Java e frytshme

[LOGIC]

Duhet t’i përmbahemi katër gjërave gjatë javës së ardhshme dhe duhet që të inkurajojmë dhe motivojmë njeri tjetrin për të siguruar që do t’i bëjmë të gjitha. Ekspertët e kësaj fushe thonë: “Nëse dëshiron të bësh diçka atëherë fillo me një kusht, pastaj vrojto dhe në fund gjyko”. Tani dëshiroj që të vendosni një kusht për vete ose premtoni vetes se do të bëni si vijon:



1. Puna: çdo ditë duhet të punoni në mënyrë produktive

2. Ibadeti: çdo ditë duhet të bëni ibadet më shumë se minimumi

3. Ushtrimet: çdo ditë duhet të bëni ushtrime trupore

4. Jeta shoqërore: çdo ditë duhet të bëni diçka shoqërore



Pika e parë është për veten tuaj, e dyta për shpirtin tuaj, e treta për trupin tuaj dhe e katërta për familjen tuaj. Le të i përmbahemi atyre meqë ato përbëjnë vetë esencën e jetës. Idetë për këtë projekt i kemi nxjerr nga jetë përshkrimi i Pejgamberit a.s. Kemi analizuar ditën e tij, si e ka kaluar dhe kemi nxjerrë katër pikat e mësipërme të cilave ai u përmbahej çdo ditë. Dëshirojmë të imitojmë Pejgamberin a.s. në atë se si e kalonte ditën e tij. Ne nuk e kemi parë atë kurrë, e as që dimë si ka ecur, si ka buzëqeshur, por dimë se si përbëhej një ditë e tij dhe duhet ta imitojmë në këtë. Kur ta takojmë në Ditën e Gjykimit, dëshirojmë t’i themi: ”O i Dërguari i Allahut, të kemi imituar ty” (qoftë edhe për një javë)



Allahu xh.sh. thotë në Kur’anin famëlartë: Thuaj: "Nëse e doni Allahun, atëherë ejani pas meje që Allahu t'ju dojë, t'ju falë mëkatet tuaja, se Allahu është që fal shumë, mëshiron shumë” 3:31



Prandaj, nëpërmes të këtij projekti ne do t’a imitojmë Pejgamberin a.s. do të shpërblehemi bollshëm nga Allahu xh.sh. do të bëhemi njerëz më të mirë dhe do të çlirohemi nga pranga e humbjes së kohës.



I. Puna:



Për pikën e parë duhet të mundohemi që të punojmë apo mësojmë së paku 6 orë në ditë. Mesatarja e kohës neto të shpenzuar për punë në perëndim është 6-7 orë në ditë, ndërsa në Botën Arabe është vetëm 27 minuta. Koha neto d.m.th. pa ndërprerje, pa telefonata dhe pa lojëra – asgjë pos punës së përqendruar. Ky projekt është i përshtatshëm për secilin prej punëtorëve në punë e deri te amviset që kryejnë punët e shtëpisë dhe edukojnë fëmijët e tyre. Pejgamberi a.s. bashkonte ditën me natën, prandaj ishte në gjendje të zgjerojë këtë fe në botë për 23 vjet. Ai e bëri këtë që ne të bëhemi myslimanë, prandaj duhet të punojmë për t’i ndjekur hapat e tij. Omeri r.a. thoshte: “Kur të flejë? Nëse fle natën, i hi hak të drejtës së Allahut ndërsa nëse fle ditën do ti hyj në hak të drejtave të njerëzve”



II. Ibadeti:



Pejgamberi a.s. kryente 4 veprime të adhurimit çdo ditë: namazin e natës, dhikrin, leximin e Kur’anit dhe duanë. Ju mund të i falni së paku dy reqate namaz të natës dhe me këtë rast të lexoni së paku një faqe të Kur’anit. Pas namazit bëni dhikr dhe bëni dua, bile për disa minuta. Nëse bëni këtë atëherë ju keni kryer 4 llojet e ibadetit të cilat Pejgamberi a.s. kurrë nuk i ka lënë gjatë tërë jetës së tij.



E kam një recetë që mund të ju ndihmojë për të praktikuar këtë ibadet.



Zgjohuni 15 minuta para agimit dhe falni dy reqate dhe lexoni Kur’an gjatë këtij namazi. Kjo periudhë e kohës është koha më e preferuar për të falur namaz për Allahun xh.sh. Pastaj bëni dua sepse kjo është koha kur duatë më së shumti pranohen dhe pastaj falni namazin e sabahut. Dhe pas saj thoni lutjet e mëngjesit për pesë minuta. Në këtë mënyrë ju keni kryer të 4 llojet e ibadetit vetëm për 25 minuta. Tani paramendoni nëse mund të zgjoni edhe të tjerët të bëjnë këtë. Paramendoni se sa i lumtur do të jetë Pejgamberi a.s. po qese të gjithë myslimanët do të zgjoheshin për t’i bërë këto ibadete.



III. Ushtrimet :



Nëse i shikoni myslimanët e sotshëm, do të shihni se shumë njerëz lëngojnë nga përdorimi i duhanit dhe ata rrëzohen edhe nga sfidat më të vogla. Për të ngritur shëndetin trupor, është me rëndësi që secili nga ne të bëjë ushtrime fizike së paku 30 minuta në ditë, qoftë në shtëpi apo jashtë ku edhe femrat mund të merren me sport por në fusha të mbyllura. Pejgamberi a.s. ishte sportist. Kur garonte me gruan e tij Aishen, ai gjithmonë fitonte edhe pse ishte 60 vjeçar e ajo i kishte vetëm 18 vjet.



IV. Jeta shoqërore:



Planifikoni një interval prej 30 minutash në ditë kur do të uleni me prindërit e juaj dhe kushërinjtë ose për të kaluar me gruan dhe fëmijët e juaj. Paramendoni se si do të përmirësoheshin marrëdhëniet familjare po qese do të shpenzoni më shumë kohë bashkërisht. Kërkojmë nga ju gjysmë ore të kohës cilësore.



Paramendoni nëse të gjithë angazhohemi shumë për të kryer këto detyra. Allahu xh.sh. do të shikonte popullin e Muhammedit dhe do të shihte se ata janë duke kryer katër gjëra të cilat Pejgamberi a.s. i bënte gjatë tërë kohës. Mendoni se si do të përmirësohej marrëdhënia e juaj me Allahun xh.sh. gruan e juaj dhe punëdhënësin dhe si shkathtësitë e juaja dhe gjendja fizike përmirësohet vetëm brenda një jave.



