VIZITA HISTORIKE E PRESIDENTIT BUSH
Shkruan: Xhavit Haliti
Të gjithë e mësuam lajmin se Presidenti amerikan, Xhorxh Bush, mund të vizitojë Prishtinën, pas përfundimit të Samitit të NATO-s në Bukuresht, që do të zhvillohet në datat 2-4 prill. Lajmi i madh na ka gëzuar shumë. Kosova do të presë përfaqësuesin më të lartë të një shteti që na ka mbështetur fort që në fillimet e kauzës sonë e deri në realizimin e saj.
Për një vizitë të mundshme të Presidentit amerikan në Kosovë u fol edhe një vit më parë, kur Xhorxh Bush vizitoi Tiranën, mirëpo statusi i pazgjidhur i Kosovës deri në atë kohë, bëri që Prishtina të mos futej në axhendën e tij.
Tashmë që Kosova ka shpallur pavarësinë dhe çështja e statusit u përmbyll me sukses, është shumë e mundur edhe vizita e Presidentit amerikan. Ai vjen në Kosovë pas një misioni të përmbushur, vjen të marrë nga afër mirënjohjen e popullit të Kosovës, që kurrë nuk u ndje i tradhtuar nga SHBA dhe aleatët.
Kosova do ta presë Presidentin e Amerikës krahëhapur, me një gëzim krejtësisht të motivuar. Ardhja e tij në Kosovë do të përbëjë kulmin e gëzimit të festës për pavarësinë.
Në krah të Presidentit Bush pritet të jenë në këtë ditë edhe protagonistët e çlirimit të Kosovës, ata që mbështetën luftën e vitit 1999, si ish-presidenti amerikan Bill Klinton, Sekretarja e Shtetit Madalene Allbright, ish-kryeministri britanik Tony Blair etj.
Këta emra të nderuar të SHBA vijnë të gjithë së bashku në Kosovë, për të rikonfirmuar edhe një herë mbështetjen për shtetin e pavarur të Kosovës, që serbët rreken ta quajnë ende josovran.
Shtetet e Bashkuara të Amerikës ishin të parat në botë që deklaruan se njohin zyrtarisht pavarësinë e Kosovës, shtetit më të ri në Evropë, dhe bënë të ditur se shumë shpejt do të emërojnë ambasadorin e tyre në Prishtinë. Fuqia e botës mbështet pareshtur Kosovën dhe për këtë natyrisht që ndihemi krenarë, ndihemi të nderuar, ndihemi dhe të ngushëlluar për mijëra jetë që na humbën, por më së shumti na bën të ndiejmë më shumë përgjegjësi për atë që duhet të bëjmë.
Ardhja e Presidentit amerikan, Xhorxh Bush
Sa gëzim dhe mbështetje. Përbën edhe një detyrim moral për t‘i dëshmuar atij se kemi filluar të jetojmë denjësisht si qytetarë të një shteti të pavarur, se dimë të zbatojmë ligjet që vetë i kemi bërë, se dimë t‘i respektojmë pakicat dhe se ato ndihen në Kosovë si në shtëpinë e tyre.
Sot, pas kaq vjetësh, më kujtohet vizita e ish-presidentit Klinton në Kosovë, në vitin 1999. Ishte vizita që shënoi fundin e dhunës dhe genocidit serb, që simbolizoi fitoren e botës perëndimore të qytetëruar mbi primitivizmin millosheviçian dhe paralajmëroi fillimin e një rruge të gjatë për të arritur qëllimin e madh. Ndërsa kjo e Presidentit Bush mbyll rrugën e gjatë të përpjekjeve diplomatike për zgjidhjen e statusit të Kosovës dhe paralajmëron një epokë të re; atë të luftës së madhe për konsolidimin e shtetit më të ri në Evropë. Vizita historike do të japë sinjalin për fillimin e përpjekjeve po aq të mëdha sa të deritanishmet, për arritjen e standardeve që do ta bënin Kosovën një shtet të merituar për integrimin euro-atlantik.
Dhe Kosova do ta bëjë, sepse asgjë nga ato që i ka ofruar historia nuk e kanë penguar të ndihet një vend i vërtetë evropian mu në zemër të Evropës. Këtë do të kemi rastin dhe nderin ta dëshmojmë edhe një herë përpara Presidentit të Amerikës në ditët e para të prillit, kur pranvera sapo kanë hyrë...
Përgjigju Duke Cituar
Krijoni Kontakt