Zgjedhjet presidenciale ne SHBA: Republikanet!

[skipetar]

Kush mendoni se do fitoje kandidaturen e Partise Republikane per president?

[skipetar]

Kandidati republikan per president, senatori Xhon Mekein nga Arizona

Në listën plot me kandidatë republikanë për president, ndoshta asnjeri nuk është më i njohur se senatori Xhon Mekejn nga Arizona. Kjo është hera e dytë që zoti Mekejn vë kandidaturën për president.

Xhon Mekejn lindi në zonën e Kanalit të Panamasë në vitin 1936. Si djalë dhe nip i admiralëve të marinës amerikane, kariera ushtarake e çoi atë në Akademinë e Marinës dhe më pas në betejë si pilot i marinës në luftën e Vietnamit. Pasi aeroplani i tij u rrëzua mbi Vietnamin verior më 1967, zoti Mekejn kaloi 5 vjet e gjysëm si rob lufte, ku përjetoi rrahje brutale dhe u kthye në atdhe si hero kombëtar.

Zoti Mekejn thotë se përvoja e tij në luftë e bën atë veçanërisht të kualifikuar për detyrën e presidentit. “Unë do ta filloja detyrën e presidentit me plot energji dhe kompetencë. Nuk kam nevojë për trejnim në punë. E kam parë fytyrën e të keqes dhe e njoh fytyrën e luftës. Kjo është çështja kryesore, prandaj kjo është arsyeja që unë do të jem president i Shteteve të Bashkuara”.

Në katër mandatet si senator, zoti Mekejn njihet si njeri agresiv në politikën e jashtme dhe çështjet e mbrojtjes, por pa i lënë mënjanë çështjet e brendëshme. Në vitin 2000, zoti Mekejn humbi në fushatën e tij për të siguruar emërimin e Partisë Republikane përkundrejt presidentit Bush, guvernator i atëhershëm i Teksasit.

Zoti Mekejn shpreson të tërheqë votuesit konservatorë dhe të pavarur në përpjekjen e dytë për në Shtëpinë e Bardhë në zgjedhjet e 2008-tës, duke theksuar sigurimin kombëtar. “Askush nuk mund të më thotë mua se ne nuk mund ta bëjmë vendin tonë më të fuqishëm dhe botën më të sigurtë. Ne mund dhe duhet ta bëjmë këtë. Dhe kur unë të zgjidhem president, ne do të bëjmë pikërisht këtë”.

Senatori i Arizonës luajti rol aktiv në hartimin e projekt-ligjit për financimin e fushatave. Ai mbështet ligjësimin e emigrantëve ilegalë, që ndodhen tashmë në Shtetet e Bashkuara. Të dyja këto qëndrime e dëmtojnë atë mes republikanëve konservatorë.

Në fillim të vitit, zoti Mekejn shikohej si kandidati me më shumë popullaritet mes republikanëve, por gjatë vitit fushata e tij pati probleme dhe tani ai radhitet pas ish kryetarit të bashkisë së Nju Jorkut, Rudi Xhuliani, dhe ish senatorit të shtetit Tenesi, Fred Tompson.

Mes kandidatëve republikanë, zoti Mekejn ka qënë mbështetësi më i hapur i strategjisë së presidentit Bush për shtimin e trupave amerikane në Irak. “Lufta është shumë më e rëndësishme se çdo ambicje politike që unë kam. Mendoj se nëse ne dështojmë në atë luftë, në Irak do të ketë kaos dhe gjenocid në rajon dhe terroristët do të na ndjekin ne në vendin tonë”. Ekspertët vënë në dukje se gjatë karierës së tij senatori Mekejn e ka trajtuar me sukses rolin e një politikani në disavantazh. “A mund të fitojë zoti Mekejn? Ai ka ende mjaft popullaritet në anketat e opinionit. Ai është një figurë dinamike. Gara mes republikanëve nuk është përcaktuar ende, prandaj nuk do ta eliminoja kandidaturën e tij”. Në moshën 71 vjeçare, senatori Mekejn do të ishte personi më i moshuar në postin e presidentit, nëse ai fiton zgjedhjet e 2008-tës, duke ia kaluar kështu heroit të tij politik, Ronald Reagan, i cili ishte 69 vjeç kur bëri betimin. //rd//

[skipetar]

