Vetëm 25 vjeç dhe në mënyrë të rrufeshme po kthehet në një ikonë të gazetarisë amerikane. Marina Vataj, e lindur në Bronks të Nju Jorkut, është shqiptare e Kosovës. Gazetare e të përditshmes së njohur “New York Post”, Marina tashmë është bërë një ndalesë për shumë yje amerikanë, të cilët preferojnë t’ia rrëfejnë ekskluzivitetet vetëm asaj. Nga Anxheline Zholi e deri te Tiger Woods janë kthyer në të intervistuar të shqiptares nga Kosova, ndërkohë që gazetat e tjera amerikane janë gjithmonë të interesuara të mësojnë më shumë për jetën e këtij
personazhi. E duke qenë se nuk arrijnë të zbulojnë asgjë, shpesh edhe krijojnë histori të tipit "Marina dhe shoqet e saj mbajnë gjithmonë nga një unazë fejese false, për të shmangur ofertat". Për herë të parë, biondja e bukur dhe shumë inteligjente nga Kosova, jep një intervistë dhe këtë e bën për "Gazeta Shqiptare".
Marina, ku keni lindur?
Kam lindur në Shtetet e Bashkuara të Amerikës, në Bronks të Nju Jorkut, por prindërit e mi janë nga Kosova. Menjëherë sapo mbusha pesë vjeç, familja ime u transferua në një qytet të mrekullueshëm, të quajtur Armonk. Atje kalova edhe vitet e fëmijërisë dhe të adoleshencës. Kam një vëlla, quhet Uillson që është 12 vjet më i madh se unë, kam edhe dy motra që janë më të mëdha në moshë se unë, Gloria dhe Vilma. Si më e vogla e familjes, nuk më kanë munguar për asnjë çast përkëdheljet nga prindërit e mi, Pren dhe Jana, të cilët u përpoqën shumë që të mos më mungonte asgjë.
Çfarë shkollimi keni ndjekur?
Pasi mbarova shkollën e mesme, u regjistrova në Universitetin Fordham, ku studiova për katër vjet, duke u diplomuar për Anglisht dhe Gazetari. Pas kësaj, bëra punë hulumtuese për dy vjet në Universitetin "Sara Lawrence", ku dhe mbarova një master për gazetari.
Kur mbërritën prindërit e tu në Shtetet e Bashkuara të Amerikës?
Prindërit e mi u martuan në Kosovë kur ishin vetëm 20 vjeç. Pasi jetuan disa vjet në shtëpinë që im atë ndërtoi me duart e tij, ata vendosën që të kërkonin një jetë më të mirë në Amerikë. Pas përpjekjesh të lodhshme, më në fund mbërritën në Nju Jork në vitin 1971.
Marina, keni qenë ndonjëherë në Kosovë?
Po, kam pasur fatin të vizitoj dy herë vendin ku kanë lindur prindërit e mi. Herën e parë isha shumë e vogël dhe nuk arrita të vlerësoj bukurinë e vërtetë të atij vendi. Herën e dytë, në adoleshencë shkova në Kosovë, me dëshirën për të kuptuar sa më shumë gjëra. Vizitova kushërinjtë e mi dhe tezen time të dashur, e cila vjen për të na vizituar shumë shpesh në SHBA. Madje shkova edhe në shtëpinë për të cilën ju fola pak më parë, që im atë ndërtoi me shumë mund për familjen. Shpresoj që gjatë pushimeve të verës të shkoj sërish me familjen time në Kosovë. Por, jo gjithçka që pashë më pëlqeu. U bëra dëshmitare e një varfërie të skajshme, që ende më ka mbetur në mendje. Do më pëlqente të kthehesha dhe merrja pjesë në projekte, për të përmirësuar jetën në atë vend. Në fakt, ky është qëllimi im.
Kur e keni nisur punën si gazetare?
Kur isha në universitet, fillova të punoj për një revistë mjaft të njohur, por në të cilën nuk paguhesha shumë. Ishte një përpjekje që e bëja për të fituar sa më shumë përvojë në këtë fushë të jashtëzakonshme. Për disa muaj punova për revistën "Fitnes", ku isha në kontakt të vazhdueshëm me gazetarët e tjerë, me fotografë dhe kryeredaktorë. Gjatë atyre muajve punoja shumë në terren, për të mbledhur sa më shumë informacion. Menjëherë pas kësaj eksperience të vyer, fillova të punoj për shfaqjen e njohur "Good morning America" - "Mirëmëngjes Amerikë", ku dhe pata fatin të punoj me legjendaren e gazetarisë amerikane, Diane Sawyer, personin që kisha pasur burim frymëzimi që në vogëli. Pasi mbarova universitetin, CV-ja ime ishte më e plotësuar. Pata kurajën të aplikoj për një pozicion në gazetën "New York Post", gazetë shumë e rëndësishme në tregun amerikan. E fitova punën menjëherë.
