Lajmi më i fundit nga Kosova në ditën e shpalljes së pavarësisë

[Davius]

SHBA: Gjysmë milonë shqiptarë në sheshet e Amerikës për të festuar

Gjysmë milonë shqiptarë dalin në sheshet e rrugët e Amerikës për të festuar Pavarësinë e Kosovës, njofton korrespodenti i agjencisë së lajmeve INA në Uashington.

Në të gjithë territorit e Shtetve të Bashkuara të Amerikës dhe Kanada, vendbanimet e shqiptarve, kanë filluar festimin e një feste që këtu, ka më shumë se 100 vjet që e kanë pritur, shqiptarët e Amerikës, prej shpalljes së Shqipërisë më 1912. Janë më shumë se 500 mijë shqiptarë, fënijë,
të rijë e të reja, gra e burra pleq e plaka, që me lotë gëzimi në sy po e presin lindjen e diellit, nesër diellin e kësaj dite të bardhë dhe të rëndësishme që shqipëtarët me në fund këto lotë shekullorë, ti shëndrojnë në gëzim.
Asnjëherë, në historinë e Amerikës, nuk janë kaq shumë shqipëtarë, asnjehere nuk janë parë kaq shumë flamurë kuq e zi që thuaje se kanë mbuluan Washingtonin, New Yorku, Detroitin, Çikagon, Bostonin, Floridën, Kaliforninë, Teksasin, Arzizonën,New Jersey, Kenektiket,Pensillvaninë, Karolinëne Veritu e të Jugut, Atlantën, Toronton, Montrealin, Vankuverin,Visnskosin.

Shqipëtarët nga e gjithë Amerika e Kanadaja kanë dalë në rrugë e sheshe për të festuar këtë
ditë të madhe ditë historike e cila vjen menjër pas asaj të 1912. Sot, të gjithë po festojnë, duke mos harruar se kemi me vete mikun e madh dhe të përjetëshë Amerikën! E gjithë kjo po ndodh kur vetë amerikanët nesër fetojnë ditën e Presidentit të SHBA- Presidnent Day . Çdo shqiptarë në Amerikë po kërkon të bëhet neser pjesë e historisë së kombit tonë.
Në zëmer të qytetit 12 milion banorësh, metropolit të botës New York, në sheshin e famëshëm Time Square, do të defilohet nga studentë, dhe nxënës shqiptare të shkollave të ndryshme me veshje kombëtare, flamurin kuq e zi, dhe do të kendohët e vallzohet në shesh shqip. Më pasë festa do të kalojë në shtëpinë e Vatrës, Vatrës, së kolosëve të kombit . Në shtëpinë Federatës
Panshqiptare të Amerikës VATRA, e udhëhequr nga mëmëdhetarët e shquar, F.Konica,
F. Noli, K. Dako , K. Thanasi etj. dhe deri sot tek A. Karagjozi. Më pasë Lëvizja e Legalitetit për Amerikë,ka ftuar edhe Ligën Qytetare Shqiptaro Amerikanë ta festoin së bashku. Ish luftëtarët e Bataloinit luftarak "Atlantiku" dhe fondacioni Vendlindja Thërret, nga ai vend ku u nisën për të luftuar, Regency Hotel, në Yonkers, do të mblidhen jo për të luftuar, por për të festuar.

(Beqir Sina, korrespodenti nga Nju Jorku )

INA-ONLINE

[Davius]

Mblidhet kuvendi për pavarësinë e Kosovës


Kryeministri i Kosovës Hashim Thaçi i kërkoi Kuvendit të Kosovës që të miratojë e deklaratën e pavarësisë.

"Kam kërkuar të thërras Kuvendin e Kosovës në seancë të jashtëzakonshme," tha zoti Thaçi para gazetarëve duke lexuar kërkesën që i është bërë kuvendit nga ai dhe presidenti i Kosovës Fatmir Sejdiu.

Rendi i ditës i seancës së jashtëzakonshme të Kuvendit të Kosovës do të jetë: Miratimi i Deklaratës së Pavarësisë së Kosovës dhe miratimi i simboleve shtetërore të Kosovës.

"Është koha të marrim vendime që do ta bëjnë vendin tonë pjesë të kombeve të lira dhe të pavarura," tha zoti Thaçi.

Ai shtoi se bisedimet për përcaktimin e statusit të Kosovës kanë përfunduar dhe se ka ardhur koha për të zbatuar planin Ahtisari.

Ai tha se autoritetet kosovare do të mirëpresin mision e BE-së.

BBC ALBANIAN

[Davius]

Kuvendi i Kosovës fillon seancen e jashtëzakonshme në ora 12:00

Kryeministri i Kosovës, Hashim Thaçi, pak minuta më parë, në Qendrën e Mediave në Prishtinë, bëri të ditur se ai dhe presidenti i Kosovës, Fatmir Sejdiu, i kanë dorëzuar sot një kërkesë kryeparlamentarit, Jakup Krasniqi, për thirrjen e një seance të jashtëzakonshme ku do të miratohet Deklarata e Pavarësisë dhe nxjerrja e simboleve shtetërorë. Ai tha se seanca e jashtëzakonshme e Kuvendit do të fillojë në ora 12 .
“Unë dhe presidenti Sejdiu i kemi dorëzuar një kërkesë kryeparlamentarit Krasniqi për thirrjen e një seancë të jashtëzakonshme të Kuvendit të Kosovës. I kemi bërë thirrje Kuvendit që të mblidhet dhe të miratojë Deklaratën e Pavarësisë së Kosovës dhe nxjerrjen e simboleve shtetërore të Kosovës”, tha ai.