Koha e nevojshme për të arritur këto është: 6 orë mësim + 25 minuta ibadet + 30 minuta ushtrime trupore + 30 minuta aktivitete shoqërore = totali është 8 orë dhe ju mbetet pjesa tjetër e kohës të bëni çka të doni. Provoni këtë projekt dhe do të jeni më të kënaqur me veten tuaj.



Por këtë herë nuk do të kërkojmë nga ju të na dërgoni rezultatet në web faqe. Synimi ynë është të zgjojmë secilin dhe njerëzit përreth tyre dhe, inshallah, në Ditën e Gjykimit do të marrim vesh për numrat. Çdo njeri duhet të jetë i sigurt në suksesin e tij personal. Në këtë mënyrë ju do të arrini sukses dhe njerëzit rreth jush do të arrijnë sukses dhe rezultatet do të shihen në Ditën e Gjykimit. Në atë ditë do të thuhet: “Filani dhe fallani kanë ndjekur hapat e Pejgamberit a.s. edhe pse nuk njihnin atë”. Paramendoni se sa i gëzuar do të jetë Pejgamberi a.s.



T’i shikojmë tani disa të dhëna statistikore.



Arabët shpenzojnë 60% të ditës së tyre duke shikuar televizorin, 28% të kohës janë të angazhuar në punë të parëndësishme e pastaj bien në gjumë në ora dy apo tre të mëngjesit.
Perëndimorët zgjohen në ora 6 të mëngjesit, flenë në ora 10 të natës dhe nuk argëtohen pos gjatë fundjavës.
Perëndimorët lexojnë gjatë tërë kohës; në autobus; në dhomën e pritjes së mjekut…
Arabët harxhojnë kohën e tyre duke lozur lojëra në internet apo duke bërë chat. Të rinjtë shpenzojnë kohën e tyre duke vozitur automjetet e tyre ose në kafenetë ndërsa vajzat e reja shpenzojnë nga dy tre orë ne telefon.


Mund të përfundojmë se ne arabët jemi duke funksionuar me 25% të energjisë sonë duke pamundësuar kështu që të arrijmë perëndimin ose të bëjmë ndonjë ndryshim të situatës pa marrë parasysh se sa i lutemi Allahut xh.sh. Mos harroni se çdo ibadet është i lidhur me kohën: namazi, zekati, haxhi.



“...faleni namazin në mënyrë të rregullt, pse namazi është obligim (për kohë) i caktuar për besimtarët.” 4:103
“…O i Dërguari i Allahut, cila është vepra më e mirë?”... “Namazi në kohën e vetë” u përgjigj ai.
Agjërimi…numër i caktuar i ditëve…“agjëroni kur të shihni hënën e re dhe ndërpritni agjërimin kur të shihni hënën e re.”
“Haxhi është në muajt e caktuar” 2:197
Zekati; duhet të kalojë një vit për ta dhënë atë.


Allahu xh.sh. na përkujton gjithmonë me ajetet apo mrekullitë e kohës;



“Ne i bëmë natën dhe ditën dy fakte (që dokumentojnë për fuqinë Tonë), e shenjën e natës e shlyem (e errësuam), e shenjën e ditës e bëmë të ndritshme që të mund të angazhoheni për shfrytëzimin e begative të dhuruara nga Zoti juaj, dhe që ta mësoni njehsimin e vjetëve dhe llogaritjen (e kohës). Ne kemi sqaruar çdo send në mënyrë të hollësishme.” 17:12



Allahu xh.sh. betohet në kohën në shumë ajete të Kur’anit. Allahu xh.sh. betohet në diçka kur ajo është tepër e rëndësishme.



“Pasha paraditen! Pasha natën kur shtrinë errësirën. 93:1-2
“Pasha agimin. Pasha dhjetë netët” 89: 1-2
“Betohem në kuqërrimin e horizontit pas perëndimit,” 84: 16

“Pasha kohën. Nuk ka dyshim se njeriu është në një humbje të sigurt.” 103:1-2



O ju myslimanë, keni kujdes se koha është e vlefshme. Edhe përkundër këtyre ajeteve, ende dëgjojmë të rinjtë që thonë: “Jam duke e mbytur kohën”. A nuk e kuptojnë se koha është vetë jeta dhe se janë vetëm duke mbytur vetveten? A është ky ummeti i Muhammedit a.s.? Një pjesë e madhe e kohës është duke humbur kot por në fund ne jemi duke humbur jetën tonë. Si mund të jemi të kënaqur me këtë situatë?



Shembujt vijues tregojnë se sa është e vlefshme koha:



Franca ka emëruar një ministër për kohën e humbur për të shfrytëzuar këtë kohë për gjërat që janë të dobishme për shoqërinë franceze.
Pejgamberi a.s ka thënë: “Nxitoni për të kryer 7 gjëra...” Mos vallë prisni vdekjen e befasishme, sëmundjen fatale apo varfërinë para se të kuptoni se çka keni humbur?
Në Kur’an thuhet: “Dhe ngutuni (me punë që meritoni) në falje mëkatesh nga Zoti juaj” 3:133. “Garoni njeri me tjetrin” 57:21


A kuptoni se sa është e vlefshme koha? Dijetarët e islamit çmonin lartë kohën e tyre shumë kohë para perëndimit. Në këtë mënyrë, ata arritën ringjalljen e tyre.



Hasan El-Basriu ka thënë: “Çdo ditë agon dielli dhe thotë: “O ju njerëz! Unë jam dita e re dhe jam dëshmitar i veprave të juaja. Më shfrytëzoni sepse nuk do të kthehem deri në Ditën e Gjykimit.”
“O i biri i Ademit, ti nuk je asgjë tjetër pos një grumbull i frymëmarrjeve. Kur frymëmarrja del, me të ka dalë një pjesë e jotja. Ashtu si ka shkuar kjo pjesë, së shpejti të gjithë ju do të shkoni”
Ibn Kajimi ka thënë: “Çdo frymë që del për ndonjë qëllim tjetër e jo për hir të Allahut xh.sh. do të shndërrohet në pikëllim dhe pendim në Ditën e Gjykimit.” Ai po ashtu ka thënë: “Shenja që Allahu ju urren është se e gjeni veten tuaj duke u marrë me çështje të parëndësishme; kështu që ju e humbni mundësinë e të shkuarit në xhenet. Ndërsa shenja që Allahu ju donë është se ju kryeni më tepër detyra se sa keni kohë”. Një thënie thotë: “Shejtani gjen punë për duart e papuna”. Nëse doni të kuptoni se a është Allahu xh.sh. i kënaqur me ju, atëherë mendoni: a rrini kot apo jeni të angazhuar?
El-Muhasibi thotë: “Do të kisha pasur dëshirë që koha të blihej me para për të blerë kohën ne atyre që e shpenzojnë kot dhe që janë jo mirënjohës, për ta shfrytëzuar pastaj duke i shërbyer Allahut xh.sh.”
Ibn Mesud ka thënë: “Për asgjë nuk ndiej keqardhje pos për ditën që më ka kaluar në të cilën nuk kam shtuar veprat e mia”
Ibn Akil ka shkruar “Librin e Arteve” që përmban 800 vëllime. Ai thoshte: “Unë nuk haj si ju, unë përziej bukën e thatë me ujë derisa të zbutet. Me këtë unë fitoj në kohë meqë e gëlltis ushqimin në vend se ta përtypi atë”


