BDSH: Letër NATO-s

[biligoa]

BDSH: Letër NATO-s

Adresuar:
Këshillit te NATO-s
Sekretarit të Përgjithshëm z.Jaap de Hoop Scheffer
Përfaqësuesve Permanent të shteteve antëre të NATO-s
Kryetarëve, Kryeministrave, Ministrave të Punëve të Jashtme dhe Ministrave të Mbrojtjes të shteteve anëtare të NATO-s ( përmes përfaqësuesve të tyre permanent)

Shpartallimi i Bllokut socialist dhe i Paktit të Varshavës, që simbolizojnë përfundimin e bipolaritetit në marrëdhëniet ndërkombëtare, krijuan rrethanat që NATO të shtrinë zonën e sigurisë dhe të stabilitetit edhe në pjesën e shteteve të Evropës që ishin nën influencën komuniste.
Në përputhje me këtë kontekst të ri historik u elaborua strategjia e zgjerimit të NATO-s edhe për këtë pjesë të Evropës.
Me një fjalë, cikli i pestë i zgjërimit të Aleancës, do të shënojë një etapë të rëndësishme drejt realizimit të objektivës së kamotshme për një Europë të lirë, të bashkuar dhe të sigurtë ku sundon paqa, demokracia dhe vlerat e përbashkëta.

I nderuari Sekretar i Përgjithshëm z.Jaap de Hoop Scheffer,
Të nderuar Përfaqësues Permanent në Këshillin e NATO-s,

Siç jeni në dijeni Kryeministri i Maqedonisë Nikolla Gruevski më 23 janar do të raportoj në selinë e NATO-s në Bruksel, lidhur me dialogun politik, implementimin e Marrëveshjes së Ohrit, reformat e brendshme, zgjidhja e kontestit të emrit me Greqinë...
Referimi i z.Gruevski me 23 janar 2008 paraqet një rast të volitshëm që përfaqësuesit e institucioneve demokratike ndërkombëtare të ushtrojnë presionet e nevojshme që ky shtet të ndërpres logjikën totalitare të funksionimit. Për këtë qëllim ju rikujtojmë disa nga problemet kyçe:
-Edhe pse autoritetet e Shkupit janë të vetëdijshme se shtetet që dëshirojnë të aderojnë në NATO duhet të plotësojnë të gjitha kushtet në përputhje me synimet e Aleancës për liri, siguri, demokraci dhe vlera të përbashkëta ato vazhdojnë të funksionojnë me mentalitet të vjetër.
-Maqedonia, me praktikat e veta të diskriminimit është shteti ku më së shumti shkelen të drejtat e njeriut në Evropë.
-Edhe pse Maqedonia ka nënshkruar dhe ratifikuar Kartën Evropiane për gjuhët, gjuha shqipe nuk është gjuhë zyrtare dhe shqiptarët vazhdojnë të diskriminohen si më parë.