Kryeministri Thaçi, tha se kryepalrmanetari Krasniqi tani ndodhet në takim me kryesinë e Kuvendit.

RTK LIVE

[Davius]

Sot shpallet Pavarësia e Kosovës

Në një seancë parlamentare të jashtëzakonshme, Kuvendi i Kosovës sot pritet të shpallë pavarësinë e Kosovës. Kryeqyteti i Kosovës, Prishtina, qysh mbrëmë është mbushur me qytetarë nga të gjitha trevat shqiptare dhe nga diaspora, që kanë filluar të festojnë pavarësinë me flamuj kombëtar dhe të shteteve që kanë premtuar njohjen e shpejt të shtetit më të ri në botë.

Seanca plenare pritet të fillojë në orën 15:00. Paraprakisht kryeministri i Kosovës, Hashim Thaçi, do të kërkojë mbledhjen e kësaj seance, ndërsa më pas do të mblidhet kryesia e kuvendit dhe do të mbahet takimi i shefave të grupeve parlamentare.

Sipas itinerarit të botuar nga mediat, pas shpalljes së pavarësisë, në Qendrën e Mediave në hotelin “Grand”, në ora 18.00, tre liderët e Kosovës; presidenti Fatmir Sejdiu, kryeparlamentari Jakup Krasniqi, dhe kryeministri Hashim Thaçi, do t’iu drejtohen medieve.

Ndërkaq në ora 18:30 do të bëhet zbulimi i Obeliskut të Pavarësisë përballë Pallatit të Rinisë në Prishtinë, për të vazhduar me pastaj festa (në ora 19.00) në sallën “1 Tetori” ku do të mbahet koncerti i Filarmonisë së Kosovës, ndërsa një orë më vonë, do të mbahet një koncert i madh në Sheshin e Prishtinës.

Kryetari i Kosovës, Fatmir Sejdiu dhe kryeministri Hashim Thaçi në ora 22:50 do t’i drejtohen masës, ndërsa në ora 23:00 do të hidhen fishekzjarrë nga katër pjesë të ndryshme të Prishtinës.

Afro 2.000 gazetarë vendor dhe të huaj janë akredituar në Prishtinë për ta përcjellë këtë ngjarje, ndërsa akti i shpalljes së pavarësisë pritet të përcillet edhe nga dhjetëra delegacione nga rajoni dhe bota.

Komunat e Kosovës gati për festë

Përkundër faktit se Prishtina do të jetë kryeqendra e festimit të pavarësisë – ku ndër të tjera, për të pranishmit, do të servohet edhe një tortë gjigante që peshon 1 ton, në formë të hartës së Kosovës – edhe në qytetet të tjera të Kosovës do të organizohen manifestime të shumta kulturore e artistike.

Në shumicën e qyteteve tashmë janë vendosur mbishkrimet me urime për pavarësinë, janë vendosur flamujt kombëtar, amerikan, dhe të shteteve perëndimore që në vazhdimësi kanë përkrahur Kosovën, si dhe janë ngritur skenat ku do të performojnë artistë të ndryshëm.

Shqipëri: Seancë e hapur pavarësinë e Kosovës

Kuvendi i Shqipërisë do ta mbajë një seancë parlamentare të hapur për të përcjellë tek të gjithë shqiptarët shpalljen e pavarësisë së Kosovës. Kryetarja e Kuvendit, Jozefina Topalli, ka vendosur të thërras Kuvendit në orën 14:30, vetëm 30 minuta para seancës së jashtëzakonshme të Kuvendit të Kosovës ku do të lexohet dhe votohet deklarata e pavarësisë.

Të ftuar në këtë seancë të hapur të Kuvendit shqiptar do të jenë jo vetëm deputetët, por dhe intelektualë, artistë, e njerëz të shquar të të gjitha fushave, kanë njoftuar mediat shqiptare.

Ndërkaq në Tiranë dhe në qytetet të tjera të Shqipërisë, me rastin e shpalljes së pavarësisë së Kosovës, janë paraparë një mori aktivitetesh artistike e kulturore, të cilat do të kulmojnë pas shpalljes zyrtare të pavarësisë së Kosovës

Shkupi gati për të festuar pavarësinë e Kosovës

Shkupi ndërkaq, siç ka bërë të ditur agjencia INA, do ta festojë pavarësinë e Kosovës me një koncert të organizuar nga Komuna e Çairit, në bashkëpunim me lëvizjen "Zgjohu" dhe Shoqatën e Historianëve Shqiptarë.

Në koncertin, i cili do të mbahet në sheshin "Skënderbej", do të këndojnë shumë yje të muzikës vendase si; Adrian Gaxha, Elita 5, Leonora Poloska, Mustafa Ymeri-Tafa, Erol Jakupi, Berkani, Bertani etj.

Edhe partitë politike shqiptare në Maqedoni kanë filluar përgatitjet për festën e pavarësisë së Kosovës. Pavarësia e Kosovës, siç kanë bërë të ditur mediat, do t‘i gjejë në një ambient festiv liderët e partive politike shqiptare.

Udhëheqësit e Luginës... kërkojnë maturi nga banorët

Kryesia e Kuvendit të këshilltarëve shqiptarë të Luginës së Preshevës, ka rikonfirmuar përkrahjen institucioneve të Kosovës për aprovimin e Deklaratës për shpalljen e Pavarësisë së Kosovës.

