Ministri Alibeaj paditet për fyerje.

[ClaY_MorE]

Një kandidate e Magjistraturës çon në gjykatë kreun e Drejtësisë. Padit edhe drejtoreshën e shkollës: Më fyen gjatë konkursit


Ministri i sapoemëruar i Drejtësisë, Enkelejd Alibeaj, do të përballet në fillim të dhjetorit me një akuzë për fyerje, që është regjistruar tashmë në Gjykatën e Shkallës së Parë në kryeqytet. Lajmi konfirmohet nga burimet zyrtare të Gjykatës së Tiranës, të cilat saktësuan se shtetasja Rudina Murataj ka paditur drejtoreshën e Shkollës së Magjistraturës, Adriana Fullanin, dhe ish-pedagogun e kësaj shkolle, Enkelejd Alibeaj. Objekti i akuzës që është kategorizuar në seksionin e kërkesave me të dëmtuar, është fyerja. Në 26 tetor të këtij viti, pra rreth një muaj më parë, Rudina Murataj ka regjistruar në gjykatë një padi ndaj dy drejtuesve të Shkollës së Magjistraturës. Megjithëse për shkak të mosnisjes ende të procesit, burimet zyrtare të gjykatës nuk dhanë ndonjë informacion më të hollësishëm rreth padisë, mësohet se Murataj ka marrë pjesë në provimin e konkursit për të fituar të drejtën e hyrjes në Shkollën e Magjistraturës. Në padinë e saj, kandidatja pretendon se gjatë zhvillimit të konkursit, ku Fullani dhe Alibeaj kanë pasur rol drejtues në komisionin e vlerësimit të provimit, ajo është fyer prej këtyre personave. Murataj nuk ka arritur të fitojë në konkursin e zhvilluar dhe mendohet se ajo pretendon që dy të paditurit kanë bërë padrejtësi në vlerësimin e provimit të saj, por nuk përjashtohet edhe mundësia që mes të dy palëve të jenë shkëmbyer replika reciproke, prej të cilave vajza është ndier e fyer.

Në fillim të muajit nëntor, në Gjykatën e Tiranës është hedhur shorti për padinë ndaj Fullanit dhe Alibeajt dhe sipas këtij shorti çështjen do ta gjykojë gjyqtari Sokol Tona. Tashmë është caktuar edhe data për seancën e parë të kësaj çështjeje, e cila do të zhvillohet në datë 3 dhjetor të këtij viti. Ndërkaq, Murataj ka bërë vetëm 5 ditë më parë edhe një tjetër padi, kësaj radhe ndaj Shkollës së Magjistraturës. Në këtë padi, që do të gjykohet nga gjyqtari Agron Zhukri, studentja që ka konkurruar për në Shkollën e Magjistraturës, kërkon të drejtën e saj për "cenimin e të drejtës për arsimim, cenimin e të drejtës së ankimimit, refuzimin e nxjerrjes së aktit administrativ, si dhe një shpërblim dëmi jopasuror në masën 50 milionë lekë". Edhe në këtë rast, në qendër të padisë duket se është incidenti i ndodhur gjatë konkursit të pranimit për në Shkollën e Magjistraturës. Në këtë mënyrë, Alibeaj duket se do ta nisë në një mënyrë jo fort komode prezantimin e parë publik si ministër i Drejtësisë, ndërsa pritet seanca e parë e procesit për të zbardhur më shumë detaje nga kjo përplasje.






Reagimi

Fullani: Nuk më kujtohet kjo studente

Zonja Fullani, a jeni në dijeni të një padije që është ngritur ndaj jush dhe zotit Alibeaj nga një kandidate për shkollën e magjistraturës?

Jo, nuk kam informacion.


A ju kujton gjë emri Rudina Murataj, që është emri i paditëses suaj?

Jo, nuk e mbaj mend. Veç në qoftë një studente që ishte e shqetësuar dhe u detyruam të thërrisnim policinë për ta marrë nga shkolla. Nuk më kujtohet, por ndoshta edhe nuk është ajo, sepse emrat nuk i mbaj mend. Kur të më vijë thirrja e gjyqit dhe padia do të mësoj më shumë.


