Shpresat për ndryshime!

[goldian]

te gjithe keta te emeruarit jane anetare te pd-se??????
sbesoj te behen emerime pa tesere partie

[DI_ANA]

Sollaku paralajmëron Ina Ramën: “Mbaj përgjegjësi për vendimmarrjen”


Shaban Sulçe

Ish-kryeprokurori Theodhori Sollaku, i ftuar në tryezën e organizuar nga fondacioni “Qemal Stafa” për çështjen e Drejtësisë, ka deklaruar pikëpamjet e tij se si mund të reformohet sistemi i drejtësisë dhe veçanërisht Prokuroria.
Sipas Sollakut, nuk do të ishte shumë efecient kufizimi i mandatit të kryeprokurores, por se kjo e fundit duhet t’i kushtojë një rëndësi shumë të veçantë mbajtjes së përgjegjësisë për vendimmarrjen e saj. “Është folur shumë për reformën në Drejtësi, por të gjithë e konstatojmë që të pakta janë idetë që e kanë shoqëruar këtë propagandë. Askush deri sot nuk ka thënë nëse ka nevojë të preket Kushtetuta për këtë sistem të drejtësisë, nëse është i mirë apo është i keq. Ne sot kemi rregulla të caktuara në Kushtetutë përsa i përket sistemit gjyqësor, po kështu kemi dhe pjesën e Prokurorisë. Nuk ka asnjë rezervë për këtë rregullim, përjashto pozicionin e prokurorit të Përgjithshëm për kufizimin e mandatit. Natyrisht, kufizimi i mandatit edhe mund të bëhet në Kushtetutë, apo edhe në ligjin organik, por unë mendoj që kjo nuk zgjidh asgjë në rritjen e efeciencës së institucionit. Qeveria duhet të jetë ajo që duhet ta administrojë organin e Prokurorisë, kurse kryeprokurori të jetë përgjegjës vetëm për vendimmarrjen”, - tha Sollaku. Ish-kryeprokurori ka kërkuar hetimin e administratës për të luftuar fenomenin e korrupsionit.
“Ashtu si policia investigon aferat korruptive në Dogana, Tatime, në Rrugë, e njëjta gjë mund të ndodhë edhe me administratën. Mund të ketë përjashtime imuniteti, por unë mendoj se reforma duhet të synojë edhe në këtë drejtim. Përsa i përket aftësisë së magjistratëve, gjyqtarëve, prokurorëve, nuk mund ta zgjidhim me një ligj, por gjithsesi, kjo kategori duhet integruar duke përdorur më shumë forma të tilla të integrimit profesional”, - deklaroi Sollaku.
Xhafaj
Ndërkohë, deputeti i Partisë Socialiste, Fatmir Xhafaj, në fjalën e tij në tryezën e organizuar nga fondacioni “Qemal Stafa” ka shprehur keqardhjen për mungesën në këtë debat të autoriteteve drejtuese në sistemin e drejtësisë. “Në debat nuk arrihet të përfshihen zërat potentë që ka sistemi dhe kur them zërat potentë që ka sistemi, gjyqtarët, prokurorët, avokatët, Profesorati, akademikët, dhe ne kemi të tillë, por pikërisht kjo klimë që është krijuar e ka penguar këtë shfaqje dhe, për fat të keq, pushteti gjyqësor, por edhe pjesë të tjera të sistemit, përfaqësohen nga autoritetet drejtuese të tyre, të cilat mbrojnë në vetvete, për hir të së vërtetës, nga njëra anë nuk përbëjnë ato zëra potentë që duhet të kishin dhe mbase s’është shumë e nevojshme të ishin të tillë. Por është për të ardhur keq që më shumë kujdesen se si të forcojnë pushtetet e tyre individuale, sesa të përafrojnë realisht sistemin dhe ishim të hapur që ata të ishin sot të pranishëm. Për fat të keq, KLD-ja, edhe një anëtar që dërgoi, edhe ai sa mbaroi iku, se tha të mos hyjë në një siklet politik më shumë”, - tha Xhafaj.



2 Shkurt 2008 Gazeta "Albania"

[Agon_xh]

DI_ANA qenka kthyer ne forum
pranoi pershendetjet e mia.