Kryesia, konsideron se, përkundër spekulimeve të ndryshme që po plasohen ditëve të fundit, nuk ka vend për shqetësime, megjithatë ka ftuar popullatën për maturi, vetëpërmbajtje dhe vigjilencë qoftë edhe nëpër manifestimet private dhe ka apeluar që të mos shkaktojë e as bie pre e provokimeve që mund të vijnë nga qarqet e ndryshme.

Në këto momente të ndjeshme në të cilat gjendet rajoni, Kryesia ka kërkuar fuqishëm prezencë të shtuar ndërkombëtare e cila do të ishte garanci e stabilitetit të Luginës së Preshevës.

“Kryesia është në përcjellje të vazhdueshme të situatës dhe do të jetë e gatshme të ndërmarrë masat adekuate varësisht nga zhvillimet e saj”, thuhet në një njoftim për media të kryesisë së KKSHLP-së.

Festojnë edhe arbëreshët e Italisë

Federata e Shoqatave Shqiptare dhe Arbëreshe të Piemontit (Itali), me rastin e shpalljes së shumëpritur të pavarësisë së Kosovës, ka përgatitur aktivitete të larmishme, njofton gazeta Start.

Siç kanë bërë të ditur zyrtarët e kësaj Federate me qendër në Torino, finalizimi i këtyre aktiviteteve do të bëhet sot me një manifestim festiv, në mjediset e qendrës Alouan, në Torino, duke filluar nga ora 16:30.

Përgatitje të shumta janë bërë, që menjëherë me shpalljen zyrtare të pavarësisë, të pranishmit të ndjekin përmes lidhjes televizive satelitore transmetimet direkte dhe manifestimet e zhvilluara jo vetëm në Kosovë, por edhe në Shqipëri.

/TELEGRAFI/

[Davius]

Pasditen e sotme pritet që Kuvendi ta miratojë Deklaratën për Pavarësinë e Kosovës

Sot, në një seancë solemne, Kuvendi i Kosovës pritet ta miratojë Deklaratën e Pavarësisë së Kosovës. Është paraparë që kryeministri Hashim Thaçi në orë 10:00 t’ia dorëzojë Kryetarit të Kuvendit Jakup Krasniqi kërkesën për mbajtjen e seancës së jashtëzakonshme, ndërkaq në ora 12:00 është paraparë mbledhja e Kryesisë së Kuvendit dhe një orë më vonë takimi i grupeve parlamentare. Miratimi i deklaratës së pavarësisë pritet të ndodhë në orën 15:00.
Ndërkaq, në orën 18:00, në Press Qendrën Prishtina, kryetari i Kosovës Fatmir Sejdiu, kryeministri Hashim Thaçi dhe kryetari i Parlamentit Jakup Krasniqi do të flasin para gazetarëve të huaj.

/RTK LIVE/

[Davius]

Kosova shpall sot pavarësinë

Kuvendi i Kosovës pritet të deklarojë sot pasdite pavarësinë nga Serbia, në një seancë të posaçme.

Festimet kanë filluar, por një valë e re kremtimesh do të fillojë në momentin që pavarësia të shpallet zyrtarisht. Kryeministri Hashim Thaçi thotë se dita e sotme është një ditë paqësore dhe historike për Kosovën.

Zoti Thaçi do të flasë para popullit sot në mbrëmje nga sheshi kryesor në Prishtinë. Më pas do të mbahet një koncert në qiell të hapur, nga filarmonia e Kosovës dhe fishekzjarret do të vazhdojnë deri në mesnatë.

Serbia e kundërshton me forcë pavarësinë e Kosovës. Kryeministri serb Vojislav Kostunica pritet të flasë para kombit një orër pas shpalljes së pavarësisë në Prishtinë.

Duke folur para serbëve në Kosovë dje, zoti Kostunica tha se Serbia do t’i mbrojë qytetarët e saj në Kosovë.

Autoritetet në Beograd thonë se nuk do të ketë dhunë, por ata do të përdorin çdo mjet politik të mundshëm për të mos lejuar njohjen e pavarësisë së Kosovës.

Qeveria serbe kundërshtoi vendimin e Bashkimit Evropian për të dërguar një forcë policore dhe administrative prej 1 mijë e 800 vetësh në Kosovë. Ky mision civil i paqes dhe drejtësisë do të marrë detyrat e sigurisë nga Kombet e Bashkuara.

Rusia, aleate e Serbisë thotë se do të bëjë thirrje për konsultime urgjente në Këshillin e Sigurimit menjëherë pas shpalljes së pavarësisë.

Shqiptarë nga e gjithë bota kanë shkuar në Kosovë për të marrë pjesë në festimet për pavarësinë. Pavarësia e Kosovës po festohet edhe në Shqipëri dhe nga komuniteti shqiptar në Maqedoni.

ZERI AMERIKES

[Davius]

Repishti: Pavarësia e Kosovës, e rëndësishme për shqiptarët dhe botën e qytetëruar

Aktivisti i të drejtave të njeriut, Prof. Sami Repishti thotë se pavarësia e Kosovës është e rëndësishme jo vetëm për historinë e shqiptarëve, por edhe për botën e qytetëruar. Ai tha në një intervistë për Zërin e Amerikës se e sheh këtë moment edhe si eliminim të një vatre të destabilizimit të paqes në Ballkan.

Zëri i Amerikës: Zoti Repishti, sot pritet që të finalizohen përpjekjet për pavarësinë e Kosovës. Çdo të thotë kjo ditë për historinë shqipëtare?

