Francezët: Sarkozi po na lë pas dore!

[ClaY_MorE]

"Efekti Karla" po" ndihmon" dukshëm në rënien e Presidentit në sondazhe

Shefi i Elizesë, në qendër të kritikave. Ai shihet shtrembër, sidomos nga të moshuarit

Romanca me modelen e kthyer në këngëtare Karla Bruni, që prej disa ditëve është në qendër të objektivit të paparacëve, në vend që t‘i bëjë francezët ta duan më shumë Presidentin e tyre, po sjell efektin e kundërt: tashmë Sarkozi gjendet në qendër të një orteku kritikash të forta, sipas të cilave i ka kthyer shpinën punëve dhe shtetit, për t‘iu përkushtuar tërësisht qejfeve dhe zbavitjeve.

Lidhur me vazhdimësinë e romancës, revista "Le Journal du Dimanche", një e përjavshme franceze, pronë e një prej miqve më të afërt të Presidentit Sarkozi, raportonte këtë të diel në kopertinë se çifti do të martohej gjatë ditëve të para të muajit të ardhshëm.

Sipas një sondazhi të zhvilluar në shkallë kombëtare nga grupi i specializuar në këtë fushë, CSA, i publikuar po të dielën, vetëm 48% e francezëve besonin se Presidenti është i përkushtuar në drejtimin e shtetit - rënie prej shtatë pikësh në muaj. Që nga korriku i shkuar, përqindjet e njerëzve që e aprovojnë kanë rënë me 17 pikë.

"Presidenti Sarkozi po ekspozon dëfrimet e jetës personale në një çast kur francezët kërkojnë prej tij të mbajë premtimet e bëra gjatë fushatës elektorale për rimëkëmbjen e ekonomisë", tha Stefan Roze, drejtor i CSA-së, në një intervistë të dhënë një ditë pas publikimit të rezultateve të sondazhit. "Ai ka zhdukur vijën që ndan jetën publike nga ajo private, mes sukseseve në jetën personale dhe premtimeve që u ka bërë francezëve vetëm pak muaj më parë".

Rënia e niveleve të besimit për Presidentin Sarkozi është veçanërisht domethënëse në radhët e të moshuarve; gjatë muajit të fundit, ra nëntë pikë mes atyre të moshës nga 50 në 64 vjeç dhe 15 pikë tek ata që i kanë kaluar 65 vitet.

Dhe në të vërtetë, ndërkohë që Franca e kaloi Vitin e Ri me një rritje të ndjeshme të çmimeve të mallrave me pakicë, 52-vjeçari Sarkozi fotografohej me ish-modelen (40-vjeçare) teksa kënaqej duke vizituar piramidat e Egjiptit dhe site të tjera arkeologjike. Të gjithë patën rastin të shihnin shumë poza, teksa e lumtur sa më s‘ka, Bruni mbështeste kokën në supin e tij; ndërsa Presidenti e shtrëngonte me delikatesë rreth belit.

Mendohet se Sarkozi, dy herë i divorcuar, që tashmë po quhet nga disa komentues Presidenti Bling-Bling, i ka dhuruar një unazë fejese me diamant në formën e zemrës, të dizajnuar nga Viktor De Kastelan i shtëpisë së modës "Dior"; ndërsa ajo i ka dhuruar një orë të markës mjaft prestigjioze zvicerane "Patek Philippe".

Zëdhënësi i Sarkozisë, David Martinon, nuk ka pranuar të konfirmojë apo të hedhë poshtë raportet që flasin për martesën e afërt, ndërkohë që pallati Elize ka urdhëruar që mbi këtë çështje të mbahet heshtje e plotë. Pritet që gjatë javës në vazhdim Sarkozi të pranojë të japë shpjegime mbi detajet e reja të jetës personale në një konferencë shtypi dy orëshe, e para që nga çasti që ka marrë përsipër detyrën e kreut të shtetit.

Francezët tolerantë duket sikur nuk u trazuan shumë që martesa 11-vjeçare e Sarkozisë përfundoi në divorc tetorin e vitit të shkuar, pasi ish-bashkëshortja, Sesilia, e la për herë të dytë. Por për analistët francezë, kundërshtarët politikë dhe francezët e zakonshëm, fotot e romancës së Sarkozisë dhe të ish-modeles lënë shije aspak të mirë - madje janë mungesë respekti për qytetarët e thjeshtë.