[DI_ANA]

Niazi Jaho: “Lëvizjet e prokurorëve nuk janë reformë”
Intervista/ Flet konstitucionalisti i njohur

Luan Kondi

Pas reagimit të politikës pro e kundër shkarkimit dhe transferimit të prokurorëve me dekret të Presidentit të Republikës dhe deklaratës së prokurores së Përgjithshme se lëvizjet ishin të justifikuara, në një intervistë ekskluzive për gazetën “Albania” shprehet edhe konstitucionalisti Niazi Jaho. Duke sqaruar situatën juridike në të cilat u kryen lëvizjet, Jaho thotë se deri tani sqarimet kanë mbetur deri në stadin e kompetencave të kryeprokurores. Sipas tij, në konkluzione për uljen në detyrë është e rëndësishme të arrihet pas analizave të thella, objektive dhe të gjithanshme, ku të paraqiten argumentet pro dhe kundër.
Para disa ditëve, kryeprokurorja ka bërë disa lëvizje në Prokurorinë e Përgjithshme dhe në prokuroritë e rretheve. A janë të mbështetura me ligje dhe të justifikuara lëvizje të tilla?
Që t’i përgjigjesh kësaj pyetjeje duhet të njohësh jo vetëm ligjin, por edhe faktorët që kanë kushtëzuar lëvizje të tilla. Kjo do të thotë se duhet të njohësh problemin në detaje. Unë e njoh ligjin, por jo motivet dhe detajet që kanë kushtëzuar lëvizje të tilla. Sipas pikës 3 të Nenit 149 të Kushtetutës, prokurorët emërohen dhe shkarkohen nga Presidenti i Republikës me propozimin e prokurorit të Përgjithshëm.
Sipas ligjit mbi prokurorinë, cilat janë detyrat e prokurorit të Përgjithshëm?
Kompetencat e prokurorit të Përgjithshëm janë përcaktuar në Nenin 8 të ligjit “Për organizimin dhe funksionimin e Prokurorisë në Republikën e Shqipërisë”. Në këtë dispozitë, veç të tjerave, thuhet se prokurori i Përgjithshëm ka të drejtë t’i propozojë Presidentit të Republikës emërimin, transferimin, ngritjen në detyrë dhe shkarkimin e prokurorëve, të caktojë drejtuesit e prokurorive dhe zëvendësit e tyre në prokuroritë pranë gjykatave, të urdhërojë komandimin e prokurorëve etj.
Po transferimi i prokurorëve a duhet të jetë i motivuar?
Mendoj se po. Sipas Nenit 24 të ligjit “Mbi prokurorinë”, transferimi i prokurorit mund të bëhet vetëm për nevoja të organizimit dhe të funksionimit të hallkave të sistemit të prokurorisë si dhe në rastet kur për arsye të ndryshme kjo kërkohet nga vetë prokurori.
Në cilat raste mund të vendoset ulja në detyrë e prokurorëve?
Fillimisht e shikoj të nevojshme të sqaroj se ulja në detyrë e prokurorit është një nga masat disiplinore. Sipas nenit 32 të ligjit “Mbi prokurorinë”, shkelje disiplinore, veç të tjerave, konsiderohen zvarritjet e rënda ose sistematike të procedimeve ose detyrave të tjera të ngarkuara ose mospërmbushja e detyrave, kryerja e veprimeve që diskretitojnë rëndë figurën e prokurorit, nxjerrja e sekretit të hetimit ose i të dhënave të tjera me karakter konfidencial etj.. Kundër dhënies së një mase të tillë (kur prokurori i ulur në detyrë nuk e quan atë të drejtë) mund të bëhet ankim në Gjykatën e Apelit.
Ligji “Mbi prokurorinë”, a i njeh të drejtën prokurorit të Përgjithshëm të komandojë prokurorin me detyrë në një prokurori tjetër?
Po, mundet, në rastet kur një prokurori nuk funksionon normalisht ose nuk përballon dot volumin e punës si dhe në rastet kur del nevoja e kryerjes së hetimeve paraprake ose gjykimit të tij, por jo më shumë se kohëzgjatja e procedimit penal të veçantë.
Lëvizjet e prokurorëve që ka bërë prokurorja e Përgjithshme, a duhet të shqyrtoheshin më parë nga Këshilli i Prokurorisë?
Sipas Nenit 10 të ligjit “Mbi prokurorinë”, Këshilli i Prokurorisë jep mendim për shkelje të disiplinës të kryer nga prokurori për të cilat prokurori i Përgjithshëm i propozon Presidentit të Republikës shkarkimin e tij nga detyra. Por ky këshill është vetëm konsultativ. Prokurori i Përgjithshëm mendimin e shfaqur prej tij mund ta marrë ose mund të mos e marrë parasysh.
Lëvizjet e vendosura nga prokurorja e Përgjithshme a mund të konsiderohen reformë që duhej bërë në këtë organ?
Për t’i dhënë përgjigje kësaj pyetjeje, duhet të dish se si konceptohet reforma që duhet të kryhet në prokurori. Mendimet mund të jenë nga më të ndryshmet. E rëndësishme është që në bazë të një analize të thellë, objektive dhe të gjithanshme, mbasi të paraqiten argumentet pro dhe kundër, të arrihet në konkluzionet përkatëse. Deri sot janë shfaqur mendime të veçanta mbi rolin dhe funksionin e prokurorisë, mbi raportet prokurori-polici gjyqësore etj., por nuk di ose nuk jam njohur me analiza që përmenda më lart. Është e kuptueshme se veprimtaria e çdo organi, pra edhe ajo e prokurorisë, mbështetet në legjislacionin në fuqi. Kjo do të thotë se çdo vendim që merret duhet të jetë në përputhje me ligjin. Nëse lëvizjet e bëra nga prokurorja e Përgjithshme janë të ligjshme, kjo nuk do të thotë se ato janë pjesë e reformës ose se kjo është reforma. E them këtë sepse paraprakisht duhet të ketë mision të qartë mbi reformën në prokurori gjë që ato të mundësojnë arritjen e konsensusit të gjerë praktik dhe përgjysmim në legjislacionin përkatës. Mendoj se reforma synon: 1- Në marrjen e masave për zbatimin rigoroz të dispozitave kushtetuese dhe ligjore në fuqi dhe,
2-Në përmirësimin e mëtejshëm të legjislacionit për t’iu përgjigjur kërkesave dhe nevojave që dikton koha praktike.





