Bukoshi kthehet në LDK

[laguna blu]

[QUOTE=ARIANI_TB;1741496]

pa lekë mbesin sot vetëm ata që nuk dinë të vjedhin...
QUOTE]



Qesharake kjo qe thua ti, po nese ban me na treguar ku kane shkuar te gjitha ato te holla qe Bukoshi si ish kryeminister ne egzil i mbloshi nga 3% qe populli i Kosoves i jepte ne ate kohe.

Thjeshtë, të hollat janë mbledhur nga maji 1992(në formë retroaktive prej 1 janarit 1992) dhe janë shpenzuar për të mbajtur arsimtarët që dikur jetonin më mirë se sot dhe nuk hynin asnjëherë në grevë. Është financuar shëndetësia, Presidenca dhe ministritë e ndryshme.60 milione DM janë investuar për aktivitete ushtarake dhe nja 65 të tjera janë investuar përmes UFORK_ut për rindërtimin e Kosovës, pas luftës. Aty ka pasë edhe pak gabime por ato janë në llogari të Naser Osmanit e Shpend Tërdevës e jo të Bukoshit.
Për 9 vite gjithsejt janë mbledhur rreth 270 milionë DM të atëhershme ose 15 milione euro në vit me të cilat populli ka jetuar më mirë se sot që buxheti ështe mbi 700 milionë Euro në vit ose 50 herë më i madh.
Nëse nuk më beson mua mund ti pyesni arsimtarët që dikur janë financuar nga ky buxhet. Kanë qenë rreth 22.000 të tillë dhe rroga ka qene dikund 100 DM në muaj. 43% i ka dhënë Qeveria në ekzil ndërsa 57% Këshillat e Financimit brenda në Kosovë...
P.S.
Vendi i tij gjithmonë ka qenë në LDK por ishin krimbat si Merovci, Tahiri(Edita) e të tjerë që në një kohë shumë të papërshtatshme me babëzinë e tyre valutore çuan në një konflikt në linjën Presidencë-Kryeministri. Ata që pas luftës, pra, ikën ku mundën....
Doni më për Behlulin?

[Llapi]

Heroi juaj nuk është më
Pamundësia për të ofruar diçka të re, ka nxitur disa nga kokat aktuale të LDK’së të thërrasin për së vdekuri edhe një herë heroin e saj, Ibrahim Rugovën

Nga Ilir Mirena më 07.04.2009 në ora 13:00
Pa vetëdije, por i zgjuar! Nëse një personi një gjendje e tillë i zgjatë më shumë se disa javë, atëherë, ajo përshkruhet si gjendje vegjetative konstante.

Është i njohur rasti Terry Schiavo në SHBA. Me një përshkrim të tillë, përmes një tubi ushqyes, ajo ishte mbajtur në jetë për mese shtatë vjet, derisa në vitin 2005, pas shumë debateve në mbarë botën, asaj i ishte hequr tubi ushqyes. Pak ditë më vonë, ajo kishte vdekur.

Nëse provojmë që këtë përshkrim ta përdorim edhe për organizatat politike, atëherë askujt më mirë se sa Lidhjes Demokratike të Kosovës nuk do t’i rrinte kjo diagnozë. Partia e dytë për nga numri i votuesve është në një gjendje vegjetative konstante. Tubi ushqyes për të, mund të thuhet se mbetet ende personaliteti i Ibrahim Rugovës.

E ndarë në dysh. Pa kryetar legjitim. Me ikje të kuadrove më të larta (ikja e njeriut i cili para pesë muajsh ishte shefi ekzekutiv me detyrë të posaçme reformimin e brendshëm të partisë, Blerim Kuçit). Pastaj, me mospërshtatje me vendin e dytë në skenën politike - vendi i dytë është humbësi i parë, apo jo? Pa kuadro premtuese dhe në duar pothuajse-pensionistësh. Me pamundësi për të ofruar diçka të re dhe rënie konstante të kredibilitetit politik.

Të gjitha këto kanë nxitur disa nga kokat aktuale të LDK’së të thërrasin për së vdekuri edhe një herë heroin dhe themeluesin e saj, Ibrahim Rugova.

Rikthimi i konferencës famoze të së premteve, insistimi në trashëgiminë e “filozofisë politike” të tij dhe së fundi ideja e çuditshme, deri në keqardhje, për të emërtuar autostradën ende të papërfunduar Kukës - Durrës me emrin e tij, e bënë emrin e Rugovës sërish pjesë të muhabeteve tona të përditshme.

