Fate shqiptarësh, të kyçura në qelitë e Athinës
Nga Jakup . B. GJOÇA
Më 2-3 shkurt Qendra e të Drejtës Kushtetuese Europiane në Greqi dhe Fondacioni Themistokli & Dhimitri Çaço do të organizojnë veprimtarinë “Imazhi i “Tjetrit “ dhe integrimi i Emigrantëve”.
Do të marrin ( dhe sigurisht, që do të na ...ligjërojnë) edhe Elisabet Papadhimitriu, nënkryetare e parlamentit grek , deputete e Nea Dhimokratisë ( partia në pushtet), si edhe eurodeputetët Kostas Botopoullos, Dhimitri Papadhimulis, si edhe drejtori i Institutit të Politikës të Emigracionit në Greqi,, Aleksandër Zavos.
Zotërinjtë e lartpërmendur do të na ligjërojnë ( kushedi sa orë...) për teorinë e Teorisë të Integrimit të Emigrantëve në ...( planetin ) Greqi.Do të na (mbushin mendjen) ligjërojnë për (mos)domosdoshmërinë e ligjërimit të emigrantëve në (planetin) Greqi.
Zotërinjtë e lartpërmnendur nuk janë të dërguarit e OKB, dhe as të organizatës botërore të Emigracionit. Dua që ti pyes; -Vërtet, ju zotërinj, sa e njihni gjendjen reale të emigrantëve në Greqi? Sepse , nuk kam të drejtën, që të shtoj tjetrën. Që zotërinjtë nuk jetojnë aspak në realitetin shoqëror të (planetit) Greqi. Që të dinë , si trajtohen skllevërit bashkëkohërë e tregut të zi të punës në Greqi.
Këto lloj veprimtari , si edhe disa konferenca ndërkombëtare me temën e Emigracionit që ka organizuar (herë pas here) , zoti Zavos, janë fasada e gënjeshtrës , e disinformimit të realitetit të Emigracionit në Greqi.
Sikurse është një (gënjeshtër) propagandë boshe edhe plani (MARSHALL) 6 vjeçar i Pavllopullos “ ESTIA”, i financuar 16 milionë evro nga BE plus 4 milionë evro nga pagesat e emigrantëve për ri-ri-ri-riligjësim.
Realiteti? 400.000 emigrantë të padokumenta ( dhe jo të paligjshëm) punojnë sot në tregun e zi të punës në Greqi. Dhe, këta 400.000 emigrantë të paligjshëm, përçdo ditë jetojnë edhe me frikën e madhe të policisë. Dhe me qindra nga këta emigrantë që punojnë skllevër bashkohorë në tregun e zi të punës në Greqi, dergjen me muaj të tërë nëpër birucat e policive të Greqisë. Nuk kanë kryer asnjë lloj vepre penale. Krimi i vetëm i jetës të tyre është që , të shtyrë nga nevoja e një jete më të mirë nga ajo e Atdheut të vet, kanë ardhur në Greqi dhe punojnë të padokumenta .Punojnë me vite të tëra.Ky është realiteti i Greqisë së sotme. Ndërsa në fasadën e propagandës , dikushët organizojnë konferenca të (mos)integrimit të emigrantëve.
Në qelinë e policisë të Nea Filadhelfias takova emigrantët shqiptarë Arbër Ahmetaj nga Mallakastra ( në foto) 20 vjeç, Edison Nuraj nga Burreli 24 vjeç, si edhe një tjetër emigrantë shqiptar 29 vjeç ( që nuk do të indentifikohet- turpërohet që është në qeli- edhe pse kurrë nuk ka kryer asnjë krim).Në qelinë tjetër është një irakian, i cili është miqësuar shumë me emigrantët shqiptar.
-Në Irak na vrasin, vijmë këtu në Greqi, dhe na burgosin.- na thotë irakiani-Ku të vemi e të jetojmë në paqe?
Të tre emigrantët shqiptarë kanë disa javë që janë të burgosur në qelitë e policisë të Nea Filadhelfias. Kanë kaluar edhe nga gjyqi, dhe presin akoma, pa ditur afatin kohor, shpresën që i ushqejnë avukatët grekë, që një ditë do ti nxjerrin nga qelitë e policisë greke. Me kushtëzim .Që mbase një ditë ( në beharin e madh të iluzioneve të rrema), do të mund ( avukati grek dhe jo ligji grek) ti pajisë me dokumenta. Dhe sa më të besueshme ua bën iluzionin e rremë avukati grek, kaq më shumë duhet të paguajë emigranti i padokumeta.
-Deri tani kam paguar mbi 1500 evro, - më thotë emigranti shqiptar që nuk do të indentifikohet,- dhe avukati më ka thënë që do të më nxjerrë me kusht nga qelia e policisë.
Kush ka të drejtën që ti shuajë shpresën emigrantit të padokumenta, por të burgosur me javë të tëra në qelitë e policisë greke . Që një ditë edhe ai do të mund të ketë një fletë që ta ...vërtetojë edhe atë që ....është i ligjshëm në atë vend që ai e quan shpresën e jetës të tij?Kjo, gjithë bota e emigrantit të burgosur në qelitë e policisë greke, është ajo fletë e ...shpresës. E shpresës kundër frikës të policisë.
Arbër Ahmetaj duke qeshur me hekurat që e ndanin me mua, pranoi ta fotografoja.
-Ska gjë, me nxirr edhe foto.Po do edhe botoje.
-Nuk ke ndruajtje?- e pyes.
