Cmimi i energjise kacafiu perpjet...

[BARAT]

Pas bukës, BERISHA “godet” shqiptarët edhe me dyfishimin e çmimit të energjisë


Kur PD dhe kreu i saj Berisha, i morrën votat shqiptarëve, duke u rikthyer në pushtet pas 8 vjetësh opozitë, u mendua se tashmë, ai nuk do të ishte më si në pushtetin e parë të piramidave, informalitetit ekonomik, dhunës politike dhe mashtrimit me premtimet që bënte dhe nuk i mbajti asnjëherë. Por gjithë përbetimi i Berishës, për “duar të pastra” dhe politika social-ekonomike integruese e mbështetëse për jetën dhe punën e shqiptarëve, ishte vetëm një farsë e tipit “mashtrim”. Dhe ky mashtrim, tashmë është bërë emblemë e qeverisjes së tij “laramane”, që po e komandon me paaftësi të plotë, që prej dy vjetësh e gjysëm. Qeverisja, përveç korrupsionit që e ka zënë për “gryke” dhe nuk e lë të veprojë e qetë dhe në shërbim të interesave ekonomike integruese kombëtare, ka shtuar gjatë këtij mandati dhe krizën e çmimeve, dhunën e tyre të plotë, e cila nuk vepron mbi deputetë e ministra, as mbi llogaritë e Berishës, por vetëm mbi kategoritë shoqërore që gjenden në krizë ekonomike, që gjenden në fazën e varfërisë së plotë, ose mbi ata që do t’i shtohen kësaj kategorie, pas rritjes së çmimit të bukës dhe të energjisë elektrike.

