Hakmarrja, nene e bir vriten per nje plagosje

[Flori]

Hasmeri per pronat ne Velipoje qellohen per vdekje Age e Rafael Filipi. Kapet autori.

Hakmarrja ka shënuar dy viktima nënë e bir në një fshat të Shkodrës, ndërsa policia lokale ka mundur të arrestojë në një kohë rekord autorin e vrasjes së dyfishtë. Age dhe Rafael Filipi janë qëlluar për vdekje nga Arjan Zefi, duke iu shtuar kështu listës së gjatë të hakmarrjes. Në fakt, hakmarrja mes fiseve ka pasur si zanafillë plagosjen e Zefit një vit më parë nga ana e Rafaelit për motive pronësie. Ndërsa Gjykata e Shkodrës e kishte dënuar Rafaelin me gjobë.

Të dyja palët e përfshira në këtë konflikt prisnin që diçka të ndodhte. Si gruaja 56-vjeçare, ashtu edhe djali 20 vjeç, kanë pasur në brez të trupave të tyre pistoleta. Kjo ka bërë që policia e Shkodrës të mendonte se konflikti mes dy palëve ishte shumë i ashpër. Age Filipi njihej në këtë zonë, pasi ishte kryetare e PS-së fshatit Ças të Velipojës, po kështu punonte edhe si mësuese në këtë zonë. Ka qenë ora 14.00, kur kanë ndodhur edhe vrasjet. Nënë e bir ishin duke u kthyer në shtëpi. Vetëm pak metra pa shkuar te dera e jashtme e shtëpisë ata janë qëlluar nga Arjan Zefi, i cili kishte parë lëvizjet e tyre dhe në momentin kur kanë kaluar në rrugicën e ngushtë ai ka qëlluar disa herë me një pushkë njëzetëshe. Plumbat që nënë e bir kanë marrë, u kanë shkaktuar vdekjen e menjëhershme. Viktimat po udhëtonin me një "Fiat Punto" SH 2016D dhe mjeti drejtohej nga Rafaeli. Autori është larguar nga vendi i ngjarjes. Mesa duket ai ka gjetur këtë zonë të izoluar, pa lëvizje, që të qëllonte mbi ta, duke shpresuar se nuk do të shihej nga kush dhe se autorësia nuk do të zbulohej. Por, në fakt, gjithçka është zbuluar brenda pak minutave.

Menjëherë pas vrasjes, Drejtoria e Policisë së Shkodrës ka nisur aksionin për kapjen e autorit. Në krye të aksionit ka qenë drejtori i Policisë së Shkodrës, Nikolin Bala. Janë ngritur njëkohësisht disa postblloqe, duke synuar që autori të mos largohej nga Velipoja. Postblloqet e shumta kanë bërë izolimin e tij. Dhjetëra forca policie kanë bërë rrethimin në katër anët e shtëpisë së Arjan Zefit, pas informacionit të sigurt se ai ndodhej atje në përpjekje për t‘u larguar. I është bërë thirrje që të dorëzohet dhe pas pak minutash ai është arrestuar nga policia pa bërë rezistencë. Gjatë marrjes në pyetje ai ka deklaruar se ka qëlluar mbi ta, pasi gjatë kësaj kohe e kishin kërcënuar se do ta vrisnin dhe i ka qëlluar ata për vetëmbrojtje.

Gazeta Shqip

[Flori]

Kjo masë është marrë për të shmangur përshkallëzimin e tragjedisë mes dy familjeve të përfshira prej katër vitesh në konflikt

Vrasja e dyfishtë në fshatin Ças të Komunës së Velipojës, e cila i është shtuar serisë së gjatë të krimeve të njëpasnjëshme të ndodhura gjatë këtyre muajve të fundit, ka “shkundur” organet e rendit dhe të drejtësisë në Shkodër. Të paktën pas ngjarjes që tronditi jo vetëm komunitetin e zonës, por edhe mbarë opinionin publik, Drejtoria e Policisë së Qarkut të Shkodrës ka shpejtuar të marrë në mbrojtje pjesëtarët e familjes së vrasësit, Arjan Zefi. Në orët e vona të mbrëmjes të së hënës, uniformat blu kanë larguar nga banesa bashkëshorten e dy fëmijët e Zefit si dhe të afërmit e tij, për t’i sistemuar në një vend të sigurt. Kjo masë është marrë për të shmangur përshkallëzimin e tragjedisë mes dy familjeve të përfshira prej katër vitesh në konflikt. Në raste të tilla, kanuni rishfaqet frikshëm dhe kërcënues, pa kursyer dhe të pafajshmit. E ndërsa dyert dhe dritaret e shtëpisë së familjes Zefi janë mbyllur, duke lënë heshtjen të mbërthyer brenda katër mureve, pak metra më larg ka vazhduar vaji i ngjethës i pjesëtarëve të familjes Filipi (Prenga). Pavarësisht dhimbjes së thellë për humbjen e Age Filipit dhe të djalit të saj 20-vjeçar, Rafaelit, të afërmit e dy viktimave janë munduar të ruajnë qetësinë. Në ora 15:00, miq, dashamirë dhe të njohur të familjes Filipi kanë përcjellë në banesën e fundit nënë e bir. Ndërkohë, mësohet se janë ngujuar në kullat e tyre nga frika e gjakmarrjes, të afërm dhe kushërinj të familjes Zefi.

MBROJTJA

Vetëm pak orë pasi Arjan Zefi është dërguar në qelitë e paraburgimit në Drejtorinë e Policisë së Shkodrës, uniformat blu që ndodheshin në fshatin Ças të Velipojës kanë marrë urdhër për largimin e pjesëtarëve të familjes së tij. Nën masa të rrepta sigurie dhe në errësirën e natës, bashkëshortja e 33-vjeçarit, dy fëmijët e tyre dhe njerëzit e tjerë të shtëpisë janë transportuar gjetkë. Shtëpisë i është vënë dryni. Mëngjesi i djeshëm vetëm sa ka trokitur në banesën e familjes Zefi, pasi asgjë e gjallë nuk pipëtinte përreth. Nisur nga përmasat e dramës në familjen tjetër fqinje, Filipi, uniformat blu nuk kanë harruar dhe një detaj tjetër. Dje ata kanë filluar të bëjnë roje në shtëpinë e Arjan Zefit, për të evituar ndonjë sulm të mundshëm me lëndë eksplozive. Me gjithë masat e marra nga forcat e rendit, disa familje të tjera në fshatin Ças që kanë lidhje farefisnie me familjen e Arjan Zefit janë ngujuar në banesat e tyre nga frika e hakmarrjes nga pjesëtarët e familjes së dy viktimave.

VARRIMI

Në një kohë janë nxjerrë nga shtëpia e familjes Filipi, arkivolet e nënë e bir. Kryefamiljari, vajza e djali i tij janë përshëndetur për herë të fundit me Agen dhe Rafaelin. 56-vjeçarja që deri dy ditë më parë ishte kryetare e Partisë Socialiste të Komunës së Velipojës dhe i biri i saj 20-vjeçar, janë varrosur rreth orës 15:00 në varrezat e fshatit.

Gazeta Shqiptare