Sami Rrepishti: Unë mendoj se kjo ditë ka rëndësi jo vetëm për historinë shqiptare, por ka rëndësi për të gjithë botën e qytetëruar. Shqiptarët po plotësojnë një sukses të madh në historinë e tyre, sepse për të parën herë shumica e popullit shqiptar gjendet e lirë, por ka rëndësi dhe për botën e qytetëruar sepse po i jepet fund një padrejtësie, që është imponuar mbi popullin kosovar, një popull pa mbrojtje, dhe është gjithashtu fillimi i një epoke të lirë për një popull të shtypur, siç është populli shqiptar në Kosovë. Gjthashtu e shoh këtë moment, si eleminimin e një vatre të destabilizimit të paqes në Ballkan, meqënëse kosovarët tani e tutje nuk kanë arsye që të jenë të revoltuar. Unë e shoh rastin e Kosovës, dhe si përfundimin e proçesit të shpërbërjes së ish-shtetit jugosllav, që fatkeqësisht kushtoi shumë për shqiptarët; sikurse dihet ka patur më shumë se 12 mijë të vrarë në Kosovë, ka patur më shumë se 20 mijë të plagosur, ka rreth 2 mijë të zhdukur fati i të cilëve nuk dihet, afro 1 milion kosovarë janë dëbuar nga shtëpitë e tyre, kemi afro 200 kisha dhe xhami që janë shkatërruar apo dëmtuar rëndë. Ajo që më kujtohet shpesh është fakti që afro 170 familje shqiptare janë djegur brenda shtëpive të tyre nga serbët. Kjo është një eksperiencë që e ka traumatizuar shumë popullin e Kosovës, një eksperiencë që nuk do të harrohet shpejt, por uroj që pavarësia e Kosovës do të shërbejë si një ilaç, për të qetësuar shpirtrat e trazuar dhe të plagosur të popullit kosovar.

Zëri i Amerikës: Si mendoni se do të jenë marrëdhëniet e shtetit të sapoformuar kosovar me komunitetin ndërkombëtar?

Sami Rrepishti: Besoj se kosovarët kanë fituar një eksperiencë mjaft të madhe në lidhje me marrëdhëniet ndërkombëtare sepse gjatë këtyre viteve ata janë detyruar t’iu drejtohen shumë shteteve për ndihmë, sepse kanë patur nevojë për ndihmë, dhe aspekti tjetër është që kosovarët kanë treguar pjekuri politike në marrëdhëniet e tyre me bashkësinë ndërkombëtare, sidomos me SHBA dhe vendet e BE. Jam i sigurt se kosovarët mbas dhe një ekspozimi të gjatë që kanë pasur dhe mbas emigracionit të gjatë që kanë pasur me botën perëndimore, si ne Europë dhe në SHBA, ata kanë krijuar tan një klasë që është koshiente për rëndësinë e madhe që ka mbajtja e raporteve të mira me bashkësinë ndërkombëtare, dhe rëndësia e madhe që ka për Kosovën krijimi i një Kosove që do të jetë faktor pozitiv për stabilitetin në Ballkan, dhe për paqen në Europen Juglindore.

Zëri i Amerikës: Si i shihni marrëdhëniet e Kosovës me Serbinë, pas shpalljes së pavarasisë?

Sami Rrepishti: Ka shumë njerëz që parashikojnë që mund të ketë trazime të përkohëshme, me rastin e shpalljes së pavarësisë së Kosovës, natyrisht do të ketë reaksion serb, i cili nuk e di se sa do të vazhdojë, por me deklaratat e fundit që kanë bërë udhëheqësit e Serbisë, kanë hequr dorë nga përdorimi i forcës,kështu që mbetet rruga legale, mbetet rruga diplomatike. Unë jam i bindur, se pavarësia e Kosovës, shkëputja e Kosovës nga Serbia, do të jetë një faktor pozitiv, dhe për vetë serbët. Ata kanë jetuar shumë gjatë e për shumë kohë, dhe me pasoja mjaft të rënda, me mitologjinë mesjetare, dhe një gjë e tillë e ka lënë Serbinë në kuadrin e vendeve që nuk po ecin përpara, në bashkësinë europiane. Pavarësia e Kosovës, do t’i lejojë Serbisë që të përqëndrohet më shumë, drejt afrimit me Europën Perëndimore, drejt pregatitjeve për ecjen drejt Bashkimit Europian, drejt një zhvillmi më të madh në Serbi, drejt një afrimi më të madh me shtetet kufitare, e si pasojë e kësaj do të jetë dhe një përmirësim i marrëdhënieve mes Serbisë dhe Kosovës, në mënyrë që të mbyllet njëherë e përgjithmonë ky problem i hapur.

Zëri i Amerikës: Cilët shihni si hapat e parë që Kosova duhet të hedhë si shtet i sapo formuar?

Sami Rrepishti: E para duhet sigurimi i qetësisë në vend. Kjo është një çështje e detyrueshme për çdo qeveri në botë. E dyta duhet të jetë sigurimi i fqinjëve të Kosovës se Kosova do të jetë një faktor stabiliteti politik dhe një qendër paqeje, për zhvillimin e Ballkanit. E treta, është problemi i zhvillmit ekonomik në Kosovë. Zyrtarisht papunësia në Kosovë ka arritur 40%, kurse jo zyrtarisht flitet se ka arritur deri në 60%. Por Kosova rritet me një ritëm të shpejtë, Kosova është një vend që ka popullsi shumë të re, ka popullsinë më të re në Ballkan, dhe ata duhet të sigurojnë jetesën e tyre; pra qeveria e Kosovës duhet të marrë parasysh këto vështirësi, sepse përndryshe do të ketë trazira sociale në Kosvë, dhe pavarësia e kosovës vlen në këtë rast shumë sepse, tani Kosovës i jepet mundësia që të bashkëpunojë me organizma ndërkombëtar si Banka Botërore, Banka për Zhvillimin Europian, Fondi Monetar Ndërkombëtar, që do të jenë në gjendje të japin qoftë grante, apo hua për zhvillimin ekonomik të Kosovës. Kam shumë besim se dhe emigracioni shqiptar, e sidomos kosovar, i cili në SHBA dhe në Europë ka patur mjaft sukses, do të jetë në gjendje t’a ndihmojë Kosovën me investime.