E kishe menduar ndonjëherë se do të punoje për New York Post?
Në fakt nuk e kisha menduar kurrë se do të mund të punoja për një media kaq të rëndësishme. Është vërtet një nder që të punoj dhe të kem kaq shumë lexues që i dashurojnë artikujt e mi. Gjithçka po më shkon mbarë, por dhe po mësoj çdo ditë shumë gjëra të reja.
Si gazetare mjaft e njohur në SHBA, e ndiqni me kujdes shtypin se çfarë shkruhet dhe thuhet për Kosovën dhe Shqipërinë?
Po, si gazetare lexoj shumë artikuj për Kosovën dhe Shqipërinë. Edhe unë kam bërë shumë hulumtime, që në një të ardhme të afërt, kur të jem e bindur se kam bërë një punë të mirë, mund t'i botoj. Në qendër të tyre është kultura dhe gratë shqiptare.
Te qënit shqiptare në Nju Jork, i ka lehtësuar apo vështirësuar gjërat për ju?
Fakti që jam shqiptare, i ka bërë të dyja, edhe m'i ka lehtësuar, por edhe m'i ka vështirësuar punët ndonjëherë. Kultura që kam marrë nga prindërit e mi, më ka formuar si person. Fakti që flas shqip dhe anglisht, që di të çmoj familjen dhe vlerat e saj, ka bërë që t'i shoh gjërat nga një tjetër këndvështrim. I jam mirënjohëse prindërve të mi për këtë. Nga ana tjetër, çdo kulturë mund të jetë kufizuese nëse e lejon të jetë e tillë. Që të ecësh përpara, duhet të gjesh një rrugë të mesme. Duhet t'i zgjerosh kufijtë për çështje të rëndësishme, siç është shkollimi dhe puna, megjithatë të vazhdosh të respektosh prindërit dhe kulturën e vendit tënd. Në rastin tim, kulturën shqiptare.
Cila intervistë që i keni bërë personave të famshëm, ju ka ngelur në mendje?
Kam bërë shumë intervista, kam shkruar shumë artikuj, por nuk do ta harroj kurrë intervistën që i bëra njëkohësisht të gjithë aktorëve dhe ekipit të serialit "The Sopranos", në premierën e tij. Jam një adhuruese e këtij seriali fitues të shumë çmimeve, ndaj dhe provova shumë emocione që nuk i kisha provuar më parë.
Një nga artikujt e mi më të njohur që dhe më ka dhënë shumë emër në botën e gazetarisë amerikane, është një zbulim që bëra për diamantet e gjakut. Shumë njerëz nuk e dinë se diamantet që vijnë nga Afrika kushtojnë shumë jetë njerëzish. Në artikullin tim ofrova edhe shumë alternativa për të pasur diamante, për të cilat nuk derdhet gjak. Jam shumë krenare për këtë artikull.
Shkrimet e tua janë shumë të njohura në mbarë Shtetet e Bashkuara të Amerikës. Si ju trajtojnë njerëzit, duke qenë se jeni kthyer në një person të njohur.
Sa herë që fotografitë e mia botohen në gazeta, marr shumë e-maile nga miqtë, por edhe nga të panjohurit. Megjithatë, dua të theksoj se është kënaqësi e vërtetë, kur më dhurojnë shumë bileta falas për shfaqje dhe koncerte. Çuditërisht marr edhe shumë dhurata si libra dhe parfume.
A ju është dhënë ndonjëherë mundësia të takoni shqiptarë të tjerë që jetojnë në Nju Jork?
Sigurisht. Unë jam e rrethuar nga të afërm dhe miq shqiptarë. Prindërit e mi janë shumë të përfshirë në komunitetin shqiptar në Amerikë. Madje, frekuentojmë edhe meshë në gjuhën shqipe.
Çfarë mendoni për kuzhinën shqiptare?
Ushqimi im i preferuar janë pitet. Janë të mrekullueshme! Mamaja ime gatuan në mënyrë të jashtëzakonshme dhe ushqimi i freskët shqiptar nuk mungon kurrë në shtëpi. Kolegët e mi në redaksinë e gazetës "New York Post", çmenden për ushqimin shqiptar.
Balkan
Përgjigju Duke Cituar
Postuar më parë nga SKUTHI
![Maska e [Perla]](customavatars/avatar28193_17.gif "Maska e [Perla]"){kind=avatar}
Krijoni Kontakt