Profil i kandidatit republikan Mit Romni


Ish guvernatori i shtetit Masaçusets, Mit Romni, vazhdon të jetë në krye të kandidatëve të Partisë Republikane, që përpiqen të sigurojnë emërimin e partisë në zgjedhjet paraprake në shtetet Ajova dhe Nju Hempshër. Megjithatë, zoti Romni është mbrapa disa prej kandidatëve më të njohur në anketat kombëtare të opinionit. Analistët politikë vlerësojnë fushatën plot energji të ish guvernatorit, por thonë se ndryshimi i qëndrimeve të tij rreth çështjeve të debatueshme si dhe besimi i tij fetar mormon mund të jenë pengesa serioze në fushatën e tij për në Shtëpinë e Bardhë.

Në pamje të parë, Uillërd Mit Romni do të dukej një kandidat i përsosur për president të Shteteve të Bashkuara. Kur e sheh në televizion, ai është tërheqës, plot energji dhe duket se i pëlqen të takohet me amerikanët e thjeshtë kur bën fushatë.

Shumica e analistëve politikë e shikojnë Mit Romnin si një politikan të sofistikuar dhe mjaft karizmatik. Kandidati republikan 60 vjeçar lindi në një familje të njohur në politikë, u diplomua nga Universiteti i Harvardit dhe në të kaluarën, zoti Romni ka qënë një sipërmarrës kapitalist me pasuri, që kapte shifrën e 350 milion dollarëve.

Në vitin 2003, zoti Romni bëri betimin si guvernator republikan në shtetin kryesisht demokrat të Masaçusets. Kandidatura e tij mori hov pasi ai menaxhoi me sukses Olimpiadën Dimrore të vitit 2002 në Salt Lake City, e cila ishte dëmtuar nga një skandal ryshfetesh. Ndryshimet e sukseshme të ndërmara nga guvernatori Romni në Lojrat Olimpike e bënë atë një figurë popullore kombëtare dhe i krijuan atij rrethanat që të kandidonte për postin e guvernatorit dhe tani për emërimin e Partisë Republikane për në zgjedhjet presidenciale të vitit 2008.

Lleri Sabato, drejtor i Qendrës së Politikave në Universitetin e Virxhinias, thotë se guvernatori Romni është një kandidat i fortë. “Ai është kandidati më energjik dhe me një rend dite më të ngjeshur. Ai duket se përpiqet më shumë të sigurojë emërimin e partisë. Të gjitha këto janë të rëndësishme për të siguruar emërimin e partisë”.

Zoti Romni lindi në vitin 1947 në Detroit të shtetit Mishigan. I jati ishte guvernator i atij shteti si dhe ish kandidat për president. Zoti Romni u rrit në Kishën Mormone, e njohur edhe si Kisha e Shënjtorëve të Ditëve të Mëvonshme. Feja mormone vazhdon të jetë një mister për shumë amerikanë.

Ky besim fetar mbështet idealet amerikane të optimizmit, punës së madhe dhe thjeshtësisë. Anketat e opinionit tregojnë se 35 për qind e amerikanëve thonë se ka më pak të ngjarë të votojnë për një kandidat mormon për president, dhe kjo thotë analisti politik Sabato është problem për zotin Romni. “Liberalët janë kundër mormonëve sepse filozofia e tyre është shumë konservatore. Konservatorët janë kundër mormonëve sepse fetë fondamentaliste i konsiderojnë ata si një kult. Këto dy rryma mund ta dëmtojnë rëndë kandidaturën e zotit Romni”. Zoti Romni është pasardhës i mormonëve pionerë, madje është udhëheqës i apasionuar i kishës moderne. Ai kaloi më shumë se 2 vjet si misionar në Evropë dhe thotë se nuk beson se feja do të dëmtojë shanset e tij për t’u zgjedhur.

Kur zoti Romni ishte guvernator i Masaçusets ai e paraqiti veten si një politikan i moderuar, që favorizonte të drejtat e abortit, tërhiqte votues homoseksual dhe mbronte grupet e mjedisit. Por ndërsa përgatitej të vinte kandidaturën për president, zoti Romni ndryshoi qëndrimet e tij ndjeshëm, duke folur kundër abortit dhe duke kritikuar martesat mes homoseksualëve. Ai filloi të mbante qëndrim konservator edhe për çështje të tjera shoqërore. Kritikët përdorin frazën ‘flip-flop’, që përdoret në Amerikë, për të përshkruar pikpamjet e ndryshuara të një kandidati, në këtë rast të zotit Romni, i cili thotë se qëndrimet e tij kanë evoluar, me kalimin e viteve. “Jo çdo gjë për të cilët besoja para 10-12 vjetësh është sot njësoj”. Lidhur me politikën e jashtme, Mit Romni mbështet shtimin e fundit të trupave amerikane në Irak dhe ka kritikuar ashpër udhëheqësit e Iranit.

