Kryeministri Berisha, leksion në Oxford Union

[Shijaksi-London]

Kryeministri Berisha, leksion në Oxford Union

Nga Londra
Muhamed Veliu

Kryeministri Sali Berisha udhëton për në Angli, ku do të mbajë një referat në Oxford Union te Marten 16 Tetor 2007 ora 19:00. Mësohet se tema e referatit do të jetë rreth zhvillimeve në të shkuarën dhe të sotmen eKosovës.
Oxford Union është një nga institucionet më prestigjioze në botë për zhvillimin e debateve, duke ftuar personalitetet ndërkombëtare për të referuar. Kryeministri Berisha bëhet i treti personalitet shqiptar që do të referojë atje. Fillimisht ka qenë Nënë Tereza dhe dy vjet më parë ish-presidenti Moisiu, ata të cilët kanë referuar në këtë Unionme famë botërore.
Ish-presidenti Moisiu referoi rrethtemës ""Toleranca ndërfetare në traditën e popullit shqiptar". Oxford Union është themeluar përpara 182 vitesh, për të promovuar debatin dhe bashkëbisedimin jo vetëm në Universitetin e Oksfordit, por edhenë të gjithë globin. Themelimi i Oxford Union daton nëvitin 1823 si një forum debatesh dhe bashkëbisedimi për atë kohë kur shkëmbimi i ideve ishte një nocion i huaj për autoritetete universitetit.
Disa nga personalitet më të rëndësishme që kanë referuar në këtë union kanë qenë, Malcolm X në vitin 1960. Ish-presidenti amerikan, Richard Nixon, në vitin 1970 të parin fjalim të tijin pas skandalit Watergate, e mbajti në këtë union, kupranoi gabimin, duke i thënë audiencës: "Unë pagova çmimin".
Në vitin1980 ishte Gerry Adams i cili atë kohë i ishte ndaluar dalja në televizion. Ai mbajti një fjalim për çështjet e Irlandës. Gjatë viteve të mëvonshme në sallën e debateve janë ngjitur personalitetetmë të shquara jo vetëm të politikës, por edhe nga fusha të tjera tëj etës. Disa kohë më parë, Dalai Lama u ndoq nga një numër rekord pjesëmarrësish në debatin e tij për budizmin.

[Duaje Siveten]

Po fatos nano do te shkonje ne oksford union, apo jo, se ai ka bere goxha lufte per kosoven; syte e mendja e tere botes akademike, politike, sociologjike, arkeologjike, ik e ike, do te jene atje ne ate leksion.

e mira eshte te mos e lere saliun vetem.

me se do te shkojne atje, me queen elisabeth apo me ndonje çarter?

harxhet kush do ti paguajne, leksion-dhenesi apo leksion-ftuesi?

po ata qe e kane projektuar, iniciuar, e realizuar mevetesine e kosoves - a do te jene valle atje?

mos ti ndodhe saliut si atje ne botson nja dhjete vjet te shkuara, qe seç i kurdisne ata greko-amerikanet ...

Mësohet se tema e referatit do të jetë rreth zhvillimeve në të shkuarën dhe të sotmen eKosovës.

po orakulli per ardhmerine e kosoves, kur do te mbanje leksion, dhe ku?

[Albo]

Fjala e Kryeministrit Berisha në Universitetin e Oksfordit


Zoti President,



Ndjehem shumë i nderuar që ndodhem sot këtu, i ftuar në Oksford Union, jo vetëm se në këtë tribunë kanë folur personalitete botërore, disa prej të cilëve i kam njohur dhe të tjerë admiruar, ndër ta edhe gruaja më e shquar e shekullit që kaloi, bashkëkombësja ime, Nënë Tereza, por në veçanti se unë flas këtu në një tribunë që pothuaj për rreth dy shekuj është njohur dhe bëri e famshme si tribunë e fjalës së lirë.



Prandaj dhe dua t’ju falënderoj me përzemërsi zoti President, për rastin e madh që më keni krijuar të flas dhe debatoj sonte për Shqipërinë dhe shqiptarët, të paraqes këtu projektet e tyre të këtij shekulli.



Shqipëria është një vend i vogël në Europën Juglindore që, pas rënies së perdes së hekurt, po ndërton demokracinë e bazuar në treg. Në hartën e gadishullit të Ballkanit ajo përbën bririn më perëndimor të tij. Nga veriu, lindja, jugu kufizohet përkatësisht nga Mali i Zi, Kosova, Maqedonia e Greqia. Kurse në perëndim, brigjet e saj, prej rreth 400 km, lagen në 2/3 nga Deti Adriatik dhe në 1/3 jugore nga Deti Jon. Bregu i saj ka plazhe të mrekullueshëm që po tërheqin gjithnjë e më shumë turistë. Vetëm dy vitet e fundit numri i turistëve është rritur me shpejtësi. Në tërësi Shqipëria është një vend malor me lartësinë mesatare më të madhe në Europë, rreth 640 metra, me peizazhe mahnitëse, për të cilat e kanë quajtur kopshti shkëmbor i Europës Juglindore. Peizazhet e saj magjepsëse bënë që Eduart Lear të vizitojë Shqipërinë 6 herë nga 1848-1864. Në Britaninë e Madhe, prej shekujsh janë shkruar nga historianë, shkrimtarë, poetë, piktorë, analistë, librat dhe studimet në tërësi më të mira, më të ndershme për të vërtetat e lidhura me shqiptarët. Ndër anglezët e mëdhenj që e kanë vizituar Shqipërinë nga kohëra të kaluara gjer në ditët e sotme do të përmendja Lordin Bajron që i ka kushtuar asaj strofat më të bukura të poemës së Child Harold, Eduart Lear që i ka kushtuar një libër të çmuar dhe mbi 200 punime, piktura, skica, litografi, ndër më të mirat e krijimtarisë së tij, Edith Durham që shkroi librat ndër më të mirët për shqiptarët. Por unë, në morinë e autorëve të shumë e botimeve, do të përmend gjithashtu edhe Profesor Noel Malcolm që me librin e tij, të shkruar pak vite më parë, për Kosovën, ndriçoi me vërtetësi historinë, realitetin e atij vendi nga lashtësia në ditët e sotme. Vitet e fundit Shqipërinë e kanë vizituar Kryeministri Tony Blair dhe shumë ministra dhe zyrtarë të lartë të Britanisë së Madhe. Sot, me British Airways, në më pak se tre orë fluturim, secili nga ju mund të gjendet në Tiranë. Ju ftoj të gjeni kohë të vizitoni vendin tim. Do të jeni shumë të mirëpritur. Shqipëria ka nevojë për miq si ju.



Vendi në historinë e tij tejet të gjatë ka njohur dyndje të shumta që nga dorët, grekët, romakët, barbarët, sllavët, spanjollët, frankët, otomanët dhe ka qenë pjesë e mbretërive dhe e perandorive të mëdha të kohës. Historianët në tërësi besojnë se Ilirët janë paraardhësit tanë dhe se shqiptarët nuk kanë ndryshuar kurrë shtëpitë e tyre, ata janë aty që nga fillimi. Edhe studime të shkencave të tjera kanë faktuar identitetin e tyre qartësisht të veçantë nga të gjitha kombet e tjera të rajonit dhe kontinentit. Në tërësi popullata ka qenë e përqendruar në zona të thella dhe male, por një pjesë edhe në qytete, që janë ndër më të lashtat e Europës.



