Ja se cflitet/diskutohet ne medjat tona:
Po mua përse duhet të më vijë keq për serbët…!
• Arian ÇANI emisioni "ZONË E LIRË"
Kur mendoj se sa keq do ndjehesha sikur papritur të mësoja se Dropulli në Jug të Shqipërisë do të shpallte pavarësinë dhe do të ndahej përfundimisht nga vendi im… Kur e mendoj për një çast, dridhem i gjithi. Sepse them me vete: po tani ç'i mbeti më këtij vendi. Janë mbledhur bashkë gjithë më të fortët e botës dhe ...po luajnë e tallen me ne në këtë farë feje. Se nuk është puna që na iku një pjesë territori. Në fund të fundit, nuk është puna se mua më lidhte ndonjë gjë me ato treva (fjala që bie se në të vërtetë unë kam lidhje të forta me Dropullin), por fakti që po na pallojnë kështu në sy të gjithë botës dhe ne që nuk kemi asnjë mundësi ta bllokojmë këtë copëtim… Kjo është dramë e madhe, do t'i thosha vetes. Dhe jam i bindur që të njëjtën ndjesi do të kishin shumica e banorëve që nuk do jetonin në Dropull.
Se jo për ndonjë gjë, por unë si qytetar i thjeshtë që banoj në kryeqytet apo diku vërdallë nëpër Shqipëri, nuk do t'i hyja fare diskutimit nëse do të kishin apo jo të drejtë banorët e Dropullit atje në Jug të ndaheshin nga pjesa tjetër e vendit dhe të shpallnin pavarësinë e njëanshme. Jo. jo. As nuk do të merresha fare me të tilla histori. Sepse që kur kam lindur, më kanë mësuar natyrshëm në familje, shkollë e kudo se Shqipëria është 28 mijë kilometra katrorë nga Vermoshi në Konispol. Sepse që kur kam qenë i vogël i kam shëtitur ato treva për qejfin tim, duke kaluar pushimet për vite me radhë në detin e paparë të Jugut… Ndërsa tani që po kap të dyzetat, të më thoshin se pasnesër, e diel 17 shkurt 2008, Dropulli i sipërm dhe i Poshtëm do të shpallë pavarësinë, sigurisht që do të më dukej vetja një vemje e poshtëruar. Sa keq do të ndjehesha…
Se mirë që historia nuk është treguar aspak bujare me ne, duke na ndarë e copëtuar disa herë, por të paktën mos të na merrte tani në 2008-ën, një nga copat më të mira dhe më të pasura të vendit, Jugun. Dhe mirë që ata njerëz atje duan të jetojnë të ndarë, por që shumica e shteteve të kësaj bote, të mbështeste Dropullin dhe të na trajtonte ne si ca të egër që nuk kemi ditur të respektojmë të drejtat e tyre, kjo do të më dukej e papranueshme dhe e padrejtë. Unë për vete vdes për minoritarët dhe më lidhin aq shumë kujtime me ato treva, ndonëse ekzistenca e tyre nuk interferon fare prej vitesh në jetën time. E megjithatë, sa keq do të isha sikur ato fshatra aq të mirë që flasin greqisht të ndaheshin përfundimisht nga ky territor që për vite me radhë ka qenë i përbashkët...
Kjo që po të rrëfeja më sipër nuk ishte veçse një trill i imi, një moment fantazie. Thjesht për të kuptuar më shumë tjetrin, të huajin, atë që ndoshta e konsiderojmë ende "armik".
Kur isha i vogël më kanë mësuar se jeta është e padrejtë për njërën palë. Dhe është e drejtë për palën tjetër. Pasnesër është e diel, data 17 shkurt 2008. Ata do të festojnë, do të këndojnë, do të pijnë dhe do të dehen nga gëzimi i pavarësisë (së kushtëzuar). Sepse duke filluar nga e hëna, ata do të kenë flamurin e tyre, institucionet e tyre, korrupsionin e tyre. Sa mirë për kosovarët, por sa keq për serbët…!
Përgjigju Duke Cituar
)
Krijoni Kontakt