personave që ushtrojnë funksione publike", "korrupsionit pasiv dhe aktiv në sektorin privat" si dhe të "falsifikimit të dokumenteve zyrtare, vepra penale të kryera në bashkëpunim. "Konkretisht, në prangat e policisë përfunduan dy anëtarë të komisionit të marrjes në prova për leje drejtimi mjeti, pranë Drejtorisë së Shërbimit të Transportit Rrugor, 1 pronar autoshkollash dhe dy instruktorë teorie dhe praktike pranë autoshkollave", deklaroi policia e kryeqytetit. Sipas tyre, dy anëtarët e komisionit janë Emiljano Kapllan Kahu, 31 vjeç, banues në Shijak dhe Sokol Osman Breca, 43 vjeç, banues në Tiranë. Ndërkohë, të arrestuarit Jonus Riza Meshi, 58 vjeç dhe Qazim Hasan Hoxha, 57 vjeç, të dy banues në Tiranë, ishin me detyrë instruktor teorie dhe praktike pranë autoshkollës "Univers-Vip". Gjithashtu, policia arrestoi edhe Kadri Mehmet Dajçin, 52 vjeç, banues në Tiranë, me detyrë punonjës policie në sektorin e Rendit dhe Sigurisë Publike në Drejtorinë e Policisë Tiranë, i cili ishte bashkëpronar në autoshkollën "Univers-Vip". Policia e Tiranës detajoi në lidhje me këtë operacion se pas një hetimi disamujor, nën drejtimin e Task-Forcës së Krimit Financiar dhe Korrupsionit, duke përdorur metodat speciale të hetimit, u mundësua dokumentimi i veprimtarisë kriminale, që këta persona kryenin në bashkëpunim me njëri-tjetrin. Të sipërcituarit dyshohen se personave të ndryshëm u merrnin para kundrejt dhënies së një dëshmie aftësie për drejtim mjeti. Kështu, pas hetimeve dhe mbledhjes së provave, prokuroria ka prerë urdhër-arrestet për të gjithë të lartpërmendur. Ndërsa në orët e pasdites është ndërmarrë operacioni për kapjen e tyre. Ndërkohë, pas arrestimit të pesë personave, policia tha se ka ushtruar kontroll në ambientet e zyrave dhe të banesave të tyre. Gjatë kontrollit të ushtruar, personave iu gjetën dhe iu sekuestruan 7 milionë lekë shqiptare, 300 Euro, 300 USD si dhe një sërë dokumentesh të falsifikuara, që shërbenin për plotësimin e dokumentacionit të kursantëve. Gjithashtu, atyre u janë gjetur edhe 50 patenta të plotësuara, të cilat dyshohen se janë bërë të falsifikuara. Drejtoria e Policisë së Tiranës tha se materialet hetimore do t‘i kalojnë për kompetencë Njësisë së Përbashkët Hetimore Kundër Krimit Financiar dhe Korrupsionit në Prokurorinë e Rrethit Gjyqësor Tiranë.


Mekanizmi

Merrnin 65 mijë lekë për patentë


Pesë të arrestuarit e mbrëmshëm përfitonin nga 65 mijë lekë për të nxjerrë një patentë. Mekanizmi i tyre është zbuluar nga agjentët e antikorrupsionit, të cilët kanë hetuar këtë grup prej disa javësh. Burimet nga grupi hetimor bënë të ditur se pajisjen me dëshmi për drejtim automjeti, të arrestuarit e plotësonin për të gjithë të interesuarit që përpara zhvillimit të testimit kundrejt shumës së parave prej 65 mijë lekë për çdo patentë. Në të shumtën e rasteve, kursantët takoheshin me pronarin e autoshkollës, i cili është edhe punonjës policie dhe me të kryenin pazaret. Pas kësaj, ata dorëzonin të dhënat personale dhe pajiseshin me patentë automjeti, pavarësisht se nuk kishin bërë kurs dhe nuk i nënshtroheshin testimit të detyrueshëm.