Gjuha shqipe që flasim, shumë e pasur dhe e bukur, i përket familjes indo-europiane, vjen direkt nga trungu i kësaj familjeje dhe shkruhet në alphabet latin. Shqiptarët janë komb me vokacion perëndimor, me letërsi, art, kulturë në tërësi perëndimore. Shkrimtari ynë i njohur Ismail Kadare, për të stigmatizuar disfatën që pësuan nga fundi i shekullit të 13-të ushtritë e koalicionit të gjashtë vendeve të Ballkanit, në betejën me ushtritë otomane në Fushë-Kosovë shkruan se: “vendi fjeti Europë dhe u zgjua Azi”. Mirëpo, megjithëse rreth pesë shekuj ndën perandorinë otomane, pra, gjumi aziatik, sërish shqiptarët u zgjuan Europianë. Rilindja shqiptare ishte e vonuar, por punoi dhe krijoi ndën moton se: për shqiptarët dielli lind nga perëndimi.



Shqiptarët, ndonëse njihen si një ndër themeluesit e krishterimit, sot ata janë një komb plurireligjioz, myslimanë, ortodoks, katolik. Kjo sepse linja e demarkacionit mes të dy kishave të mëdha, asaj romake dhe asaj bizantine, apo linja e Teodosit, kaloi në gjatësinë e territorit tone dhe më vonë sundimi otoman imponoi një konvertim të rëndësishëm të popullatës në myslimanë. Megjithëkëtë, megjithëse jetojnë në një kontinent, në të cilin jo pak kombe gjatë gjithë historisë së tyre dhe sidomos asaj moderne, përjetuan luftëra dhe konflikte të egra fetare, kombi im, në tërë historinë e tij shekullore, nuk ka të regjistruar as edhe një rast të vetëm konflikti ndërfetar. Toleranca fetare e shkëlqyer është një nga virtytet më të arrira, vlerat shpirtërore më të çmuara të tij. Kjo tolerancë është e njëjtë dhe në marrëdhëniet ndëretnike. Mbi 90 për qind e popullatës është me origjinë shqiptare, pjesa tjetër janë pakicë me origjinë greke, arumune, romë, sllavë. Kam shumë kënaqësi t’ju informoj se raporte serioze ndërkombëtare faktojnë se Shqipëria ka përmbushur standardet e OSBE-së për arsimimin e pakicave.



Shqipëria është nga vendet më të pakta në botë, në të cilin numri i hebrenjve gjatë Luftës së Dytë Botërore, ishte shumë më i madh në fund, se sa në fillim të saj. Asnjë hebre nuk u dorëzua tek nazistët.





Zonja dhe zotërinj



Historia e kombit tim nuk është një histori e sheshtë, përkundrazi është e shoqëruar nga vështirësi, madje edhe drama të vështira.



Nga viti 1389 gjer në vitin 1480, territoret e banuara nga shqiptarët, u pushtuan njëra pas tjetrës nga Perandoria Otomane dhe u ndanë në katër vilajete të kësaj Perandorie. Vitet 1870 gjer në vitet 1928, janë vitet e përpjekjeve të mëdha të shqiptarëve për të formuar shtetin e tyre në territoret ku ata ishin vilajete. Kjo pikëpamje u mbështet edhe nga disa fuqi të mëdha të kohës. Por, fuqi të tjera më të fuqishme, në një nga padrejtësitë më të mëdha historike, në disa konferenca ndërkombëtare, duke filluar nga Kongresi i Berlinit, më pas Konferencat e Londrës dhe e Versajës, vendosën dhe realizuan me forcën e tyre copëtimin e territoreve shqiptare në pesë shtete të rajonit, ndonëse këto territore në asnjë rast nuk ishin enklavë, por vazhdimësi etnike dhe gjeografike. Në vitin 1912, pas një seri kryengritjesh të mëdha që u zhvilluan në Kosovë, u shpall pavarësia e Shqipërisë. Por, sërish vazhduan përpjekjet dhe projektet për një copëtim tjetër të ri të Shqipërisë, mirëpo kjo u kundërshtua nga Presidenti Willson, i cili refuzoi të firmosë këto marrëveshje. Në vitin ‘22, të shekullit që kaloi, Shqipëria do të ishte vendi i vetëm në Ballkan që zhvilloi zgjedhje parlamentare dhe vendosi një parlament pluralist dhe regjim republikan. Në vitin ’27 vendi do të shpallej mbretëri.



Më 7 Prill të vitit 1939, Shqipëria do të ishte vendi i parë në Europë që do të pushtohej dhe do të mbetej e tillë gjer në tetor të vitit ‘44. Shqiptarët, gjatë Luftës së Dytë Botërore, bënë një luftë të vendosur për çlirimin e tyre. Ata patën në këtë luftë një ndihmë të madhe me armë, mjete financiare, ekspertë ushtarakë nga qeveria e Madhëri së Saj. Rreth 160 ushtarë, aviatorë, oficerë madhorë të ushtrisë britanike ranë në luftë në territoret shqiptare, për lirinë e kombit tim. Ne do t’i nderojmë ata gjithmonë.



Vendi u çlirua më 28 nëntor të vitit ’44. Por, historia do të dëshmohej sërish njerkë e pamëshirë ndaj nesh. Pas përfundimit të Luftës së Dytë Botërore, gjer në vitin 1990, në Shqipëri u vendos diktatura më e egër komuniste, e cila e shkëputi tërësisht vendin nga bota e lirë, e bunkerizoi në të gjitha aspektet, ngriti gulagë, më shumë dhe më të rreptat, se në çdo vend tjetër, ekzekutoi pa gjyqe apo me farsë politike gjyqësore mijëra qytetarë, pothuaj të gjithë intelektualët e shkolluar në perëndim, ndaloi pronën private dhe e renditi atë në 3-4 vendet më të varfra të planetit, ngriti një propagandë kaprolalike monstruoze, kundër botës së lirë. E tillë erdhi Shqipëria në vitet ’90. Të shumtë ishin ata, në Europë dhe botë, që mendonin që ky vend të mbetej si muzeumi i socializmit, si një lloj Kube e Adriatikut.



Por këtë nuk e mendonin intelektualët shqiptarë, të cilët, pas rënies së Perdes së Hekurt, shfrytëzuan çdo mundësi për të kërkuara liritë e munguara. Këtë nuk e mendonin studentët dhe pedagogët e Universitetit të Tiranës, të cilët, në dhjetor të vitit ’90, mbushën rrugët dhe sheshet e kampusit të tyre dhe Tiranës, ndën moton “Liri-Demokraci”, “E duam Shqipërinë si Europa”. Ata menjëherë themeluan partinë e parë opozitare shqiptare, Partinë Demokratike të Shqipërisë, e cila në zgjedhjet e përgjithshme të 22 marsit të vitit 1992 do të shënonte njërën prej fitoreve më të thella në vendet ish-komuniste. Qeveria demokratike, e dalë nga këto zgjedhje, ndërmori reforma të thella të gjithanshme, politike, institucionale, liberalizoi ekonominë, aplikoi terapinë e shock-ut dhe privatizimin e shpejtë të tokës, banesave, ndërmarrjeve shtetërore, nxori vendin nga izolimi dhe e hapi atë drejt vendeve mike, Bashkimit Europian, NATO-s dhe institucioneve të tjera ndërkombëtare.