ZERI AMERIKES

[Davius]

Prof. Pano: Pavarësia, vënia në vend e një drejtësie të mohuar

Ndërsa afrohet dita e shpalljes së pavarësisë së Kosovës, një ekspert i Ballkanit që e ka ndjekur ndër vite situatën atje, shpreh entuziazmin për këtë ngjarje. Historiani Nikolla Pano thotë për Zërin e Amerikës se pavarësia është vënia në vend e një drejtësie të mohuar për një kohë të gjatë, megjithatë ai shton se Kosova do të jetë tani nën vështrimin e kujdesshëm si të miqve, ashtu edhe armiqve.

Zëri i Amerikës: Profesor Pano, ju e keni studiuar rajonin për një kohë të gjatë, kështu që në fillim desha t’ju pyes cilat janë mendimet tuaja tani që pavarësia e Kosovës, sipas njoftimeve, pritet të shpallet të dielën.

Nikolla Pano: Jam shumë i lumtur. Ky është kurorëzimi i një procesi të gjatë. Pak popuj në Evropë, kanë provuar padrejtësi si ato që u janë dashur të vuajnë kosovarëve, duke filluar që nga traktatet e viteve 1912 dhe 1913, shtypja e regjimit jugosllav në periudhën mes luftrave dhe pas Luftës së Dytë Botërore. Kosova e ka merituar vërtet pavarësinë e cila i është mohuar për një kohë të gjatë dhe mendoj se mohimi i pavarësisë së Kosovës ka qenë një mohim i drejtësisë. Gjithashtu mendoj se tani po merr zgjidhje një nga çështjet e rëndësishme kombëtare të Evropës.

Zëri i Amerikës: Shpesh nëpër intervista dhe diskutime pyetja që shtrohej ka qenë çfarë do të ndodhë më pas (pas pavarësisë). Tani mbase ka ardhur koha të pyesim vërtet: Çfarë do të ndodhë sipas jush, pas shpalljes së pavarësisë?

Nikolla Pano: Kosova do të përballet me disa sfida të jashtëzakonshme. Së pari është sfida politike, ajo për ngritjen e një sistemi funksional politik. Nuk duhet të harrojmë që Kosova do të jetë nën një vëzhgim të vazhdueshëm dhe të shumëllojshëm si nga miqtë, ashtu edhe nga armiqtë. Miqtë e Kosovës do të kërkojnë arritjen e standardeve të larta, ndërsa armiqtë do të jenë të vëmendshëm ndaj çdo problemi të vogël, ndërsa Kosova përpiqet të ndërtojë demokracinë, shtetin ligjor, garantimin e të drejtave për të gjitha pakicat. Në lidhje me pakicat do të shtrohet çështja se cili do të jetë qëndrimi i pakicave ndaj qeverisë së re: a do ta çojnë deri në fund kërcënimin për mosbashkëpunim? Pa dyshim që Mitrovica do të jetë një pikë tensionesh. Do të duhet një punë e madhe dhe ndihma e forcave të UNMIK-ut që do të jenë ende atje. Kështu pra Kosova do të përballet me një numër të madh sfidash politike dhe shpresoj që në rrugën për t’u bërë ballë atyre, populli i Kosovës nuk do të përsërisë gabimet e Shqipërisë, gjatë periudhës së tranzicionit. Nuk është koha për prirje të theksuara partiake dhe për ndjekjen e interesave të ngushta vetjake në Kosovë. Sfidat janë aq të mëdha saqë udhëheqësit e të gjitha partive dhe të gjitha grupimeve duhet të punojnë së bashku për të zgjidhur problemet me të cilat përballet vendi. Sigurisht që do të duhet të fillojë zhvillimi ekonomik, inkurajimi i investimeve të huaja, do të duhet zgjidhur problemi i aktiviteteve të paligjshme, si kontrabanda. Po ashtu kosovarët duhet të fillojnë procesin e krijimit të një uniteti të fortë kombëtar. Synimi kryesor i popullit të Kosovës duhet të jetë ngritja e një shteti të drejtë ku të mbizotërojë shteti ligjor dhe ku korrupsioni dhe forma të tjera krimi të mos tolerohen.

Zëri i Amerikës: Çfarë ndikimi do të kenë tek Kosova dhe në përgjithësi tek Ballkani, acarimet e fundit diplomatike që vihen re në qëndrimet e kundërta të Shteteve të Bashkuara dhe Rusisë, e cila mbështet Serbinë?