-Përse? Që jam brenda hekurave ?Nuk kam bërë kurrë ndonjë krim. Shikoji sa të trasha janë këta hekura që më mbajnë këtu ,mbyllur mua.Sikur të kem vrarë, apo vjedhur.
-E ndjen veten se të bëjnë padrejtësi? Apo e quan të drejtë , derisa nuk ke dokumenta, dhe policia zbaton ligjin?
-Të të burgosin se do që të punosh me ndershmëri dhe të jetosh më mirë , kjo është e Drejta? Apo ky është Ligji ndaj Njeriut?
Befasohem. Arbëri është i njomë në moshë, ndonëse mjekra e lënë i ka ngjyrën e zezë.
-Sa vjeç je?
-20 vjeç.
-Kur ke ardhë për herë të parë në Greqi?
- Në vitin 2002.
-Ku ke punuar deri tani.
-Kam bërë të gjitha punët.
- Me kë je këtu në Athinë?
-Kam edhe vëllanë.
-Më të madh ?
-Jo, është më i vogël.
-Po vëllai është me dokumenta?
-Jo, jo , edhe ai pa dokumenta punon.Prandaj edhe nuk vjen dot të më shikojë.
-Po pse nuk munde ti bëje dokumentat në vitin 2005, me ligjin e ri të Emigracionit?
-Vajta në bashkinë e Athinës, bëra kërkesat. Po nuk kisha vizë ,që kërkonte ligji . Kisha dokument që kisha marrë pashaportën në ambasadën tonë në Athinë më 2003, dhe bashkia e Athinës , edhe pse paguajta, më dha veveosi ( dëshmi ) të bardhë. Ky veveos, deri tani nuk mund të më bëjë emigrantë me dokumenta të rregullta.
-Po , tani çfarë shpreson?
-Avukati më thotë që do të bëjë një gjyq , dhe do të më nxjerr këtej.
-Kur?
-Edhe unë nuk e di. Pres.- dhe Arbëri qesh.
-Sa lek të mori avukati?
-Kush pyet për lekët?!Dua vetëm të më nxjerrë këtej. U çmenda këtu.
-Sikur të të çojnë në Shqipëri, ty çdo të bësh?
-Përsëri do të vij këtu, në Greqi. Do të punoj, se këtu i njoh të gjithë. Do të ruhem më shumë nga policia. Çtë bësh?!
-Edhe ty, kështu si Arbëri?-pyes Edisonin
-Edhe unë pa dokumenta. Më kapën policët edhe mua në një ditë me Arbërin në Filadhelfia. Po ata policë ishin. Më parë kapën mua, dhe pastaj panë dhe kapën Arbërin.
-Edhe ty, ke vënë avukat që të dalësh?- e pyes.
-Po, unë kam një vendim apelasi ( zbimi nga Greqia ) të policisë më 2004, dhe avukati më ka dhënë shpresë që mund të më bëjë dokumentat.
-Po ligji i Emigracionit 3386/2005 thotë që emigrantët që kanë apelasi nga policia greke ( me përjashtim për vepra penale të terrorizmit dhe sigurisë kombëtare të Greqisë ) do të hiqen dhe njëkohësisht data e apelasit do të merret si fakt qendrimi në Greqi, dhe ke të drejtën që të bëje kërkesën për ligjësim.- e sqaroj Edisonin, sepse vërtet habitem, si ka mundësi që Edisoni nuk ka dokumentat e ligjësimit.
-E bëra kërkesën në bashkinë e Athinës, po nuk më pranuan dokumentat. Prandaj edhe avukati tani më jep shpresë se do të më shpëtojë....
Shpresa përtej hekurave të birucave të policisë greke. Edhe kur ligji i shtetit grek është kaq i qartë, në Greqi ka nëpunës që veprojnë jashtë ligjit. Që janë ata ligji! Viktima janë emigrantët shqiptarë. Që nuk mund të fitojnë të drejtat që u jep ligji.Dhe pastaj emigrantët , viktimë të keqzbatimit të ligjit bëhen gjahu i policisë greke. Bëhen edhe viktima të gjahtarëve –avukatëve grekë. Që në emër të ....NDIHMËS, i rrjepin ekonomikisht emigrantët , edhe për një plotësim të thjeshtë të një kërkese.
Dhe kur ke ditë e javë të tëra përtej hekurave të qelive të policisë greke-për krimin e vetëm që ke bërë- QË DËSHIRON TË JETOSH NJË JETË MË TË MIRË- ajo shpresë e avukatit , të duket rreze dielli.Që të ngroh shpresën e të nesërmes.Që të ngroh atë të qeshur edhe përtej hekurave të qelive të policisë greke.
Dhe e di që ato konferenca dhe seminare e veprimtari si ajo e 2-3 shkurtit ( nuk është edhe në ditën e parë të prillit, dreqi e martë) kurrë nuk do të mundin që të jetësojnë këto të qeshura të shpresës të Arbërit , të Edisonit, e të qindra e qindra emigrantëve që janë akoma në qelitë e policisë greke si emigrantë të padokumenta, s emigrantë të paintegruar. Dhe nuk e di, nëse ia vlen që emigrantët edhe ti dëgjojnë ato ....ligjërata të deputetëve të nderuar grekë, që kujtohen në të tilla aktivitete , ti djegë ....meraku i emigrantëve.
gazeta ndryshe - E Merkure, 23 Janar 2008
Përgjigju Duke Cituar
Postuar më parë nga drity
Krijoni Kontakt