2 Shkurt 2008 Gazeta "Albania"

[DI_ANA]

Kuvend, miratohet marrëveshja që shkarkoi Sollakun.

8 shkurt 2008

Debate dje ne Kuvend për miratimin e një projektligji që shkarkoi pak kohë më parë Sollakun

TIRANË- Shkarkimi i ish-kryeprokurorit Theodhori Sollaku është bërë edhe një herë objekt debati në seancën plenare të Kuvendit, dhe shkak është bërë pikërisht diskutimi i projektligjit "për ratifikimin e marrëveshjes së ekstradimit midis Shqipërisë dhe Italisë". Opozita megjithëse ka mbështetur miratimin e këtij projektligji, ka gjetur rastin të evidentojë faktin se mungesa e deritanishme e një marrëveshje të tillë midis vendit tonë dhe Italisë hedh poshtë të gjitha akuzat që shumica qeverisëse ngriti dhe shkarkoi kryeprokurorin Theodhori Sollaku gati dy muaj më parë. Sipas nënkryetarit të grupit parlamentar, Erion Braçe, ka qenë pikërisht çështja e ekstradimeve, akuza kryesore mbi të cilën shumica mbështeti raportin e saj për shkarkimin e Sollakut. Prandaj ai ka theksuar se miratimi në këtë moment i kësaj marrëveshjeje ekstradimi tregon qartë se akuzat e bëra gjatë hetimit parlamentar kanë qenë të pambështetura në bazë ligjore. "Akuza që ngritët ndaj ish-kryeprokurorit të republikës ka pasur të bëjë me faktin që z. Sollaku ka penguar ekstradimet nga Shqipëria.


Kjo ka qenë një nga çështjet më të debatueshme në komisionin hetimor dhe parlament. Pra, ka pasur disa çështje ligjore të cilat kanë veshur një akuzë që sot po provohet se atëherë nuk qëndronte për ish-prokurorin", tha Braçe. Ndërkohë që ndaj këtij konstatimi ka reaguar ministri i Drejtësisë Enkelejd Alibeaj, i cili tha se Sollaku nuk është akuzuar për pengimin e ekstradimeve, por se ka penguar zbatimin e urdhër-arresteve ndërkombëtare për shtetas shqiptarë që kanë kryer krime jashtë. "Akuza që i është bërë ish-Prokurorit të Përgjithshëm, ka qenë se ka penguar urdhër-arrestet ndërkombëtare, që do të thotë se urdhër-arrestet ndërkombëtare për qytetarët shqiptarë që kanë thyer rregullat jashtë territorit të Shqipërisë, nuk janë ekzekutuar asnjëherë", u shpreh Alibeaj.