Në të gjitha këto përpjekje, opozita shqiptare dhe më pas, qeveria demokratike, pati ndihmën e madhe dhe të çmuar të qeverisë së Madhërisë Saj, forcave politike, institucioneve të Britanisë së Madhe. Unë, si kryetar i opozitës, kam hapur fushatën elektorale që solli fitoren e forcave të opozitës, me Sir Joefry, dhe po si kryetar i opozitës jam pritur nga kryeministri Major dhe kam patur një takim tejet mbresëlënës me Lady Thacher, nga e cila u largova e bindur se, në rast se ajo nuk do të kishte dhënë dorëheqjen, Sllobodan Milosheviçi do të kishte marrë përgjigjen e merituar shumë më herët dhe se Ballkani i viteve ’90 do të ishte një histori tjetër. Po në atë kohë jam takuar me Presidentin aktual të Universitetit tuaj, Lord Patten, për të cilin ruaj një respekt dhe miqësi të veçantë. Më pas, si President i Republikës, kam vizituar dy here vendin tuaj të madh, jam pritur nga Mbretëresha Elisabeth, Kryeministri Major dhe zyrtarë të tjerë më të lartë të këtij vendi.



Gjej një rast për të shprehur një mirënjohje shumë të thellë autoriteteve, institucioneve dhe taksapaguesve të Britanisë së Madhe, për të gjithë ndihmën e tyre tejet të çmuar që i kanë dhënë dhe i japin Shqipërisë.



Zonja dhe zotërinj,



Në këto 15 vite të pluralizmit politik, ndërtimit të lirisë dhe vlerave të saj, Shqipëria ka njohur vështirësi serioze, por, në rast se kemi parasysh nivelin, gjendjen nga nisi, dua t’ju siguroj se ajo ka ndryshuar më shumë se çdo vend tjetër. Kështu, nga vendi i monizmit më ekstrem, izolimit më të thellë, militarizimit të plotë, lirive dhe të drejtave njerëzore të ndaluara me Kushtetutë, ateizmit të imponuar, hiperkolektivizmit ekstrem, varfërisë dhe mjerimit të madh, është sot vendi i pluralizmit politik të konsoliduar, i demokracisë së re por që funksionon, i shtetit ligjor, i respektimit të lirive dhe të drejtave njerëzore dhe minoriteteve, i mediave të lira, vendi i pluralitetit religjioz dhe tolerancës së shkëlqyer fetare dhe etnike, vendi i ekonomisë së lirë të tregut, në të cilin 90 për qind e prodhimit bruto të brendshëm vjen nga sektori privat dhe ku të ardhurat për frymë nga 200 dollarë, që ishin në vitin ’92, janë sot mbi 4000 dollarë. Shqipëria është sot anëtare e KE-së, partnere e NATO-s, ka firmosur marrëveshjen e Stabilizim Asociimit me BE-në. Në Samitin e Rigës është deklaruar si një vend që, në Samitin e Bukureshtit, mund të marrë ftesën për anëtarësim të plotë në NATO.



Qeveria që unë kryesoj ka përcaktuar si objektiv më madhor konsolidimin e shtetit ligjor, luftën me tolerancë zero kundër krimit dhe korrupsionit, që kanë dëmtuar rëndë qytetarët shqiptarë në vend dhe imazhin e Shqipërisë në botë, shndërrimin e Shqipërisë në vendin më tërheqës të investimeve të huaja, vendi me ngarkesën fiskale më të ulët në Europë, reformën e thellë të sistemit arsimor, sjellja e vendit në moshën dixhitale, reformën e pronësisë.



Në një luftë me zero tolerancë ndaj krimit të organizuar, agjencitë e zbatimit të ligjit, në rreth dy vjet, kanë çmontuar rreth 204 grupe dhe organizata kriminale dhe vendosur para ligjit 850 anëtarë dhe bosë të tyre, kudo që janë ndodhur në Shqipëri apo vende të tjera. Parlamenti në këtë kuadër miratoi një moratorium për ndalimin e skafeve të shpejta në ujërat tona, mbasi ato përdoreshin për trafiqe. Shqipëria, sot është një nga vendet më të qeta dhe më të sigurta në Europë. Nga viti 2005 në vitin 2007 numri i turistëve është rritur me 70 për qind dhe nuk është regjistruar as edhe një incident i vetëm ndaj tyre.



Për një luftë me zero tolerancë ndaj korrupsionit, ne kemi ndërmarrë: zvogëlimin e qeverisjes qendrore me 25 për qind të portofoleve dhe 30 për qind të punonjësve, kemi nxjerrë administratën jashtë konfliktit të interesit, kemi vendosur kritere, të cilat nuk lejojnë të përdoren paratë publike për qëllime private dhe personale, parlamenti ka miratuar një ligj për mbrojtjen e denoncuesve të korrupsionit njëlloj si ato të krimeve të rënda dhe shpërblimin me 6 për qind të vlerës që vjen nga denoncimi i tyre, janë privatizuar një seri procedurash dhe decentralizuar të tjera. Rezultatet e kësaj lufte kanë bërë të mundur shkurtimin e shpenzimeve operative të administratës qendrore me 40 për qind, uljen e kostos së prokurimeve publike me 23 për qind. Megjithë uljen drastike të taksave nëpërmjet luftës kundër kontrabandës, evazionit dhe informalitetit, qeveria ka dërguar dy vjet me radhë në muajin qershor, një buxhet të dytë në parlament me vlerë rreth 24 për qind të buxhetit vjetor. Të ardhurat buxhetore janë rritur nga 22 për qind e GDP-së në vitin 2005 në 27 për qind të GDP-së në vitin 2007. Përveç këtyre, dhjetëra zyrtarë të të gjitha rangjeve, janë dërguar para ligjit.



Për përmirësimin e klimës së biznesit dhe shndërrimin e Shqipërisë në vendin më tërheqës për investimet e huaja, kemi ulur barrën dhe pengesat burokratike për biznesin, kemi shkurtuar kohën e regjistrimit nga 42 ditë në një ditë, pas inaugurimit të "One Stop Shop"; kemi liberalizuar licencat dhe lejet, si dhe pothuajse përgjysmuar ato; së shpejti do të nisë puna për vendosjen e "One Stop Shop" për lejet dhe licencat. Dje, ne kemi inauguruar taksën online; është miratuar ligji i ri për partneritetin publik privat si dhe prokurimet publike; po aplikohet gjithnjë e më shumë iniciativa “Shqipëria një Euro”, në të cilën investitorët mund të përfitojnë me një Euro objekte apo edhe tokën për investime industriale, bujqësore, turistike dhe të gëzojnë një seri shërbimesh me një Euro.



Në këto dy vjet ne kemi ndërmarrë një revolucion të vërtetë fiskal: kemi vendosur taksën e sheshtë me 10 për qind, ulur taksën e korporatave dhe atë të ardhurave personale përkatësisht nga 25 dhe 23 në 10 për qind, taksën e biznesit të vogël me 50 për qind, kontributin e sigurimeve shoqërore me 31për qind, çmimin e energjisë për biznesin me 33 për qind. Më 1 janar të vitit 2008, Shqipëria është vendi me barrën fiskale më të ulët në Europë. Rezultatet dëshmojnë se ekonomia shqiptare është në një shkëputje të vërtetë, rritja ekonomike ishte 6 për qind vitin që shkoi, pritet më e lartë këtë vit; inflacioni është 2-4 për qind, deficiti buxhetor 2.6 për qind; krediti bankar për ekonominë është rritur tre herë krahasuar me vitin 2005; eksportet këtë vit janë 28 për qind më të mëdha se vitin që kaloi; investimet e huaja në vitin 2006 ishin tre herë më të larta se në mesataren e 10 viteve që shkuan; indeksi i shitjeve është rritur me 22 për qind; depozitat bankare janë rritur me 25 për qind. Shqipëria ka ardhur në fokusin e kompanive të mëdha europiane dhe botërore, të cilat me projektet e tyre në fushën e energjisë, turizmit, manifakturës, minierave, çimentos, bankave dhe sigurimeve shoqërore, kanë nisur dhe do të nisin në muajt që vijnë investime me shumë miliardë Euro.



