Loja e dritës.

[DI_ANA]

Make-up-i më aktual quhet “tredimensional” dhe përdor vetëm fondëtintë, pudër të ylbertë, krem ngjyrë perle, glos-pasqyrë. I përjashton ngjyrat dhe përqendrohet tek lëkura dhe linjat. Rezultati: një fytyrë e dizenjuar nga hije dhe penelata të shndritshme.



Grimi i stinës së re është transparent, tredimensional. Është në gjendje t’i japë volum fytyrës dhe të evidentojë linjat pa përdorur hijezues të dukshëm ose buzëkuqë të lëngshëm, por vetëm me një lojë dritash të dukshme. Ky look ka qenë shumë i pranishëm nëpër sfilatat dimërore dhe quhet truk i zhveshur. Të duket i vështirë për t’u realizuar? Ne i dimë sekretet. Vëri në praktikë pikë për pikë.



Balli

Për t’i dhënë dritë ballit, mjafton që të sfumosh tëmthat me një korrektor të qartë. Pastaj shkëlqe gjithçka me një penelatë pudre të ylbertë. Por kujdes! Nëse ke ndonjë puçërr të vogël, kamufloje me një laps ngjyrë bezhë, në mënyrë që të mbulosh skuqjen. Ndryshe rrezikon që drita ta nxjerrë edhe më në pah.



Vetullat

Grimi i syve bëhet më i dukshëm nëse krijohet një zonë drite nën cepin e jashtëm të vetullave, ku harku fillon të zbresë. Kjo bëhet duke shpërndarë me majën e gishtit pak krem të ylbertë. Për të gjetur pikën e duhur, duhet që më parë t’i kesh rregulluar. Nëse vetullat janë shumë të dendura, duhet të hollohen paksa, sepse ndryshe i japin hije fytyrës. Më pas krihen, në mënyrë që fijet të shkojnë të gjitha në të njëjtin drejtim. E më pas fiksohen me pak xhel.



Sytë

Për të realizuar trukun e zhveshur, hijezuesit e duhet të jenë mat, ose maksimumi me shkëlqime metalike. Në lëkurat e reja janë idealë ata në formë pluhuri, sepse janë edhe shumë më të thjeshtë për t’u përdorur. Pas moshës 40 vjeç, janë më të përshtatshëm hijezuesit në trajtë kremi, sepse depozitojnë më pak ngjyrë në brendësi të rrudhave. Kalohet produkti në të gjithë qepallën. Më pas shpërndahet në qendër një sasi e vogël gloss-i për buzët. Kështu syri merr shkëlqim dhe bëhet më i madh. Për të përfunduar, kthe qerpikët dhe vendos shumë rimel.



Hunda

Ja një ide e re: të shkëlqesh edhe hundën. Por vetëm anët, jo majën. Në këtë rast përdoret një pudër ngjyrë qumështi e pasur me mikroperla, që shpërndahet me një furçë me pupla. Një këshillë: ky grim përdoret vetëm nëse profili i hundës është perfekt, ndryshe rrezikon të nxjerrësh edhe me në pah defektet. Nëse hunda nuk është e rregullt, para se të shkëlqehet, korrigjohet me një fondëtintë një ton më të errët sesa ajo e përdorur për pjesën tjetër të fytyrës. Për të rritur gjatësinë, nëse hunda është e shkurtër dhe e shtypur, apliko fondëtintën në anë dhe në rrënjë. Nëse është shumë e gjatë, errësohet maja dhe zona mes flegrave.



Mollëzat

Janë pjesa më e rëndësishme e fytyrës, sepse rregullojnë proporcionet. Për këtë, para se t’i evidentosh me dritë, është e rëndësishme që të perfeksionosh volumin, duke përdorur një korrektor me një ton më të errët sesa ngjyra e mishit. Nëse ke fytyrë rrumbullake, zgjate duke krijuar një hije të errët nën kockën e mollëzave, që vjen duke u sfumuar drejt cepave të gojës. Nëse ke një fytyrë të gjatë, hijezo pjesët anësore të ballit dhe të mjekrës. Kështu mollëzat do të jenë më të dukshme dhe fytyra më proporcionale.



Buzët

Edhe pse grimi është i zhveshur, duhet bërë shumë kujdes me buzët. Për t’i nxjerrë sa më të bukura veprohet kështu: me një laps ngjyrë mishi vizatohet konturi natyral i buzëve. Pastaj shpërndahet një gloss transparent, për t’i bërë më sensuale dhe të shndritshme. Para se të vendosësh buzëkuqin, apliko mbi buzë një bazë silikoni. Kështu buzët bëhen më voluminoze.



Mjekra

Për të modeluar mjekrën, më parë vendoset një krem ngjyrë perle në pjesën më të dalë. Më pas, me penel, vendoset pak pudër e shndritshme. E rëndësishme është që të shpërndahet edhe në pjesën qendrore të qafës, e cila nuk duhet të privohet nga drita. Fillohet nga mjekra dhe pastaj kalohet në mënyrë pingule drejt fytit, pa e tepruar me produktin. Rezultati është shumë natyral.



E rëndësishme është baza

Grimi i zhveshur realizohet me një fondëtintë mat dhe një krem të lëngshëm të ylbertë, që nxjerr në pah disa pjesë të fytyrës. Është e qartë se kështu lëkura vihet re më shumë. E nëse ka papërsosmëri, vihen re menjëherë. Paranoja më parë duhet kuruar me shumë kujdes, në mënyrë që të ketë një pamje të shndritshme dhe të shëndetshme. Rregulli i parë është përdorimi i skrabit një herë në javë, për të eliminuar qelizat e vdekura. Pastaj, si bazë për make-up-in është e nevojshme që të shpërndahet një produkt zbutës me një efekt të lehtë lifting.



Një këshillë

Nëse do që fondëtinta jote të ketë një bazë të shndritshme, vendos pak në kurrizin e dorës dhe shto një dozë të vogël hijezuesi ngjyrë perle. Efekti do të jetë goditës.

Revista Jeta