Në Librazhd kapet në flagrancë hajduti
Disa fshatra të Tiranës kanë mbetur pa drita si pasojë e defekteve teknike dhe vjedhjes së telave të energjisë elektrike. Bëhet fjalë për Farkën, Berzhitën dhe Petrelën, të cilat prej tre ditësh kanë pasur mungesë të theksuar të energjisë elektrike. Komuna e Farkës ka mbetur pa drita për shkak të vjedhjes së telit të linjës elektrike, duke shkaktuar kështu një defekt në të gjithë zonën. Për këtë, policia e Tiranës njoftoi dje se nga shërbimet e Komisariatit Nr. 1 u mundësua arrestimi në flagrancë i shtetasve Alfred Selman Misku, 23 vjeç dhe Ylli Hysen Tafani, 53 vjeç. Uniformat blu treguan se arrestimi i tyre u krye pasi dyshohen se dy ditë më parë në fshatin Skutërr kanë vjedhur rreth 450 metra tel të linjës elektrike. Kjo sasi teli e vjedhur është gjetur ditën e djeshme në pikën e grumbullimit të skrapit në Njull Bathore, Komuna Farkë. Nga puna hetimore rezultoi se ky tel ishte vjedhur dhe shitur nga shtetasi Alfred Misku. Ndërkohë, policia tha se po punohet për dokumentimin e plotë të kësaj vepre penale. Sipas të dhënave, nga vjedhja e telit të linjës elektrike kanë mbetur pa drita dhjetëra familje. Sikur të mos kishte mjaftuar kjo, banorët e zonës së Petrelës kanë njoftuar dje se kishin tri ditë pa energji elektrike. Ata janë shprehur se prej ditës së martë nuk kanë pasur drita dhe se askush nuk i ka njoftuar për ndonjë defekt teknik. Gjithashtu, edhe zona e Berzhitës ka pasur të njëjtin fat. Ndërkohë, edhe policia e Librazhdit ka njoftuar dje se ka arrestuar një person, i cili kishte vjedhur një sasi kablloje të tensionit të lartë në një firmë private. Burime të policisë lokale thanë se kanë arrestuar në flagrancë 23-vjeçarin Zamir Posi, në fshatin Hotolisht të rrethit të Librazhdit. Mësohet se ky shtetas është kapur në flagrancë duke vjedhur një sasi kablloje të tensionit të lartë në mjediset e firmës private, "Çota".
© Gazeta Shqip
Përgjigju Duke Cituar
Krijoni Kontakt