"Pasqyrimi në publik i jetës private të kreut të shtetit, nuk ka asnjë dyshim se është i lidhur drejtpërdrejt me rënien e popullaritetit të tij", shkruhej në editorialin e së hënës në gazetën e përditshme "L‘Alsace". "Sigurisht që kjo histori dashurie bën të ëndërrojë shumë njerëz, por gjithashtu irriton edhe shumë të tjerë - sidomos ata që mezi ia dalin të mbyllin shpenzimet mujore me pagat e vogla".

Në editorialin e së hënës në "L‘Est Républicain" shkruhej - "Francezët nuk e votuan për ta bërë yll roku", për të shtuar se "ka harruar se romanca e tij duhet të jetë me Francën dhe jo me të dashurën e zemrës".

Në numrin e së hënës të gazetës së përditshme të qendrës "Le Monde" një karikaturë shfaqte Sarkozinë teksa shtynte një karrocë supermarketi, mbi të cilën pozonte Karla Bruni; titulli mbi karikaturë shkruante "Mbreti është lakuriq".

Gjatë intervistave të marra në rrugë nga njerëz të zakonshëm nga "Le Parisien", pyetjes përse ka rënë popullariteti i Presidentit Sarkozi, një pensioniste 65-vjeçare iu përgjigj, "Karla Bruni! Francezët nuk arrijnë t‘u besojnë syve që Presidenti del përpara syve të të gjithë botës përkrah një vajze që është shumë larg imazhit të një Zonje të Parë të Francës".

Sarkozi dhe Karla Bruni, trashëgimtare e një pasurie marramendëse, u njohën në një festë në nëntorin e shkuar. Ndërsa për disa kjo martesë mund të konsiderohet si gjest i tepruar moskokëçarjeje, mund të jetë e dobishme në planin politik. Franca i ka toleruar historikisht raportet jashtëmartesore të zyrtarëve të saj të lartë, por kulturat e tjera mund të mos jenë kaq zemërbuta. Për shembull në Egjipt, Sarkozi u kryqëzua nga opinioni vendas, pasi guxoi të ndante të njëjtin shtrat me ish- modelen. "Edhe sikur Bruni të qe e fejuara zyrtare e Presidentit dhe jo thjesht e dashura, tradita fetare nuk i lejon të flenë në të njëjtën dhomë", tha Gamal Zahran, një deputet i pavarur, në Parlamentin egjiptian.

Me afrimin e vizitës në Indi, që do të bëhet pas dy javësh, disa media parashikojnë kriza të forta protokollare në rast se vendos të shoqërohet nga Karla Bruni. "Ish-modelja nuk mund të trajtohet me të njëjtin nderim me Presidentin, pasi një e dashur nuk gëzon statusin e bashkëshortes", shkruante e përditshmja indiane "Indian Express", duke cituar një zyrtar anonim të Ministrisë së Punëve të Jashtme të këtij vendi.

Por gazeta "The Telegraph" e Kalkutës bënte thirrje për qetësi, dhe shkruante, "Ata i përshtaten për mrekulli Francës, vendit të dashnorëve më të zjarrtë në botë, si edhe Indisë, e cila i ka dhuruar botës klasikun më të madh të letërsisë erotike Kamasutrën".

Ndërkaq, shtypi francez vazhdon të tallet me Karla Brunin, e cila ka një djalë nga lidhja me filozofin Rafael Enthoven. Prej dy javësh e përjavshmja satirike "Le Canard Enchainé" publikon një pamflet të titulluar "Ditari i Karla Brunit". "I bëra katër javë monogami", shkruhet në një pasazh.

Duket se komenti i referohet një interviste që Bruni ka dhënë shkurtin e shkuar për revistën "Figaro Madame", ku ka thënë: "Jam besnike - ndaj vetes! Monogamia më mërzit për vdekje".


Gazeta Shqip

[DI_ANA]