------------------------------------------------------------------------------------------------

Anulohet tenderi i kartonëve, bllokohen dhënia e patentave

Kreu i Drejtorisë së Rrugëve në Korçë konfirmon arsyet e mungesës


Anulimi i tenderit të kartonëve për patentat ka lënë pa këtë dokument qindra persona. Drejtoritë e Transportit Rrugor nëpër rrethe kanë marrë konfirmim zyrtar se është anuluar tenderi dhe për këtë arsye, janë shtyrë të gjitha afatet për pajisjen me dëshmi aftësie për shoferët e rinj. Vetëm në qytetin e Korçës që në muajin shkurt, siç bëhet e ditur nga drejtori Refat Agolli, nuk janë dhënë patenta për shkak të mungesës së kartonëve, të cilat në fakt kanë qenë në një numër të reduktuar, krahasuar me kërkesën e madhe të aplikantëve dhe të fituesve të testeve për marrjen e dokumentit të drejtimit të automjetit. Nga të dhënat zyrtare mësohet se për më shumë se një muaj është penguar puna edhe pse ka ankesa të shumta nga personat që janë në pritje për të marrë një patentë dhe të cilët edhe pse i drejtohen zyrave përkatëse marrin një përgjigje negative për pajisjen. Sipas të dhënave zyrtare, mësohet se nga Rrethi i Korçës janë të paktën 300 persona, të cilëve iu është bllokuar dhënia e patentave për shkak të mungesës së kartonit. Fillimisht aplikantëve u është bërë e ditur se ka mungesa për shkak të numrit të reduktuar të kartonëve në kryeqytet, gjë që ka çuar në plotësimin e pjesshëm të tyre dhe në një shpërndarje minimale në muajin janar, por më vonë me bllokimin e shpërndarjes është dhënë edhe një argument i dytë, se nuk punon kompjuteri qendror i prodhimit. Vetëm një ditë më parë, në Drejtorinë e Transportit Rrugor ka mbërritur edhe një shkresë zyrtare që bën të ditur arsyet që kanë çuar në këtë mangësi, që lidhet në fakt me anulimin e tenderit të kartonëve në kryeqytet. Edhe pse kanë kaluar më shumë se 40 ditë që nga bllokimi i procedurave, nuk ka një konfirmim të qartë se kur do të bëhet prodhimi dhe shpërndarja në rrethe e patentave për drejtuesit e rinj të mjeteve dhe ata që kanë aplikuar për dokument të ri. I njëjti problem është vërejtur edhe në Sarandë, ku konfirmohet se janë bllokuar të paktën 170 procedura për marrje patente. Edhe në qytete të tjera situata është e njëjtë.



G.Shqip

[Jack Watson]

Ahaha, sa kam qesh kur pashë fotot në gazetë, me këtë Emiljano Kahun kam bërë një pisllik të tillë para fiks dy muajve, nxora një lejedrejtimi për kushëririn tim në Angli, për 700 mij, jo me 650, s'i duket paskën bo ulje meqë është fundi i sezonit të dimrit .

Te patenta është korrupsion i gjallë. Edhe ankohemi pastaj për aksidentet në rrugë, jo do vëmë një polic për kilometër, jo fiq jo presh.

[drague]

un e kam ble nji ne 1991per 10000lek qeka ngrejt cmimi goxha.kaq bon dhe ne itali me e bo

[MaDaBeR]

Edhe sa ka si keto. Po te pakten mire qe i arrestuan keto, te jeni te sigurte, qe pas ketyre do kete dhe nje lume arrestimesh te tjera, e mos u vije çudi qe ndoshta ndonje dite te bukur me diell te shohim nen pranga dhe ndonje deputet. Ky eshte çmimi qe duhet te paguaje shumica per te hyre ne NATO dhe per te mbyllur çeshtjen e liberalizimit te vizave.

[AlbaneZ]

Prokuroria: Hetimi i operacionit "Gërshërët e ligjit" filloi pas denoncimit të "Fiks Fare"

Tre zyrtarët e patentave, të arrestuar dy ditë më parë në Tiranë janë filmuar duke marrë ryshfet. Njësia antikorrupsion në akuzën e kryeqytetit tha dje se hetimi për operacionin "Gërshërët e ligjit" filloi në muajin janar të këtij viti, pas denoncimit të një qytetari. Të dyshuarit, për një periudhë tremujore, janë mbajtur nën vëzhgim. "Pas denoncimit, rasti në fjalë është kopsitur dhe gjatë hetimeve kanë dalë dhjetëra raste të tjera, ku të arrestuarit kanë marrë dokumente të qytetarëve të ndryshëm kundrejt të hollave", thanë burimet nga policia, të cilat saktësojnë se patentë merrnin personat që paguanin, ndërsa ata që nuk paguanin nuk fitonin. Mësohet se zyrtarët e patentave janë arrestuar duke ngrënë drekë, pas marrjes së lekëve nga i infiltruari i prokurorisë. "Prova më të forta që sollën arrestimin e zyrtarëve janë përgjimet, ndërsa ka pamje filmike dhe fotografi. Për çdo kursant, përveç pagesës 30 mijë lekë, merrnin edhe 35 mijë lekë të tjera në formën e ryshfeteve", thanë hetuesit e çështjes.