Megjithëse nuk ka shërbyer ndonjë herë në ushtri, zoti Romni e portretizon veten si përkrahës të fortë të burrave dhe grave amerikane në uniformë. Shpesh zoti Romni bën fushatë me pjesëtarë të familjes, përfshirë edhe gruan e tij Ann dhe 5 djemtë e tyre dhe 10 nipërit dhe mbesat. Tani fushata është përqëndruar në zgjedhjet e para paraprake, që mbahen në shtetet Ajova dhe Nju Hempshër, me shpresë se një fitore e mirë në këto zgjedhje do t’i jepte shtytje zotit Romni, që të dilte në krye të kandidatëve të tjerë republikanë për president. //rd//

[skipetar]

Portret i kandidatit republikan për president, Rudi Xhuliani
Xhim Malone
Uashington

Një prej kandidatëve kryesorë për emërimin e Partisë Republikane në zgjedhjet presidenciale të vitit të ardhshëm është ish kryetari i bashkisë së Nju Jorkut, Rudi Xhuliani. Zoti Xhuliani u vlerësua për mënyrën se si e trajtoi gjendjen në qytetin e tij pas sulmeve terroriste të 11 shtatorit 2001 si dhe për uljen e numrit të krimeve gjatë periudhës kur ai ishte në atë post. Por kritikët vënë në dukje stilin luftarak të zotit Xhuliani si një aspekt të tij negativ politik. Në materialin në vazhdim ju sjellim disa aspekte të rëndësishme të karierës së tij dhe disa karakteristika të jetës së tij personale.

Në orët e tensionuara menjëherë pas sulmeve të 11 shtatorit 2001, asnjeri në skenën kombëtare nuk gërshetoi dhimbjen, vendosmërinë dhe forcën më shumë se sa kryetari i bashkisë së Nju Jorkut, Rudi Xhuliani.“Është diçka e tmerrshme, dëmi është i tmerrshëm. Njerëzit po bëjnë çdo gjë të mundur për të shpëtuar sa më shumë njerëz dhe kjo do të jetë një përpjekje afat gjatë. Dua të sigurohem se bëhen të gjitha përpjekjet. Ne i lutemi Zotit se do të mund të shpëtojmë disa njerëz”.

Është pikërisht ky imazh i dhimbshurisë dhe vendosmërisë, që zoti Xhuliani shpreson ta shoqërojë atë deri në emërimin të Partisë Republikane si kandiat për Shtëpinë e Bardhë në zgjedhjet e vitit 2008.

Por fenomeni politik i njohur si Rudi Xhuliani i ka rrënjët në fillime modeste. Zoti Xhuliani, nip i emigrantëve italianë, lindi në Bruklin të Nju Jorkut në vitin 1944.

Megjithëse babai i Rudit u dënua me burg, i biri vazhdoi studimet dhe u bë avokat dhe prokuror federal, i cili u vu pas krimeve të kryera nga zyrtarët dhe disa prej figurave më famëkeqe të Mafias së Nju Jorkut.

Zoti Xhuliani humbi me rezultat të ngushtë zgjedhjet për kryetar bashkie në vitin 1989, por 4 vjet më vonë fitoi dhe menjëherë u bë i njohur për punën e tij kundër krimit dhe për uljen e taksave.

Por stili politik luftarak i zotit Xhuliani i shkaktoi atij probleme, madje ai u kritikua nga veprimtarë të të drejtave civile për mënyrën se si i trajtoi disa incidente që tërhoqën shumë publicitet lidhur me abuzimin nga policia të pakicave në qytet.

Pasi shkoi me nxitim në Qendrën Botërore të Tregëtisë më 11 shtator 2001, zoti Xhuliani fitoi mbështetjen e madhe të qytetarëve e politikanëve si dhe titullin jozyrtar ‘Kryetari i Bashkisë së Amerikës’. Revista Tajm e zgjodhi atë Person të Vitit 2001.