Gjatë muajve të parë të presidencës së tij, Nikolas Sarkozi arriti të fitonte vlerësim pa kufi dhe duartrokitje për angazhimin e tij dhe gjithëpraninë në skenën ndërkombëtare. Por tashmë, i detyruar të zbresë pak me këmbë në tokë dhe të përballet me sfidat e vështira në vendin e tij, presidenti francez po e “dënon” veten me disa muaj stresantë të luftës me problemet ekonomike, konfliktet sociale dhe marrëdhënien problematike të Francës me votuesit e saj. Që kur vendi iu kthye punës nga pushimet e verës, muajin e kaluar, nuk ka kaluar asnjë ditë e vetme pa lajme për një krizë ekonomike që cenon seriozisht atë besim për të bërë gjëra që Sarkozi kishte kërkuar me ngulm të rrënjoste te publiku francez. Në shtator u bë e ditur se niveli papunësisë, që në fakt më parë kishte një tendencë uljeje në vend, e kishte ndryshuar trendin e tij gjatë gjashtë muajve të parë të vitit dhe kishte arritur tashmë në 8.1 për qind. Më pas, rritja ekonomike që qeveria shpresonte të arrinte në 2.5 për qind kishte mbetur në 1.8 për qind, pjesërisht për shkak të hapjes së pak vendeve të reja të punës në bizneset franceze. Francezët më pas mësuan se sistemi i kujdesit shëndetësor në vend do ta mbyllte vitin 2007 me 19 miliardë dollarë humbje, 30 për qind më shumë se ç’parashikohej dhe se do të duheshin edhe 11.2 miliardë dollarë të tjerë mbi buxhetin që Sarkozi po përgatitet të paraqesë për vitin 2008. Buxheti në vetvete është shumë kontraversial: edhe pse eliminon 23.000 vendeve pune në shërbimin civil, ka një deficit prej 2.3 për qindësh (rreth 59 miliardë). Ashtu si para-ardhësi i vitit 2007, buxheti 2008 është ndërtuar mbi bazën e një rritjeje ekonomike prej 2 deri në 2.5 për qind dhe të ardhurat nga taksat që shumë ekonomistë i konsiderojnë thjesht “një ëndërr”. Në mesin e këtyre lajmeve shumë të ftohta dhe ndërsa Sarkozi u vendos në qendrën e vëmendjes së vëzhguesve amerikanë me një fjalim në OKB më 25 shtator, kryeministri francez, François Fillon e konsideroi gjendjen ekonomike dhe financiare të vendit si të falimentuar dhe paralajmëroi masa drastike për t’iu përgjigjur situatës. Fillon u pendua menjëherë për shqetësimin publik që kishte krijuar termi i përdorur prej tij, ndërsa Sarkozi u kthye nga Nju Jorku me sigurinë se nuk do të ketë ndryshim planesh për Francën. Fillon e pa veten të detyruar të shpjegonte se deklaratat e tij kishin qenë të nxituara dhe të keqkuptuara. Publiku francez i hutuar nga disa javë lajmesh të këqija ekonomike duket se vuri në dyshim qëndrimin e Fillon, premtimet e Sarkozisë dhe aftësinë e këtyre dy personave për t’i ndryshuar gjërat menjëherë. Të dy u përballën me rënien e popullaritetit në sondazhe. Lajmet e zymta ekonomike paraqesin rikthimin e Sarkozisë në realitetin e trishtë ku gjerat thelbësore nuk do të kthehen mbrapsht për të ndryshuar perfornmacën dhe për të nxitur masa të reja”, - thotë Dominique Reynié, një analist politik i Fondacionit të Shkencave Politike në Paris. “Sukseset e tij fillestare përfshinin miratimin e një ligji emigracioni më të ashpër, hapjen e portave të kabinetit për politikanët e majtë, rritjen e profilit të Francën në çështjet ndërkombëtare; të gjitha këto veprime që u bënë lajmet e para të shtypit, por ndikimi real i të cilave nuk ishte i lehtë të matej”. Dhe me problemet ekonomike me të cilat po përballet tani vendi, mendoj se është e drejtë të themi se Sarkozi ka dështuar në synimin e tij të parë: të krijonte një valë besimi që do të bindte francezët se gjërat po shkojnë në drejtimin e duhur dhe se gjithçka do të rregullohej shpejt. Mungesa e besimit mund të nënkuptojë edhe mungesë durimi me politikat e reja që Sarkozy po përgatit, duke nisur nga planet për të vënë në zbatim “regjimet speciale” që bëjnë të mundur që punonjësit e shërbimit civil të punojnë më pak vite për t’u kualifikuar për pension si dhe skemat më të gjata të sektorit privat. Për ta bërë këtë, Sarkozy ka nisur konsultimet me sindikatat dhe punonjësit e kompanive nën pronësinë e shtetit dhe është zotuar të adaptojë reformën për profesione specifike, kompani dhe sektorë të ndryshëm para se miratojë atë dhe ta zbatojë, duke nisur nga viti i ardhshëm, ndoshta. Por ashtu siç bënë me grevat njëmujore që tronditën vendin në vitin 1995 (dhe sollën për pasojë largimin e së djathtës nga pushteti), transporti publik dhe punonjësit e tjerë kërkojnë shtyrjen e reformës së propozuar nga Sarkozi për pensionet para se të nisin protestat masive të planifikuara për më 18 tetor. Punonjësit e tjerë të shërbimit civil kanë votuar për të bërë grevë në një datë të mëvonshme dhe ndoshta për të bashkuar forcat me punonjësit e transportit nëse Sarkozi refuzon të tërheqë planin e tij. Por Sarkozi që flet ashpër dhe nuk vonohet me veprimet, nuk mund të përballet me vonesën e reformës së sistemeve speciale për kohëra më të mira pa e cenuar reputacionin e tij dhe kredibilitetin që ka krijuar si një “njeri i veprimit”. Kjo do të thotë se përballja e tij me administratën është e paevitueshme. “Nëse ai e realizon këtë reformë duke i lënë pas protestat, ai do të kënaqë 50 për qind të opinionit publik, duke e miratuar këtë masë, do të entuziazmojë konservatorët e rinj dhe do të përmirësojë sërish imazhin e tij si një lider që frymëzon francezët”, - thotë Reynié. “Nëse dështon, ai do të gjendet në telashe. Lëvizja e reformës do të mbetet në vend, e majta do të rigjallërohet, rivalët konservatorët do ta sfidojnë atë dhe respekti i publikut do të bjerë”. Por nuk ka më kthim prapa për Sarkozinë, tani dhe muajt që do të vijnë do të jenë kritikë për presidencën e tij.