Por edhe ky argument nuk ka bindur përfaqësuesit opozitarë të cilët përsëri e kanë lidhur zbatimin e urdhër-arresteve me mungesën e bazës ligjore mbi të cilat duhej të veprohej. Sipas Braçes, edhe në rast se kryeprokurori do t'i zbatonte këto urdhër-arreste, ai për shkak të mungesës së bazës ligjore nuk do të mund t'i burgoste të arrestuarit. "Po e konsideroj të mirëqenë dhe atë që thoni ju që z.Sollaku ka penguar zbatimin e urdhër-arresteve ndërkombëtare për shtetas shqiptarë që kanë kryer krime jashtë. Dakord z.Ministër, ja që z.Sollaku mund t'i ndalonte apo të zbatonte urdhër-arrestet ndërkombëtare. Pastaj çfarë duhet të bënte me këta njerëz? Si duhet të vepronte t'i çonte në Itali? Marrëveshjen e ke çuar vetëm sot për t'i çuar në Itali. Ku duhet t'i çonte në Greqi, Gjermani, Belgjikë apo në Francë, në asnjë nga këto vende nuk ke marrëveshje", u shpreh Braçe.

Shekulli Online

[DI_ANA]

Të saktësohet destinacioni i pronave të trafikantëve
ALBANA LIKA
16/02/2008 Ligji për goditjen e krimit, zv.ministrja Iva Zajmi jep sugjerimet e veta

Zëvendësministrja e Brendshme Iva Zajmi, i ka propozuar Ministrisë së Financave një rregullim më të detajuar të ligjit “Për parandalimin dhe goditjen e krimit të organizuar”. Ndërsa Financat kanë propozuar një rregullim ligjor që parashikon përdorimin e fondeve që do të grumbullohen nga shitja apo dhënia me qira e pronave dhe pasurive kriminale, në interes të rehabilitimit të viktimave të trafikimit, Zajmi shkon edhe më tej. Ajo propozon përcaktimin e qartë të përqindjes që do përdoret nga shteti për mbështetjen financiare të secilit projekt, që synon administrimin për qëllime institucionale, sociale ose për interes publik të pasurive të paluajtshme të konfiskuara. Kjo sipas saj, garanton përdorimin e fondeve në destinacionin e duhur.

Propozimet

Numri dy i Ministrisë së Brendshme, gjatë një prononcimi për “Metropol”, sugjeron që hartuesit e ndryshimeve ligjore të projektit në fjalë duhet të bëjnë një rregullim më të detajuar për shpërndarjen e fondeve të grumbulluara nga pronat e sekuestruara. “Mendoj se në ligj duhet të përcaktohet përqindja që do të përdoret rast pas rasti për mbështetjen financiare, kryesisht për problemet sociale dhe rehabilitimin e viktimave të trafikimit”, theksoi Zajmi. Fakti që fondet e grumbulluara shkojnë në Buxhetin e Shtetit rrit mundësinë e mënjanimit të destinacionit për të cilin ato fonde janë mbledhur. Në këtë rast, shteti mund t’i përdorë për qëllimet e veta. Gjithashtu, zv.minsitrja propozon edhe një decentralizim të vendimmarrjes lidhur me përdorimin e fondit të të ardhurave nga pronat e konfiskuara. “Në projektin bazë, përcaktohet që për vlerësimin e ecurisë së administrimit dhe përdorimit të pasurive të sekuestruara dhe të konfiskuara, për dhënien e mendimit për kërkesat për financim të projekteve, pranë qeverisë të ngrihet Komiteti Këshillues. Ky komitet përbëhet nga titullarë institucionesh. Më e përshtatshme do ishte që me këtë punë të merreshin në nivel drejtorie”, vijoi Zajmi. Për sa i përket përbërjes së Agjencisë për Administrimin e Pronave, zv.ministrja e Brendshme sugjeron që anëtarët të vijnë nga sektori privat. “Ajo që është më e rëndësishme në rolin e kësaj Agjencie, është pikërisht ruajtja e pasurisë së sekuestruar, pa ia humbur vlerën e pasurisë. Pra, administratori duhet të marrë vesh nga tregu, prandaj propozim kryesor është që ata të vijnë nga sektori publik”, nënvizoi ajo për këtë çështje.

Drafti

Ndryshimet e propozuara në ligjin “Për parandalimin dhe goditjen e krimit të organizuar” parashikojnë krijimin e standardeve për mbrojtjen ligjore dhe fizike të viktimave të trafikut. Fondet që do të grumbullohen nga shitja apo dhënia me qira e pronave dhe pasurive kriminale, do të përdoren për kompensimin e viktimave të trafikimit. Konkretisht, për riaftësimin dhe kurimin e përdoruesve të substancave narkotike, si dhe asistencën e rehabilitimin e viktimave të trafikut të qenieve njerëzore. Gjithashtu, ato do të përdoren edhe për përmirësimin e infrastrukturës dhe të shërbimeve në zona me probleme sociale. Zhvillimi i programeve shkollore për edukimin ligjor, si dhe nxitja e edukatës së punës te personat e papunë, janë të tjera synime për të cilat do të përdoren këto të ardhura.