Por më vonë, disa zjarrfikës dhe familjet e tyre e akuzuan zotin Xhuliani se braktisi shumë shpejt operacionet e kërkimit për viktimat e mbetura nën rrënojat e Qendrës Botërore të Tregëtisë.

Ndërsa ai ka vënë kandidaturën për Shtëpinë e Bardhë vitin e ardhshëm, zoti Xhuliani po e paraqet veten si një zyrtar, që e ka provuar veten se mer vendimet e duhura në kohë të vështira dhe që do të vazhdonte luftën kundër terrorizmit.

Ashtu si presidenti Bush, zoti Xhuliani e shikon luftën në Irak si frontin kryesor të luftës kundër terrorit në përgjithësi.“Terroristët kanë qënë në luftë me ne për një kohë të gjatë para sulmeve terroriste të 11 shtatorit. Ata do të vazhdojnë luftën kundër nesh, pavarësisht nga rezultati në Irak. Ne shpresojmë dhe i lutemi Zotit për një përfundim të sukseshëm në Irak. Çdo amerikan duhet të lutet për këtë”.

Anketat e opinionit publik tregojnë se zoti Rudi Xhuliani është kandidati më i preferuar sepse republikanët e admirojnë atë për shpirtin e tij udhëheqës. Por disa konservatorë kundërshtojnë pikpamjet e modertuara dhe liberale të zotit Xhuliani rreth çështjeve shoqërore si aborti, të drejtat e homoseksualëve dhe kontrolli i armëve. “Për sa kohë që zoti Xhuliani ta mbajë vemendjen të përqëndruar në sulet terroriste kundër Amerikës dhe çështjet e sigurimit kombëtar, ai do të ketë shance për të fituar emërimin e partisë së tij. Por nëse kandidatët e tjerë arrijnë ta shtrijnë debatin në çështje të tjera si aborti, të drejtat e homoseksualëve, kontrolli i armëve dhe çështje të tjera shoqërore si emigracioni, zoti Xhuliani nuk do të jetë më në avantazh”.

Edhe jeta personale e zotit Xhuliani mund t’i krijojë atij probleme gjatë fushatës. Zoti Xhuliani është martuar 3 herë dhe gjatë kohës kur ishte kryetar bashkie jeta e tij personale u bë objekt i shtypit të Nju Jorkut. “Nëse fiton ai do të ishte në shumë mënyra një kandidat shumë i fortë për republikanët sepse ai mund të tërheqë votuesit me pikpamje të moderuara. Ai është shumë karizmatik si dhe një figurë kontradiktore dhe këto janë veti të tij që nuk duhen harruar”.

Edhe shumë demokratë mendojnë se ish kryetari i bashkisë së Nju Jorku do të jetë një kandidat i mrekullueshëm presidencial i republikanëve, por ekspertët thonë se sfida e tij më e madhe do të jetë të bindë konservatorët, që shqetësohen rreth çështjeve shoqërore, se ai është kandidati më i mirë. //ii

[skipetar]

SHBA: Majk Hakëbi, kandidati republikan i preferuar i medias


Ish guvernatori i shtetit Arkansas Mike Huckabee, pak i njohur jashtë shtetit të tij, po zhvillon një garë pa shumë shpenzime dhe pa shumë shanse për të marrë emërimin e Partisë Republikane si kandidat për president. 52 vjeçari është i preferuar i medias, por nuk ka shumë para për fushatën e tij. Megjithatë, sondazhet e fundit të opinionit tregojnë se ai ka epërsi ndaj rivalëve, sidomos në shtetin e Iowas ku do të zhvillohen koferencat e partisë republikane. Cindy Saine i hedh një vështrim më të hollësishëm portretit politik të republikanit Mike Huckabee.

Mike Huckabee rrezaton optimizëm dhe shpesh përdor ironinë ndaj vetes gjatë fushatës. Ai e paraqet veten si një kandidat jo me shumë shanse por që të bën për vete. Një gazetar e pyeti atë se përse është futur në garë. “Mund ta nisja përgjigjen duke ju thënë se nuk e kam mendjen në vend që e bëra këtë gjë, por e di që kjo nuk është përgjigja që ju doni. Jo. Mendoj se Amerika ka nevojë për udhëheqje pozitive dhe optimiste që të ndihmojë për të kthyer besimin e vendit”. Huckabee është përpjekur të bëjë për vete konservatorët. Ai shpreh një ndjenjë të fortë besimi fetar, duke dalë hapur kundër abortit dhe martesës mes homoseksualëve.