Ju duhet të dini se ku po shkon koha e juaj, duhet të dini se kur mund të dilni jashtë dhe kur mund të keni kohë të lirë. Nëse keni kohë të lirë mos e shpenzoni kot – një lojë e futbollit mjafton, nuk keni nevojë të shikoni 6 lojëra futbolli.



· Ebu Jusuf, që ishte nxënës i Ebu Hanifes, njëherë tha: “Ebu Hanife ishte duke vdekur kur kërkoi një laps dhe një copë letër për të zgjedhur një problem të jurisprudencës duke thënë “Nëse më ka mbetur vetëm edhe një moment për të jetuar, do ta shpenzoj në atë që e kënaq Allahun xh.sh.”

Një njeri kërkoi nga Ibn Xhevziu të ulet me të të bisedojë. Imami iu përgjigj: “Vetëm nëse e ndalon diellin së rrotulluari”. Në këtë mënyrë, këto gjenerata i ofruan njerëzimit shumë përparime. Allahu xh.sh. ka bekuar jetën e tyre; ata ishin në gjendje të bëjnë atë për të cilën neve do ta na duheshin vite të tëra.
Kur ishte 16 vjeçar Usame Ibn Zejd ishte udhëheqës i ushtrisë. Ebu Bekri dhe Omeri r.a. ishin nën komandën e tij. Pejgamberi a.s. ka thënë: “Pasha Allahun, Usame është plotësisht i përshtatshëm për këtë punë”. Usame ka luftuar kundër romakeve dhe ka fituar. Ashabët thanë: “Asnjë ushtri nuk është shpërblyer si ushtria e Usames dhe myslimanët nuk kanë pasur humbje”. Një njeri i suksesshëm punon edhe gjatë pushimeve të tija, nëse nuk gjen ndonjë punë të rregullt, ai punon vullnetarisht.
Saad ibn Muadhi pranoi islamin kur ishte 30 vjeçar dhe vdiq 37 vjeçar. Edhe pse jetoi vetëm 7 vjet si mysliman, froni i Allahut xh.sh. u tund për shkak të vdekjes së tij dhe 70.000 melaqe zbritën për funeralin e tij.
Mustafa Kemali luftoi okupimin e anglezëve dhe solli në gjunjë perandorinë angleze. Ai vdiq në moshën 33 vjeçare
Omer el-Muhtar udhëhoqi luftën kundër okupimit italian prej moshës 60 vjeçare deri në moshën 70 vjeçare.
Muhammed bin El-Kasim pushtoi Indinë kur ishte 17 vjeçar. Ai luftoi në 12 beteja për një vit dhe i fitoi të gjitha.
Zejd bin Thabit pranoi islamin qysh në moshën dhjetë vjeçare. Pejgamberi a.s. ia mësoi tërë Kur’anin përmendësh qysh në moshën e tij 12 vjeçare. Ai mësoi gjuhën hebraike në moshën 14 vjeçare dhe u bë përkthyes personal i Pejgamberit a.s. në moshën 16 vjeçare, ndërsa në moshën 17 vjeçare u bë një nga ashabët e zgjedhur për të shkruar shpalljen. Në moshën 19 vjeçare ai ishte kryesues i komisionit për caktimin e trashëgimisë. Në moshën 21 vjeçare ai u caktua për detyrën më të madhe në histori – për grumbullimin e Kur’anit dhe përmbledhjen e tij në një dorëshkrim.


Ne humbim një pjesë të madhe të kohës tonë: 8 orë flemë dhe 8 orë tjera i shfrytëzojmë për haje dhe nevoja tjera personale. Kjo do të thotë se 2/3 e kohës tonë është harxhuar ndërsa pjesa e mbetur është koha kur mund të arrihet produktiviteti. Paramendoni që çdo frymëmarrje e juaj është ruajtur në një dollap e cila do të hapet në Ditën e Gjykimit. A është ai dollap i zbrazët? Apo në to janë shërbime të shumta, ndihma, shpikje dhe ibadeti? Parafytyroni dikë duke gjuajtur 100.000 dollarë në det. Me siguri se do të konsiderohej i marrë dhe do të vendosej nën mbrojtjen e rreptë. Ju e bëni të njëjtën gjë nëse harxhoni kot kohën e juaj sepse pasuria juaj më e madhe janë frymëmarrjet e juaja në këtë jetë të kufizuar.



Detyrë shtëpie:



Do të përmbledhim atë në pikat vijuese:



Ju nuk mund të shfrytëzoni kohën e juaj në mënyrë të urtë pos nëse keni një qëllim në jetë. Nëse keni qëllim atëherë do të jeni syçelë për kohën e juaj dhe do ta ndani atë për të arritur qëllimin e juaj në mënyrë efikase.
Krijoni një plan si vijon:


Koha_____________________Puna_____________________ Koha e nevojshme



4:00 - 4:15

4:15 - 4:30

4:30 - 5:00



Nëse i përmbaheni këtij plani, do të shihni se 60% e kohës së juaj është humbje. A jeni të gatshëm për ndryshime apo të gjitha mbeten fjalë pa zotime? A jeni të gatshëm që të rirenditni kohën e juaj? Nëse me të vërtetë jeni gati, atëherë të merremi vesh për detajet që do të ju ndihmojnë të organizoni kohën e juaj.