Pasuritë e sekuestruara dhe konfiskuara para dhe gjatë vitit 2007

1. Për pasuritë e mëposhtme është dhënë masa e zgjatjes së afatit të sekuestros:

Apartamente banimi - 2

Garazh

Hotel

Autoveturë

Llogari bankare

Tokë arë - 3

Ullishte

Truall.

2. Për pasuritë e mëposhtme është paracaktuar shtyrja e masës së sekuestros:

Toke arë

Ullishte

Truall

Lokal

Automjet fuoristradë.

3. Konfiskim pasurie:

Restorant motel 476 m2.

4. Sekuestro pasurie:

Automjet i tipit benz.

5. Sekuestro paraprake:

Bar kafe

Truall

Automjete – 2.

Gazeta "Metropol"

[DI_ANA]

Topi dekreton katër ligje
16/02/2008 Presidenti

Presidenti Bamir Topi ka dekretuar dje shpalljen e katër ligjeve të miratuara nga Kuvendi në muajin janar. Kreu i Shtetit ka dekretuar shpalljen e ligjeve “Për ushqimin”, si dhe “Për disa shtesa dhe ndryshime në ligjin nr. 9426, datë 6.10.2005 “Për mbarështimin e blegtorisë”. Gjithashtu, Topi ka dekretuar shpalljen e ligjit “Për ratifikimin e Memorandumit të Mirëkuptimit ndërmjet Republikës së Shqipërisë dhe Komunitetit Evropian për asociimin e Republikës së Shqipërisë në programin e shtatë kuadër të Komunitetit Evropian për kërkimin, zhvillimin teknologjik dhe të veprimtarive të demonstrimit (2007-2013)”. Një tjetër ligj i dekretuar nga Presidenti është edhe ai “Për përcaktimin e rregullave dhe të procedurave për tregtimin ndërkombëtar të llojeve të rrezikuara të faunës dhe të florës së egër”. Dekretet janë në mbështetje të neneve 93 dhe 84, pika 1 të Kushtetutës.

Gazeta "Metropol"

[DI_ANA]

Pronat e trafikantëve për rehabilitimin e viktimave të trafikut
ALBANA LIKA
15/02/2008 Ndryshimet e reja ligjore pritet të kalojnë së shpejti për miratim në qeveri

Për rehabilitimin e viktimave të trafikut, qeveria shqiptare nuk do të përdorë më fonde nga Buxheti i Shtetit, por fondet nga shitjet e pronave të konfiskuara të trafikantëve që i kanë përfituar në mënyrë kriminale. Ndryshimet ligjore në ligjin “Për parandalimin dhe goditjen e krimit të organizuar”, janë pjesë e punës së Ministrisë së Brendshme në kuadër të hartimit të një legjislacioni bashkëkohor, në luftën kundër krimit të organizuar dhe terrorizmit.

Projekti i ri

Të gjitha fondet që do të grumbullohen nga shitja apo dhënia me qira e pronave dhe pasurive kriminale, do të përdoren në interes të rehabilitimit dhe kompensimit të viktimave të trafikimit. Sipas burimeve nga Ministria e Brendshme, ky fond i posaçëm për parandalimin e kriminalitetit dhe edukimin ligjor, do të përdoret për riaftësimin dhe kurimin e përdoruesve të substancave narkotike, si dhe asistencën e rehabilitimin e viktimave të trafikut të qenieve njerëzore. Gjithashtu, ato do të përdoren edhe për përmirësimin e infrastrukturës dhe të shërbimeve në zona me probleme sociale. Zhvillimi i programeve shkollore për edukimin ligjor, si dhe nxitja e edukatës së punës te personat e papunë, janë të tjera synime për të cilat do të përdoren këto të ardhura. Në legjislacionin aktual, qeveria parashikon përdorimin e vetëm 50 për qind të të ardhurave të Buxhetit të Shtetit, që përfitoheshin nga pronat e konfiskuara. Masa e konfiskimit vendoset me kërkesën e prokurorit, i cili i paraqet gjykatës arsyet ku bazohet kërkesa. Projekti aktualisht ndodhen në fazën e diskutimit me aktorët kryesorë të interesit, dhe pritet së shpejti të miratohet në Këshillin e Ministrave.