GAZETA Shqiptare Online

[DI_ANA]

Të gjitha të dashurat e Presidentit!

PARIS -Nuk e ka pasur aspak të vështirë divorcin me të hijshmen Sesilë, presidenti i Francës, Nikola Sarkozi. Menjëherë pas ndarjes me zonjën e parë, gazetat e thashethemeve në Francë kanë regjistruar disa flirte të liderit të shtetit francez, në një paradë historish të mbyllura shpejt. Presidenti u fotografua në fundjavë në shoqërinë e ish-fotomodeles, tashmë këngëtare, Karla Bruni, duke ushqyer zërat për fillimin e një romance vetëm dy muaj pas divorcit nga gruaja e tij e dytë. Pamje të Sarkozisë me Brunin, një italiane me flokë të errët dhe sy bojëqielli, duke vizituar Disneyland-in në Paris ishin botuar në faqet e para të gazetave franceze të ditës së sotme, ndërsa çifti pritet të jetë gjithashtu në faqet e para të shumë revistave të ilustruara këtë javë. Zyra e Sarkozisë refuzoi të komentonte lidhur me njoftimet. Gazeta “Figaro”, me prirje nga e djathta, që shihet si shumë e afërt me Sarkozinë 52-vjeçar, kishte vendosur në faqen e parë titullin “Karla Bruni, e dashura e presidentit” poshtë një fotografie të 38-vjeçares që buzëqeshte, e veshur me një pallto gëzofi. Gazeta “Le Parisien” kishte botuar në faqe të parë një fotografi të çiftit së bashku në parkun Disneyland të Parisit, të rrethuar nga tre fëmijë të paidentifikuar me diciturën “Kreu i Shtetit dhe e dashura e tij Karla”. Nuk është hera e parë që aristokratja Bruni del në faqet e para për zgjedhjet e të dashurve të saj. Ajo ka qenë e lidhur në të shkuarën me këngëtarët Miki Xhager dhe Erik Klepton si dhe me manjatin e biznesit, Donald Tramp. Bruni, që ka lindur në Itali por që jeton në Francë, bënte pjesë gjithashtu në personat e famshëm që morën pjesë në tetor në një koncert për të kundërshtuar një projektligj të ri për imigracionin të propozuar nga Sarkozi, i cili përfshinte bërjen e testit të ADN-së për të verifikuar lidhjet familjare. Sarkozi dhe gruaja e tij e dytë Sesilia, u ndanë miqësisht në tetor pas 11 vjet martese. Ishte hera e parë në historinë moderne të Francës që një president në detyrë ndahet. Sesilia dhe Sarkozi kanë një djalë të vogël, dhe secili nga dy fëmijë më të mëdhenj nga martesat e mëparshme. Kjo lidhje nuk do të jetë një surprizë për nënën e Sarkozisë, që i tha një reviste franceze më parë gjatë këtij muaji se i biri nuk do ta kishte të vështirë të gjente një grua tjetër pas divorcit. Por, Andree Sarkozy i tha revistës “Point de Vue” se nuk donte që ai të martohej prapë, meqenëse asaj “i kishte ardhur në majë të hundës nga nuset”.


Gazeta Shqiptare Online