Nikolla Pano: Fakti që jemi në një periudhë rivaliteti në rritje mes Shteteve të Bashkuara dhe Rusisë dhe që një nga pikat e mosmarrëveshjes mes tyre janë pikëpamjet e kundërta për pavarësinë e Kosovës, shton një element tensioni në këtë proces, është një faktor tjetër që ndërlikon ngritjen e një shteti funksional në Kosovë. Nuk ka dyshim që qeveria e Serbisë nuk do ta njohë Kosovën dhe nuk do të bashkëpunojë. Do të jetë interesante të shihet nëse qeveria serbe do ta zbatojë në praktikë kërcënimin për të ushtruar autoritetin e saj ndaj pakicës serbe dhe sigurisht që kjo do të ishte një burim tensionesh mes dy qeverive. Po ashtu megjithëse qeveria serbe ka thënë se nuk do të përdorë dhunën, ose agresionin ndaj Kosovës, në atë vend ka disa nacionalistë të skajshëm që mund të ndërmarrin veprime që mund të krijojnë tensione që do të destabilizonin ekuilibrin e brishtë që është i nevojshëm për suksesin e shtetit të Kosovës.

Këta faktorë të jashtëm do të kenë rëndësi dhe e nuk ka diskutim që nuk do të jetë e thjeshtë që të ngrihet një shtet efektiv dhe funksional në Kosovë, por jam i bindur se atje ka disa udhëheqës të zotë. Ata kanë mbështetjen e Shteteve të Bashkuara, Britanisë, Gjermanisë, Italisë dhe anëtarëve të tjerë të Bashkimit Evropian. Po ashtu NATO-ja do të jetë e pranishme në Kosovë dhe të gjithë këta faktorë sigurisht që do t’i përmirësojnë shanset për suksesin e një Kosove të pavarur.

Zëri i Amerikës: Le t’i hedhim një vështrim së ardhmes. Megjithëse shumë vende të BE-së do ta njohin Kosovën, disa prej tyre duket se nuk do ta pranojnë pavarësinë. Në këndvështrimin afatgjatë si do të bëhet Kosova pjesë e Bashkimit Evropian dhe OKB-së, duke pasur parasysh këtë atmosferë?

Nikolla Pano: Hyrja e Kosovës në Bashkimin Evropian, anëtarësimi në OKB, pranimi i mundshëm në NATO, të gjitha këto janë pjesë e një procesi afatgjatë. Po flasim këtu për një periudhë prej 10-15 vjetësh. Një pjesë e mirë e asaj që do të ndodhë në atë periudhë do të varet nga zhvillimet në Evropë dhe a do të zbuten këto tensione mes Shteteve të Bashkuara dhe Rusisë. A do të jenë në gjendje kosovarët të dëshmojnë se janë në gjendje të ndërtojnë një shtet funksional ku të mbizotërojë shteti ligjor? A do të jenë ata anëtarë të përgjegjshëm të komunitetit ndërkombëtar? Dhe mendoj se të gjithë këta faktorë do të përcaktojnë përparimin që do të bëjë Kosova drejt shndërrimit në një shtet me të drejta të plota dhe këtyre organizmave prestigjioze ndërkombëtare.

Zëri i Amerikës: A mund të themi që kemi ardhur në fund të një cikli për Ballkanin?

Nikolla Pano: Ballkani ka hyrë në një fazë të re të historisë së tij. Sigurisht që shpërbërja e Jugosllavisë, fundi i regjimit komunist në Evropën Lindore, ka qenë një proces që ka zgjatur pothuajse 20 vjet. Tani NATO është në prag të zgjerimit në Ballkan, hyrja e vendeve të Ballkanit në Bashkimin Evropian, zgjerimi i bashkëpunimit ekonomik mes shteteve të Ballkanit, të gjitha këto janë shenja të mira për fillimin e një periudhe të re, të fqinjësisë së mirë në atë rajon, që historikisht është karakterizuar nga armiqësi të skajshme mes vendeve fqinjë. Megjithatë faktori që vazhdon të mbetet pjesë e ekuacionit politik dhe diplomatik në Ballkan, është roli i fuqive të mëdha. Dhe ne e dimë se nga këndvështrimi historik, kur bëhet fjalë për rivalitetin mes këtyre fuqive si Shtetet e Bashkuara dhe Rusia, këto janë elemente që kontribuojnë në paqëndrueshmërinë në rajon.

Por unë kam shpresa që në të ardhmen do të gjendet një zgjidhje për këto çështje që ndajnë vendet e Bashkimit Evropian dhe Shtetet e Bashkuara nga Rusia dhe të shkojmë drejt një periudhe paqeje, përparimi, bashkëpunimi në Ballkan dhe që kjo do të kontribuojë në paqen dhe përparimin e gjithë Evropës.

ZERI AMERIKES

[Davius]

DioGuardi: Pavarësia, plotësim i aspiratave shumëvjeçare të shqiptarëve

Presidenti i Lidhjes qytetare shqiptaro-amerikane, Joseph Dioguardi, thotë se askush nuk duhet të trembet nga pavarësia e Kosovës. Ajo i shërben stabilitetit të rajonit, është në të mirën e Serbisë për t'u integruar në Bashkimin Evropian, dhe natyrisht është plotësimi i aspiratave shumëvjeçare të shpiptarëve. Pavarësia e Kosovës është në përputhje të plotë me idealet dhe institucionet amerikane, thotë ish-kongresmeni amerikan, dhe u shërben interesave kombëtare të Shteteve të Bashkuara.

Zëri i Amerikës: Zoti DioGuardi, pritet që Kosova të shpallë pavarësinë të djelën më 17 shkurt. Si e prisni këtë zhvillim?