Gazeta Shqip

[ClaY_MorE]

Pse e padita ministrin Alibeaj

Murataj: Pedagogu më fyeu. Më tha që nuk e meritoj të bëhem prokurore


Përplasja midis kandidates për në shkollën e Magjistraturës, Rudina Murataj, dhe drejtoreshës së kësaj shkolle është zgjidhur me ndërhyrjen e policisë, ndërsa ministri i Drejtësisë, ish-pedagog në shkollën e lartpërmendur, është përfshirë në padinë e studentes, për shkak të një fjalie të vetme që i ka thënë asaj. Një ditë pas publikimit të lajmit se ministri Enkelejd Alibeaj është paditur në gjykatë për fyerje, së bashku me zonjë Adriana Fullani, "Shqip" ka arritur të zbulojë motivet që e kanë çuar studenten nga Gjirokastra në dyert e gjykatës. 22-vjeçarja e lindur në Tropojë dhe me banim në lagjen "Dunavat" të Gjirokastrës ka marrë pjesë në konkursin për shkollën e Magjistraturës, që është zhvilluar më 11 shtator të këtij viti, për profilin prokuror. Sipas deklarimit të saj në kërkesën për gjykim, dalja e rezultateve përfundimtare të provimit, vetëm një javë më pas e ka renditur atë në vendin e 11, një vend më poshtë sesa numri prej 10 vetash që fitonin të drejtën për të hyrë në shkollë.

Rudina, e cila do ta mbrojë vetë padinë e saj në gjykatë, ka deklaruar se pas marrjes së rezultatit të konkursit i është drejtuar ambienteve të shkollës për të kërkuar testin e saj dhe për të kontrolluar rezultatin e tij. E shoqëruar nga e ëma ajo ka takuar drejtoreshën e shkollës, zonjën Fullani, me të cilën duket se ka pasur një replikim që është acaruar moment pas momenti. Studentja ka thënë në padinë e saj se pasi i ka kërkuar fotokopjen e testit drejtoreshës, kjo e fundit i është përgjigjur: "Në 10 vjet nuk kemi dhënë asnjë kopje testi dhe prej këtej nuk del fotokopje testi". Vajza ka paraqitur si argumente për kërkesën të drejtat e saj kushtetuese për informim dhe ankimim, por sipas padisë në këtë moment drejtoresha ka nisur të ulërasë nëpër ambientet e shkollës. "Më është dashur t‘i ulem në gjunjë zonjës Fullani me shpresën se do të merrja fotokopjen e testit", ka thënë Murataj, e cila ka vazhduar të tregojë se në këto kushte e ëma e saj ka dashur të thërrasë policinë. Por këtë veprim e ka bërë më përpara drejtoresha e shkollës.

Policia e Komisariatit Nr.1 ka mbërritur shpejt në ambientet e shkollës dhe është përpjekur të sqarojë situatën. Sipas 22-vjeçares, pasi kanë dëgjuar problemin, njëri nga policët e ka pyetur Fullanin: Zonjë përse nuk ia jepni testin dhe zgjidhet kjo punë? Pas kësaj, Murataj ka arritur të marrë testin e saj, por kjo nuk e ka penguar që të padisë në gjykatë drejtoreshën e shkollës për fyerje. "Zonja Fullani ka konsumuar veprën e fyerjes, neni 119, me gjithë elementët e saj. Është konsumuar ana objektive nëpërmjet gjesteve dhe të bërtiturave, të cilat më kanë fyer, duke qenë një njeri me nder dhe dinjitet", thotë studentja në padinë e saj. Ajo madje ka përfshirë në padi edhe ish-anëtarin e komisionit të vlerësimit të provimeve, aktualisht ministër i Drejtësisë, Enkelejd Alibeaj. Shkak për këtë është bërë një fjali që ish-pedagogu i ka thënë studentes, kur kjo e fundit ka shkuar për të konsultuar testin. "Ti s‘e meriton të bëhesh prokurore", i ka thënë Alibeaj 22-vjeçares, e cila duket se ka mbetur shumë e fyer nga këto fjalë. "Unë kam mbaruar Fakultetin shtetëror të Drejtësisë me rezultate të shkëlqyera. Çdo student i këtij niveli do të ishte rënduar nga këto fjalë", e ka mbyllur kërkesën e saj drejtuar gjykatës Rudina Murataj.


Gazeta Shqip