Po punojmë për krijimin e zonave të lira dhe parqeve industriale.



Në përpjekjen tonë për të sjellë Shqipërinë në moshën dixhitale, ne kemi nënshkruar një marrëveshje me Microsoft, që do të hapë një qendër inovative në Tiranë, si dhe dy akademi. Me UNDP-në përfundojmë projektin pilot të e-shkolla, kemi përfunduar e-dogana, e-taksa, e-prokurime, e-regjistër biznesi dhe nga mesi i vitit 2008 përfundon e- regjistri civil dhe do të përfundojë me e-government.



Në dy vjet kemi liberalizuar plotësisht universitetet tona. Numri i studentëve është rritur nga 50.000 në 100.000 dhe kemi katërfishuar investimet për arsimin e lartë dhe jemi duke dyfishuar buxhetin për arsimin.



Zonja dhe zotërinj,



Këto reforma, që unë përmenda më sipër si dhe ato të ndërmarra në institucione dhe fusha të tjera, bënë të mundur shpejtimin e procesit të integrimit të vendit. Për Shqipërinë dhe shqiptarët, anëtarësimi i vendit të tyre në BE dhe NATO janë projektet më madhore, ndaj dhe jemi të vendosur të ndërmarrim dhe zbatojmë të gjitha reformat e domosdoshme për të merituar këto anëtarësime.



Zonja dhe zotërinj,



Në këto 15 vite, gadishulli i Ballkanit u shndërrua në një teatër tragjedish, luftërash, barbarisht të vërteta çnjerëzore. Shkaku themelor i tyre qëndron në ultranacionalizmin, obsesionin e një kombi që ndjehej hegjemon ndaj komeve të tjera dhe mbizotërohej nga ideja e shtetmadhësisë së tij.



Sot, Ballkani është rajon paqeje dhe integrimi rajonal në Europë. Në të gjitha zhvillimet, luftërat dhe konfliktet, Shqipëria mbështet fuqishëm përpjekjet e NATO-s dhe komunitetit ndërkombëtar për paqe dhe stabilitet në rajonin tonë dhe më gjerë.



Në këtë kuadër, njësitë ushtarake të Shqipërisë janë të shpalosura në misionin paqeruajtës të NATO-s në Bosnjë, Afganistan dhe në kuadrin e luftës kundër terrorizmit ndërkombëtar në Irak.



Por sot, zgjidhja e statusit të Kosovës përbën njëkohësisht kusht vendimtar për paqen dhe stabilitetin jo vetëm në Kosovë, por edhe në rajon dhe më gjerë.



Qeveria shqiptare ka mbështetur dhe mbështet projektin e Presidentit Ahtisaari si projektin më të mirë për zgjidhjen e statusit të Kosovës. Ky projekt vendos nga njëra anë standardet më të gjëra për liritë dhe të drejtat e minoriteteve, standarde që nuk ekzistojnë në ndonjë vend tjetër dhe, nga ana tjetër, respekton vullnetin e shumicës për pavarësi.



Ne mbështesim përpjekjet aktuale të Trojkës, por mendojmë se zgjatja e mëtejshme e zgjidhjes së statusit të Kosovës kërcënon seriozisht stabilitetin e rajonit. Zgjidhja e statusit të Kosovës duhet të ndihmojë serbët të shkëputen nga e shkuara e luftërave dhe barbarive, genocideve që provoi në rajon diktatura e Miloshevicit dhe i orienton ata drejt së ardhmes.



Ne përshëndesim dokumentin e paraqitur nga autoritetet e Kosovës për bashkëpunim, pajtim dhe miqësi midis serbëve dhe kosovarëve dhe besojmë se shqiptarët dhe serbët duhet të angazhohen për një kapitull të ri në marrëdhëniet ndërmjet tyre.


16/10/2007

[Albo]

Intervistë e Kryeministrit Berisha dhënë për BBC-në


BBC: Zoti Kryeministër, faleminderit që pranuat ftesën e BBC-së. Desha ta filloj bisedën me ju, me një arritje që duket e rëndësishme për politikën e jashtme shqiptare, por edhe për Shqipërinë, ratifikimi i marrëveshjes së Asociimit me BE-në që i bëri parlamenti britanik. Kjo tregon që kjo marrëveshje po shkon pozitivisht përpara?.

Kryeministri Berisha: Po, unë e konsideroj këtë një mbështetje shumë të rëndësishme që qeveria e Madhërisë së saj dhe Parlamenti britanik i kanë dhënë dhe i japin Shqipërisë, një vlerësim të madh të tyre për të gjithë kursin e reformave dhe zbatimin e reformave por edhe seriozisht, me seriozitet të madh këto dy vjet.

Kam shumë kënaqësi se po dje, Parlamenti italian votoi marrëveshjen e Stabilizim Asociimit. Pra ishte ky një lajm shumë i gëzuar. Në Komisionin Evropian, i cili bën vlerësimin e zbatimit të marrëveshjes interim, që është faktikisht teksti i kësaj marrëveshjeje, po që ecet paralelisht me të, ka një vlerësim realisht pozitiv mbi përpjekjet tona. Sikundër, shpreh një kënaqësi tjetër të veçantë, sepse zbatimi i marrëveshjes nuk ka patur pasoja negative ose asnjë impakt negativ në Shqipëri. Çka do të thotë liberalizimi i doganave dhe hapja e doganave, ulja e doganave dhe heqja e tyre për vendet e Bashkimit Evropian jo vetëm që s'është shoqëruar me një rënie të eksporteve, përkundrazi këtë viti eksportet janë rritur 28 për qind, krahasuar me vitin që kaloi.

Pra, efekt tjetër i saj i madh ka qenë liberalizimi i vizave. Shqipërisë i është dhënë, për shkak të marrëveshjeve që Shqipëria ka pranuar të nënshkruajë për ri-atdhesimin dhe aspekte të tjera, i është dhënë spektri më i gjerë i liberalizimit të vizave në këtë fazë dhe i është akorduar mundësia e fillimit të bisedimeve në 1 janar për liberalizimin e plotë të vizave. Pra, në këtë mënyrë, bëhet gjithnjë më i prekshëm procesi i integrimit të qytetarëve shqiptarë në Evropë, proces të cilin ata e kanë mbështetur më shumë se të gjithë qytetarët e vendeve të tjera.

BBC: Duket se Britania është një mbështetëse e fuqishme e Shqipërisë për futjen në Bashkimin Evropian, por edhe në NATO. Si qëndron çështja e NATO-s, a do ta marrim ne ftesën më në fund?

Kryeministri Berisha: Unë u largova nga takimi me sekretarin e Çështjeve të Jashmte të Britanisë së Madhe, zoti Miliband, me një optimizëm real. Sinteza e asaj çka Ministri i Jashtëm i Britanisë së Madhe më siguroi mua ishte se qeveria e tij është e vendosur të mbështesë Shqipërinë në përpjekjet e saj për anëtarësim në NATO dhe reformat të cilat janë shumë të rëndësishme në këtë proces. Britania e Madhe është e vendosur të na mbështesë edhe në realizimin e këtyre reformave me të gjithë potencialin e saj. Kështu që pashë një vullnet të qartë tek Sekretari i Shtetit Miliband dhe qeveria e tij për të mbështetur projektin e Shqipërisë për anëtarësim në NATO, për të pasur ftesën në samitin e Bukureshtit.