Joseph DioGuardi: Isha atje rreth një vit më parë duke menduar për një zgjidhje përpara zgjedhjeve në Serbi, por nuk ishte e thënë të bëhej. Por të paktën, në atë kohë e dinim se Shtetet e Bashkuara dhe Britania e Madhe, ku gjithashtu shkova për vizitë, ishin të përgatitura për të qënë të parat që do ta njihnin pavarësinë e Kosovës, qëndrim që e shikoj edhe tani. Çfarëdo që të bëjë tani Serbia, mua më duket se Kosova ndodhet në duar të sigurta për shkak të punës të Lidhjes Qytetare Shqiptaro Amerikane dhe të komunitetit shqiptaro-amerikan, që duke punuar së bashku për më shumë se 20 vjet, hodhëm themelet për këtë. Ishin Kongresi Amerikan, ishin burra si Tom Lantos, senator Biden, kongresmeni Hayden, Gilman, njerëz të cilët vazhdimisht i thoshin Departamentit të Shtetit se politika ndaj popullit shqiptar në ish-Jugasllavi dhe në Kosovë duhej ndryshuar.

Zëri i Amerikës: Disa ish diplomatë amerikanë kanë shprehur shqetësimin se pavarësia e Kosovës do të ishte në dëm të interesve të Shteteve të Bashkuara në raport me disa fuqi rajonale dhe botërore. Kjo frikë është shprehur edhe nga disa analistë të çështjeve ballkanike. Cili është mendimi juaj?

Joseph DioGuardi: E vetmja gjë që do të dëmtonte interesat tona do të ishte vazhdimi i destabilizimit në rajon dhe jo pavarësia e Kosovës. Për shumë vjet dhamë argumenta për këtë çështje, janë bërë shumë seanca dhe hartuar rezoluta nga Kongresi. Seanca e parë në vitin 1990 zgjati rreth 5 orë. Në të mori pjesë dhe zoti Rugova, senatori Pell dhe kongresmani Lantos. Një vit më vonë në senat diskutuan senatori Pell dhe senatori Biden dhe më vonë, ky problem u diskutua nga njerëz të tjerë shumë të rëndësishëm në Komisionin për Marrëdhënie me Jashtë, duke mos harruar kongresmenin Gilman dhe paraqitëm argumente se ajo që shkaktonte destabilizimin e rajonit ishte mënyra se si shqiptarët ishin trajtuar nga serbët prej ndoshta 100 vjetësh dhe padyshim pas vdekjes së Titos. Unë personalidht, si një kongresmen i ri në atë kohë, kam paraqitur argumenta në mesin e viteve 1980 se që nga viti 1981 deri në vitin 1989 janë përndjekur nga policia e kontrolluar nga serbët rreth 600 mijë shqiptarë. Kjo ishte përpara se Millosheviçi të merrte pushtetin. Pas marrjes së pushtetit nga Millosheviçi situata u keqësua edhe më shumë. Ajo që ne kuptuam ishte se Serbia nuk synonte ta trajtonte shumicën shqiptare si qytetarë të barabartë dhe ky ishte shkaku i fillimit të problemit. Ashtu siç rrodhën ngjarjet që nga mesi i viteve 80-të e deri nga fundi i viteve 90-të ne e pamë fare qartë se nuk kishte shpresë për pajtim midis serbëve dhe shqiptarëve, jo sepse shqiptarët nuk donin, por nuk ishte dëshira e serbëve për t’i trajtuar shqiptarët si qytetarë të barabartë dhe tani shqiptarët po veprojnë si ne 230 vjet të shkuara, kur shpallën pavarësinë nga Mbreti Xhorxh i Katërt i Anglisë dhe më pas u njohëm si shtet.

Zëri i Amerikës: Pavarësia shpallet, cili është hapi tjetër, si do të mbijetojë ky shtet i ri i sapokrijuar në Evropë, veçanërisht në dy tri vitet e para?

Joseph Dioguardi: Shumë punë. Dhe komuniteti shqiptar duhet të punojë akoma më shumë në të ardhmen, sepse pavarësia ka nevojë për zhvillimin ekonomik, për punësimin e rreth 500 mijë të rinjve. Kur je shtet duhet t’i shërbesh njerëzve të tu për nevojat jetësore, të përditshme. Tani fjala është se si do të sigurohen investimet. Së pari, tani ne mund t’i drejtohemi Bankës Botërore, të cilën nuk mund ta bënim më parë, Bankës Evropiane për Rindërtim dhe Zhvillim. Ky është vetëm fillimi i ndërtimit të një infrastrukture të re, si sistemi i ri telefonik, energjitik e kështu me radhë. Pastaj do të shihet afrimi i investitorëve privatë si shqiptaro-amerikanë, hebrej-amerikanë, të cilët vlerësojnë se shqiptarët mbrojtën secilin prej tyre gjatë Luftës së Dytë Botërore dhe shohin se në Shqipëri dhe Kosovë ka shumë burime natyrore për t’u shfrytëzuar, të cilët, meqë ra fjala, përbëjnë të njejtin vend sepase kufijtë janë artificialë. Kështu do të na duhet të punojmë shumë dhe kemi filluar.

Zëri i Amerikës: Për sa i përket Serbisë. Udhëhqësit e saj e kanë bërë të qartë qendrimin e tyre kategorik kundër pavarësisë së Kosovës. Si do të integrohet Serbia në dinamikën ballkanike dhe më tej, me krijimin e shtetit e ri të Kosovës si një lojtar me zërin e tij në skenën e Ballkanit?

