KUKES -Më shumë se 10 për qind e grave kuksiane lindin në kushtet primitive të shtëpisë. Ato rrezikojnë jetën e tyre, vetëm e vetëm për shkak të mentalitetit fanatik që legjitimon ende lindjen në shtëpi. Burrat dhe vjehrrat, nuk i lejojnë nuset e reja t’u “zbulohen” mjekëve. Ky mentalitet i brezave të mëparshëm, ndonëse është zbehur disi, për fat të keq ende nuk është zhdukur. Mjekë të Spitalit Obstetrik-Gjinekologjik të qytetit të Kukësit, bëjnë me dije se pjesa më e madhe e grave që preferojnë të lindin në banesat e tyre në kushte tejet të vështira, janë nga zonat e thella rurale. Sipas tyre, rreziku i lindjeve jashtë ambienteve të maternitetit është në ato zona ku mungojnë mamitë e specializuara për lindjet natyrale. Ndërkohë, mjeku Gëzim Basha pohon se lindjet janë në raport të kënaqshëm me shtimin e popullsisë ne vend, Ai pohon se numri i vdekjeve të foshnjave është 12 në 1 mijë lindje.
FENOMENI
Gjatë dy dekadave të fundit janë shtuar lindjet nën kujdesin mjekësor në rrethin e Kukësit. Sipas mjekëve, brezi i viteve 70-të i kushtonte shumë pak vëmendje lindjes së grave në maternitetin e vetëm të këtij rrethi. Por referuar statistikave të Spitalit Obstetrik-Gjinekologjik të qytetit verilindor, rezulton se ka ende gra që lindin fëmijët e tyre në shtëpi, në kushte të papranueshme për bluzat e bardha. “Është e trishtueshme ta çosh nëpër mend, por ja që duhet pranuar se 10 për qind e nënave kuksiane lindin në kushtet e shtëpisë, duke rrezikuar infeksione të ndryshme që mund të jenë fatale si për shëndetin e tyre dhe të fëmijës”, - thotë për “Gazeta Shqiptare”, mjeku Gëzim Basha. Sipas tij, përveçse mentalitetit, gratë shtatzëna e kanë të vështirë të shtrohen për të lindur në maternitet dhe për shkak të largësisë së zonave ku ato banojnë dhe mungesës së infrastrukturës rrugore. “Në kohën time kishim shumë turp që t’i thonim burrit apo vjehrrës se dua të shkoj për të lindur në maternitet e me iu zbulu burrave (mjekëve). Ishte traditë, sepse edhe vjehrrat tona në shtëpi kanë lindur”, - thotë Hana 74-vjeçare. Ndërkaq, e moshuara shprehet se mendimet e asaj kohe ishin një budallallëk i vërtetë, pasi gratë e nuset e reja torturoheshin duke lindur me shpirt ndër dhëmbë. Nga ana tjetër, plaka tregon se nuset e djemve të saj kanë lindur gjithë fëmijët në maternitet dhe i ka shëndoshë si molla. Disa nëna fëmijësh pohojnë se ende ruhet mentaliteti, se femrat që lindin në shtëpi ndjehen më të respektuara nga burrat.
“Tani pak burra kundërshtojnë kur u thua se lindja duhet bërë në maternitet”, - thotë Shefie Peposhi, e cila punon prej 15 viteve si mami në fshatin e thellë të Lusnës. Ajo nuk harron të përmendë një rast fatal të një fshati fqinj, të ndodhur katër vjet më parë, ku një grua nga fisi i saj humbi fëmijën gjatë lindjes në shtëpi.
MATERNITETI
Spitali Obstetrik-Gjinekologjik i Kukësit është ndërtuar rreth viteve ‘50-të, ku kontributin themelor në formësimin dhe funksionimin e tij e mban doktor Korab Shehu, emrin e të cilit katër vjet më parë e mori ky institucion, pas ndarjes së tij nga jeta. Shehu, i cili punoi për rreth pesë dekada si gjinekolog, priti afërsisht 50 mijë lindje nga të gjitha trevat e Kukësit. Ai krijoi besimin e këtij institucioni shëndetësor tek popullata, nëpërmjet aftësive të tij të rralla profesionale dhe njerëzore duke thyer mentalitetin, traditën dhe fanatizmin e zonave të Kukësit për lindjet në shtëpi, duke i sensibilizuar ato mbi rrezikun që u kanoset nënave dhe fëmijëve.
http://www.balkanweb.com/gazetav4/index.php?id=28920
Përgjigju Duke Cituar
Postuar më parë nga Jack Watson
Krijoni Kontakt