Hetimet pas "Fiks Fare"

Prokuroria e Tiranës tha dje se hetimet për zyrtarët e patentave kanë filluar edhe pas një indicie të marrë nga emisioni investigativ "Fiks Fare" në "Top Channel". Disa zyrtarë të patentave kanë lëshuar një dëshmi për drejtim automjeti me emrin e themeluesit së Tiranës, Sulejman Pasha. Gazetari ka arritur, kundrejt një pagese, të marrë patentën e rregullt. Fiksi ka arritur të pajisë me patentë ndërkombëtare edhe ish-kampionin e botës në Formula 1, Fernando Alonso. Nxjerrja e këtyre patentave ishte mjaft e thjeshtë. Gazetarët e "Fiksit" shkuan në disa autoshkolla. Në njërën prej tyre gjetën edhe një sekser, i cili merrte përsipër nxjerrjen e patentave për drejtim makine pa u paraqitur fare në provim dhe pa bërë asnjë ditë kurs. Gjatë bisedës me sekserin, u mësuan edhe çmimet e tregut, kuptohet me pagesa që bëhen nën dorë. 70 mijë lekë të reja kushton nxjerrja e një patente për një person, i cili nuk bën asnjë ditë kurs, por duhet të paraqitet në provim. Paraqitja në provim është sa për sy e faqe, sepse çfarëdo që të shkruajë në fletën e provimit, patentën e ka të marrë. Por nëse preferon të mos paraqitet fare në kurs, i duhet të paguajë më shumë për të marrë patentën. Dhe për këtë nevojiten 100 mijë lekë të reja.

"Gërshërët e ligjit"

Operacioni i koduar "Gërshërët e ligjit" realizoi arrestimin në flagrancë të 5 personave. Sipas policisë, këta persona akuzohen për "korrupsion pasiv të personave që ushtrojnë funksione publike", "korrupsion pasiv dhe aktiv në sektorin privat" etj. "Konkretisht, në prangat e policisë përfunduan dy anëtarë të komisionit të marrjes në prova për leje drejtimi mjeti, pranë Drejtorisë së Shërbimit të Transportit Rrugor, një pronar autoshkollash dhe dy instruktorë teorie e praktike pranë autoshkollave", deklaroi policia e kryeqytetit. Sipas tyre, dy anëtarët e komisionit janë Emiljano Kahu dhe Sokol Breca. Ndërkohë, të arrestuarit Jonus Meshi dhe Qazim Hoxha ishin me detyrë instruktorë teorie dhe praktike pranë autoshkollës "Univers-Vip". Gjithashtu, policia arrestoi edhe Kadri Dajçin, me detyrë punonjës policie në sektorin e rendit dhe sigurisë publike në Drejtorinë e Policisë Tiranë, i cili ishte bashkëpronar në autoshkollën "Univers-Vip".


Precedenti


Prokuroria dërgoi në gjykatë tri autoshkolla


"Fiks Fare" filmoi falsifikimet e "Majestik, "Selimi" dhe "Nokia"


Tri autoshkolla, të cilat operonin aktivitetin e tyre duke bërë falsifikime të ndryshme, kanë shkuar në gjykatë. Prokuroria e Tiranës, pasi ka shqyrtuar materialin dhe bërë hetimet përkatëse, ka nisur kërkesën për gjykim për autoshkollat "Majestik", "Nokia" dhe "Selimi". Të tri këto autoshkolla janë hetuar, falë punës investigative të gazetarëve të emisionit "Fiks Fare" në "Top Channel". Sipas prokurorisë, tri autoshkollat janë hetuar për veprën penale të korrupsionit pasiv në sektorin privat, parashikuar nga neni 164 i Kodit. Gjithçka ka nisur kur gazetarët e "Fiks Fare" siguruan prova të falsifikimeve që bënin drejtuesit e këtyre autoshkollave. Ata jepnin dëshminë e aftësisë për drejtim të automjeteve edhe personave që nuk bënin fare një kurs të tillë autoshkolle, duke iu siguruar edhe dokumente të falsifikuara. Ky skandal është bërë objekt i njëpasnjëshëm i emisionit "Fiks Fare". Ku pas saj reagoi Drejtoria e Transporteve, e cila pezulloi licencat e tri autoshkollave deri në zbardhjen e plotë të hetimeve. Prokuroria konstatoi elemente të veprës penale dhe pas hetimeve, dosjet ia kaloi gjykatës për të dhënë verdiktin përfundimtar.


G.Shqip