Çdo ditë shkruani atë që planifikoni të bëni nesër.
Shkruani këtë në kalendarin ditor.
Përqendrohuni në punën e juaj dhe mos u ndalni për arsye të parëndësishme. Koha në Lindjen e Mesme humbet kot për shkak të ndërprerjeve të shumta. Angazhohuni fortë dhe do të vëreni shtim të madh të produktivitetit.
Zvogëloni numrin e orëve të gjumit; vetëm një orë në ditë d.m.th. ju shtoni 365 orë në vjet. Mund ta shfrytëzoni këtë kohë për të përgatitur disertacionin e juaj apo për të mësuar përmendësh Kur’anin. Paramendoni këtë!
Largohuni nga njerëzit e papunë dhe të pakujdesshëm
Bëni gjërat paralelisht. P.sh. derisa pritni në dhomën e mjekut apo derisa udhëtoni me autobus, lexoni një libër. Në vend se të harxhoni kohën duke pritur shfrytëzoni atë kohë dhe bëni diçka produktive. Një shembull i madh është Ibn Kajimi i cili shkroi librin e tij “Zad El-Maad” gjatë udhëtimit të tij për në haxh.
Keni kujdes nga koha e lirë që keni gjatë verës, përdoreni në mënyrë të urtë, p.sh. duke punuar vullnetarisht.
Çdo natë pyetni veten çka keni bërë atë ditë dhe së shpejti do të jeni të ngazëllyer me rezultatet e juaja. Vlerësoni se sa keni qenë në gjendje të kompletoni projektin e javës së frytshme. Mund të filloni po e zëmë me 30% por produktiviteti dhe efikasiteti i juaj do të rritet çdo ditë.
Në fund, kur mos dilni nga shtëpia pa kalendarin ditor.


Besoj se nëse jemi në gjendje të shfrytëzojmë kohën gjatë kësaj jave të efikasitetit, vlerësimi ynë mbi kohën, do të ndryshojë. Ju lutem, punoni me ne në këtë projekt. Vendosni një synim të qartë ku dëshironi të lartësoni kohën për hir të Allahut xh.sh. dhe nga dashuria ndaj Pejgamberit a.s. Shpresoj se isha në gjendje ta sqaroj mesazhin. Kërkoj ndihmë nga Allahu xh.sh. dhe shpresoj se do të takohemi javën e ardhshme.



Paqja dhe bekimet e Allahut qofshin mbi ju.

përkthyer nga: Ekipi Dar Al-Tarjama – Konvoji shqipëtar


Nga libri "Krijuesit e jetës"



AmrKhaled.net ©
Ky artikull mund të publikohet dhe shumëfishohet lirisht për nevoja personale, përderisa përmendet burimi i origjinalit. Për të gjitha nevojat tjera, paraprakisht duhet të pajiseni me aprovimin me shkrim të administratës së web faqes

[burbuqe1]

Përdorimi i mendjeve tona


Përmbledhje e episodit të kaluar


Kemi arritur në episodin e fundit të fazës së parë të këtij programi. Qëllimi i kësaj faze ishte çlirimi nga prangat. Deri tani jemi çliruar nga dhjetë pranga. Para se të vazhdojmë, dëshiroj të ju përkujtoj për projektin e javës së kaluar “Java e frytshme” e cila do të vazhdojë edhe këtë javë. Synimi ynë për “Javën e frytshme” ishte të kryejmë 4 gjëra çdo ditë: një për mirëqenien e shpirtit, një për mendjen, një për trupin dhe një për familjen.



Jemi pajtuar se këto katër gjëra janë: puna (apo mësimi), ibadeti, ushtrimet dhe aktivitetet shoqërore. Shkurtimisht do të përmbledh atë që u tha në episodin e javës së kaluar.



Puna


Duhet të synoni të keni çdo ditë 6 orë punë apo mësim pandërprerë. Kemi thënë se projekti është i inspiruar nga Pejgamberi a.s. dhe mënyra si ai e ka kaluar ditën.



Të gjitha projektet tona paraprake ishin të bazuara në veprime nga të cilat përfiton shoqëria në përgjithësi. Dëshiroj ta përdori këtë projekt për të ju treguar se mund të reformoni veten përbrenda pasi keni arritur të reformoni atë çka ju rrethon.



Ibadeti:


Dëshirojmë të adhurojmë Allahun xh.sh. ashtu si e ka bërë këtë Pejgamberi a.s. Së paku mund të provojmë të kryejmë 4 llojet kryesore të ibadetit për shkak të shpërblimit të madh të tyre. Këto janë mënyrat e afrimit te Allahu xh.sh. Ato janë:



- Namazi i natës – qoftë edhe dy reqate pas namazit të jacisë

- Duaja – qoftë edhe për një minutë pas namazit

- Dhikri – bile 5 minuta gjatë rrugës tuaj në punë

- Recitimi i Kur’anit – qoftë edhe një faqe gjatë namazit të natës


Jam i sigurt që ata të cilët kanë zbatuar në praktikë “Javën e frytshme” tashmë ndihen më të afërt me Allahun xh.sh. Kemi sugjeruar një metodë të lehtë për praktikimin e këtij ibadeti. Ngrihuni gjysmë ore para namazit të sabahut dhe falni namazin e natës për dhjetë minuta duke recituar Kur’an gjatë namazit. Pastaj pesë minuta para sabahut bëni dua në kohën më të mirë kur Allahu xh.sh. i pranon lutjet. Pastaj faleni sabahun dhe bëni dhikr e pastaj flini. Në këtë mënyrë ju keni kryer të gjitha ibadetet që kemi kërkuar për një periudhë të shkurtër kohore krahas namazeve të rregullta ditore.



Ushtrimet:


Ushtroni çdo ditë së paku gjysmë ore. Kemi zgjedhur fuqinë dhe gjendjen fizike të Pejgamberit a.s. dhe zhdërvjelltësinë e ashabëve si shembull për të ndjekur.


Aktivitetet shoqërore:


Ju duhet të shoqëroheni me kushërinjtë e juaj, të rrini me prindërit e juaj ose gruan dhe fëmijët së paku gjysmë ore në ditë apo kaloni pak kohë me fqinjët e juaj. Kontaktoni me familjet e juaja, bile nëpërmes telefonit, së paku gjysmë ore në ditë.



Deshi Allahu xh.sh. dhe disa nga ju keni përfunduar “Javën e frytshme” dhe melaqet do të regjistrojnë se ju keni ndjekur hapat e Pejgamberit a.s. Projekti i “Javës së frytshme ende vazhdon dhe sot si shtojcë do të largojmë pengesën e “pasivitetit të mendjes“.



Problemi ynë si myslimanë është se ne nuk mendojmë. Ne parafytyrojmë procesin e të menduarit si një proces të lodhshëm. Secili nga ne tenton të gjejë dikë tjetër që do të mendojë për të. Shumica e të rinjve besojnë se të menduarit është për të rriturit dhe se ata janë shumë të rinj për të menduar. Si rezultat ne nuk prodhojmë asgjë. Cili është prodhimi përfundimtar të cilin ne si myslimanë e prezantojmë njerëzimit?