Por nuk është e lehtë ta përkufizosh këtë politikan që është edhe prift baptist. Ai i bie kitarës bas në grupin e tij të rokut të quajtur Capitol Offense. Në fushatën elektorale, disa votues në Peterborough të shtetit New Hampshire të cilët e takuan zotin Huckabbe, thanë se ata e pëlqejnë atë. “ Ai ka shumë ide të mira dhe është njeri me këmbë në tokë. Ai pëlqen qentë, luan në kitarë. Çfarë mund të kërkosh më shumë?” Një tjetër votues komenton. “Ai iu përgjigjet pyetjeve, duke u mbështetur në parimet e tij, një cilësi e mirë për një politikan”. Huckabee ka drejtuar shtetin Arkansas nga viti 1996 deri më 2007 si përfaqësues i qendrës. Ai i anashkaloi dogmat e partisë së tij kundër taksave të larta, duke i rritur ato që të mund të financonte programin shëndetësor të fëmijëve.

Disa analistë thonë se kombinimi i parimeve të tij si konservator social dhe populizmit ekonomik, mund t’i bëjë për vete votuesit e shtresës punëtore si të bardhë dhe ata me ngjyrë në jug dhe në pjesën qendrore të vendit. Ai shpesh përmend një tjetër ish guvernator të shtetit Arkansas, Bill Klinton, i cili gjithashtu vinte nga një familje punëtorësh në një qytezë të vogël të quajtur Hope.

Klinton kandidoi për president dhe fitoi dy herë. Huckabee ka kaluar përmes disa fazash ndryshimi në jetën e tij. Ai ishte i pari mashkull nga familja që u diplomua në shkollë të mesme dhe universitet dhe më pas arriti të bëhej guvernator. Më vonë, me nxitjen e mjekut, guvernatori humbi 50 kg peshë, duke u shndërruar në një vrapues maratone.

Tani, analistët aludojnë nëse ai do të jetë i zoti që të bëhet udhëheqës i garës brënda republikanëve. Disa prej sondazheve të fundit tregojnë se Huckabee është në garë me një kandidat tjetër për vendin e dytë mes rivalëve republikanë për shtetin e Iowas, një shtet strategjik për votimet paraprake.

Ndonëse kritikët thonë se ai nuk ka përvojë në politikën e jashtme, Huckabee ka mbajtur një qëndrim të prerë kundër terrorizmit, të ngjashëm me kandidatët e tjerë republikanë që udhëheqin garën. “Ne nuk mund ta kuptojmë se deri ku arrin fanatizmi që udhëheq islamofashizmin, dhe ja pse duhet të sigurojmë që çdo amerikan ta kuptojë që kërcënimi ndaj lirisë sonë është real”. Huckabee tha për Zërin e Amerikës se ai beson që mund të fitojë garën megjithëse nuk ka shumë fonde apo një organizim mbarëkombëtar të fushatës. “Mendoni se ku e nisëm, ishim në fund fare dhe trajektorja jonë është në ngjitje. Ka të tjerë që e kanë nisur nga maja më e lartë. Por pak nga ata që e nisën mjaft lart, po vazhdojnë atje ku e nisën. E ndërsa të tjerëve u ka ngecur anija e tyre në rërë, velat tona janë hapur dhe ne po ecim në drejtim të erës”. Votuesit në shtetet ku bëhen zgjedhjet paraprake dhe konferencat e partive në fillim të vitit 2008 do të jenë të parët që do të vendosin nëse Mike Huckabee është gati të nisë maratonën më të rëndësishme të jetës së tij, garën për Shtëpinë e Bardhë. //rd//

[Musa`]

Majk Kakebi eshte orator po s'ka noj shonc te madh se esht shume fetar (kristian i thekur).
Nuk e di pse diskutohet vetem per republikanet e nuk shifet rrjedha e "padroneve" te shpis se bardh ne keto tre mandatet e fundit. Psh une mendoj qe bush baba e ndihmoi bushin e ri te vinte ne pushtet ndoshta edhe nga politika e ndjekur prej tij ne kohen kur ishte president dhe Clinton bashkshorti ka bere vend qe Clinton bashkshortja te behet presidente e ardhshme e USA, theksoj, jo te fitoje zgjedhjet pasi kete askush s'e di te sigurte. Jo per gje po Bush biri pati probleme ne fund ndersa po mbyllej votimi gje qe i beri aerikanet dhe mbare opinionin nderkombetar te jene ne dyhim per rezultatet e verteta te zgjedhjeve ne ate kohe.