Me mungesën e prodhimit të ideve të reja për reformimin e partisë dhe krijimin e gjeneratës së re të udhëheqësve partiakë, LDK sot mbetet peng në duar të udhëheqësve të tipit të hokatarit plak, Eqrem Kryeziu. Streha e shpëtimit nga kolapsi kërkohet në simbolikën e famshme të instaluar për nja dhjetë vjet nga ish-Presidenti Rugova.

Më tej, as nuk kanë mundur as nuk kanë ditur të reformojnë LDK’në. Reforma kërkon personalitete që do të marrin përsipër dështimin apo suksesin e tyre. Cili është reformatori i LDK’së? Le ta gjejë secili që i bie ndërmend ndonjë emër.

Sidoqoftë, nuk është vetëm LDK që kërkon hise nga trashëgimia politike e Rugovës.

Nexhat Daci, kryetar i fraksionit të ndarë të LDK’së, Lidhjes Demokratike të Dardanisë, në një intervistë në numrin e djeshëm në ‘Epoka e Re’ thotë se shkencërisht dhe me dokumente e ka filozofinë e Rugovës! Pashmangshëm, pa të ardhme si parti politike, edhe Dacit i duhet të shpikë posedimin e tapive të tilla filozofike!

Jo rrallë, edhe drejtues të lartë të Partisë Demokratike, ish-rivalë të përbetuar e tani partnerë në koalicion, janë të kujdesshëm që kohë pas kohe të vendosin ndonjë lule dhe përkulen pranë varrit të Rugovës.

Më sofistikueshëm elektoratit të shkapërderdhur të LDK’së i është qasur, Aleanca për Ardhmërinë e Kosovës. Duke e kuptuar humbëtirën në të cilën janë dërguar votuesit e LDK’së, liderë të AAK’së, përmes figurave më periferike të LDK’së, qoftë të gjalla qoftë të vdekura, synojnë të mbledhin material nga rrënojat e LDK’së. Aderimi i Blerim Kuqit, nderimi ndaj dëshmorëve të famshëm - të cilët LDK dikur i kishte uzurpuar - gradualisht mund të tërheqin simpatinë e votuesve të çorientuar të LDK’së drejt AAK’së.

Me ndonjë dallim nuancial, figurës së Lidhjes i është qasur gjithë spektri politik. Dallojnë për nga përkushtimi ndaj figurës së tij, partitë që janë në kriza të thella. Sa më e thellë kriza, aq më i madh nderimi për presidentin e vdekur. Mjerueshëm duhet ta kenë gjendjen ato parti që platformën e tyre politike e vendosnin mbi rrasa varri të figurave historike.

Përderisa nga tubi i tij ushqyes mundohen të mbesin në jetën politike të gjithë, tash i vdekur fizikisht, ai më nuk ngjallë as mërinë e armiqve të tij të dikurshëm. Në gjithë këtë garë për pronësi të figurës së tij, harrohet diçka esenciale: se Ibrahim Rugova më nuk sjell vota.

Kësaj duhet shtuar edhe ndryshimin e elektoratit. Nuk është më ai që ishte. Dikur i parashikueshëm brenda një sistemi pak a shumë stabil në skenën e partive politike, elektorati më nuk është ashtu. Masës së madhe të votuesve që nuk duan të shohin kutitë e votimeve shkaku i ofertës së varfër që u ofrohet, duhet shtuar edhe ata që vrapojnë pas partive miniaturale. Duke mos përfillur këto fakte, fokusi i disa partive parlamentare, posaçërisht LDK’së, mbetet tek figura e Rugovës.

Është e njohur legjenda për varrin e Skënderbeut. Pas ardhjes së turqve, varri i tij ishte hapur, dhe ushtarë osmanë kishin marrë copëza të eshtrave të tij, për të marrë pak nga trimëria e tij, e pak nga lavdia e tij.

Ata që thirren në emër të Rugovës, nëse nuk u ndalet turri, mund të ndodhë ta zhvarrosin atë. Jo për ta marr diçka nga fama e tij, por sa për të marr një copë pushtet.
Kokave të lodhura të tyre duhet sqaruar diçka njëherë e mirë: Heroi juaj është i vdekur. Ai është vetëm në kokat tuaja. Gjithçka tjetër tash është në duart tuaja. Shpikeni një Rugovë tjetër!

Nëse nuk ofroni shanse, shuarjen e keni të paevitueshme. Vetëm se ndoshta të lehtë dhe padhimbje. Lexoni sondazhet.

Është një thënie se vetëm të vdekurit shohin fundin e luftës. Nga ajo që shohim, besoj se vetëm Rugova ishte ai që ka parë fundin e Lidhjes Demokratike të Kosovës dhe gjithë partive që do të thërriten në emrin e tij.