Kohë qirinjsh

[Agim Metbala]

Xhevdet BAJRAJ


BARI I KOSITUR

Dje e gjeta një copë të atdheut
Në aromën e barit të porsaprerë në Parkue Mexico
U ngjita në majë të mallit dhe Anadrinia më doli para
Syve
Si vashë e rrallë që ta trazon shpirtin

Pastaj me Enrique Serna-në në kafenenë “Punto y Coma”
Tërë ditën e luta që të bjerë pakëz shi se zemra më
Digjej
Buena Vista Social Club dhe zëri i Celia Cruz na mbanin
Ritmin
Derisa na u dehën zogjët e këmbëve dhe ikën në gjumë
Por shi nuk ra se nuk ra

Meksika...
E bukur është si sytë e vashës nga Dukagjini
Gati mund ta krahasoj me një gjeth hardhie rrushi të zi
Që ma sjell era e mallit o mallit të Rahovecit tim

[Agim Metbala]

ECJET

Ka ecje:
HORIZONTALE
Dhe
V
E
R
T
I
K
A
L
E
Dhe nga çfarë ecje bëhet
Lindin pastaj një mijë e një epitete
Apo vetëm një
NJERI...

PA TITULL

Ajo apo unë, unë apo ajo
Tash fare s'ka rëndësi
U tretëm poleve të kundërta
Me ndalesa në pasaportë...
.............................................

Tash shpalosim kujtimet
Nga arkivat personale
Ajo i lexon letrat e lidhur me kordhele
Unë i shikoj fotografitë e sajë bardhë e zi
Ajo i lexon vargjet e mi të dhuruar
Unë loz me unazën e saj që s'ma zë gishti...
.................................................. ...................

Takohemi rrallë, krejtë rastësisht
Shikimet kur na përpiqen
Nga sytë na fluturojnë pëllumbat e bardhë
Hapat na rëndohen e na ngatërrohen
Zemrat përpiqen ta lëshojnë krahërorin
E fjalët, fjalët kanë ndalesat e vulosur
Me vështërsi parakalojmë njëri tjetrin
Sikur rruga të na ngushtohet
Duke ngarkuar mbi shpinë
E gjithë peshën e dashurisë...
.................................................. ..............

Ajo apo unë, unë apo ajo
Tash më fare s'ka rëndësi
U tretëm poleve të kundërta
Me ndalesa të kthimit në pasaportë...

06.03.1008

[Spleen1]

Duke mbështetur mendimin e Palmes dhe për poezitë tua epike, po e postoj një nga repertoari im i dikurshëm.

PIRAMIDË NDERI

Çdo muaj na i kthejnë ata që tepruan
Që mbeten jasht varrit të përbashkët

Kur t’i kthejnë të gjithë
do t’i varrosim në Piramidën e Nderit
emrat e tyre do t’i shkruajmë
nga i shikon bota

Kujtimet do t’ua shpalosim me kujdes
pa ua prishur qetësinë
në çdo shesh e rrugë
një lapidar udhërrëfyes për ne

Sa të madhe kemi pasur merzinë
__________________

[Agim Metbala]

Zotri Spleen 1, ju falenderoj për poezinë e postuar "Piramidë nderi", siç thuani Ju nga repertoari u Juaj i dikurshëm. Jo vetëm kjo poezi e postuar, por edhe shumë poezi të Juaj, jo se janë nga repertoari i dikurshëm, ato janë të qëlluar dhe tërheqëse edhe për kohën e sotme, e sipas vlerësineve të mija, me siguri se do t'i mbijetojnë edhe shumë dekada e dekada... duke marrë parasysh rrethanat nëpër të cilat po kalon kombi ynë në të gjitha trojet...
Të dëshiroj frymëzime sa më të thella ngase nga thellësia e shpirtit, lindin poezitë e mëdha që i mbijetojnë mijëvjeçarët.
Me respekt!

[Agim Metbala]

MBRËMË MË ERDHE NË ËNDËRR

Mbrëmë më erdhe në ëndërr
E veshur me vellon e nusërisë
Me buzëqeshjen magjepëse si dikur
Me aromën e luleve pranverore
E me pastërtinë e liqenit t'argjent...

Po, po, mbrëmë më erdhe në ëndërr
Buzët tua shëronin plagët e vjetra
Lëkura njohu miklimën e gishtave tu
E për fjalë, s'kishim kohë...
.................................................. ......
Rrezet e diellit trokitën në dritaren time
Ndjeva lodhje, lodhje ndjeva
Duke pirë kafen e mëngjesit kalimthi
M'u paraqitën të gjitha episodet...