Ligji i 2004-ës

Sipas projektit “Për parandalimin dhe goditjen e krimit të organizuar”, pasuritë e konfiskuara me vendim gjykate, kalojnë në favor të shtetit. Vendimi i formës së prerë për konfiskimin e pasurive i dërgohet menjëherë Agjencisë për Administrimin e Pasurive të Sekuestruara dhe të Konfiskuara. Mënyra e përdorimit të pasurive të luajtshme, pasurive të paluajtshme dhe pasurive që shërbejnë në veprimtari ekonomike e tregtare, vendoset nga ministri i Financave, në bazë të raportit të vlerësimit tekniko-financiar, si dhe të mundësive të përdorimit të tyre. Ndërsa përdorimi i pasurive të luajtshme dhe i mjeteve monetare, realizohet nga administratori, i cili kryen veprimet e nevojshme për të dorëzuar në llogaritë e Agjencisë për Administrimin e Pasurive të Sekuestruara dhe të Konfiskuara fondet në mjete monetare. Pasuritë e paluajtshme të konfiskuara shiten, kalojnë në administrim të organeve të sistemit të drejtësisë, të rendit publik dhe mbrojtjes civile, ose kalojnë në pronësi të njësive të qeverisjes vendore. Veprimtaritë tregtare dhe pasuritë e paluajtshme të konfiskuara, që janë të vendosura në veprimtarinë e personave juridikë tregtarë, kalojnë në pronësi të shtetit.

Hartuesit e projektit të ri

Koordinatorja Kombëtare në Ministrinë e Brendshme, në bashkëpunim të ngushtë me PAMEKA-n, Ministrinë e Financave, Agjencinë për Administrimin e Pasurive të Sekuestruara dhe Konfiskuara, ka propozuar këto ndryshime në ligjin “Për parandalimin dhe goditjen e krimit të organizuar”. Këto ndryshime parashikojnë krijimin e standardeve për mbrojtjen ligjore dhe fizike viktimave të trafikut, dëshmitarëve të drejtësisë gjatë procedimit penal dhe gjyq; mundësimin e kompensimit të tyre duke përdorur burime nga pronat që trafikantët e tyre i kanë përfituar në mënyrë kriminale.


Metropol

[DI_ANA]

Projekti me 30 drejtori, 53 sektorë mbeshtetës dhe 5 zv.drejtorë


Ndryshimet e fundit të strukturës së re të policisë



Etleva DELIA

Drejtori i Policisë së Shtetit përgatit strukturën e re. Gazeta “Tirana Observer” boton për herë të parë organogramën dhe bashkë me të edhe të vjetrën. Vihen re disa ndryshime themelore, ku ajo më e rëndësishmja është ndarja në shumë sektorë, për të pasur një polici sa më efektive. Ajo që bie në sy menjëherë sapo shohim skicën e strukturës së uniformave blu, është shtimi i departamenteve, të cilët tashmë do të drejtohen nga 5 zv.drejtorë, të cilët do të kenë gradën “Drejtues” dhe do të jenë në varësi të drejtorit të Përgjithshëm. Kjo strukturë, së bashku me ligjin e ri të policisë, i cili është në fazë projekti, pritet të miratohet brenda këtij muaji në Parlament. Burimet bënë të ditur, se specialistët po rishikojnë edhe një herë organo-gramën dhe projektligjin, por deri tani nuk ka ndryshuar asgjë. Pika më e diskutueshme tani për tani është vetëm emërimi dhe largimi nga detyra i drejtorit të Përgjithshëm të Policisë së Shtetit. Burimet pohuan se në ndryshim nga më parë, grada kreut të uniformave blu i jepet menjëherë sapo emërohet.
Ndryshimet
Përveç pjesës më të dallueshme të strukturës së re të Policisë së Shtetit, që është numri i departamenteve, të cilët nga dy do të jenë pesë dhe drejtohen nga 5 zv.drejtorë, vihet re edhe shtimi i sektorëve në varësi të drejtorive. Në organogramën e vjetër kanë qenë 21 drejtori dhe në varësi të tyre ishin 33 sektorë, ndërkohë në të renë janë 30 drejtori dhe në varësi kanë 53 sektorë. Akademia e Policisë që deri dje ishte në varësi të zv.drejtorit të Përgjithshëm, tashmë do të ketë lidhje direkte me drejtorin e Përgjithshëm. Repartet FNSH dhe forcat speciale RENEA, “Brisku”, “Helikopterët”, “Antieksplozivi” e “Negociatorë”, në strukturën e vjetër ishin në varësi të Drejtorisë së Krimit të Organizuar dhe asaj të Rendit dhe Sigurisë Publike. Në strukturën e re të policisë janë në varësi të Drejtorisë së Forcave Lëvizëse Operacionale.
Departamentet
Departamenti i Hetimit të Krimeve drejtohet nga zv.drejtori i Përgjithshëm dhe është pjesa më e rëndësishme e Policisë së Shtetit, mbështetur në eksperiencën evropiane dhe atë amerikane. Krimet e Hapura nuk do të ndahen nga Krimi i Organizuar dhe do të drejtohen nga një oficer me gradën “Drejtues”. Sektorë të tjerë në varësi të këtij departamenti janë Antikrimi Ekonomik, Antitrafiqet, Krimet Kundër Personit dhe Antiterrori. Departamenti i Sigurisë Publike është një nga departamentet, të cilit i është dhënë rëndësi dhe do të përgjigjet për të gjithë efektivin e policëve në shërbim. Në varësi të tij janë sektorët e forcave speciale, RENEA dhe FNSH-ve, ndërkohë që do të vëzhgojë forcat e qarkullimit rrugor, “Shqiponjat” dhe objektet.

