Imazhi i shqiptarëve në debat televiziv
Drejtuesja e debatit, Jeta Xharra: “Shqiptarë e kosovarë se duan njëri-tjetrin”
RTK kishte improvizuar një studio lëvizëse në mes të Tamizit për të hapur një debat televiziv me një grup qytetarësh dhe ekspertësh mbi çështjen e imazhit të shqiptarëve në Britani të Madhe. Debati u zhvillua në mjediset e anijes HMS President, e ankoruar përballë kullës OXO, në qendër të Londrës. Një grup “të privilegjuarish” mbushnin studion, ndërsa në bankinën e debatit televiziv, ishin të ftuara katër gra; Brikena Muharremi - avokate, Scarlet McGeire – eksperte për marrëdhëniet publike, Lala Meredith-Vula – fotografe dhe Gemma Juma – përfaqësuese nga Këshilli i Refugjatëve. Debati u zhvillua në gjuhën angleze dhe u drejtua nga gazetarja Jeta Xharra.
Debati
Jeta Xharra kishte ardhur në studio me imazhin më të keq të shqiptarëve në diasporë. Që në hapje të emisionit, ajo shpërtheu me një sërë informacionesh për të vërtetuar se shqiptarët në Angli dhe në përgjithësi në Perëndim ishin më shumë imazh i trafikantit, kriminelit, azilantit të pasofistikuar, importuesit të drogës dhe prostitucionit dhe shkelësit të ligjit. Fjalët e gazetares Xharra u kundërshtuan sëpari nga zonja Gemma Juma, përfaqësuese e Këshillit të Refugjatëve. “Nuk ka evidenca që të provojë se shqiptarët janë të përfshirë në krimin e organizuar dhe prostitucion më shumë se grupet e tjera etnike apo vetë vendasit”, tha ajo. Megjithatë, zonja Juma pranoi se ekziston një imazh jo i mirë mediatik mbi shqiptarët në përgjithësi. Sipas saj është i domosdoshëm një organizim më i mirë, duke filluar që nga shoqatat etnike dhe deri tek organizmat e qeverisjes lokale dhe qendrore për të luftuar imazhin e keq në media. Zonjushe Brikena Muharremi u shpreh: “Nëse ka një problem këtu, ky do të ishte se shqiptarët nuk punojnë së bashku.
Ekziston një lloj mosbesimi ndaj njëri-tjetrit mes shqiptarëve në migracion dhe kjo bën që ata të mos punojnë së bashku për të përmirësuar imazhin e tyre në Angli”. Në fjalën e saj, Scarlet McGeire, eksperte për marrëdhëniet me publikun theksoi se Britania e Madhe është një vend anti-emigracion. Sipas saj, shqiptarët erdhën në Britani të Madhe të papërgatitur. “Shumica ishin të paedukuar dhe nuk kishin shumë për të ofruar në marketin britanik. Kështu që shpejt, ata u gjendën në një pozitë të pafavorshme në një botë shumë ndryshe nga bota e tyre. Atyre u mungonte kultura e respektit ndaj ligjit, policit dhe shtetit”. Fotografja, Lala Meredith-Vula përforcoi idenë e gazetares Xharra se shqiptarët duhet të ndërgjegjësohen për imazhin jo të mirë të tyre. Sipas saj, shqiptarët duhet të bashkëpunojnë shumë më tepër dhe duhet të shqetësohen më seriozisht nga imazhi jo i mirë që i ndjek kudo.
Reagimet
Zoti Ralf Gjoni, kryetar e degës së shoqatës “Mjaft” në Londër mori fjalën për të thënë se shqiptarët nuk e meritojnë një imazh të keq në media. Ai hodhi poshtë idenë se shqiptarët e diasporës nuk janë të organizuar. “Unë do të thoja se grupe të tjera etnike na kanë zili për organizimet tona brenda komunitetit”. Ai akuzoi organizmat qeveritare britanike që nuk bëjnë sa duhet për të luftuar krimin, trafikun dhe veprimtarinë ilegale të disa personave. Gazetarja Xharra ndërhyri për të thënë se shqiptarët e Kosovës ishin të indinjuar ndaj shqiptarëve nga Shqipëria. “Të gjithë kosovarët që kam takuar unë, më kanë thënë se nuk dëshirojnë të shoqërohen me shqiptarët e Shqipërisë. Ata më thonë se të gjithë kriminelët dhe trafikantët janë nga Shqipëria dhe po prishin imazhin e të gjithëve”. Historiani Bejtullah Destani e hodhi poshtë këtë konstatim të gazetares Xharra. Ai vuri në dukje se ka plot shembuj të imazhit të mirë mes komunitetit shqiptar, por që sipas tij nuk u jepet popullariteti i duhur. Skenaristi, Tomorr Kokona tha se duhet të pranojmë së bashku se midis nesh ka elementë që po na dëmtojnë imazhin tonë si grup dhe më pas duhet të organizohemi për ta luftuar këtë imazh. Në këtë debat u përmendën disa shembuj pozitivë të organizimit të shqiptarëve në Angli, midis të cilëve edhe gazeta “Albanian Mail”. Rexhep Bajraktari nga Kosova tha se problemi i bashkatdhetarëve tanë qëndron në faktin se të gjithë duan të jenë në krye dhe nuk pranojnë të bashkohen rreth një iniciative të përbashkët. Sipas tij shumica e shoqatave shqiptare në Angli janë inekzistente dhe vazhdojnë të pretendojnë se përfaqësojnë shqiptarët si grup etnik.
Pjesa e dytë
Debati televiziv ishte konceptuar në dy pjesë. Tema e dytë kishte të bënte me atë se çfarë shqiptarët ne diasporë mund të bënin për Kosovën dhe Shqipërinë. Në fjalën hyrëse, gazetarja Xharra tha se bashkatdhetarët kishin qenë shumë të suksesshëm për të mbledhur të ardhura dhe armatim në periudhën e Luftës së Kosovës. Në kohë paqeje, sipas saj pritej një angazhim i mëtejshëm. Ish – zëdhënësi i qeverisë së Kosovës, Daut Dauti duke folur nga eksperienca e tij personale hodhi një lum akuzash ndaj drejtuesve dhe politikanëve në Kosovë. “Në Kosovë drejtojnë injorantët, njerëzit e paaftë. Ata kanë frikë nga studentët e Oksfordit dhe Kambrixhit që i kemi me shumicë këtu. Nuk do të kishte shanse për një shqiptar të diplomuar në Angli apo Perëndim për të gjetur një pozicion drejtues në qeverinë e Kosovës”, tha ai. Të njëjtën gjë bëri edhe Ralf Gjoni nga shoqata “Mjaft”. Sipas tij, në Shqipëri ekziston një frymë më ndryshe, por përsëri mbetej problem inkuadrimi i trurit të edukuar në Perëndim. “Ka disa projekte dhe janë bërë disa hapa të vegjël në këtë drejtim. Megjithatë, në Shqipëri nëpunësit të kanë shumë frikë dhe bëjnë cmos që të dështosh nëse vjen nga shkollat e Perëndimit”, tha ai. Të tjerë që e morën fjalën, dhanë dëshmi të tyret personale mbi përpjekjet që kishin bërë në këtë drejtim. Pothuajse të gjitha ishin histori dështimesh që fajësonin sistemet burokratike të Shqipërisë dhe Kosovës, mentalitetin ballkanik që mbyt çdo iniciativë të importuar.
Postuar më parë nga Korcar-L1
Krijoni Kontakt