A mund dikush të më tregojë se çka i kemi kontribuar njerëzimit në 100 vjetët e fundit? Përse nuk kemi çmime të Nobelit në mjekësi apo teknologji? Ky nuk është komplot kundër neve, siç mund të thotë dikush, e vërteta është se asnjëri nga ne nuk kemi prodhuar ndonjë prodhim të vlefshëm që meriton çmimin e tillë. Prej nga rrjedhin teoritë ndërkombëtare të ekonomisë dhe politikës? Të gjitha ato vijnë nga perëndimi.


Ku janë zbulimet tona artistike? Bile edhe video spotet tona – kopjohen ashtu si janë nga perëndimi. Ku janë zbulimet tona vetanake të cilat na përshtaten? Edhe sportet dhe taktikat e lojërave vijnë nga jashtë. Kështu jetojmë ne; ne jetojmë duke shfrytëzuar rezultatet e mendimit të të tjerëve. Ata zbulojnë automjetin, ne e ngasim dhe kjo vlen për kamerën, telefonat celular, çdo gjë. Ne nuk jemi asgjë tjetër pos konsumatorëve sepse ne nuk mendojmë. E di se këto fjali janë të rënda por fatkeqësisht ato janë të vërteta.



Meqë ra fjala, pengesa e sotshme është vështirë të thyhet dhe dallon nga projektet e mëhershme ku u bashkëngjitën një numër i madh njerëzish. Prandaj dëshiroj të them se qëllimi i episodit të sotëm është identifikimi i problemit dhe ta ndiejmë atë. Ne do të përpiqemi maksimalisht që të arrijmë sukses por ndoshta mund të dështojmë.


Janë dy lloje të resurseve: natyrore (uji, nafta) dhe njerëzore (më të rëndësishme janë koha dhe mendja). Është një debat konstante në shtetet tona lidhur me rritjen e përhershme të myslimanëve: a janë ata barrë apo ata sjellin dobi? Më vjen keq por ata duken se janë barrë, meqë grumbulli i njerëzve që nuk i kontribuojnë shoqërisë mund të jetë vetëm barrë.



Në vazhdim janë disa shembuj nga jeta e Pejgamberit a.s.



Pejgamberi a.s. ka thënë për myslimanët: ”Myslimani është sikur shiu. Kudo që shkon, prej tij ka bereqet”
Amr Ibn As kërkoi nga Ebu Bekri 1000 njerëz për betejë. Ai dërgoi vetëm një njeri - El Kaqan. Me mendjen dhe shpirtin e tij ai ishte i barabartë me 1000 njerëz. Prandaj si mund të pranoni ju që të jeni mysliman i cili është vetëm barrë për dikë tjetër?
Pejgamberi a.s. ka thënë: “Unë do të jem krenar me numrin e juaj në mesin e popujve tjerë në Ditën e Gjykimit.” A është kjo me kuantitet apo me kualitet? Ku mbeti kontributi ynë mental?


Ajo që kërkoj nga ju sot është që të mendoni. Qelizat tona nervore mund të ndryshken meqë nuk i përdorim ato.


Japonia është një shtet me resurse të pakta natyrore por një nga resurset më të rëndësishme të Japonisë është mendja e japonezëve. Në luftën e dytë botërore i tërë vendi ishte i shkatërruar; shtëpitë, fabrikat, si dhe infrastruktura, por mendja japoneze nuk u shkatërrua. Është një thënie qesharake e cila fatkeqësisht është e vërtetë. Çka mendoni se do të ndodhte po qese japonezët do të zhvendoseshin në një nga shtetet tona? Pas një viti do të shihnim ndërtime, prodhimtari, dhe fabrika ndërsa në Japoni nuk do të mbetej asgjë pos pulave në rrugë dhe ujërave të zeza që notojnë në rrugë.



Poenta këtu nuk qëndron te paratë apo resurset por te personi që vendos të ndërtojë apo të shkatërrojë.


Dua të ju parashtroj një pyetje. Përse jemi bërë të tillë? Përse nuk kemi ide të reja? Në bazë të hulumtimet që bëra, janë 4 arsye:

Arsimi: Arsimi është i bazuar vetëm në pranimin e informatave:



Arsimimi në shtetet tona bazohet në mësim dhe mbushjen e kokave me informata. Truri është shndërruar në një vend për deponim ku nuk ka vend për zbulime. Në perëndim nuk mësohet kështu. Ata propozojnë një temë për diskutim dhe sugjerojnë ku dhe si mund të hulumtoni atë temë. Duke u bazuar në hulumtimin e juaj pastaj ju ndërtoni opinione dhe ide të juaja. Mund të ketë disa aspekte të së njëjtës temë. Truri fillon të mësohet me alternativa. Rezultati i sistemit tonë është se nxënësi sheh temën nga një aspekt shumë i ngushtë. Nëse gjen ndonjë aspekt tjetër, ai është i paaftë të kuptojë apo të gjejë alternativa dhe mendja ndalet.



Rezultat tjetër është se nxënësi në sistemin tonë mëson shumë më shumë se ata në perëndim por rezultatet i ka më të pakta. Ekziston një studim që sugjeron se fëmijët egjiptian janë fëmijët më të mençur në botë – derisa të arrijnë moshën 5 vjeçare kur fillojnë të shkojnë në shkollën egjiptiane.



Shtëpia: vendimet a paarsyeshme



Në shumë shtëpi fëmijët janë të detyruar të dëgjojnë pa kuptuar arsyet. Ai sheh se si prindërit e tij marrin të gjitha vendimet. Është bërë një studim me një numër familjesh në vendet tona ku u përfundua se gjatë fëmijërisë prindërit shfrytëzojnë fjalën “Jo” mesatarisht 148.000 herë pa ndonjë arsye të dukshme ndërsa fjalën “Po” e shfrytëzojnë përafërsisht 40.000 herë. Si rrjedhojë, aftësitë mentale të fëmijës fillojnë të zvogëlohen. Për të evituar këtë, vendimet duhet të arsyetohen. Duhet të bisedoni me fëmijët tuaj sikur me të rriturit dhe duhet t’i konsultoni ata për të inkurajuar pjekurinë e tyre.



Edhe lloji i lodrave me të cilët lozin është i rëndësishëm. Zgjidhni lodra që zhvillojnë mendjen e fëmijës së juaj. A e dini se Evropa ka anuluar të gjitha tatimet për lodra meqë ato ushqejnë mendjen?



Mediat: Programi jo i seleksionuar



Mediat kanë si aspekt pozitiv ashtu edhe negativ. Por fatkeqësisht ne nuk zgjedhim. Ne shikojmë programe të këqija edhe pse ka programe që rrisin dijeninë tonë dhe përmirësojnë mendjen tonë. Askush nuk dëshiron të i shikojë ato.



