Gazeta elektronike sportive: "FUTBOLLI" - (Nr:4)

[RaPSouL]

Riberi: Itali-Francë, një sfidë plot tension

Vjen, ulet, 10 sekonda në heshtje, merr mikrofonin dhe: “Ooohh, ka njeri këtu”. Ka nisur kështu konferenca e djeshme për shtyp e Frenk Riberi. Një përshëndetje për gazetarët italianë. “Ciao, si po ia kaloni?”. Në fjalët e tij nuk ndjehet aspak inati i shfaqur në distancë mes dy kampeve në kohët e fundit. “Ajo e San Siros do të jetë një betejë e vërtetë. Ne jemi Franca, nuk kemi frikë askënd. Italia mbrohet mirë, bën edhe shumë faulla, por..”. Me Tonin është në një skuadër dhe Frenk Riberi ka folur jo pak me të këtë kohë. “Kemi shkëmbyer disa batuta në Gjermani dhe sigurisht do ta bëjmë edhe para ndeshjes.

Për 90 minuta nuk do të jemi shokë skuadre”, ka deklaruar mesfushori francez. Fitorja megjithatë është më e rëndësishme për italianët, pasi “Gjelat” ndodhen në një pozitë më të favorshme në grupin B të Euro 2008. “Po, e vërtetë, të kaltërve u duhen patjetër tre pikë, pasi rruga e tyre mund të komplikohet. Për ne një pikë është mirë, por ju siguroj se do të mundohemi të bëjmë 6 në këto dy ndeshje, pasi do të quhemi të kualifikuar”, shprehet për këtë mesfushori francez i Bajernit. Megjithatë, për Francën do të mungojë Domenek, një minus i madh po të kihet parasysh rëndësia e ndeshjes. Tekniku i “Gjelave” u pezullua nga Komisioni Disiplinor i UEFA-s pas akuzave për blerje arbitrash nga italianët. “Nuk është e lehtë të mos kesh një teknik në pankinë që të të japë sugjerime. Nëse do të ishte në pankinë, do ishte më mirë, megjithatë ne jemi futbollistë profesionistë dhe e dimë se çfarë të bëjmë. Jam i sigurtë se do t’ia hedhim, Pier Mankovski, zëvendësi i tij, na njeh dhe e njohim mirë”, sqaron Riberi.

Vigjilja e sfidës megjithatë nuk është shumë e qetë, duke nisur që nga frazat e Domenek. “Kështu do të jetë edhe ndeshja, me ndjenjat e tifozëve dhe me italianët që na presin,. Por ne nuk kemi frikë”, thotë Riberi. Por Itali-Francë, është gjithë Itali-Francë. “Jemi fizikisht gati për të luajtur një betejë. Kur luajmë me Italinë, ka gjithnjë pak tension, flasim shumë mes nesh. Është rivalitet mes skuadrash dhe mes tifozëve. Italia do bëjë gjithçka për të na shqetësuar, ne s’do të kemi Domenek në pankinë, kështu që kemi shumë probleme. Por të gjithë janë stimuj më shumë. Presioni i publikut italian më eksiton”, shprehet fantazisti. Nuk do të jetë as Zidane me Materacin, mos ndoshta francezi duhet të kërkonte falje? “Zizu është Zizu, nëse s’ka dëshirë të kërkojë falje, s’duhet ta bëjë. Çfarë doni të thojë ai? Duhet të ketë arsyet e tij që nuk e bën. Pastaj, është një çështje mes tij e Materacit”, përfundon Frenk Riberi.

[RaPSouL]

Dëmtimi, Toni në fushë kundër Francës

Italia duket se do ta ketë të gatshëm Luka Tonin për sfidën që do të luhet nesër në mbrëmje në “San Siro” kundër Francës.

Doktor Ferreti është shprehur optimist për gjendjen e sulmuesi të kaltër. “Situata është në përmirësim. Do të vendosim të premten, por unë jam optimist”, tha ai. Kjo edhe për faktin se lojtari nuk ka ndërmend të heqë dorë nga një sfidë e tillë. “Nëse do të ishte për Tonin, ai do të zbriste në fushë që sonte. Por ne jemi duke vazhduar programin e rekuperimit. Them se do të jetë i gatshëm si për Francën ashtu edhe për Ukrainën”, u shpreh mjeku i skuadrës axurre. Vetë Toni tha: “Do flas me trajnerin dhe do vendos”.

[RaPSouL]

Bufon: Jemi më të fortë kur na shajnë

Xhixhi Bufon është gati për sfidën e nesërme mes Italisë dhe Francës në “San Siro” dhe replikon me polemikat e ardhura nga kampi i “Gjelave”.