ndryshimet

ISHTE

1. Struktura e vjetër e Policisë së Shtetit kishte 2 zv.drejtorë të Përgjithshëm, të cilët drejtonin dy departamente.

2. Në strukturën e vjetër të policisë, Akademia e Policisë ishte në varësi të zv.drejtorit të Përgjithshëm.

3. Repartet FNSH dhe forcat speciale RENEA, “Brisku”, “Helikopterët”, “Antieksplozivi” e “Negociatorë”, në strukturën e vjetër ishin në varësi të Drejtorisë së Krimit të Organizuar dhe asaj të Rendit dhe Sigurisë Publike.

4. Kontrolli i kufirit dhe migracioni, në strukturën e vjetër të policisë ishin në formën e një drejtorie të veçantë.

5. Vetëm dy departamente ekzistonin në strukturën e vjetër të policisë, i Menaxhimit Operacional dhe i Menaxhimit të Burimeve, Ndihmës dhe Mbështetjes.

6. Në strukturën e vjetër, në varësi të drejtorit të Përgjithshëm ishin dy zv.drejtorë me gradë “Kryekomisar”.

7. Policia Shkencore në strukturën e vjetër ishte një institut në varësi të Departamentit të Menaxhimin Operacional.

ESHTE

1. Struktura e re e Policisë së Shtetit ka 5 zv.drejtorë të Përgjithshëm, të cilët janë në krye të pesë departamenteve.

2. Akademia e Policisë në strukturën e re është në varësi të drejtpërdrejtë të drejtorit të Përgjithshëm të Policisë.

3. Repartet FNSH dhe forcat speciale, RENEA, “Brisku”, “Helikopterët”, “Antieksplozivi” e “Negociatorë”, në strukturën e re të policisë janë në varësi të Drejtorisë së Forcave Lëvizëse Operacionale.

4. Në strukturën e re të Policisë së Shtetit ekziston një departament i veçantë i Kufirit dhe Migracionit.

5. Në Strukturën e re të policisë janë 5 departamente, ai i Hetimit të Krimeve, i Sigurisë Publike, Kufirit dhe Migracionit, Standardeve Profesionale dhe i Shërbimeve Mbështetëse.

6. Të pestë zv.drejtorët që janë në varësi të drejtorit të Përgjithshëm, në strukturën e re e kanë gradën “Drejtues”.

7. Policia Shkencore në strukturën e re është një drejtori më vete, që është në varësi të Departamentit për Hetimin e Krimeve.

Tirana Observer

[DI_ANA]