Energjia me çmim dyfish, krizë e plotë social-ekonomike
Kjo është një situatë tepër alarmante, për më tepër kur qeveria vepron në mënyrë arbitrare, duke mos komunikuar me palët partnere që janë konsumatori popull dhe grupet e interesit. Në rastin konkret, qeveria dhe personalisht kryeministri i dështuar dhe mashtrues e demagog, zoti Berisha, ndërmori aktin më shkatërrues ndaj mbijetetës së shqiptarëve tejet të varfër, të bërë të tillë prej politikave të tij të mbajtjes gjallë, të tranzicionit, duke bllokuar zhvillimin ekonomik të këtij vendi, duke aplikuar metoda të tilla qeverisjeje, që kanë larguar, që kanë frenuar dhe kthyer mbrapa investimet e huaja, të cilat përveç broçkulave të kryeministrit dhe ekipit të tij të këshilltarëve e ministrave, nuk gjejnë asnjë hapësirë dhe resurs tjetër, për të vepruar në vendin tonë. Masa e fundit e rritjes dyfish të çmimit të energjisë elektrike, është akti më i dhunshëm asocial dhe anti-ekonomik për familjet dhe bizneset shqiptare.
Dhuna financiare e qeverisjes e ka emrin “korrupsion”
Qeveria dhe personalisht kreu i saj Berisha, nuk është e para herë që bënë demagogji dhe ushtrojnë dhunë financiare mbi shqiptarët. Kujtojmë, që gjatë viteve 1992-1997, u zhvati gjithë kursimet me piramidat. Biznesin e shkatërroi me situatën që krijoi. Shkatërroi ekonominë e cila është një humbje e madhe, mbasi rehabilitimi u bë dhe po bëhet nga taksat publike. Kështu veproi dhe me çmimin e bukës. Kështu dhe me çmimin e ujit, të shërbimeve publike në hipoteka, me taksat lokale e qëndrore, në transportin rrugor etj. Tregu i konsumit ditor të shqiptarëve, ka tashmë një tabelë me çmime tepër të larta, të dyfishuara. Po kështu edhe nafta e hidrokarburet, që përdoren për gatim dhe ngrohje familjare. Dhe së fundi, qeveria, në mënyrë krejt arbitrare, rriti çmimin e energjisë elektrike, duke e dyfishuar atë. Kjo është krejt e papërballueshme për qindra mijëra familje shqiptare, të cilat jetojnë me paga, me pensione e ndihma ekonomike lëmoshë që jep qeveria dhe që i konsideron, si tregues të rritjes së mirëqenies social-ekonomike. Por “kapoja” i qeverisë, i cili në këtë mandat që ka zaptuar, ia ka kuptuar shijen “pasurimit”, ka vendosur të vazhdojë në këtë rrugë pa kthim, në drejtim të rritjes së nivelit të varfërisë ekstreme, duke përdorur si mjet goditës çmimet e larta të të gjithë shërbimeve publike dhe produkteve e lëndëve që përdoren si konsum masiv në jetën e përditëshme.
Berisha mashtroi shqiptarët, rriti çmimet
Pesë muaj më parë, kur gazeta “SOT” bëri me dije një informacion, që doli nga “kulla” e qeverisjes, se do të rritej çmimi i bukës, i ujit dhe energjisë elektrike, kryeministri i vendit më të varfër e më të shpërfillur të botës, Sali Berisha, doli përballë mediave dhe deklaroi: “Nuk ka rritje të çmimit të energjisë elektrike! Qeveria është e vendosur të ndal çdo përpjkeje dhe propzoim të KESH, për të rritur çmimin e energjisë dhe të çdo çmimi tjetër që ka lidhje me produktet e konsumit masiv të popullatës”.
Ky alarm për rritje të çmimit të energjisë dhe bukës u dha edhe dy muaj më parë. Berisha doli përsëri në media dhe në mes të parlamentit e të qeverisë dhe tha: “Nuk do të ketë rritje të çmimeve të bukës dhe energjisë”.
Ndërsa 1 javë më parë, kur u dyfishua çmimi i bukës, Berisha doli dhe pa iu skuqur e pa iu zverdhur faqja, tha se “nuk ndërhyjmë në treg”. Pastaj doli e tha, se do të ketë “kompensim të çmimit të bukës”, por një ditë më vonë nxorri “lolon” e tij, ish-shefin e piramidave, Ritvan Bode, për të thënë që “nuk ka kompensim të çmimit të bukës”.
Ndërsa dje, berisha nuk doli, që t’u jepte shqiptarëve sihariqin e madh të dyfishimit të energjisë elektrike. Padyshim, që do të dalë nesër dhe do ta gjej “fjalën” për të justifikuar mashtrimin. Për të faktuar këtë mashtrim të Berishës, po kujtojmë deklaratën e kryetarit të ERE, të bërë dje në media: “Bordi i Komisionerëve, u mbështet në aplikimin e KESH sha, të datës 06.08.2007, për çmimet dhe tarifat e vitit 2008, në argumentat dhe llogaritjet e tyre, në metodologjinë e caktimit të çmimeve dhe tarifave për konsumatorët fundorë si dhe në mendimet dhe propozimet e palëve të interesuara, të shprehura në seancën dëgjimore publike, të datës 20.11.2007”. pra, Berisha edhe vepronte për rritjen e çmimit, edhe mashtronte shqiptarët, duke u thënë se nuk e lejon këtë rritje.
Cmimet me rritje dyfish
Buka, taksat dhe energjia thellojnë varfërinë
Rritja e çmimit të energjisë elektrike, nga 7 lek në 12 lek për kilovat orë, është rritja më e madhe e çmimit, e ndodhur ndonjëherë në Shqipëri, veçanërisht për energjinë elektrike. Do të doja të bëja sqarimin, që çmimi 12 lek për kilovat/orë është pa TVSH, sepse duke i shtuar edhe 20 % TVSH, çmimi shkon diku te 14.4 lekë për kilovat/orë energji elektrike.
Ky çmim dhe kjo rritje do të rrënojë akoma dhe më buxhetet familjare. Një faturë në të cilën është shënuar konsumi për 400 kilovat orë, kushtonte bashkë me TVSH-në 3360 lekë. Ndërsa, që nga 1 marsi, do të kushtojë 3960 lekë. Një faturë e energjisë elektrike në të cilën është shënuar konsumi prej 500 kilovat orë, deri sot kushtonte 42 mijë lek të vjetra. Që nga 1 marsi, do të kushtoj 54 mijë lekë të vjetra. Ky është shembulli konkret i rritjes së çmimit të energjisë elektrike, që do t’ju kushtojë drejtpërdrejtë familjeve shqiptare.
Kjo rritje e re, e madhe, rekord, e çmimit të energjisë elektrike, vjen në kushtet, kur 110 mijë familje sot paguajnë energjinë elektrike aforfe. E gjitha kjo, e paligjshme, sepse që nga 1 janari i këtij viti, fatura aforfe ka dalë jashtë ligjit. Kjo rritje e re, e madhe dhe rekord e çmimit të energjisë elektrike, vjen në kushtet kur qeveria e mbylli vitin 2007 me mbi 10 milion dollarë borxh ndaj familjeve në nevojë, për kompesimin ligjor të energjisë elektrike. Do të doja të sillja në vëmendje, që qeveria po me këtë borxh të shtetit ndaj familjeve në nevojë, mbylli edhe vitin 2006. E gjitha kjo rritje vjen edhe në një moment kur korporata dëshmon përditë me fakte dhe prova, se të paktën 40 % të energjisë që hidhet në rrjet ose e humbet, ose nuk paguhet fare, ose nuk faturohet fare nga ana e saj. Pra, kjo rritje e re, e madhe dhe rekord e çmimit të energjisë elektrike do të bjerë drejtpërdrejtë, mbi të vetmit konsumatorë që paguajnë rregullisht faturën.