Shqiptarja gjendet e vdekur në garazh !

[Shpirt Njeriu]

Vajza shqiptare kishte të paktën 12 orë që kishte vdekur kur është gjetur pa jetë e rrethuar me shiringa narkotikësh në shtratin e saj në një garazh të përshtatur si banesë në Bolonja.


Sipas policisë dhe mediave italiane, shqiptarja me iniciale S.H. është 26 vjeçe dhe dyshohet se është vrarë kur ndodhej nën efektin e lëndëve narkotike. Mjeku ligjor, i cili zhvilloi autopsinë e kufomës së vajzës, tha se ajo duhet të ketë vdekur 12 orë para se policia të gjente trupin e pajetë në qytetin e Bolonjës. Policia, e cila është lajmëruar nga persona të panjohur për adresën e vajzës mbërriti menjëherë në garazhin që i shërbente shqiptares për banim. Vajza ndodhej pa jetë në shtratin e saj, ndërsa pranë kishte telefonin celular dhe dy shiringa të dyshuara se janë përdorur nga viktima për injektim të lëndëve narkotike. Ato bashkë me telefonin u sekuestruan në cilësinë e provave materiale nga policia. Kjo e fundit dhe mjekët nuk janë të sigurt nëse bëhet fjalë për një vrasje të vajzës shqiptare apo për një vdekje të saj nën efektin e sasisë së lartë të lëndës narkotike që ajo kishte injektuar në venat e saj. Policia shkoi në rrugën "Col di Lana" në qytetin e Bolonjës dhe, pasi gjeti trupin në garazh e dërgoi atë te mjekët ligjorë. Ata thanë se viktima ishte qëlluar me thikë, por nuk u dhanë detaje rreth mënyrës së vrasjes së vajzës shqiptare, e cila mendohet se është vendosur në Itali prej vitit 1996. Për shkak të dyshimeve se viktima mund të jetë një vajzë e shfrytëzuar më parë për ushtrim prostitucioni, policia nuk bëri të ditur identitetin e saj, i cili, në fakt, është mësuar nga hetuesit vetëm në orët e mbrëmjes së djeshme, pasi viktimës nuk iu gjet asnjë dokument identifikimi. Policia është përqendruar në verifikimin e telefonatave të bëra nga vajza para se ajo të gjendej e vdekur në garazhin që kishte shndërruar në banesë në qytetin e Bolonjës. Banorët e zonës nuk dhanë dëshmi të vlefshme për hetimin e ngjarjes, pasi duket se nuk kanë pasur shumë informacion për viktimën, rrethin shoqëror të saj apo vendin e punës. Sipas mjekëve ligjorë, viktima ka pasur hemorragji, por nuk është e kuptueshme nëse kjo i është favorizuar nga plagët që i janë shkaktuar në trup, apo nga përdorimi i substancave narkotike. Personi që ka lajmëruar policinë mësohet se ka qenë i vetmi që kishte trokitur në derën e garazhit-shtëpi ku qëndronte vajza dhe prej dy ditëve nuk kishte marrë asnjë përgjigje prej saj. Ky fakt duket se e ka shqetësuar të njohurin e viktimës, i cili menjëherë kërkoi ndihmën e policisë.

12 ore
para se të gjendej e vdekur në garazhin-shtëpi, vajza shqiptare sipas mjekëve ligjorë është ndarë nga jeta si pasojë e hemorragjisë. Vajza kishte 11 vjet që qëndronte në Itali

11 vjet
më parë mësohet se vajza kishte mbërritur në Itali dhe kishte banuar në qytete të ndryshme, derisa ishte vendosur në Bolonja, ku edhe gjeti vdekjen

1 banor
i zonës, i cili ka trokitur dy ditë me radhë në derën e shtëpisë së vajzës lajmëroi policinë, pasi nuk mori asnjë përgjigje nga emigrantja shqiptare