Kohë qirinjsh

[Agim Metbala]

ECI VERTIKALISHT

Kur më ftuan në kokteje shoqërore
Thashë atëherë:
- S’është sofër për mua!

Ku si të ri më futën në lojërat politike
Thashë atëherë:
- Do të mbetem apolitik!

Kur “patriotët” më ftuan në takime të fshehta
Thashë atëherë:
- Nuk kam lindur patriot!

Kur “atdhedashësit” më ftuan në luftë
Thashë atëherë:
- Nuk kam lindur luftëtar!

Unë akoma eci vertikalisht!

[Agim Metbala]

RRUGA MIQËVE TË MI

Kisha unë miq shumë
Më besoni, shumë miq kisha
Horizonti ishte i vogël për të gjithë
Apo brengat ishin të mëdha
Këtu qëndrojnë pikëpyetjet
Ky është realitet autogram i kohës...

Dhe nga shumë miq
Më mbetën fotografitë e papërsëritshme
Në album me ngjyrë bardhë e zi
Disa janë edhe kolor
Që ma zbusin mallin
Nostalgjinë ma shumëfishojnë
Nga një rrudhë e thellë më shtohet në ballë...

Më kanë mbetur notesat me adresa plot
Ku tani banojnë të panjohur
Në blok numrat e telefonave
Me zërat e panjohur
Apo vala 900...

Miqtë e mi të shkepur
Metropoleve me drejtpeshim të humbur
Me dhembje të ngarkuar mbi shpinë
Të thinjur para kohe
Vrapuan pas letrave pa vlerë
Ndoshta pas premtimeve zhgënjim
Për ta malli, oh sa më djeg!

06.10.2003

[Agim Metbala]

ILUZIONI

Të shetit xeheroreve...me plot ar
Grushtat duarthat shtrënguar
Natën shndërohesh në çudira
Mëngjesi të puth të rraskapitur...

[Agim Metbala]

DËSHMORIT

Vertikalisht
Lapidarit lartësohesh universit
Horizontalish
Shtrinë rrënjët me gjak ujitur
Përjetësisht sfinguar mes dy botërash...

[Agim Metbala]

VRAGË

Erdhe pa ftuar me aromë pranvere
Ngrite çerdhe në shpirtin tim
Ike në vjeshtë me rrebesh shiu
Gërryve vragë të pashlyer n'kujtesë
Unë mbeta peng i kohës së ikur...

[Agim Metbala]

MALLI

Digjem prush, me djersë lahem
Kërnezët n'lëkurë ndërrohen palë-palë
E kthejë në retrospektivë
Imazhet ndërrohen në pakufi
Malli për të, sa më lodh-çlodh...

07.04.2012

[Agim Metbala]

NOSTALGJIA

Këmbët humbin drejtëpeshimin
Ëndrrat marrin trajtën e përnatshme
E dhembja ngre fole në sy...

07.04.2012

[Agim Metbala]

NESËR

Nesër, mos më thuaj se më do
Harresa do n'gjitet
Në maje t'malit në jehonë
Me pafuqi kthimi...
Kujtimi do zbehet deri në humbje...

07.04.2012

[Agim Metbala]

(MOS) FALJE

Do t’u fali edhe vitet e vjedhura
Edhe netët e pagjumësisë
Edhe frikën duke pritur
Me ankth hijet e natës
Do t’u fal të gjithat
E pse mos t’u fal
Jeni poret e mia të frymëmarrjes...

Një gjë s’do t’u fal
Me kurëfarë kushti
As edhe i vdekur s’do t’u fal
Fantazmave me yll të kuq
Që i xingërojnë edhe sot
Telefonatat djajëve
Për nostalgjinë e shkuar
E ritualet e lugetërve...

11.10.2004

[Agim Metbala]

PROTESTË


Damarët më bëjnë protestë
Indet më dridhen si telat e kitarës
E muskujt m’i lëshojnë këmbët zhagë
Nga të vjellurat banale paraelektorale
Kur i shikoj në ekran fytyrat
E vrasjes sonë të djeshme
Barrikadë e jonë e sotme
E sëmundje ngjitëse e së ardhmes...

Ekranin nga larg e pshurri...


28.09.2004