Dhuratë nga Zoti"

[biligoa]

Një 32-vjeçar korçar me aftësi të kufizuara prezanton veprat e tij në pikturë


Ia ka dedikuar krijuesit talentin e tij prej piktori, ndonëse me fizik të cunguar. "Dhuratë nga Zoti." Kështu ka vendosur ta titullojë ekspozitën e tij një 32-vjeçar që ka impresionuar piktorët dhe artistët korçarë. Por ky artist nuk është si gjithë të tjerët. Ervin Theodhori është një 32-vjeçar me aftësi të kufizuara. Tre vjet më parë teksa ai kishte hyrë për rehabilitim në një qendër ditore për personat me aftësi të kufizuara, ku qëndronte prej një viti, Ervini do të çudiste të gjithë kur ka filluar të shfaqë edhe këtë talent, duke hedhur në letër me lapsa me ngjyra skicimet e para. Me një shpejtësi të çuditshme ai mbush telajot me frymëzimin e tij. Me një penel dhe si një artist i vërtetë ai ka mundur që të shprehet nëpërmjet pikturës, duke realizuar 100 tablo të ngjashme me abstraktet e shumë piktorëve të mëdhenj. Pas një pune të vazhdueshme, Ervini ka mundur të plotësojë ëndrrën e tij. Impresionet, të cilat flasin për shpirtin e të riut me probleme dhe për dhimbjen e veçimit nga shoqëria, do të merrnin shkas kur ai u ndodh mes njerëzve që shfaqnin të njëjtat probleme me të. Në fillim agresiv dhe me shumë probleme, shumë shpejt Ervini do të gjente qetësinë në talentin e tij, në pikturë. Kështu, ai largonte vetminë dhe agresivitetin. "Për disa njerëz jeta është e lumtur, për disa të tjerë është e vështirë. Por çdo njeri ka ëndrra. Dua të jetoj si gjithë të tjerët", thotë Ervini. Në tablotë e tij me harmoninë e ngjyrave dhe figurat që krijon ai, është renditur mes piktorëve korçarë. Artistë të njohur e kanë përkrahur sapo kanë dëgjuar se një nga personat me aftësi të kufizuara të qendrës ditore të zhvillimit ka shfaqur një talent të tillë. "Këto janë piktura të cilat zor se mund të realizohen nga një njeri i zakonshëm. Pikturat me përmbajtje impresioniste të ngjashme me nota abstrakte e veçojnë këtë piktor që shpreh nëpërmjet figurave të ndryshme jo vetëm botën e tij, por dhe mënyrën se si e shikon jetën. Në këto tablo duket sikur kanë folur engjëjt nëpërmjet Ervinit. U befasova nga ngjyrat që ai ka përdorur dhe nga teknika e ngrohjes me hekur. Këto krijime janë impresione ku derdhet fantazia e vetë Ervinit. Që në fillim më tërhoqi talenti i tij dhe si piktor vendosa ta përkrah", shprehet piktori i njohur korçar Sotiraq Xega, që i ka qëndrua afër. Vetë 32-vjeçari me aftësi të kufizuara, që ka çelur edhe ekspozitën e tij të parë, shpreh mosbesimin se dikush mund të blejë tablotë e tij. Ai e ka zgjedhur këtë mënyrë që të japë kontributin e vet nga shitja e pikturave për prindërit. Ervini do që me paratë që do të grumbullojë nga pikturat të gëzojë dy prindërit që i kanë qëndruar afër në ditë të vështira për të. Babai i Ervinit, Sokrati, e quan këtë eveniment dhe hapjen e ekspozitës si dasmën e 32-vjeçarit. Ka qenë Bashkia e Korçës që i ka mundësuar Ervinit hapjen e ekspozitës në Pallatin e Kulturës së qytetit. Të gjitha kornizat janë blerë nga bashkia e qytetit me qëllim që Ervini të prezantohet në mënyrë dinjitoze. Ai ka sjellë në Pallatin e Kulturës 60 prej tablove të realizuara prej tij. Fakti se një i ri me aftësi të kufizuara ka çelur një ekspozitë, ka mbledhur një numër të madh qytetarësh. Piktura ka qenë ajo që e ka larguar 32-vjeçarin nga depresioni dhe agresiviteti. Pas tre vjetësh në rehabilitim, ai sot duket më i qetë, ndërsa bashkë me të kanë ardhur edhe fëmijët e tjerë të qendrës së zhvillimit dhe punonjëset sociale. Në ekspozitë nuk ka munguar asnjë piktor i njohur korçar dhe shumë të tjerë kanë ardhur nga kryeqyteti dhe Pogradeci, enkas për të.


Shqip