Tjetër krim brenda familjes në Tiranë. Dëshmia në polici e autores së vrasjes Vasilika Mazniku: Donte të më nxirrte nga shtëpia
Vret njerkën e të shoqit për një dhomë në shtëpi. Ngjarja e rëndë ka ndodhur dje pasdite në kryeqytet, ndërkohë që policia ka vënë në pranga autoren 61-vjeçare. Policia u njoftua rreth orës 16:30, se në rrugën "Sitki Çiço", përballë një shkolle 9-vjeçare, në një banese private, kishte ndodhur një vrasje. Menjëherë shërbimet e Komisariatit Nr. 4 shkuan në vendin e ngjarjes. Hynë nga një portë druri që ishte gjysmë e hapur dhe brenda në oborrin e saj kanë parë Vasilika Maznikun. "Kam vrarë vjehrrën". Me këto fjalë, Mazniku ka pritur uniformat blu, që më pas kanë hyrë në dhomën e ndenjes dhe kanë parë se aty ndodhej 76-vjeçarja Bozhana Mazniku, me një përparëse në qafë. "Pasi u zumë, i vura përparësen në qafë, e shtrëngova fort, derisa ajo vdiq. Ajo donte të më nxirrte nga shtëpia, prandaj e bëra", ka vijuar më tej 61-vjeçarja, e cila ishte në praninë e policisë. Menjëherë forcat policore kanë bërë shoqërimin e saj dhe pak minuta më vonë në vendin e ngjarjes ka mbërritur Sotir Mazniku. Ai ka gjetur të vrarë njerkën, ndërkohë që policia e ka njoftuar se këtë krim e kishte kryer gruaja e tij. Pas marrjes së dëshmive, grupi hetimor deklaroi se Vasilika kishte konflikt me Bozhanën për shtëpinë që i kishte lënë babai i Sotirit. Për këtë, të dyja ishin zënë shpesh herë dhe Bozhana kishte jetuar në një dhomë, e ndarë nga thjeshtri i saj dhe bashkëshortja e tij. Konflikti ka arritur maksimumin dje pasdite, kur 61-vjeçarja, duke përfituar edhe nga mungesa e të shoqit, ka marrë përparësen e gatimit dhe ia ka lidhur në fyt vjehrrës. E ka mbajtur për disa minuta shtrënguar, derisa është siguruar se ajo kishte ndërruar jetë. Duke mbledhur gjithë provat e mundshme në vendin e ngjarjes, policia deklaroi se dyshohet që autorja e këtij krimi është Vasilika Gjice Mazniku, 61 vjeçe, e martuar dhe me dy fëmijë. Sipas policisë, ndaj saj u mor masa e arrestit në flagrancë dhe paraprakisht e ka pranuar krimin e kryer. Për sqarimin e plotë të rrethanave të ngjarjes, policia ka shoqëruar edhe Sotir Maznikun, i cili ka lëshuar deklaratën e tij për këtë krim të rëndë brenda familjes. Policia mori dëshmi edhe nga dy fëmijët e viktimës.
Familja Mazniku i vë kyçin shtëpisë
Pas krimit të rëndë që ka ndodhur dje, familja Mazniku i ka vënë kyçin portës, pasi asnjë nuk ndodhej në shtëpi. Menjëherë pas kësaj ngjarjeje, policia ka arrestuar 61-vjeçaren dhe ka shoqëruar bashkëshortin e saj. Ndërkohë, çifti ka edhe dy fëmijë, një djalë edhe një vajzë, të cilët nuk ndodhen aty. Sipas fqinjëve, vajza ndodhet në Maqedoni, pasi familja është me origjinë nga Golloborda, ndërsa djali ka zgjedhur me kohë që të jetojë si prift. Sipas të dhënave, që i ri ai ka ndjekur rrugën fetare dhe ka mbaruar studimet për prift, duke u shkëputur nga familja për t‘i kushtuar jetën besimit. Ndërsa motrat e Sotir Maznikut janë martuar dhe jetojnë në lagje të tjera të Tiranës. B. G.
Dëshmia
Sotir Mazniku rrëfen motivin e vrasjes së njerkës
65-vjeçari Mazniku: Dola për të blerë cigare
Pas mbërritjes së policisë në vendin e vrasjes së 76-vjeçares, aty është paraqitur edhe thjeshtri i saj. Ai ka mbetur i habitur për praninë e policisë, por shumë shpejt është njoftuar se gruaja e tij i kishte vrarë njerkën. Duke nxjerrë nga xhepi një paketë "President", sikur donte t‘ia tregonte policisë, ai ka marrë një cigare dhe është shprehur: Dola për të marrë këto, pasi kisha mbetur pa duhan. Më tej ai ka deklaruar se në momentin që kishte dalë nga shtëpia nuk kishte lënë të hapur ndonjë debat, por shpesh herë kishin ndodhur të tilla në familjen e tij. Sipas dëshmisë, babai i tij ishte martuar dy herë dhe kur kishte vdekur, njerkës i kishte lënë një dhomë. "Unë kam tri motra, një nga nëna dhe dy të tjera nga babai. Ato janë të gjitha të martuara dhe në këtë shtëpi banonim vetëm ne të tre", është shprehur me gjysmë zëri Sotir Mazniku, teksa po shoqërohej me furgon për në Komisariatin Nr. 4.
Gazeta Shqip
Përgjigju Duke Cituar
Postuar më parë nga engjellorja
Krijoni Kontakt