Joseph Dioguardi: Më vjen shumë keq për popullin serb. Ai nuk meriton të ketë qeveritë që ka pasur e që kanë luajtur me ngulm kartën e ultranacionalizmit. Ajo që ata duhet të kuptojnë është se bota është duke shkuar drejt integrimit, veçanërisht Evropa është duke shkuar drejt bashkimit për shkak të problemit ekonomik që përballemi. Mendimi im është se serbët duhet të kuptojnë se ata duhet të bëhen pjesë e rëndësishme e Evropës dhe ata mund të jenë të tillë, dhe jo të dëgjojnë Rusinë e cila po e përdor tani Serbinë për interesat e saj gjeopolitike. Serbia duhet të konsolidohet si demokraci dhe serbët duhet të shqetësohen për të ardhmen tyre, e cila duhet të jetë si një shtet demokratik i mbështetur parime ekonomike jo komuniste dhe të integrohet në Evropë. Kjo bëhet duke filluar nga shkalla e parë që është t’u njohësh shqiptarëve atë që meritojnë, pavarësinë.

Zëri i Amerikës: A do të ishte e drejtë të parashikohet se zhvillimet pas pavarësisë në Kososë do të provojnë se mbështetësit e pavarësisë kanë patur të drejtë dhe skeptikët do të shikojnë një tjetër tabllo nga ajo të cilës i janë trembur?

Joseph DioGuardi: Pa dyshim, sepse ajo që po ndodh është se ne po përmbushim një nga principet më të rëndësishme të ligjit ndërkombëtar. Quhet vetëvendosje. Kur ke një koncentrim njerëzish, si në Kosovë ku rreth 2 milionë shiptarë vendosin se qeveria nuk i përfaqëson ata, është shembulli më i mirë i zbatimit të ligjit që thotë se kur një grup njerëzish janë të shtypur, kanë të drejtë ashtu si 13 kolonitë e Amerikës, të mos pranojnë tiranin, që për Kosovën ka qenë regjimi komunist serb që nuk donte të kthehej në demokraci dhe më pas, Millosheviçi që kishte si qëllim krijimin e Serbisë së madhe pas shpinës së popullit shiptar. Mendimi im është se ajo që po ndodh është e drejtë, duhet të respektohet dhe Serbia do të ketë përfitimet e veta nga kjo situatë. Një gjë mund të them për shqiptarët. Ata punojnë shumë. Emigruan pa asnjë gjë dhe shiko çfarë bënë në Amerikë dhe Evropë. Të njëjtën gjë ata do ta bëjnë në Ballkan. Mendoj se motori ekonomik i Ballkanit do të jenë 7 milion shqiptarët, 3.5 milion në Shqipëri dhe 3.5 milion jashtë kufinjve duke përfshirë 2 milion në Kosovë. Ata do të punojnë së bashku si një bllok ekonomik dhe për 20 vitet e ardhshme do të provojnë se kufijtë janë të parëndësishëm. E rëndësishme është të krijosh vende pune dhe mirëqënie. Edhe Serbia do të përfitojë nga kjo.

ZERI AMERIKES

[Davius]

Sot lind Kosova e pavarur

Pritet që rreth orës 15:00, Parlamenti i Kosovës të shpallë pavarësinë. Do të pasojë festa e madhe dhe qytetarët janë ftuar nga të gjithë liderët që atë ta bëjnë në formë dinjitoze, për një lindje të mbarë të pavarësisë së Kosovës.

Kosova sot bëhet shtet i pavarur. Deklarata e pavarësisë do të bëhet në një seancë të jashtëzakonshme parlamentare, në orën 15:00. Pritet që liderët kosovarë, presidenti Fatmir Sejdiu, kryeministri Hashim Thaçi dhe kryetari i Kuvendit, Jakup Krasniqi, të dalin në një konferencë të përbashkët, në orën 18:00.

Rreth orës 18:30, në Prishtinë, do të zbulohet Obelisku i Pavarësisë, që do të jetë emblema kryesore e pavarësisë së Kosovës. Në orën 19:00, Filharmonia e Kosovës mban një koncert dhe pastaj mbahet koncerti në qendër të Prishtinës.

Në orën 23:00 do të hidhen fishekzjarre nga të katër anët e Prishtinës.
Presidenti i Kosovës, Fatmir Sejdiu dhe shumë qytetarë, në orët e para të mëngjesit, kanë vizituar varrin e ish-presidentit të Kosovës, Ibrahim Rugova.
Në orët e para të mëngjesit, kryetari i Kuvendit të Kosovës, Jakup Krasniqi, bën homazhe në kompleksin memorial të komandantit të UÇK-së, Adem Jashari, në Prekaz.

Ndërkaq, delegacionet e komunave të Gjakovës, Pejës dhe Deçanit, paradite, gjithashtu do të bëjnë nderime te Kompleksi i Varrezave të Dëshmorëve në Gllogjan.

Zatën, festa në Prishtinë dhe në qytetet tjera kosovare tashmë ka filluar. Pavarësia e Kosovës do të festohet edhe në Tiranë, Shkup dhe qendrat tjera të banuara me shqiptarë. Ka qenë dhe mbetet ftesë e të gjithë liderëve që festa të jetë dinjitoze.

Ndërkohë, kanë arritur mbështetjet e para për pavarësinë e Kosovës.
Britania e Madhe mbrëmë ka bërë të ditur se është e gatshme ta mbështesë pavarësinë e Kosovës dhe të ofrojë mbështetje ushtarake nëse e do nevoja. Kjo është kumtuar nga Qeveria në Londër, e cila ka thënë se plani i Ahtisaarit është "mënyra më e mirë për të ecur përpara".

EUROPA E LIRE