Keqkuptimi i religjionit: vetëm disa nga ne kuptojnë se perisatja është akt i adhurimit



Mendimi është obligim islamik; ne jemi duke bërë mëkat nëse nuk mendojmë. P.sh. a e dini se pse duhet të lexoni fatihanë në namaz 17 herë në ditë (së paku)? Ne nuk lodhemi të mendojmë bile as për aktet e adhurimit?



Për shkak të 4 arsyeve të cekura më sipër, janë shfaqur gjenerata të rinjsh që nuk dinë si të mendojnë. Truri është sikur muskujt tjera të trupit. Shfrytëzoni atë se mund ta humbni. Ky është fakt shkencor.


Mendimi dhe qelizat nervore:


Shkencëtarët kanë zbuluar se secila qelizë nervore (në tru janë afro 140 miliardë) zhvillon lidhje përreth vetes që ndihmon rritjen e mendimit. Ata shtohen në numër kur ju mendoni ndërsa vdesin nëse nuk shfrytëzohen. Mendimi për të cilin flas nuk është mendimi i përditshëm por mendimi i matur që ndihmon zgjidhjen e problemeve të popullit tonë.



P.sh. merrni një djalosh të ri të papunë i cili dërgon CV-në e tij në shumë kompani por i cili as që mendon për ndonjë zgjidhje tjetër për problemin e tij të papunësisë siç është më shumë trajnim ose më shumë eksperiencë që do të i sjelli atij punën. Një shembull tjetër është kur dikush aplikon për një punë ku kërkohen 12 vjet eksperiencë. Pas intervistës i thonë atij se nuk është i përshtatshëm për punë meqë ka vetëm një vjet eksperiencë në punë të dobishme ndërsa 11 vjetët tjera janë vetëm përsëritje e asaj që ka mësuar në vitin e parë.


Ajo që është e çuditshme është se feja jonë flet më së shumti për mendjen



Pejgamberi a.s. ka thënë: “Allahu xh.sh. nuk ka krijuar qenie më të ndershme se mendja”
Pejgamberi a.s. pa disa ashabë se si lavdëronin një mysliman i cili kishte vdekur me ibadet. Ai tha: “Si ishte mendja e shokut të juaj?” Ata thanë: ”O i Dërguari i Allahut, ne po të tregojmë për ibadetin e tij e ti po na pyet për mendjen e tij” Ai tha: “ Në Ditën e Gjykimit njerëzit do të shfaqen para Allahut në bazë të mendjeve të tyre”
Transmetohet nga Aisha r.a. se ka thënë: “O i Dërguari i Allahut, çka i lartëson njerëzit në këtë botë?” Ai u përgjigj “Mendja” Ajo tha “O i Dërguari i Allahut, po çka i lartëson njerëzit në botën tjetër?” Ai u përgjigj “Mendja” Ajo tha: “Atëherë ku mbetet gjykimi për veprat e kryera?” Ai u përgjigj “Njerëzit veprojnë (vepra) vetëm në bazë të mendjes së tyre”.
Pejgamberi a.s. ka thënë: “Allahu ka krijuar mendjen dhe ka thënë: ”Betohem në krenarinë time dhe në shenjtërinë time se nuk kam krijuar krijesa më të nderuara se ju njerëzit; në bazë të veprave të juaja, unë jap, shpërblej dhe dënoj”
Pejgamberi a.s. ka thënë: “O Ebu Derda, nëse njerëzit i afrohen Allahut me veprat dhe punë e tyre të mira, ti duhet t’i afrohesh Allahut me mendjen tënde (meqë mendja është ajo që inkurajon vepra të mira dhe ibadetin)
Dëshmitë për shfrytëzimin e mendjes në Kur’an:

Shikoni këto fjalë që i referohen mendimit në Kur’an:

Fjala “mendjehollësi” është përmendur 54 herë në Kur’an.
Fjala “kuptim” është përmendur 48 herë në Kur’an.
Fjala “konsideroni” është përmendur 48 herë në Kur’an.
Fjala “përsiatni” është përmendur 122 herë në Kur’an.
Fjala “përkujto” është përmendur 210 herë në Kur’an.
Fjala “urtësi” është përmendur 20 herë në Kur’an.
Po ashtu fjalët sikur “Shikoni” dhe frazat si “prandaj a nuk shihni” nënkuptojnë analizë dhe të kuptuarit në kontekstin Kur’anor.

Sa për informatë, është dëshmuar se një përqindje e madhe e inteligjencës përfitohet nëpërmjet ushtrimeve dhe tentimeve. Kur’ani është libër i shenjtë që kërkon nga ne të përdorim mendjet tona, bile-bile kemi edhe një formë të posaçme të ibadetit që është plotësisht i bazuar në ushtrimin e mendjes. Ky është një lloj ushtrimi të cilin e kanë praktikuar pejgamberët dhe e cila qon kah njohja e Allahut xh.sh. Është kjo përsiatja mbi krijimtarinë e Allahut xh.sh.

Profetët dhe të zhyturit në mendime – persiatja:

Dhjetë vite para shpalljes, Pejgamberi a.s. kishte zakon të meditonte në shpellën Hira.

Meditimi ishte po ashtu mënyra profetike e Ibrahimit a.s. Ajeti Kur’anor thotë: “E kështu Ibrahimit ia mundësuam t'i shohë madhësitë e qiejve e të tokës për t'u bërë edhe më i bindur.” 6:75

Thënjet mbi soditjen

El Hasan ka thënë: “Një orë meditimi është më mirë se një vjet ibadet”. Omer Ibn Abdul Aziz ka thënë: “Meditimi është vepra më e mirë e adhurimit”



Meditimi është ibadet i cili mund të bëhet nëpërmjet trajnimit por ai shumë pak praktikohet. Prandaj ejani ta praktikojmë bashkërisht.

Mendoni për fillimin e krijimit:

Ajeti Kur’anor thotë: ”Thuaj: "Udhëtoni nëpër tokë e shikoni se si filloi krijimi,..” (29:20)

Një grup njerëzish erdhën te Pejgamberi a.s. dhe e pyetën: “O i Dërguari i Allahut, si ishte në fillim” Ai u përgjigj “Në fillim Allahu ishte vetëm, asgjë tjetër nuk ekzistonte” mendoni për një çast për këtë. Paramendoni madhësinë e juaj në krahasim me fuqinë gjithëpërfshirëse të Allahut xh.sh. Në këtë mënyrë do të gjeni shumë ide që dalin nga ky fakt.