“Unë kam shumë respekt për Francën, por aspak frikë”, thotë portieri italian. “Kur nuk ndjehemi shumë të fortë, përfundon keq, kur të tjerët na shajnë dhe na ngacmojnë, reagimi ynë në fushë është gjthnjë më i miri. Do të shohim fundin për të parë kush do të qeshë”, është shprehur ai. “Domenek? Më duket një tip folkloristik. Nuk i dua të keqen, pasi nuk e njoh. Por nëse i ka thënë vërtetë ato gjëra, eh, them se një trajner ka edhe detyra. Duhet të edukojë, jo të nxisë”, tha portieri i kombëtares italiane.

[RaPSouL]

Anglia, dëmtimet kthehen në makth

Dëmtimet e shumta janë kthyer në problemin kryesor për trajnerin e Anglisë Stiv Mek-Klaren, në kuadër të sfidave me Izraelin dhe Rusinë.

Për britanikët vazhdon të jetë në dyshim Frenk Lampard, i cili është ende 50 me 50. Anglia do të jetë gjithashtu pa Uejn Runin, Devid Bekham dhe Geri Nevil për këtë ndeshje, ndërkohë që do të mungojë për pezullim edhe Piter Krouç.

[RaPSouL]

“Me Anglinë? Fitore dhe jo barazim”

Trajneri i Rusisë GusHidink, u shpreh optimist se skuadra e tij do të arrijë të marrë 6 pikë në dy ndeshjet e radhës, ndaj Maqedonisë të shtunën dhe ndaj Anglisë të mërkurën e ardhshme.

Trajneri i Rusisë GusHidink, u shpreh optimist se skuadra e tij do të arrijë të marrë 6 pikë në dy ndeshjet e radhës, ndaj Maqedonisë të shtunën dhe ndaj Anglisë të mërkurën e ardhshme. “Të gjithë janë fokusuar te Anglia dhe deri këtu në rregull, por për ne ka më shumë rëndësi ndeshja me Maqedoninë”, deklaroi ai.

[RaPSouL]

Probleme te Holanda, dëmtohet Van Der Vart

Vart nuk do të luajë për Holandën në ndeshjen e nesërme ndaj Bullgarisë dhe mjekët e skuadrës bënë të ditur se ai është në dyshim për sfidën e të mërkurës kundër Shqipërisë.

Rafael Van Der Vart nuk do të luajë për Holandën në ndeshjen e nesërme ndaj Bullgarisë dhe mjekët e skuadrës bënë të ditur se ai është në dyshim për sfidën e të mërkurës kundër Shqipërisë. Mesfushori i Hamburgut ka pësuar një dëmtim gjatë seancës stërvitore të ditës së djeshme, duke shkaktuar një problem më shumë për trajnerin Marko Van Basten në kuadër të dy sfidave decizive. Dëmtimi i Van Der Vart është i dyti për holandezët, pas atij të Arjen Roben që nuk do të luajë as nesër e as të mërkurën.

Ndërkaq, tekniku Van Basten ka bërë të ditur dje se për ndeshjen me Shqipërinë do të marrë vetëm 18 apo 19 futbollistë dhe jo 23 sa janë aktualisht në ekipin përfaqësues të tulipanëve. “Por, gjithashtu është e mundur që për ndeshjen me Shqipërinë të marrim edhe ndonjë lojtar jashtë këtyre që kemi aktualisht në organikë”, ka thënë Van Basten. “Ajo ndeshje kërkon ndonjë tjetër afrim, pasi futbollistët tanë mund të dëmtohen kundër Bullgarisë”, ka deklaruar tekniku i tulipanëve. Tetë futbollistë të Holandës nuk do të mund të luajnë ndaj Shqipërisë nëse marrin kartonë nesër. Bëhet fjalë për Huntelar, Jaliens, De Jong, Matijsen, Van Persi, Sedorf dhe Shnajder.

[RaPSouL]

Sheva nuk e ka të qartë injorimin e Mourinhos


Futbollisti më i mirë i Ukrainës, Andriy Shevchenko (30), ka deklaruar se, nuk e ka të qartë pse trajneri i Chelseat, Jose Mourinho, e ka lënë atë jashtë formacionin të ekipit, raportojnë mediat angleze.


“Qarkullojnë fjalët se unë nuk po luaj për shkak të dhembjes së shpinës. Megjithatë, çdo gjë është në rregull me mua, unë jam plotësisht i gatshëm për lojë. Nuk e kam të qartë - se çfarë po ndodhë - dhe jam duke e pritur rastin tim”, ka deklaruar Shevchenko.

Ukrainasi po merr pjesë në përgatitjet e kombëtares së Ukrainës, e cila të shtunën luan ndeshjen kualifikuese për Kampionatin Evropian 2008, kundër Gruzisë.

Sheva ka arritur vitin e kaluar në Chelsea nga AC Milan, për 30 milionë funte. Qysh atëherë flitej se për ardhjen e tij në Londër, kishte insistuar pronari i Chelseat, rusi Roman Abramovich, derisa Mourinho ishte kundër ardhjes së tij.

[RaPSouL]

Pato shënon golin e parë për Milanin

Alexandre Pato, lojtari i ri brazilian i cili këtë verë ka ardhur në Milan, ka arritur të shënojë golin e parë për klubin e tij të ri.