Ministri përdori një shprehje shumë, do të thoja, shumë kuptimplotë në Bukuresht, "shumë aeroplanë do të tentojnë të zbresin, nuk e kanë shumë të thjeshtë por do kujdes që të zbresin si duhet dhe të arrijnë qëllimin." Në këtë kontekst, unë e sigurova ministrin se qeveria mbetet thellësisht e përkushtuar në të gjitha reformat. Dhe jemi një qeveri e orientuar drejt rezultateve konkrete. Kështu që ky kilometri i fundit, le ta quajmë kështu, kilometri i fundit që kemi për të arritur tek ftesa, e cila pati edhe një mbështejte të gjerë në Reikjavik, të mund të përmbushet sa më shpejt dhe sa më mirë.

BBC: Duket se mbështetja ndërkombëtare është e fuqishme. Por, a po i bëjmë ne, siç mund ta quaj, detyrat e shtëpisë?. Ka shumë retorikë në Shqipëri midis forcave politike dhe duket se reformat që duhet të ndërmerren për të ecur përpara po mbulohen, po zbehen nga retorika politike për çështje të ndryshme. Për shembull, kohët e fundit çështja e Prokurorit të Përgjithshëm duket se po pengon reformat në drejtësi.

Kryeministri Berisha: Unë besoj se klima politike në Shqipëri është një klimë e favorshme. Në të gjitha rrethanat, ujdia midis qeverisë dhe opozitës duhet të jetë në disa çështje themelore dhe jo në çdo çështje dhe ne do të mësohemi me këtë dhe kjo është merita e pluralizimit. Mendoj se zgjidhja e këtij problemi që ju thatë ështe një kusht i domosdoshëm që Shqipëria të konsolidojë në mënyrë përfundimtare luftën kundër krimit të organizuar dhe korrupsionit dhe kjo është një çështje tashmë shumë evidente.

BBC: Por opozita nuk është në një mëndje me ju në këtë pikë. Dhe kjo e pengon ecjen përpara, apo jo?

Kryeministri Berisha: Unë mendoj se opozita, natyrisht, ka qëndrimet e saj. Por në mënyrat më të përsëritura ka shprehur se ky njeri duhet të iki. E keni në disa deklarata të tyre. Tani, modalitetet janë diçka tjetër, por vetë opozita e ka shprehur diçka të tillë. Natyrisht mban një qëndrim të ndryshëm në mënyrat, por nuk di ndonjë forcë politike që të ketë kërkuar që ai të qëndrojë më tutje.

BBC: Ashtu është, por forcat politike nuk po bëjnë përpjekjet e duhura, apo të mjaftueshme, për të arritur pikat e përbashkëta për të bërë këto reforma, por në vend të kësaj, merren me polemikat për prokurorin, apo për imunitetin, apo afera të tjera.


Kryeministri Berisha: Polemikat midis forcave politike janë një diçka normale, por historia ka faktuar se forcat politike në Shqipëria kanë arritur të gjejnë gjuhën e përbashkët në të gjitha rastet kur ka patur probleme madhore për vendin. Unë jam dëshmitar i kësaj. Tjetër problem janë media dhe interpretimet mediatike të forcave politike dhe është normale që të shprehin rezervat e tyre ndaj forcave politike.

Por tjetër problem është pastaj që forcat politike kanë arritur të zgjidhin problemet e mëdha të vendit. Le të marrim pak zgjedhjet e 2005-s. Ato prodhuan rotacion paqësor të pushtetit. Çfarëdo që unë kam supozuar për qeverinë, qeveria dorëzoi pushtetin në mënyrë paqësore. Le të marrim zgjedhjet e 18 shkurtit. Unë nuk mund të them se s'kishin defekte, por janë zgjedhjet e para në të cilat eksponentë kryesorë të opozitës u shprehën se ishin të lira dhe se u pranuan nga të gjitha forcat politike.

Le të vijmë tek presidenti. Presidentin nuk mund ta zgjidhte një maxhorancë që nuk kishte 84 vota. Në zgjedhjen e presidentit, në mënyrën që u interesonte atyre, dhanë kontribut të gjitha forcat politike kryesore të opozitës, dhe fakti që ata u bënë të nesërmen njerëzit që uruan presidentin, ata uruan kontributin e tyre. Kështu që, unë i shoh me optimizëm, të jem fare i hapur, e shoh me shumë vlerësim rolin e opozitës, e shoh me optimizëmn të gjithë kursin në tërësi të zhvillimit. Shqipëria zgjodhi këtë radhë një president në mënyrën më identike siç e zgjedh Republika Italiane.

Të themi atë që është. Zgjodhëm një president, politikan me profil, sepse posti i presidentit është posti i parë i vendit dhe duhet të ketë profilin e përshtatshëm për të mbuluar atë vend. Zgjodhi një president me parlament, çka është një detyrim kushtetues. Zgjodhi një president me kontributin, në faza të ndryshme, të çdo force politike. Kështu që unë mendoj se ai ishte një proces realisht shumë i rëndësishëm për vendin. Dhe pse ishte? Ishte shkalla e përgjegjësisë, sepse secila forcë politike ndjente përgjegjësinë që të mos çojë vendin në zgjedhje.

BBC: Megjithatë unë dua të insistoj tek çështja e korrupsionit dhe tek çështja e prokurorit të përgjithshëm, sepse duket se kjo po krijon një lloj krize tjetër politike. Duket se ju keni një konflikt me prokurorinë. Ndërkohë që ju kërkoni nga prokuroria që të mbështesë nismën tuaj për korrupsionin, nga ana tjetër, kur prokuroria ndërmerr hapa ndaj pjesëtarëve të qeverisisë suaj kohët e fundit ju e keni quajtur prokurorinë se është e motivuar politikisht. A nuk e pengon kjo punën e prokurorisë?

Kryeministri Berisha: Absolutisht jo. Së pari, e rëndësishme është se unë u kam faktuar shqiptarëve dhe botës se unë bëj një luftë jo partiake kundër korrupsionit. Në qoftë se shihni ata që janë vendosur para ligjit për korrupsion, 98-99 përqind i përkasin partisë sime. Por nuk ka njeri që mund ta mohojë se ka pasur korrupsion të shkallës më të lartë në administratën që kaloi dhe qeverinë që kaloi.

BBC: Megjithatë nuk shohim ndonjë çështje që të jetë hapur ndaj zyrtarëve të ish-qeverive?

Kryeministri Berisha: Sepse pikërisht ai prokuror bën politikë. Kjo është e vërteta, kjo është fatkeqësia e tij. Ai kryeprokuror ka qenë këshilltari im. Unë dua një prokurori të paanshme, një prokurori të lirë, të pakapur nga krimi. Asgjë tjetër, dua një prokurori të pa kapur nga krimi. Unë jam optimist. Dikur, dy vjet më parë, në mënyrë të përsëritur gazetarët më shtronin pytjen "si do ta luftosh ti krimin" dhe unë u thosha; me këta policë do ta luftoj krimin, sepse ka prej tyre burra dhe gra të vendosur për t'i bërë shërbimet më të mira vendit të tyre. Dhe është faktuar besoj në këto dy vjet më mirë se çdo gjë tjetër.

