Miratohet ndërtimi i hidrocentralit të Skavicës dhe kablli nënujor Seman-Foxha

[brooklyn2007]

• Kompania AET tërhiqet nga ndërtimi i parkut energjetik. Drejtori i AET (Azienda Elettrica Ticinese), Reto Brunett tha se zbatuesi nuk gjeti financim

Kemi ngurtësuar projektin e ndërtimit të impiantit të rigazifikimit të gazit metan në Shqipëri, si pjesë e një rishikimi të përgjithshëm të strategjisë sonë të investimeve”. Ka deklaruar kështu këto ditë për median zvicerane drejtori i AET (Azienda Elettrica Ticinese), Reto Brunett. Sipas rrjetit kombëtar televiziv të Zvicrës, Brunett shtoi edhe se javët e ardhshme pritet të merret vendimi përkatës lidhur me këtë ndryshim qendrimi. Në këtë mënyrë, ai ka konfirmuar zërat, e përhapura nga televizionet vendore të Luganos, se shoqëria ishte e pakënaqur nga fakti se ASG Power, kompani-bijë, ku AET zotëron 50% të aksioneve, nuk kishte arritur të gjente një partner serioz për financimin e projektit madhor energjetik në Shqipëri, ndërkohë që deri tani ka shpenzuar në dy vjet 9 milionë franga zvicerane për këtë qëllim. Duke qenë se AET është kompani publike, për investime të mëdha ajo është e detyruar të japë llogari para parlamentit vendor, që, kohët e fundit, ka shprehur dyshime për mënyrën se si dhe ku investohen paratë e taksapaguesve të kantonit italo-folës të Tiçinos.
Sipas televizionit Teleticino, “në Fier, vendi ku mendohet të ndërtohet impjanti gjigand, nuk kanë filluar as punimet e gërmimit. Në fakt, ASG ka arritur të marrë ekskluzivitetin nga qeveria shqiptare për këtë objekt, por gjatë gjithë 2007-ës nuk arriti të gjejë një partner që të ketë paratë e duhura për ta realizuar atë”. AET duket se ka hasur një projekt tepër të madh për të, “pa patur paratë, ka shpresuar të gjejë, pas marrjes së lejes nga shqiptarët, atë që do të ishte i interesuar për një punim të tillë”. Por, nuk e ka gjetur.

(GazetaShqiptare)

[DYDRINAS]

Kompania e njohur hedh poshtë si të pavërtetë dhe keqdashës shkrimin e botuar në "Gazetën Shqiptare"

ASG Power SA: 2,65 miliard USD për energjinë

ASG Power SA reagoi dje ashpër, duke hedhur poshtë si të pavërtetë dhe keqdashës një shkrim të botuar në "Gazetën Shqiptare" për gjoja bllokimin e projektit të saj për energjinë elektrike në Fier. Një një njoftim për shtyp të shpërndarë dje thuhet se, ASG Power SA hedh poshtë si të pavërtetë, keqdashës dhe profesionalisht jokorrekt lajmin e botuar të shtunën dt.5.01.2008 në "Gazetën Shqiptare" lidhur me gjoja bllokimin e projektit të ASG Power SA në Shqipëri. "Duke mirënjohur rivalitetet e saj në një treg strategjik si ai i energjisë, ASG Power SA shpreh keqardhjen që një gazetë shqiptare bëhet pre e interesave të huaja komerciale, duke shtuar errësirën në mjedisin kombëtar ku përket. ASG Power SA, siguron publikun e gjerë se mbetet e vendosur dhe krejtësisht e angazhuar për realizimin e plotë të projektit të saj kompleks në Shqipëri, me kosto të përgjithshme prej 2,65 miliard dollarë", thuhet në njoftimin për shtyp.

Më tej thuhet se, ky projekt përfshin ndërtimin e një stacioni të rigazifikimit prej 10 miliard m3, një TEC me 1,200 MW fuqi të instaluar, një linjë interkonjeksioni nëndetare të rrymës së vazhduar me Italinë, një gazsjellës nëndetar me Italinë, 2 linja të brendshme të tensionit të lartë që lidhin TEC-in me Kasharin dhe Elbasanin (nënstacioni i ri do të ndërtohet posaçëm) si dhe lidhjen 220 KV me nënstacionin e Fierit.