[druvari]

Mendoj se Xhon Mekein do jete kandidati i Republikaneve ne zgjedhje, por nuk mund te them se do fitoje zgjedhjet ne SHBA, pasi Demokratet tashme jane te favorizuar nga gafat e herepashershme te Bushit

[Alienated]

John McCain dhe Rudy Giuliani kane shanset me te mira per te vazhduar garen ne mesin e Republikaneve, dhe besoj qe do ngelet McCain per t'u perballur me demokratet.

[bili99]

I vetmi kandidat qe kryesisht ka motive atdhetare eshte McCain....por edhe ky luftetari i perjetshem ka mbet me ilet nga qelite e Vjetnamit dhe do te fitoje nje lufte qe ne fakt s'ka definicion per "fitoren", nje lufte qe as qe duhej te niste, nje lufte qe i ka shkaktuar dem me shume Amerikes se cdo lufte tjeter.Pra ky qe duket si njeri me i mire ka shume ilete republikane, mos te flasim per moshen qe gati e ben te pazgjethshem per mentalitetin kapadahij te amerikaneve.
Nga republikanet perseri eshte i vetmi kandidat qe me pelqen.


Guliani , eshte nje shembull se si politika eshte mvarshmeri e keqe si droga dhe mvarshmerite tjera jetesore....Per kete mendoj se as do te zgjidhet....

Tash edhe ne taborrin republikan mbesin te diskutohen ata te frikshmit e religjionit...
Do cudited dikush qe nuk jeton ne Amerike se sa ka rol religjioni ketu, do cuditet se sa ka fanatizem fetar ketu...bekimi i prijesve fetar te rrymave me te forta fetare do te thote edhe ndikim shume i madh ne perfundimin-zgjedhjet.Pra, Amerika per nje njeri qe eshte neutral eshte nje shtet ku feja luan rol shume te madh.
Sa i frikshem eshte fanatizmi fetar une dij njerez qe ne asnje segment nuk mund te identifikoheshin me Bush (i cili e gjet fene kur i duheshte, dhe kishen dhe Zotin gjitheashtu) por pas riteve fetare si frekuentues te te njejtes kishe si Bush , edhe e votuan me direktiva...Andaj evangjelistet si me ndikim te madh dhe me pasuri mund ta shtyejn lart Huckabee...por, s'mund te parashikoj per republikanet edhe ashtu nuk me pelqejne keta edhe aq jane si mafioze .

Te gjithe flasin per ndryshime dhe ku mund te sjelle ndryshime nje Parti qe vazhdon kursin e kryetarit te sotem, te njejtin program me falcifikim te fakteve dhe drejtesise dhe me genjeshtra dhe tradheti ndaj interesave kombetare shtine popullin e vet ne lufte per interesa te tyre te semura....
Shpresoj se amerikanet nuk i ka lene mendja krejt, dhe per kete shpresoj dhe kam shume frike me kane deshpruar shume.Ne vendin me demokratik ne bote u implementuan padrejtesite me te medha qe mbahen mend te nje shoqerie te ashtuquajtur demokratike ... kaluan ne heshtje dhe kalojne pa hetuar sikur nuk eshte bere gje bile ne dy mandatet e ketij qoftlargut Bush....kjo eshte e frikshme...padrejtesia qe nuk gjykohet kudoqoft ne bote eshte kerrcnim per cdo cep te botes....
Republikanet...nuk i pres ne fund vitit........do nderrojme shpresoj per te mire...
.......................

[Alienated]

Eshte e cuditshme qe Giuliani mundohet te shfrytezoje 9/11 si pike pozitive per vete.

E kupton njeri ca viktimizimi ka patur Rudy ne 9/11 dhe pse do duhej ta votonin Amerikanet ate, meqe 9/11 ndodhi ne New York ku ky ishte kryebashkiak?

Mua s'me duket fare si favor - por ja qe ai kapet mbas kesaj shpesh.