Gjykata ndryshon cilësimin e veprës penale
Është shfaqur shumë e qetë, e madje kur ka hyrë në sallë nuk ka mundur ta përmbajë emocionin teksa shikonte familjarët e saj dhe u ka qeshur, e madje edhe është përpjekur të shkëmbejë disa fjalë me ta. E veshur me një xhaketë ngjyrë jeshile të errët dhe pantallona jeshile tip ushtarake kamuflazhi, me flokët e mbledhura pas koke, 18-vjeçarja nga Tropoja dukej se kishte marrë parasysh çdo lloj vendimi që do të shqiptohej nga kryesuesi i trupit gjykues. Vrasja e një personi, për të cilin ka pretenduar se kishte tentuar ta përdhunonte, do t‘i kushtojë 7 vjet heqje lirie Aurora Breçanit. Gjykata e Tiranës ka dhënë dje vendimin përfundimtar, duke e shpallur fajtore vajzën nga Tropoja. Prokuroria kishte kërkuar dënimin e Breçanit me 18 vjet burg për akuzat e "vrasjes me dashje" dhe "mbajtjes pa leje të armëve luftarake". Por, në argumentimin e vendimit, gjykata, duke marrë parasysh edhe provat e paraqitura nga mbrojtja, ka ndryshuar cilësimin e veprës penale, duke dhënë fajësi për "vrasje në kushtet e tronditjes së rëndë psikike".
Historia e Aurora Breçanit zë fill në dhjetorin e vitit 2005 në fshatin e saj në Breçan të Tropojës, kur ajo ishte vetëm 16 vjeçe. Sipas deklarimeve të saj në proces, personi që kishte qëlluar donte ta përdhunonte. Viktima, 35-vjeçari Agron Rrahmani, sipas vajzës i kishte hyrë në shtëpi dhe kishte tentuar ta përdhunonte. E gjendur pa rrugëdalje, ajo e kishte qëlluar me automatik dhe e kishte vrarë. Por akuza ka pasur një tjetër version lidhur me ngjarjen. Sipas prokurorisë, midis viktimës dhe Breçanit kishte pasur më parë një lidhje dashurie. Për të vërtetuar këtë akuzë në proces është paraqitur edhe një foto e vajzës, e cila ndodhej në celularin e Rrahmanit.
© Gazeta Shqip
Përgjigju Duke Cituar
Postuar më parë nga Qyfyre
Krijoni Kontakt