Ka në radhët e prokurorëve dhe të gjyqtarëve juristë të shkëlqyer, të aftë, të zotë, që absolutisht do t'i japin Shqipërisë një drejtësi dhe një sistem akuze nga më të mirët në rajon. Ky është i gjithë besimi im. Unë jam njeri që besoj, ky është një nga parimet e mia themelore, u besoj kapaciteteve njerëzore, u besoj zyrtarëve dhe nuk e kam të gabuar këtë praktikë. I besoj prokurorisë, i besoj sistemit gjyqësor, reformat janë jetike. Pse policia arriti këto rezultate, sepse iu nënshtrua reformave. Reformat janë të domosdoshme për çdo vend. Kudo. Unë isha këtu në parlamentin (britanik) dhe e njëjta gjë kudo, reformat janë një forcë udhëheqëse e zhvillimit të vendit.

BBC: Energjia ka qenë gjithmonë një problem dhe kur ju keni ardhur në pushtet keni premtuar zgjidhjen e kësaj çështjeje. Ndërkohë kanë kaluar dy vjet nga qeveria juaj e asgjë nuk është bërë, njerëzit janë pa drita. Si do t'i përgjigjeshit publikut?

Kryeministri Berisha: Jo. Unë mendoj se këto dy vjet nuk janë ashtu siç i paraqisni. Pse? Së pari këto kanë qenë vitet më të thata në historinë e Shqipërisë. Jemi dakord me këtë? Nuk ka thatësirë të regjistruar si kjo në analet e vendit, absolutisht, në 60 vitet e fundit, aq sa ka regjistër. Kjo është njëra anë. Çfarë kemi bërë ne? Ne kemi vendosur që të mos ndërpresim energjinë për shkak të importit, pra ne importojmë me gjithë kapacitetin që mund të importojmë.

Në dallim me konceptin e mëparshëm ne kemi fiksuar konceptin se çmimi më i lartë i energjisë është mungesa e saj. Së dyti, pas 40 ose 50 vjetësh, ne marrim vendimin përfundimtar që të balancojmë prodhimin energjetik të vendit. Se është shumë lehtë të rrish në mëshirë të shirave. Jo, ne nuk rrimë më në mëshirë të shirave. Ne po ndërtojmë në Vlorë një kapacitet prej 100 MGË. Ne jemi në tratativa për të finalizuar shumë shpejt ndërtime që mund të arrijnë shumë shpejt në 340 MGË të tjera. Natyrisht nuk është pa kosto kjo që bëjmë ne, por prapë jemi të mendimit, se kostoja më e lartë është mungesa e saj. Së treti, ne ia kemi dalë që të mos ketë ndërprerje për turizmin, të mos ketë ndërprerje për biznesin. Unë kam kënaqësinë të informoj publikun nëpërmjet valëve tuaja se konsumi i energjisë nga biznesi këtë vit është 12,6 për qind më i lartë se në vitin e kaluar. Ka një menaxhim më të mirë, më të kujdesshëm.

BBC: Një pyetje për Kosovën - qeveria Juaj, ministri i Jashtëm, Ju vetë në Asamblenë e Përgjithshme të Kombeve të Bashkuara, por edhe në forume të tjera, keni qenë shumë aktivë në mbrojtjen e çështjes së Kosovës dhe në mbështetje të zgjidhjes së statusit në mënyrë të drejtë e të shpejtë. A do ta njohë Shqipëria Kosovën nëse ajo shpall pavarësinë në mënyrë të njëanshme?

Zoti Berisha: Së pari, unë sapo vij nga takimi me Sekretarin e Jashtëm Britanik Miliband. Dhe, sigurisht Kosova zuri një pjesë të mirë në diskutimin që pata me të. Absolutisht kishim të njëjtin mendim. Një, Kosova, është këshilla jonë dhe insistimi i Shqipërisë, që udhëheqja politike e Kosovës nuk mund të marrë dhe nuk duhet të marrë veprime të njëanshme pa një miratim nga ana e anëtarëve të Grupit të Kontaktit, të cilët shohin pavarësinë si zgjidhjen e vetme që jep paqe dhe stabilitet.

Në këtë kontekst, unë këtë mesazh e bëj publik dhe u bëj thirrje, dhe jam i sigurt se ata kanë të gjithë mençurinë e duhur, sepse kanë udhëhequr me një zotësi shumë të madhe dhe me një ndjenjë të lartë përgjegjësie një proces shumë të vështirë. E kanë atë sens që të mos marrin një veprim të tillë. Së dyti, është jashtëzakonisht e rëndësishme që të fillojnë zbatimin e Projektit Ahtisaari. Pavarësisht se çfarë thuhet. Projekti Ahtisaari është një projekt i domosdoshëm për t'u shndërruar në projekt, në marrëpveshje paqeje, stabiliteti për Kosovën. Madje pjesën, ju sugjeroj dhe jam i bindur që e kanë, po kaq të rëndësishme të projektit sa ç'kanë pavarësinë, duhet konsideruar pjesa që garanton pakicat serbe dhe pakicat tjera në Kosovë, si standard në Kosovë.

A po përpiqet, a ka këtë vetëdije udhëheqja politike e Kosovës? E ka të plotë dhe unë e sigurova sekretarin Miliband se ata janë shumë të vendosur në këto standarde. Sikundër, e theksoj edhe një herë, nuk mund të merren veprime të njëanshme. Çështja e Kosovës nuk është një çështje midis Prishtinës dhe Tiranës. Por ju e thatë vetë që ne po e mbështesim me të gjithë mundësitë tona çështjen e pavarësisë së Kosovës. Ne s'kemi dyshim në këtë.

BBC: Një pyetje hipotetike - nga kontaktet që keni pasur, mendoni se do të zgjidhet çështja e Kosovës shumë shpejt, pra a është gati komuniteti ndërkombëtar ta njohë Kosovën e pavarur?

Kryeministri Berisha: Unë mendoj se çështja do të zgjidhet shpejt. Që të caktojmë data, unë këtë e mendoj në këtë mënyrë - të mendosh më datën 10, Trojka do të dorëzojë raportin, Këshilli i Sigurimit i Kombeve të Bashkuara ka procedurat e veta, Sekretari i Përgjithshëm i OKB-së ka procedurën e tij, vendet anëtare të Këshillit të Sigurimit marrin kohën e tyre, vendet e Grupit të Kontaktit po kështu.

Prandaj, ne nuk mund të themi "dhjetë o s'ka"! Besoj se ky koncept tanimë është i qartë. Për t'u zgjatur, nuk besoj se do të zgjatet. Nuk besoj se i tërë komuniteti ndërkombëtar do të jetë dakord. Unë jam shumë skeptik për qëndrimin e Rusisë. Ky qëndrim mund të ketë edhe ndonjë nuancë ndaj shqiptarëve, por në tërësi mund të jetë dhe ndonjë qëndrim global që Rusia po përshtat tani në arenën politike. Një gjë është e sigurtë, e kam thënë dhe po e them prapë, se për në Ballkan kjo nuk funksionon. Nuk funksionon për paqen dhe stabilitetin e tij dhe unë ndjej shumë keqardhje.

Rusia ka dhënë kontributin e vet në Grupin e Kontaktit. Ka dhënë kontributin e vet fillimisht në problemin e Kosovës dhe tani ka marrë një rol pothuajse bllokues në Këshillin e Sigurimit, çka është i papërshtatshëm. Së dyti, ka dhe ndonjë vend tjetër në Bashkimin Evropian që heziton. Kanë ca hezitime, sepse projektojnë segmente të interesave kombëtare. Por unë jam i bindur se interesat evropiane do të predominojnë dhe Bashkimi Evropian ka të gjithë potencialin e gjithanshëm politik ekomonik për të promovuar zgjidhjen e këtij problemi. Shtetet e Bashkuara kanë një qëllim jashtëzakonisht pozitiv, kanë një qëndrim të kthjellët, por jo vetëm Shtetet e Bashkuara, të tillë e ka dhe Britania e Madhe, të tillë e kanë dhe vende të tjera të Grupit të Kontaktit.


