Sarandë, 80 % e pronave ka probleme me dokumentet

[no name]

Flet kryeregjistruesi i rrethit jugor: Po vuajmë ende pasojat e vitit të mbrapshtë

Djegia e arkivave në vitin 1997 ngatërroi pronarët

Dyert e zyrës së regjistrimit të pronave në hipotekë zor se i gjen ndonjëherë pa njerëz që presin t‘u shërbehet, t‘u zgjidhet një kërkesë e të jenë mendjembledhur për merakun e bërjes me pronë. Muaji gusht ka qenë edhe më i ngarkuar në kërkesa e radhë të tilla, pasi banorëve të përhershëm të qytetit e rrethinave, u shtohen edhe ato të emigrantëve që vijnë dhe brenda atij një muaji kohë qëndrimi në vendbanimin e përhershëm, duan të plotësojnë shumë mangësi edhe në fushë të dokumentacionit dhe të sqarimit pronësor. Në ditët dhe javët e gushtit ishte një shifër e zakonshme që të kryheshin 80 deri 90 aplikime në ditë. Por kjo periudhë, sipas kryeregjistruesit Arlond Kermaj të kësaj zyre në Sarandë, evidentoi edhe një varg mangësish, që bëhen burim sorollatjesh dhe pasigurie të pronarëve në pronën e tyre. Sërish del në sipërfaqe viti i mbrapshtë 1997, gjatë të cilit u zhdukën një varg dokumentesh që identifikonin pronarët. Kjo jo vetëm që shtoi dyshimet dhe vuajtjet e pronarëve të vërtetë për të marrë pronat e tyre, por zgjoi dhe shton çdo ditë, edhe dhjetë vjet më pas, mundësitë për manipulim me të vërtetën, duke bërë që më i sigurt të ndjehet në mundësinë e marrjes së një prone të pretenduar ai që është treguar "usta" në letra, se sa ai që e ka pronë të trashëguar apo të blerë realisht. E veçanta e muajve të verës në Zyrën e Regjistrimit të Pasurisë në Sarandë, kanë qenë kërkesat e shtuara për kalim pronësie, lidhja e kontratave të shitjes, blerjes apo dhurimeve e sidomos vënia e pronës në hipotekë, për efekt të përfitimit të një kredie. Por në 70 deri 80 për qind të praktikave ka rezultuar të mungojë dokumentacioni i origjinës së pronës, i cili vjen nga gjykata. Shkaku - zhdukja e këtij dokumentacioni në "rrëmujat e ‘97-ës", kur godina dhe arkivat e institucionit të drejtësisë ishin nga të parat që u sulmuan, u bastisën e më pas iu vu flaka, për t‘i lënë të gjitha "mëkatet" zjarrit dhe jo zjarrvënësve.

Boshllëkun e këtij dokumentacioni ligjor për pronën e trashëguar apo të blerë, e mbush tani debati pa krye, pasi në kushtet e kësaj mungese, shumica e pronarëve rezultojnë të ndryshuar disa herë, duke sjellë një kaos, karshi të cilit hipoteka ngre supet, gjykata hap maratonë procesesh dhe pazaresh gjyqësorë dhe shanset më të mëdha nuk i ka pronari i vërtetë për t‘u bërë pronar. Ka mjaftuar një vendim gjyqi të anshëm apo të blerë, që jo në pak raste pronari i origjinës së pronës të lihet me gisht në gojë dhe prona e tij t‘i kalojë "të zotit", "të fortit", paralliut. Madje kryeregjistruesi thotë se një vendimi të tillë ai "i falet" dhe ligja e detyron të kryejë regjistrimin në emër të atij që ka vendimin, edhe sikur fals të jetë. Këtu vepron logjika që përgjegjësinë për pavërtetësinë ose manipulimin e vendimit të paqenë, e mban personi dhe jo hipoteka, e cila nuk i hyn fare verifikimit, por të bën pronar edhe kur mund të jesh një falsifikator dhe meriton të ndiqesh e ndëshkohesh penalisht.



Gazeta Shqip