"Aktualisht ASG Power SA po zhvillon në Itali praktikën e marrjes së lejeve të linjës së interkonjeksionit nëndetar Seman - Foggia me rrymë të vazhduar, ndërsa në Shqipëri po përkufizon elementët e fundit të infrastrukturës detare të ndërlidhur me stacionin e rigazifikimit. ASG Power SA, shpreh mirënjohjen për mbështetjen që ka gjetur tek publiku shqiptar dhe veçanërisht në popullatën e Fierit, për realizimin sa më parë të një projekti që do ta shndërrojë Shqipërinë në një nyje energjitike rajonale", përfundon njoftimi për shtyp i ASG Power SA.


RD

[Ujku'80]

Gati një vit më parë, KRRTRSH miratonte studimin për vendosjen e terminaleve të gazit natyror të lëngëzuar dhe infrastrukturës përkatëse në bregdetin e qarkut Fier. Në mbledhjen e këtij institucioni, më 1 mars 2007, u tha se projekti parashikon ndërtimin e terminalit të gazit të lëngshëm, ndërtimin e gazsjellësit që do të lidhë Shqipërinë me Italinë, si dhe kabllin nënujor të linjës së tensionit të lartë me Italinë.
Ndërkohë, u tha se “kompania ASG Power ka avancuar në projektin e saj dhe pritet të fillojë punimet në muajin gusht të këtij viti dhe t’i përfundojë ato në vitin 2009". Ka qenë vetë kryeministri Sali Berisha, që ka theksuar në mbledhje se “kompania ASG Power ka bërë një punë të madhe dhe realisht është në prag të fillimit të këtij projekti gjigant për vendin”. “Qeveria ka përzgjedhur si mënyrë partneriteti përpjekjen për të lehtësuar maksimalisht veprimtarinë e saj, ndërkohë që format e tjera të partneritetit komplikojnë procedurat”, shtoi ai. Fjala është për mënyrën e financimit të një projekti gjigand (në fillim u tha 1,9 mld USD, pastaj madje 2,65 mld USD!), që privatët e marrin vetë në ngarkim, pa burime nga Buxheti i Shtetit shqiptar.
Por, asnjë punim ende nuk duket në horizont në zonën e Semanit, duke lënë të dyshosh në efikasitetin real të rrugës, që ndoqi qeveria për të përzgjedhur këtë lloj partneriteti. Apo këtë kompani konkrete, si partner privat.
Projekti
Për herë të parë, zyrtarisht, kompania zvicerane ASG Power paraqiti projektin e saj ambicioz më 25 prill 2006, jo shumë muaj pas ardhjes së qeverisë Berisha në pushtet. Presidenti i saj, ing. Agim Gjinali, deklaroi me atë rast se punimet parashikohej të vazhdonin rreth 18 muaj. Ndërkohë, po ai, në një intervistë dhënë agjencisë së lajmeve REUTERS, theksoi në muajin mars 2007 se fondet për realizimin e projektit ishin gati. Por, mirëkuptonte vonesat proceduriale nga ana e autoriteteve shqiptare. Në Itali të vonojnë shumë më tepër, deklaroi Gjinali, me të drejtë.
Ligji
Ndërsa KRRTRSH mori vendimin e mësipërm, asnjë ligj nuk është miratuar nga ana e Kuvendit shqiptar për të vënë vulën mbi kontratën koncensionare midis qeverisë shqiptare dhe kompanisë ASG Power apo një grupi kompanish realizuese të projektit të Semanit.
Por, opinioni është mësuar se midis dy palëve është nënshkruar një memorandum mirëkuptimi.
Vendimi
Akti i vetëm nënligjor, që ka deri tani në dorë ASG Power, përveç lejes nga KRRTRSH, është ai i koncensionit për ndërtimin e linjës së interkonieksionit nëndetar Seman-Manfredonia (Itali), miratuar nga Këshilli i Ministrave në fund të vitit të kaluar.
Afatet
Pavarësisht nga deklaratat se fondet janë gjetur, fakti kokëfortë është se asnjë punim nuk ka filluar. Në prononcimet më të fundit, Gjinali apo zëdhënësi i tij në Tiranë kanë deklaruar se pritet që puna të fillojë në qershor 2008 dhe të vazhdojë për tre vjet. Kështu, data e fillimit shtyhet një vit dhe ajo e përfundimit edhe 18 muaj të tjerë, nga ç’ishte thënë më parë.