17/10/2007

[Albo]

Kryeministri Berisha takohet me Sekretarin e Mbrojtjes së Britanisë së Madhe, zotin Des Browne


Kryeministri Berisha u prit nga Sekretari i Mbrojtjes së Britanisë së Madhe, Zoti Des Browne, me të cilin diskutoi mbi procesin e integrimit të Shqipërisë në NATO.

Kryeministri Berisha informoi Sekretarin Browne mbi reformat e ndërmarra nga qeveria për reformimin e Forcave të Armatosura, duke u ndalur në reformat strukturore, rritjen e aftësisë së personelit ushtarak, shndërrimin e ushtrisë në ushtri profesioniste brenda vitit 2010, rritjen e buxhetit për ushtrinë në 2 përqind të Prodhimit të Brendshëm Bruto. Kryeministri informoi gjithashtu për angazhimin dhe sukseset e qeverisë në luftën kundër krimit të organizuar dhe korrupsionit.

Sekretari Des Browne i shprehu Kryeministrit Berisha mirënjohjen për angazhimin dhe kontributin e Shqipërisë në operacionet ushtarake në Afganistan dhe Irak dhe bashkëpunimin e saj të ngushtë me NATO-n. Ai vlerësoi vendimin e qeverisë shqiptare për të rritur prezencën ushtarake në Afganistan dhe mirëpriti vullnetin e Kryministrit Berisha për të konsideruar edhe mundësinë e ofrimit të mbështetjes me personel, në kuadrin e programit të NATO-s për trajnimin e forcave policore dhe ushtarake afgane.

Duke përshëndetur arritjet e qeverisë shqiptare në luftën kundër krimit të organizuar dhe korrupsionit, Sekretari Des Browne theksoi se vazhdimi i kësaj lufte është i rëndësishëm jo vetëm për integrimin e Shqipërisë në NATO, por edhe për sigurinë dhe mirëqënien e të gjitha vendeve europiane, pasi krimi i organizuar nuk mbetet asnjëherë i izoluar, por kapërcen kufijtë e çdo vendi.

Kryeminsitri Berisha falënderoi Sekretarin Des Browne për mbështetjen dhe ndihmën e dhënë nga qeveria britanike për reformat në fushën e mbrojtjes dhe të rendit, në mënyrë të veçantë për ndihmën në fuqizimin e policisë dhe organeve të luftës kundër krimit. Sekretari britanik i Mbrojtjes shprehu vullnetin e qeverisë britanike për të vazhduar këtë mbështetje dhe premtoi ndihmë të mëtejshme me ekspertizë për organet shqiptare të rendit dhe sigurisë.

Sekretari Des Browne shprehu mbështetjen e plotë të Britansië së Madhe për integrimin e Shqipërisë në NATO. Ai u shpreh se e ardhmja e Shqipërisë është në NATO, por për të arritur këtë gjë është e nevojshme që qeveria të vazhdojë të demostrojë angazhimin e saj në reforma, veçanërisht në luftën kundër krimit dhe korrupsionit, që është një nga testet kryesore për të merituar ftesën për anëtarësim.

17/10/2007

[Albo]

Kryeministri Berisha, gjatë vizitës së tij në Britaninë e Madhe, u prit në një drekë pune nga Lord Rothschild dhe Lord Sainsbury, në Spencer House.

Ky takim u bë në përgjigje të interesimit të personaliteteve të larta të politikës dhe financës në Britaninë e Madhe, për të përkrahur dhe ndihmuar konkretisht zhvillimin ekonomik të Shqipërisë.

Lordi Rotchschild dhe Lordi Sainsbury janë dy anëtarë të Dhomës së Lordëve në Britaninë e Madhe dhe nga përfaqësuesit më prestigjozë të botës financiare e bankare. në Britaninë e madhe.

Biseda e Kryeministrit Berisha dhe Lord Rothchild e Lord Sainsbury u përqëndrua në bashkëpunimin në fushën e turizmit në Shqipëri dhe financimin e një Pakete rajonale turistike, për koordinimin e investimeve dhe lidhjen midis disa zonave të rëndësishme të vendit, Finiqit, Butrintit dhe Fushës së Dropullit, si dhe për hartimin dhe funksionimin e një strategjie të përbashkët në turizëm. Kryeministri u shpreh se turizmi në Shqipëri ka patur një rritje të madhe gjatë këtyre dy viteve dhe janë hedhur bazat për një bum turistik në vitet në vijim. Numri i turistëve që kanë vizituar Shqipërinë këtë vit ishte 34 përqind më i madh dhe paketa e re e turizmit synon që ky numër të rritet deri në 65 përqind.

Dy personalitetet britanike shprehën mbështetjen e tyre dhe të Britanisë së Madhe për zhvillimin e vendit në të gjitha fushat ekonomike dhe politike.


17/10/2007

[Albo]

Nënshkrimi i MSA nga parlamenti britanik, simbol i mbështetjes së plotë të Britanisë së Madhe për reformat në Shqipëri dhe integrimin e saj në NATO e BE

Kryeministri Berisha u prit sot nga Sekretari i Jashtëm Britanik, Zoti David Miliband, me të cilin bisedoi rreth përparimit të reformave në Shqipëri, bashkëpunimit dypalësh, integrimit të Shqipërisë në NATO e Bashkimin Europian, si dhe situatës në rajon.

Kryeministri Berisha e falënderoi Sekretarin Miliband për ratifikimin nga qeveria dhe parlamenti britanik të Marrëveshjes së Stabilizim-Asociimit midis Shqipërisë dhe Bashkimit Europian. Sekretari Miliband u shpreh se ky ratifikim, përveçse një akt parlamentar, është një simbol i mbështetjes së plotë të Britanisë së Madhe për integrimin e Shqipërisë si pjesë e familjes Europiane, anëtarësimin e saj në institucionet euro-atlantike, si dhe e dëshirës për thellimin e bashkëpunimit dypalësh midis Britanisë dhe Shqipërisë.

Në mënyrë të veçantë, Kryeministri Berisha dhe Sekretari Miliband diskutuan për procesin e integrimit të Shqipërisë në NATO. Në këtë kuadër, Kryeministri Berisha bëri një paraqitje të reformave të qeverisë dhe të sukseseve të arritura veçanërisht në fushën e luftës kundër krimit të organizuar dhe korrupsionit, si dhe në përmirësimin e klimës së biznesit dhe zhvillimin ekonomik. Kryeministri u ndal në reformat e ndërmarra nga qeveria për Forcat e Armatosura, duke theksuar në mënyrë të veçantë partneritetin besnik të Shqipërisë me NATO-n, sidomos mbështetjen që Shqipëria i ka dhënë operacioneve të NATO-s, si përmes vënies në dispozicion të logjistikës së saj portuale dhe aeroportuale, ashtu edhe përmes angazhimit të njësive shqiptare në kuadër të operacioneve të NATO-s në Bosnje dhe Afganistan.

Sekretari Miliband shprehu vlerësimin dhe mirënjohjen e Britanisë dhe të NATO-s për bashkëpunimin e Shqipërisë me Aleancën, duke theksuar se trimëria dhe angazhimi i ushtarëve shqiptarë gëzojnë mirënjohjen e NATO-s. Ai përshëndeti rezultatet e reformave të qeverisë shqiptare, duke vlerësuar në mënyrë të veçantë arritjet në luftën kundër krimit dhe korrupsionit si vendimtare për integrimin euro-atlantik të Shqipërisë dhe zhvillimin e vendit.