Sinqerisht, edhe në ëndrra të dua...

31.03.2008

[Agim Metbala]

TI NË VERI E UNË NË JUG
(Tim shokut)

Ti ike pa i cakrërruar as kupat e ndarjes
Në vendin e premtimeve
(premtimet çdo herë sjellin pikëpyetjet)
Me vete në valixhen e madhe
More gjithë dhembjen
Pak dashuri
Pak mall
E nostalgjinë nën sjetull...

Mendove se mund t'u ikish
Vrasjeve në Çafë të Thanës
Maltretimeve rrugëve të Podrimës
Burgosjeve për vepra penale
Që i njeh vetëm djalli
Mendove se mund t'i harrosh
Dy varet...
Sytë e nënës të ngulitur në veri
E neve në kafe të "Ximka"...
.................................................
Por, çdo gjë mbeti si ishte
Ti nëveri e unë në jug
Me dhembjet e njejta
Ndëgjohemi rrallë nëpërmjet telit
-Alo! Alo! Si je?
Më fal i dashur, 20 DM më shkuan
Më bjenë më lirë
Me laps të bisedoj me ty...

1995

[Agim Metbala]

PUTHIN PRAGUN E NDERIT

Këngët e mia
Këputen në melodi të vjetra
Rrisin buzëqeshjen e fëmijëve
Ndonjëherë shtojnë nga një pikë
Loti në qepallë
Lehtazi shndërrohen në serenadë
Trokasin në dritaret
E xhamave të mërdhirë
Për ta zgjuar dashurinë
Befasishëm ama befasishëm
Në gjumë trembin
Mizat kush i ka nën kapuç...

Këngët e mia ecin dhe ecin
S’ngrihen nga të ftohtit
Mbase rreziten me rrezet e diellit
Dhe puthin pragun e nderit...

[Palma]

EMIGRANTI

Diku veç në tavolinën
Me mbulesë të bardhë shtruar,
Birrë të huaj ke përpara
Dhe një pamje të menduar.


Diku veç në tavolinën
Në një qoshe të lokalit,
Shokun tënd se ke përballë,
Pi vetmuar ti prej hallit.


Diku veç në tavolinën
Në një lagje të panjohur,
Gjithçka është akull e ftohtë,
Vetëm birra është e ngrohur.


Diku veç në tavolinën,
Që të bën ty shoqëri
Gotën s´di ku t´a trokasësh,
Tavolina s´është njeri.

Alma Papamihali

Shtator 2007

[Agim Metbala]

E respektuar Alma Papamihali, në fillim, kam menduar vetëm ta prezentoj vehten në Forumin Shqiptar me disa poezi, meqenëse lexuesi gjithëshqiptarë, objektivisht nuk ka patur mundësi t'i përcjell shkrimet e mia dhe librat të botuar.
Mirëpo, duke përcjellur paraqitjen e poetëve të forumit, të cilët në numër nuk janë të paktë, dhe në nivel artistik të dëshiruar në njerën anë, e në anën tjetër angazhimin e vazhdueshëm të të gjithëve (duke filluar nga poeti i palodhshëm Agim Doçi, Juve Alma, Diana, Pëllumb Syku, Xheladin Hamza, Yjori, Mondishalli, Mbreti-ILI... - në këtë moment nuk më kujtohen pseudonimet i shumë të tjerëve që metëvërtetë meritojnë të përmenden - u kërkojë falje), më kenë shtrënguar të paraqitem edhe unë më shpeshë duke shpresuar se do të hedhi disa guraleca në këtë mozaik të bukur artistik.
Ju falenderoj për poezinë e postuar.

E lexova me kënaqësi.

Të dëshiroj shëndet të mirë dhe punë të mbarë në shkrimet!

Me respekt, Agim METBALA.

[Palma]

I nderuar z. Metbala!

Vertete forumi shqiptar, po na krijon mundesine qe te njohim krijimtarine tuaj te pasur, sepse mbase vete kushtet tona, qe na kane shperndare neper vende te ndryshme te botes, nuk n´a mundesojne gjithmone te kemi perpara, gjithcka qe duam te lexojme.
Ju uroj edhe juve, shendet dhe krijimtari te mbare.
(Gjithashtu gjithe poeteve dhe dashamiresve te letersise)

Ju lexoj vazhdimisht, me vemendje dhe kenaqesi.
Pershendetje miqesore!
PAlma