Pasuria, prokuroria hetim zyrtareve

Rozeta Rapushi


Zyrtare te larte te shtetit kane dosje te hapura ne Prokurori te Pergjithshme per fshehje te pasurise. Kryeprokurorja Ina Rama pranoi dje, per here te pare, nga marrja e detyres se ne zyren e saj ndodhen dosje te zyrtareve te larte te shtetit, te cilat do te gjykohen pas perfundimit te hetimit. ”Kam emra dhe dosje te zyrtareve te larte te shtetit qe jane per fshehje te pasurise. Gjykimi i tyre do te behet sapo te perfundoje hetimit”, tha Rama, gjate nenshkrimit te marreveshjes se bashkepunimit me Inspektoratin e Larte te Pasurive per bashkepunim ne luften kunder korrupsionit. Pa dhene emra konkrete per shkak te hetimit, Kryeprokurorja vetem sa pohoi ekzistencen e dosjeve te zyrtareve ne zyren e saj. Ne fakt, nje fenomen i tille eshte permendur dhe ne raportin vjetor te ILDKP-se qe drejtohet nga Fatmira Laskaj. Ne te theksohet se vetem per vitin 2007 jane depozituar ne Prokurorine e Pergjithshme 12 kallezime penale per zyrtaret qe kane fshehur pasurine. Nderkohe qe qindra te tjere jane ne proces e hetimi e rreth 200 zyrtare jane evidentuar se kane konflikt interesi me punen qe kryejne. Per eliminimin e ketyre fenomeneve dhe zbulimin e pasurive te tundshme dhe te patundshme te zyrtareve, ILDKP nenshkroi dje kater marreveshje me institucione te ndryshme te shtetit. Marreveshja e bashkepunimit per luften kunder korrupsionit u nenshkrua dje nga Inspektorati me Prokurorine e Pergjithshme, Agjencine e Prokurimeve Publike, Drejtorine e Pergjithshme te Policise dhe INSTAT-in. Ne baze te marreveshjeve, institucionet angazhohen per krijimin e kontakteve me te ngushta dhe shkembim informacioni me te shpejte per evidentimin dhe venien para pergjegjesise penale te zyrtareve qe perfshihen ne afera korruptive. Po ashtu, institucionet angazhohen ne marrjen e masave per plotesimin e rregullt te kallezimeve penale, kryerjen e hetimeve paraprake, ushtrimin e ndjekjes penale, ngritjen dhe perfaqesimin e akuzes ne afate sa me te shpejta, ne zbatim te ligjit penal dhe procedural penal.

Marreveshja

Institucionet angazhohen per krijimin e kontakteve me te ngushta dhe shkembim informacioni te shpejte per venien para pergjegjesise penale te zyrtareve qe perfshihen ne afera korruptive.

Institucionet angazhohen ne marrjen e masave per plotesimin e rregullt te kallezimeve penale, kryerjen e hetimeve, ushtrimin e ndjekjes penale ne afate sa me te shpejta.

Ngritjen dhe perfaqesimin e akuzes ne afate sa me te shpejta, ne zbatim te ligjit penal dhe procedural penal.

Institucionet do te koordinojne hetimet ndermjet agjencive te specializuara per te rritur efikasitetin e strukturave te specializuara per te zbuluar format e ndryshme te krimit ekonomik.

Ina Rama: Gati dergimi ne gjykate

Prokurorja e Pergjithshme, Ina Rama, pranon se ka zyrtare me dosje, te denoncuar per fshehje te pasurise. Per here te pare, dje, Rama pohoi gjate nenshkrimit te marreveshjes me ILDKP-ne se ka dosje te hapura dhe do te shqyrtohen. Kryeprokurorja nuk beri publik emra, por permendi se ata jane zyrtare te larte te shtetit. “Kam emra e dosje te zyrtareve te larte te perfshire ne korrupsion. Per arsye te hetimit nuk i bej publik emrat e tyre”, tha Rama. Sipas Kryeprokurores, gjykimi do te nise sapo te perfundoje hetimi mbi keta zyrtare, qe jane nen akuzen per fshehje te pasurise. Rama theksoi se dosjet jane ne prokurori dhe do te shqyrtohen sipas rastit e kohes. Reagimi i djeshem i Kryeprokurores se disponon dosje te zyrtareve ne zyre, eshte i pari qe nga zgjedhja e saj ne kete post, duke paralajmeruar se tashme organi i akuzes do te veproje shpejt ndaj te gjithe atyre qe kane fshehur pasurine.

Laskaj: Bashke kunder korrupsionit

Institucionet shteterore angazhohen me shume ne zbulimin e pasurive te fshehta te zyrtareve te larte te shtetit. Inspektorati i Larte i Deklarimit dhe Kontrollit te Pasurive nenshkroi kater marreveshje me institucione qe kane mundesi te ndihmojne ne hetimin e pasurise. ”Firmosja e marreveshjeve eshte deshmi e angazhimit qe kane institucionet per forcimin e shtetit ligjor ne Shqiperise”, u shpreh kryeinspektorja Fatmira Laskaj. Sipas saj, koordinimi i hetimeve ndermjet agjencive te specializuara do te rrisin ne menyre te ndjeshme efikasitetin e strukturave te specializuara per te zbuluar format e ndryshme te krimit ekonomik. ”Vullneti i mire dhe angazhimi me seriozitet maksimal do te ndikojne ne permiresimin e imazhit te Shqiperise ne arenen nderkombetare”, vijoi Laskaj. Per te cilin nje bashkepunim i tille eshte shume i frytshem.

"Koha Jone"