Paramendoni se si çdo gjë do të përfundojë. Allahu xh.sh. thotë: “Dhe i fryhet Surit dhe bie i vdekur çka ka në qiej dhe çka ka në tokë, përveç atyre që do Allahu (të mos vdesin), pastaj i fryhet atij herën tjetër, kur qe, të gjithë ata të ngritur e presin (urdhrin e Zotit).” 39:68. Gjithësia ka filluar me një fryrje dhe do të përfundojë në të njëjtën mënyrë. Një ajet tjetër Kur’anor thotë: (Përkujto) Atë ditë kur Ne e palojmë qiellin sikurse palimi i fletëve në libër. Ashtu sikundër e kemi filluar krijimin (tuaj), e rikthejmë. Ky është obligim Yni, e Ne e bëjmë këtë. 21:104. Merrni këtë ajet dhe mendoni sa të parëndësishëm jemi ne dhe sa jemi nevojtarë për ndihmën e Allahut xh.sh. Po qese do të mendonit për këtë fakt për gjysmë ore, kurrë më nuk do të ishit të padëgjueshëm ndaj Tij. Për më tepër, do ta dashuronit dhe do ta çmonit atë.

Meditoni për krijimin e Diellit

Energjia e Diellit prodhohet nga fuzioni i 650 milion ton helium me 650 milion ton hidrogjen që bëhet në një distancë prej më tepër se 20 milion km larg nga Toka. Distancën që kalon ajo gjatë lëvizjes së saj në një sekondë tejkalon distancën që njeriu mund të ecë për 500 vjet.

Tani mendoni për ajetin Kur’anor: “Edhe Dielli udhëton për në kufirin e vet (në cakun përfundimtar). Ai është (udhëtim) përcaktim i ngadhënjyesit, të dijshmit.” 36:38. Potenciali i Diellit është i madh dhe ai është krijuar për ne. Perëndimi po e shfrytëzon, ata janë duke bërë hulumtime mbi energjinë diellore edhe pse klima e vendeve tona është me e nxehtë se ajo e tyre dhe ne pranojmë më tepër energji diellore se ta. Është dashur të jemi ne ata që bëjnë hulumtime të tilla, por fatkeqësisht ky nuk është rasti.

Meditoni mbi sistemin solar

Mendoni për numrin e planetëve që rrotullohen përreth qendrës së Kashtës së Kumbarës që përbën më shumë se 200 milion yje nga të cilat Dielli është vetëm një. Kjo galaktikë është vetëm një nga dhjetëra miliona galaktika të cilat konsiderohen të jenë vetëm një pikë në qiellin e parë. Pejgamberi a.s. ka thënë: “Qielli i parë është vetëm grimcë rëre në krahasim me qiellin e dytë, qielli i dytë është sa grimca e rërës në krahasim me qiellin e tretë e kështu me rrallë deri te qielli i shtatë”

Paramendoni këtë mbretëri me qëllim që të shfrytëzoni mendjen e juaj dhe të përfitoni nga ajo. Ju në mes të mbretërisë nuk jeni asgjë pos një grimce por prapëseprapë jeni më të vlefshëm për Allahun xh.sh. për shkak të aftësisë së të menduarit.

Meditoni për trupin tuaj

Allahu xh.sh. ka krijuar shumë sisteme në trupin e juaj që funksionojnë pa angazhimin e juaj në mënyrë që të keni mjaft kohë që të meditoni. P.sh. mushkëritë punojnë 20.000 herë në ditë dhe zemra rrah 72 herë në minutë.

Ato punojnë pa vullnetin tuaj dhe nuk kërkojnë nga ju asnjë përpjekje.

Dijetarët myslimanë dhe meditimi

Dijetarët myslimanë kanë zbuluar trigonometrinë, algjebrën, logaritmet dhe konceptin e zeros (meqë numri zero nuk shfrytëzohej më herët). Ata po ashtu zbuluan anatominë e syrit dhe anatominë e njeriut. Për më tepër, ata ishin në gjendje të përcaktojnë diagnozën e sëmundjeve si fruthin dhe linë. Ne, myslimanët ishim të parët që bëmë operacione për largimin e bajameve dhe gurrëzave si dhe operacionet e rrugëve të urinës, dhe të parët që kemi zbuluar bakteret dhe mikrobet pa mikroskop. Myslimanët po ashtu kishin iniciativa për zbulimin e formës sferike të Tokës dhe të cilët kanë vizatuar hartat relievore. Ne ishim të parët që vumë themelet e sociologjisë dhe gramatikës ndërsa roli i perëndimit ishte zhvillimi i këtyre shkencave. Por tani, meqë perëndimi është prodhues ai ka dorën e sipërme ndërsa ne kemi dorën e poshtme meqë jemi vetëm konsumatorë.

Prodhimi më i rëndësishëm i njeriut është ideja. Mendoni për këtë:

Ideja e gropimit të hendekut që u sugjerua nga Selman el Farisiu të cilën e pranoi Pejgamberi a.s.
Pejgamberi a.s. ishte i pari që përdori idenë e minave gjatë rrethimit të Taifit kur njëri nga ashabët sugjeroi të fusin gozhda në tokë për të parandaluar përparimin e kuajve të armikut.
Hasan Ibn Hajtham shtroi bazën e optikës dhe është përgjegjës për gjetjen e fenomenit të thyerjes dhe reflektimit të dritës. Ai e quajti “Qamara” (kabinë) nga e cila rrjedh fjala angleze “camera”. Ai përdorte fjalinë vijuese në parathënien e të gjitha librave të tij: “Derisa të jem gjallë do të përpiqem, do të përdori mendjen time dhe do të shfrytëzoj potencialin tim për të arritur këto tre qëllime: 1. Që kërkuesit e diturisë të përfitojnë gjatë jetës time dhe pas vdekjes time 2. Të krijoj furnizim fetar për varr dhe për Ditën e Gjykimit dhe 3. Për përparimin dhe lartësimin e myslimanëve.”
Ali Ibn Ebi Talib ishte vetëm 10 vjeçar kur Pejgamberi a.s. e thirri në islam. Ai kërkoi nga Pejgamberi a.s. që ti jepte rast të mendojë deri të nesërmen. Ai pastaj u kthye dhe pyeti Pejgamberin a.s. çfarë i kishte thënë një ditë më parë, dhe kur Pejgamberi a.s. bëri këtë Aliu e tha shehadetin.
Një ditë Pejgamberi a.s. takoi Rabi’a Ibn Ka’b El Eslamin. Rabi’a kishte bërë një vepër të mirë dhe Pejgamberi a.s. ishte shumë i kënaqur me të e i tha: “Kërko nga unë çfarë të dëshirosh dhe unë do të plotësoj dëshirën”. Rabi’a u përgjigj: “O i dërguari i Allahut kjo është gjë e madhe, më lejo të mendoj”. Pejgamberi a.s. buzëqeshi dhe u pajtua. Të nesërmen ai u kthye dhe Pejgamberi a.s. e pyeti: “A ke menduar o Rabi’a”. Ai u përgjigj: “Mendoj se nëse kërkoj diçka të kësaj bote ajo do të zhduket shpejtë, prandaj kërkoj që të shoqëroj në xhenet”. Pejgamberi a.s. e pyeti a ka edhe ndonjë dëshirë tjetër e ai u përgjigj: “Jo, kam vendosur” (që do të thotë së kishte menduar në tërësi)
Gjatë betejës El Kadisije, kuajt e myslimanëve ishin të tmerruar nga pamja e elefantëve të armikut. Një nga ashabët u kujtua që të bëjë një figurë të elefantit nga balta që kali i tij të mësohet me pamjen e elefantit. Kjo ide jo e zakonshme në fakt kishte sukses dhe kuajt e myslimanëve nuk frikoheshin më nga elefantët. Kjo dredhi e vogël ishte çelësi i suksesit të myslimanëve në këtë betejë.
Merreni për shembull Luftën e tetorit të vitit 1973. Në atë kohë Izraeli kishte vendosur vijën mbrojtëse Barlev që konsiderohej pengesë më e madhe dhe më e padepërtueshme e asaj kohe. Ajo përbëhej nga post blloqet shumë të mbrojtura para barrierave nga rëra që ishin të gjata 22 metra (që është gjatësia e ndërtesës 8 katëshe) përgjatë kanalit të Suezit. Ekspertët Rus sugjeruan dy mënyra për të shkatërruar këtë barrierë të fortifikuar. Ose të bombardohet me bombë atomike ose të lëshohen 100.000 ushtarë me parashuta mbrapa barrierës (për këtë do të nevojiteshin 4000 aeroplanë). Me fjalë të tjera ishte ky një mision i pamundur. Më pastaj një oficer i ultë u kujtua për një ide. Ishte kjo ide e thjeshtë që nuk u konsiderua seriozisht bile edhe u përqesh. Ideja e tij ishte që të drejtohen pompa të ujit kah barrierat e rërës dhe të lejojnë ujin të i shkatërrojë ato. Ideja u përdor dhe pati sukses të madh meqë për një ditë ata shkatërruan 3000000 m² të barrierës duke bërë 81 vrima në rërë vetëm e vetëm me forcën e ujit .


Projekti i javës

Ekspertët rekomandojnë disa pika për të zhvilluar aftësitë e mendimit, të cilat dëshiroj të i shkruani. Ato janë:

Përcaktoni qëllimin tuaj të jetës (kjo ndihmon trurin e juaj të funksionojë)
Zhvilloni pasion për lexim për të përfituar nga përvoja e autorëve të publikimeve. Ne do të ju ndihmojmë duke ju rekomanduar libra të dobishme në fusha të ndryshme në web faqen tonë www.amrkhaled.net dhe mos harroni se fjalia e parë hyjnore e shpallur për ne ishte “Lexo”. Një studim i njerëzve më kreativ tregoi se ata lexojnë mesatarisht 50 libra në vit. Mendoj se ky është numër i arsyeshëm dhe se nuk është i pakapshëm. Gjithmonë mbani një laps dhe një fletë kur të lexoni, për të shkruar komentet e juaja dhe të mendoni për atë që keni lexuar. Jam i sigurt se do të gjeni shume ide dhe mund të ju siguroj se truri i juaj do të punojë plotësisht ndryshe pas gjashtë muajsh.
Shoqërohuni me të tjerët, qoftë nëpërmjet udhëtimeve apo duke punuar gjatë sezonit veror meqë është treguar se shumica e njerëzve që kanë arritur sukses ishin duke punuar që nga ditët kur ishin nxënës të shkollës së mesme. Po ashtu është zbuluar se 90% e inteligjencës përfitohet me përvojë e jo me mbyllje vetëm duke dëshiruar që intelekti i tij/saj të zhvillohet.
4. Nxitni mendjen tuaj të prodhojë ide duke i ofruar informata të dobishme meqë nëse i ofroni mendjes tuaj këngë, biseda dhe vallëzime rezultati do të jenë gjepurat e njëjta ndërsa nëse i ofroni mendjes njohuri, religjion dhe Kur’an rezultati është gjithmonë madhështor.

5. Zgjidhni atë se çka do t’i prezantoni mendjes tuaj dhe zvogëloni vëllimin e informatave të parëndësishëm që keni në mendje për të zmadhuar kapacitetin e memories së juaj. Buhariu ka mësuar përmendësh një milion hadithe. Kur e pyetën se si i mësoi këto hadithe ai u përgjigj: “Unë nuk preokupoj mendjen time me asgjë tjetër pos hadithit”.

6. Përdorni imagjinatën tuaj. Paramendoni se jeni udhëheqës i këshillit të drejtorëve në kompaninë e juaj ose që jeni kryetar. Do të ju kujtohen shumë ide të mira.

7. Mendoni bashkë me të tjerë që ndihmojnë aktivizimin e mendjes tuaj dhe që ju ndihmojnë të prodhoni ide mahnitëse.

Në vazhdim, dëshiroj të ju jap disa këshilla.

Formoni shprehinë e shëtitjes vetë apo shpenzoni pak kohë në vetmi duke menduar, qoftë edhe për 10 minuta
Përdorni fletoren që të shënoni mendimet tuaja
Ndryshoni rutinën e juaj një herë në javë
Udhëtoni diku tjetër qoftë edhe për një periudhë të shkurtër kohore
Projekti “Java e frytshme” ende vazhdon dhe në të njëjtën kohë Pejgamberi a.s. do të jetë i kënaqur me ne në Ditën e Gjykimit. Me këtë episod po e përfundojmë fazën e parë të programit tonë.

Paqja dhe bekimet e Allahut qofshin mbi ju.



perkthyer nga: Ekipi Dar Al-Tarjama – Konvoji shqipëtar

Nga libri "Krijuesit e jetës"



AmrKhaled.net ©
Ky artikull mund të publikohet dhe shumëfishohet lirisht për nevoja personale, përderisa përmendet burimi i origjinalit. Për të gjitha nevojat tjera, paraprakisht duhet të pajiseni me aprovimin me shkrim të administratës së web faqes