KËRKOJMË që Këshilli i NATO-s të kushtëzojë ftesën e Maqedonisë për Samitin e Bukureshtit me miratimin e ligjit për zyrtarizimin e gjuhës shqipe në përputhje të plotë me praktikat e shoqërive demokratike perëndimore.
Edhe pse Maqedonia ka nënshkruar dhe ratifikuar të gjitha konventat për mbrojtjen e të drejtave dhe lirive fundamentale të njeriut dhe konventat lidhur me luftën kundër diskriminimit, diskriminimi ndaj shqiptarëve vazhdon në të gjitha fushat e jetës shoqërore, ekonomike dhe politike….
KËRKOJMË që Këshilli I NATO-s të kushtëzojë ftesën Maqedonisë për Samitin e Bukureshtit me heqjen e të gjitha ligjeve diskriminuese dhe me miratimin e ligjeve të reja ku çështjeve sociale do tu jepet përgjigje adekuate. Është tepër urgjente që para Samitit të NATO-s të rregullohet statusi i ish luftëtarëve të UÇK-së.
Nga themelimi i Maqedonisë si republikë në kuadër të Federatës Jugosllave dhe gjatë periudhë së tranzicionit demokratik vendbanimet e banuara me shumicë shqiptare në Maqedoni kanë mbetur jashtë projekteve zhvillimore.
Diskriminimi i shqiptarëve në fushën ekonomike ka qenë i theksuar gjatë gjithë periudhës së komunizmit dhe ka marrë përmasa edhë më të mëdha në periudhën e privatizimit. Rezultatet e privatizimit dëshmojnë se shqiptarët kanë qenë të margjinalizuar dhe të përjashtuar nga ky proces.
Krahas kësaj diskriminimi në përfaqësimin e shqiptarëve në institucionet shtetërore dhe ndërmarrjet publike ka qenë dhe mbetet shqetësues.(për më shumë detaje shihni raportin e BDSH-së drejtuar institucioneve ndërkombëtare me 10 shtator 2007; www.bdsh.eu)
KËRKOJMË që Këshilli i NATO-s të kushtëzojë ftesën e Maqedonisë për Samitin e Bukureshtit me hapjen e një perspektive të re ekonomike në përputhje me rekomandimet e Parlamentit Europian të datës 12 korrik 2007 që të hiqet dispariteti zhvillimor si në aspektin regjional ashtu edhe në aspektin etnik. Njëherit të filloj ristrukturimin e administratës në përputhje me standardet euro-atlantike, kapacitetin buxhetor të vendit dhe përfaqësimin adekuat dhe të drejtë të etniteteve.
Koalicioni qeveritar VMRO-PDSH përmes politikës që destabilizon vendin dhe rajonin dëshmon se Maqedonia dëshiron të jetë vetëm përfituese e të mirave që ofrojnë institucionet euro-atlantike.
Një nga parimet themelore të funksionimit të shoqërive demokratike konsiston në atë që asnjë njeri nuk duhet t’i nënshtrohet torturës, veprimeve dhe dënimeve mizore, trajtimeve çnjerëzore dhe poshtëruese...
Realiteti në Maqedoni dëshmon të kundërtën : shqiptarët rrihen, poshtërohen, çnjerëzohen, maltretohen, torturohen, dënohen, vriten, masakrohen me bekimin e autoriteteve politike të Shkupit.
Përkundër angazhimeve të mëdha të komunitetit ndërkombëtarë për të inkurajuar një qasje të re të problemeve ndëretnike dhe heqjes së katalizatorëve eventual të krizave të reja rastet e Sopotit, Bllacës, Brezës, Tanushës, Vaksincës, Brodecit ku u ushtrua dhunë dhe terror kundër shqiptarëve dëshmojnë se politika e vjetër antishqiptare është dominante në institucionet shtetërore të Republikës së Maqedonisë.
Të vetëdijshëm se lufta kundër diskriminimit racor, kundër diskriminimit etnik, kundër diskriminimit gjinor dhe kundër të gjitha formave të diskriminimit kërkon një angazhim kolektiv të demokratëve të mirëfilltë, BDSH kërkon që Këshilli i NATO-s të kushtëzojë ftesën e Maqedonisë për Samitin e Bukureshtit me lirimin e menjëhershëm të gjithë civilëve të pafajshëm të fshatit Brodec dhe rishikimin e të gjitha proceseve të montuara kundër shqiptarëve .
Pa një distancim të qartë nga politika antishqiptare e koalicioni qeveritar VMRO-PDSH dhe pa një intervenim energjik të demokracive perëndimore për t’i thënë ndal dhunës dhe diskriminimit të shqiptarëve në Maqedoni qeveria aktuale do të inkurajohet në vazhdimin e destabilizimit të vendit me rrezik për të destabilizuar tërë Ballkanin.
Rikthimi në regjimin e vjetër të vizave dëshmon frymën antishqiptare që mbretëron në institucionet shtetërore të Maqedonisë e që është në kundërshtim të plotë me objektivën e kamotshme për një Europë të lirë, të bashkuar dhe të sigurt ku sundon paqja, demokracia dhe vlerat e përbashkëta.
Referimi i 23 janarit përbën një moment të volitshëm ku përfaqësuesit e demokracive perëndimore mund tua bëjnë me dije autoriteteve të Maqedonisë se rruga drejt integrimit në institucionet euro-atlantike është e lidhur ngushtë me respektimin e plotë të të drejtave të shqiptarëve.

Aneks :
1. Dëshmitë e dhunës në Brodec (Video)
2. Fotot e personave të torturuar në paraburgim
3. Fotot e personave të masakruar

Tetovë, 18 janar 2008
Kryetar i BDSH
Bardhyl Mahmuti

http://lajme.dervina.com/?sherbimi=lajme&lajmi=4947-1438:220