Sekretari Miliband u shpreh se muajt që vinë janë shumë të rëndësishëm për reformat që Shqipëria duhet të ndërmarrë në këtë kuadër, përfshi reformat në sistemin e drejtësisë dhe reformën elektorale dhe se qeveria britanike është e gatshme të ofrojë mbështetje të plotë për realizmin e tyre.

Duke folur për zhvillimet politike në vend Kryeministri Berisha theksoi se Shqipëria gëzon stabilitet të plotë dhe të qëndrueshëm politik, dëshmi e të cilës janë ndërrimi normal i pushtetit pas zgjedhjeve të vitit 2005, si dhe respektimi i ligjit dhe standardeve gjatë zgjedhjeve të fundit lokale dhe zgjedhjes së Presidentit.

Kryeministri Berisha dhe Sekretari Miliband diskutuan gjithashtu për situatën në rajon dhe veçanërisht zgjidhjen e statusit përfundimtar të Kosovës. Ata shprehën mbështetjen e qeverive të tyre për planin Ahtisari. Në mënyrë të veçantë, Kryeministri theksoi se projekti i Presidentit Ahtisari është projekti më i mirë për sigurimin e paqes dhe stabilitetit në rajon, pasi ai siguron, nga njëra ana, standardet më të larta që ka pasur ndonjë vend për minoritetet dhe, nga ana tjetër, respekton vullnetin e shumicës së popullit të Kosovës për pavarësi. Duke u shprehur për rëndësinë e arritjes së zgjidhjes përfundimtare të çështjes së Kosovës, Kryeministri Berisha dhe Sekretari Miliband theksuan gjithashtu rëndësinë që ka angazhimi serioz i Prishtinës dhe Beogradit në negociatat e ndërmarra nga Trojka.

Kryeministri Berisha e ftoi Sekretarin e Jashtëm britanik, zotin Miliband, për një vizitë në Shqipëri, ftesë të cilën ai e pranoi më kënaqësi.

17/10/2007

[Albo]

BERZH vlerëson klimën e favorshme për biznesin në Shqipëri

Kryeministri Berisha zhvilloi sot në Londër një takim me Presidentin e Bankës Europiane për Rindërtim dhe Zhvillim (BERZH), zotin Jean Lamierre dhe stafin e tij.

Kryeministri Berisha falenderoi Zotin Lamierre për kontributin e çmuar dhe mbështetjen që BERZH ka dhënë dhe jep për zhvillimin e Shqipërisë në shumë fusha, si dhe shprehu bindjen për rritjen e nivelit të bashkëpunimit në të ardhmen.

Kryeministri Berisha e njohu zotin Lamierre me zhvilimet më të fundit dhe ecurinë e disa projekteve të mëdha, si dhe me arritjet e Shqipërisë në ekonomi dhe në zbatimin e reformave në luftën kundër korrupsionit, në infrastrukturë dhe në tregun e energjisë. Ndër të tjera, Kryeministri theksoi se hapa të rëndësishme janë bërë krijimin e një klime të përshtatshme për biznesin.

Në këtë kuadër, Kryeminstri Berisha kërkoi mbështetjen e BERZH-it me investime në sektorin privat, në energji, në turizëm, në infrastrukturë etj..

Në vazhdim, Kryeministri Berisha vuri theksin mbi rëndësinë e investimeve në portet shqiptare sidomos në atë të Durrësit dhe Shëngjinit që janë ura të rëndësishme të transportit të mallrave.

Nga ana i tij, Presidenti i BERZH-it u shpreh se kjo banke do të shohë me përparësi tre projekte të rëndësishme me tre shoqëri të mëdha të prodhimit të çimentos, investime këto që synojnë të bëjnë kalimin e Shqipërisë nga një vend importi në një vend eksporti në këtë fushë, duke u bazuar edhe në faktin se ka një bum të ndërtimeve në Shqipëri.

Zoti Lamierre tregoi interes të veçantë për përpjekjet e bëra në sektorin energjitik me synim diversifikimin e burimeve të energjisë, për të eleminuar varësinë nga burimet ujore.

Gjithashtu Presidenti I BERZH-it, zoti lamierre u shpreh se prashikohen të zbatohen disa projekte të rëndësishme për transmetimin e energjisë, nëpërmjet linjave të transmetimit që kalojnë nga Kosova, Maqedonia dhe Bullgaria, drejt Shqipërisë.

Gjithashtu zoti Lamierre tha në vazhdim se ka disa projekte për financime me bashkitë, si ai për unazën e Tiranës, me ujësjellesin si dhe po studiohet problemi i përpunimit të plehrave në qytetet më të mëdha.

Në fund të takimit, Presidenti Lamierre pranoi ftesën e bërë nga Kryeministri Berisha për të vizituar Shqipërinë.

17/10/2007

[Albo]

Biznesi britanik, interes të madh për investime në Shqipëri


Në vijim të vizitës së tij në Londër, Kryeministri Berisha mori pjesë në një tryezë të rrumbullakët me përfaqësues të biznesit britanik.

Në këtë tryezë merrnin pjesë përfaqësues të biznesit vendas, të përzgjedhur Agjencia Kombëtare Britanike për Investimet, përfaqësues të bankave më të mëdha, si dhe përfaqësues të mediave britanike.

Përfaqësuesit e biznesit dhe bankave britanike treguan mjaft interes për sektorin energjitik, për mënyrën e balancimit të prodhimit të energjisë në Shqipëri, ndërmjet burimeve ujore dhe atyre termike, si dhe për shfrytëzimin e potencialeve turistike malore. Një aspekt tjetër për të cilin pjesëmarrësit paraqitën interes ishte dhe hapja e zyrave të avokaturës në Shqipëri.

Nga ana e tij, Kryeministri Berisha i njohu të pranishmit me përpjekjet e qeverisë shqiptare për të çuar më tej reformat e ndermarra në fusha të ndryshme, veçanërisht në atë ekonomike, si dhe me masat e ndërmarra në këtë drejtim në ndihmë të biznesit, si përgjysmimi I taksave për biznesin e vogël, krijimi i "ONE STOP SHOP", dixhitalizimi i procedurave, etj., si dhe u shpreh se Shqipëria është e hapur për investime sidomos në sektorin e turizmit, në infrastrukturë, në zhvillimin e artizanatit, në sektorin e energjise etj..

Një vend të rëndësishëm në fjalën e tij, Kryeministri i kushtoi përpjekjeve dhe arritjeve të qeverisë në luftën kundër korrupsionit dhe informalitetit në të gjitha sferat.

Ndër të tjera, Kryeministri u shpreh se Shqipëria është një vend me potenciale të mëdha edhe në fushën e shfrytëzimit të mineraleve dhe të pasurive hidrike si dhe në prodhimin e çimentos.

Ju ftoj të investoni në Shqipëri dhe ju garantoj se qeveria shqiptare do të jetë pas jush për të mbështetur sukseset tuaja, - tha kryeministri Berisha.

17/10/2007

[Duaje Siveten]

Nuk ka dyshim se takimet e mesiperme jane te dobishme, sidomos per palen angleze.

A nuk duhej qe kryeministri Shqiptar te takohej me kryeministrin anglez, aq me teper qe kete vit ka pasuar Toni Blair-in?

Perkimi i ratifikimit te MSA eshte nje gjetje e bukur, por nuk mund te justifikohet niveli i ulet qe tregon takimi i kryeministrit me nje sekretar ministrie.

Ftesa per te folur per te kaluaren e Kosoves, dhe jo per Shqiperine, eshte dekurajuese, gjithashtu per nje kryeminister aktual.