[Ujku'80]

Që nga ditët e fundit të vitit të kaluar, kompania e ing. Gjinalit dhe ai vetë ndodhen në „syrin e ciklonit” të një morie akuzash për probleme fiskale, zvicerane e ndërkombëtare. Drejtori i AET (Azienda Elettrica Ticinese), që zotëron 50% të aksioneve të ASG Power, Reto Brunett, deklaroi se kompania e tij bllokon vazhdimin e pjesëmarrjes në projektin energjetik në Shqipëri, duke qenë se janë hedhur miliona franga të taksapaguesve zviceranë, por nuk ka asnjë shenjë të vetme për fillimin e realizimit të projektit. Për këtë, do të pritet vendimi i këshillit drejtues të ndërmarrjes publike. Ndërkohë, në „Il Mattino online”, të datës 13 janar 2008, Giuliano Bignasca shkruan: “Qeveria, parlamenti dhe kompania AET duhet të japin sqarime mbi operacionin në Shqipëri! Dhe mbi gjendjen fiskale të inxhinier Gjinalit, i cili një vit e gjysmë më parë i detyrohej shtetit rreth gjysmë milioni franga taksa e, megjithatë, arriti të lidhë marrëdhënie biznesi me AET! Por, një ndërmarrje që nuk paguan taksat nuk mund të marrë pjesë as në prokurime publike!”
Raporti
Në raportin e Këshillit Administrativ të kompanisë AET për vitin 2006, del qartë se ASG Power i është bashkëngjitur kompanisë-mëmë vetëm në vitin 2006, pas një pagese prej 1.200.000 frangash promotorëve të projektit „Adriatic Gas & Power Project” në Shqipëri. Për të arritur objektivat e caktuara me kontratë, AET angazhohej të derdhte edhe një pagesë shtesë deri në 4 milionë dollarë amerikanë për kompaninë e ing. Gjinalit. ASG Power ka përfituar 3.043.000 franga më 2006 si paradhënie afatgjatë dhe 450.000 franga të tjera për aksionerë të tjerë. Por, pas ndryshimit të organeve drejtuese të kompanisë AET, drejtuesit e rinj duket se nuk kanë të njejtin besim tek Gjinali, për më tepër, kur nuk shohin rezultat lidhur me angazhimet e marra.
“Kremlingejti”
Emri i Agim Gjinalit është përfshirë edhe në një nga skandalet më të bujshme të botës, që lidhet me emrin e ish-presidentit të Federatës Ruse, Boris Jelcin. Në atë, që, në analogji me një prej skandaleve më të mëdha të SHBA (Uotergejt), u quajt „Kremlingejt”. Dhe, që ka të bëjë me derdhje e pastrim parash të pista në vende të ndryshme të botës. Ing. Gjinali dhe Giovanni Carlo Mahler, të dy qytetarë zviceranë janë akuzuar nga mediat për implikim me rusët Pavel Borodin, zyrtar i Jelcinit dhe Viktor Stollpovskih, biznesmen, në mashtrime ndërkombëtare financiare. ge.ko.


Heshtje qeveritare për fatin e koncensionit



Ndërkohë që dhënia e lejes së shfrytëzimit të qindra hektarëve në Seman u shoqërua me „tam-tamet” e zakonshme të medias qeveritare, Ekzekutivi ka mbajtur një heshtje domethënëse lidhur me ecurinë e projektit energjetik, i cili, praktikisht, nuk ka lëvizur nga letra në realitet. Gjithashtu, domethënës është fakti që ASG Power nuk pranon të thotë se kush janë partnerët e saj të huaj seriozë, që zotërojnë më shumë se një zyrë me tre veta në Lugano, të cilët janë angazhuar për kryerjen e punimeve në zonën e Fierit. Natyrshëm, qeveria ka dhënë lejen e kërkuar, me besimin e mirë që, të paktën, nuk do të hedhë fonde nga buxheti i shtetit. Por, „garantimi maksimalisht i të gjithë partnerëve publikë dhe institucionalë të vendit për seriozitetin e saj në realizimin sa më parë të këtij projekti, duke mbetur e bindur në mbështetjen dhe bashkëpunimin efikas në të ardhmen”, sipas deklaratave të kompanisë, po zbehet, sa më shumë që kalojnë muajt. Qeveria shqiptare po ndjek me shqetësim situatën. Duke qenë se i ka dhënë, jo pak, por për 20 vjet konçension linjën Seman-Foxhia.