I riu, të cilin shumë e shohin si mega yll të ardhshëm të futbollit botëror nuk ka të drejtë të luaj për Milanin deri në muajin janar (në lojërat zyrtare), por për këtë ai i ka kënaqur adhuruesit në lojën miqësore të cilën Milani e ka luajtur në Kiev kundër Dinamos (2-2).

Pos shënimit me të cilin Milani zvogëloi rezultatin në 1-2, Pato ka impresionuar me driblingje dhe futboll të shkëlqyer, dhe kështu ka inkurajuar udhëheqësit e Milanit të cilët në të, në vërtetë, mund të shohin yllin e ardhshëm.

[RaPSouL]

Donadoni: Domenekut do t'i shtrëngoj dorën

Trajneri i Italisë Roberto Donadoni është përpjekur të ulë tensionin në vigjilje të supersfidës me Francën që do të luhet sot në mbrëmje në "San Siro" të Milanos. Madje, tekniku i kampionëve të botës e ka quajtur ndeshjen me tulipanët si gjithë të tjerat dhe aspak të veçantë përsa i përket anës sportive. "E ndjej normalisht këtë sfidë, ndërsa në optikën e kualifikimit në Euro 2008, nuk është aspak decizive. Na duhet të shohim më shumë skuadrat që janë prapa transalpinëve", ka thënë ai. Konferenca për shtyp e Donadonit në fakt ka nisur me një lajm të hidhur, pasi nga stafi mjekësor është konfirmuar se Luka Toni nuk do të jetë në fushë kundër Francës. Një humbje e madhe po të kihet parasysh fakti që sulmuesi i Bajernit ishte mjaft në formë dhe nga të vetmit futbollistë që mund të tërhiqte skuadrën në sulm.

"Në këtë pikë, mund të them se është më e mundshme që ai të jetë në dispozicion për ndeshjen me Ukrainën", ka pranuar tekniku. "Dje është stërvitur mirë dhe dha përgjigje të mira, por është e vështirë ta hedh në fushë të shtunën", deklaroi Donadoni. Në këtë pikë, duket se Pipo Inzagit do t'i takojë edhe njëherë detyra që të nxjerrë nga "balta" skuadrën, gjë që sulmuesi i Milanit e ka bërë mjaft mirë në të shkuarën, duke u treguar më shumë se njëherë deciziv me klubin dhe kombëtaren. Në "San Siro" do të jetë një atmosferë e nderë, kjo duke parë edhe rivalitetin tradicional mes dy skuadrave.

Polemikat
Trajneri i kampionëve të botës nuk mund të mos ngacmohej në lidhje me polemikat e ditëve të fundit, duke filluar që nga deklaratat e Rajmond Domenek. "As e kam dëgjuar fare atë që kanë thënë", ka thënë Donadoni duke qeshur. "Thonë që pula këndon kur bën vezë, por këtu kemi përballë një Gjel", është shprehur ai. Po Domenek, tekniku francez që do të mungojë në këtë ndeshje pas skualifikimit që i ka dhënë UEFA për akuza të pabaza? "Nëse nuk do ketë shumë shkallë për të ngjitur, do t'i shtrngoj dorën Domenekut.

Mua tekniku francez nuk më ka bërë asgjë dhe të përshëndesësh një person, është mbi të gjitha çështje edukate. Kështu që do ta bëj", ka thënë Donadoni. Trajneri italian ka siguruar gjithashtu se nuk do të kalojë "një natë pa gjumë", por ndoshta më të qetë se gjithë të tjerat. "Unë e ndjej njësoj si ndeshjet e tjera. Natyrisht, kemi një kundërshtar të prestigjit të lartë. Por nëse shohim matematikën e klasifikimit, në këtë ndeshje nuk vendoset asgjë. Ne në renditje na duhet të shohim më shumë ata që janë pas Francës sesa Francën që është para nesh", tha Donadoni. Itali-Francë luhet sërish, si në finalen e Berlinit, por mungojnë dy aktorë: Zidane dhe Materaci.

[RaPSouL]

Vieira tërbon Interin, në fushë ndaj Italisë

Pas Rajmond Domenek, është Patrik Vieira ai që ka xhindosur trajnerin e Interit Roberto Mançini.

Tekniku zikaltër ishte shqetësuar për kondicionin fizik të Vieirasë, por trajneri i "Gjelave" ka vendosur ta hedhë në fushë për ndeshjen e sotme me Italinë. Madje, me insistimin e vetë futbollistit. "Jam gati për të luajtur", ka thënë Vieira. Fjalë që kanë shkaktuar një irritim të vërtetë te Mançini, duke parë gjendjen e lojtarit. Gjithsesi, prezenca e Vieira u bë më e domosdoshme për Domenek, pas mungesës së një tjetër futbollisti kyç si Uilliam Gallas. Ndërsa Mançini ishte shprehur tepër i nxehur me Domenek edhe në ditët e shkuara, pasi trajneri grumbulloi Vieira.