Vrasja e Baki Taullajt zbulimi pas përgjimit nga Antimafia e Torinos.

[DI_ANA]

ELTON QYNO
16/02/2008 Akuza, ende nuk janë zbardhur motivet dhe shkaqet e krimit në Lushnjë në fillimin e korrikut 2005

Vrasja e Baki Taullajt në qendër të qytetit të Lushnjës në fillim të korrikut të vitit 2005, është regjistruar edhe në përgjimet e Antimafias së Torinos. Burime konfidenciale pranë organit të akuzës shqiptare bënë me dije se në transkriptimet që priten të vijnë nga Italia, është përgjuar mënyra e marrjes së vendimit përfundimtar, për të ekzekutuar biznesmenin Baki Taullaj.

Sipas burimeve, vrasja në qendër të Lushnjës, e cila u shoqërua edhe me një eliminim të menjëhershëm të atentatorit të biznesmenit, ende nuk është zbardhur plotësisht, pasi të dy personat që dyshohet se kishin konflikt me njëri-tjetrin, mbrëmjen e 4 korrikut 2005 mbetën të vdekur.

Si të dyshuarit kryesorë për vrasjen e Baki Taullajt aktualisht janë Aldo Bare, Enver Dondollaku dhe Leonard Prifti, por ky i fundit që kreu atentatin, u ekzekutua në çast nga njerëz të tjerë që në atë moment qëndronin afër viktimës. Duke mbetur hetimi në udhëkryq, akuza shqiptare do të mundë të marrë transkriptimet e përgjuara nga Antimafia italiane dhe me këtë rast pritet që të zbardhen motivet dhe shkaqet kryesore që kanë shtyrë Leonard Priftin, për të ekzekutuar në qendër të Lushnjës biznesmenin Baki Taullaj.

Ngjarja

Sipas burimeve jozyrtare, shkaku i vrasjes së viktimës Baki Taullau ka qenë një gjobë prej gati 150 milionë lekësh (të vjetra) që i superkërkuari i asaj kohe, Leonard Prifti, i kishte kërkuar disa muaj më parë Baki Taullaut në shkëmbim të jetës së tij. Ish-anëtari i bandës të Aldo Bares, Leonard Prifti, duke u vetëcilësuar edhe si “i fortë” dyshohet se i kishte kërkuar 150 milionë lekë (të vjetra) në këmbim të qetësisë së tij dhe të familjes.

Nga ana tjetër, dyshohet se kësaj kërkese i është përgjigjur negativisht tregtari i karburantit Taullai. Pas refuzimit të kërkesës, rreth orës 22.00 kur të gjithë qytetarët e Lushnjës kishin dalë në shëtitjen e mbrëmjes, mes zhurmës së madhe është parë shkëputja në tokë e trupit të Baki Taullait dhe rrjedhja e gjakut. Pas pak sekondash, turma e frikësuar ka dëgjuar krisma të tjera pistolete duke parë përtokë edhe trupin e pajetë të një personi tjetër, i cili në ato momente nuk mund të identifikohej prej tyre.

Gjatë hetimeve paraprake dhe pastrimit nga gjaku i dy viktimave, konkludoi se njëri prej tyre ishte Leonard Prifti, i cili njihej ndryshe si anëtar i “Bandës së Lushnjës” dhe që ishte shpallur në kërkim nga drejtësia shqiptare.

Hetimi

Duke u nisur nga vështirësia e zbardhjes së motiveve të krimit të ndodhur më 4 korrik 2005 para selisë së Partisë Demokratike në qendër të Lushnjës, njerëzit e akuzës shpresat e vetme i kanë në transkriptimet që priten të vijnë nga Antimafia e Torinos.

Duke u mbështetur në dosjet italiane, të cilat kanë ardhur në Shqipëri për llogari të akuzës shqiptare, kjo e fundit ka mundur të “zbërthejë” në mënyrë të dukshme strukturën e grupit kriminal, i cili gjatë periudhës 1997-2006 mundi të kryejë një sërë krimesh duke filluar që nga vrasjet deri tek sekuestrimi i pasurive në mënyrë të paligjshme.

Baki Taullaj

Viktima ishte arrestuar në vitin 2003 me heroinë

Pak më shumë se 2 vjet para ekzekutimit të tij, Baki Taullaj është arrestuar së bashku me vëllanë e tij, pasi janë kapur me një lëndë narkotike, e cila dyshohej se ishte heroinë.

Sipas një njoftimi zyrtar, të dalë nga Ministria e Rendit Publik mësohet se më datë 06 mars 2003 u arrestuan në flagrancë shtetasit Sajmir Hamit Taullau, 32 vjeç, i dënuar një herë për vrasje dhe Baki Hamit Taullau, 44 vjeç, pasi në banesat e tyre iu kapën një sasi lënde e dyshuar për heroinë si dhe një pistoletë, tre armë gjahu, një sasi fishekësh dhe një maskë, të cilat u bllokuan në cilësinë e provës materiale.

Gazeta "Metropol"