PS përjashton 6 nanoistët qe votuan Bamir Topin President
“Dëbimi” i tyre nga rradhët e partisë është zyrtarizuar paraditen e djeshme në mënyrë pothuajse unanime nga kryesia rozë. Nderkaq ne mbledhje kane munguar Arben Malaj, që njihet si mbështetës i Nanos, dhe Pandeli Majkos, i cili është “prishur” me Ramën sidomos pas mbështetjes së promemories në kongresin e parafundit
Tedi Blushi -GazetaShqiptare
Tirane-Përjashtohen nga Partia Socialiste gjashtë deputetët “rebelë” të cilët votuan pro Bamir Topit për President të Republikës duke thyer vendimin politik të opozitës së bashkuar. “Dëbimi” i tyre nga rradhët e partisë është zyrtarizuar paraditen e djeshme në mënyrë pothuajse unanime nga kryesia e selisë rozë. Mbledhja e kryesisë nuk ka pasur asnjë debat. Ka folur fillimisht Rama për idenë e përjashtimit të gjashtë deputetëve.
Ky i fundit, është mbështetur menjëherë nga Dokle. “Duhet të largohen nga partia. Shkelën një vendim të forumeve. Duhet të përjashtohen” ka qenë deklarata e Namik Dokles.
Ndërkaq, duket se kanë munguar debatet, edhe për shkak të mungesës së dy eksponentëve oponentë të Ramës brenda kryesisë, Arben Malaj, që njihet si mbështetës i Nanos, dhe Pandeli Majkos, i cili është “prishur” me Ramën sidomos pas mbështetjes së promemories në kongresin e parafundit.
Në prononcimin e tij për mediat fill pas kësaj mbledhjeje, kryesocialisti, Edi Rama referuar këtij vendimi u shpreh se “tashmë ka ardhur koha që Partia Socialiste t’u tregojë shqiptarëve një alternative tjetër qeverisjeje”. Ndërkaq në mbledhjen e saj kryesia e selisë rozë vecc këtij vendimi ka miratuar edhe programin e ri politik deri në qershor të vitit 2008 i cili sipas Ramës do të nisë zbatimin në muajin shtator. “Objekt i diskutimeve ishte programi i punës për periudhen e mbetur të vitit dhe njëkohësisht edhe për periudhën që i takon vitit të ardhshem”, tha Rama duke theksuar se PS është në një moment kur duhet të marrë më shumë përgjegjësi. Në këtë mënyrë ai la të kuptohet socialistët do të nisin javën e ardhshme një konsultim të gjerë me bazën, për të ndërtuar programin alternativ qeverisës. Kundërshtues të shumë prej nismave ligjore të mazhorancës, të majtët do të provojnë të nënshkruajnë një marrëveshje të re me elektoratin përmes një turi takimesh. Madje referuar këtij momenti Rama sqaroi se me këtë lëvizje, partia më e madhe e opozitës do të kërkojë ndërtimin e një aleance të re me Shqipërinë dhe shqiptarët. “Kjo nuk do të jetë një aleancë, e cila të jetë e kushtëzuar brenda gardhit të partive, por një aleance e cila shkon përtej tyre dhe kërkon që t’i jap individit dhe shqiptarit të sotëm të gjitha mundësitë për të konkuruar lirisht me talentin dhe aftësitë e tij, dhe njëkohesisht të garantojë me ligj këto mundesi, duke mos lejuar klientelizmin, nepotizmin, abuzivizmin që jane armiqët e konkurrences”, argumentoi gjatë prononcimit të tij për mediat kreu socialist. Ndërsa duke u ndalur në vija të përgjithshme rreth turit të planifikuar prej tij në bazë, Rama sqaroi se qëllimi kryesor do të jetë të sqarojë shqiptarët për pasojat e keqqeverisjes së qeverisë Berisha si edhe për arsyet pse e majta duhet të rikthehet në pushtet. “Jetojmë në një periudhë ku qeveria është përfundimisht e çoroditur. Dëgjojmë broçkulla dhe shprehje absurde, si ajo më e freskëta e sekuestrimit të tokave që nuk punohen, nga ana e kryeministrit, që është në fakt shprehja e sëmundjes së kësaj qeverie dhe mazhorancës. Kjo është një qeveri dhe mazhorancë anti-sistem, anti-kapitaliste, anti-liri, anti-individualitet dhe anti-përgjegjësi. Në fund të fundit është një qeveri anti-ligj”, vuri në dukje kryesocialisti. Por ndërkaq bazës së majtë në shtator pritet t’i drejtohen edhe mbështetesit e ish kryetarit Fato Nano, të pakënaqur nga mospërfaqësimi në organet e larta drejtuese.
Përgjigju Duke Cituar
Postuar më parë nga mondishall
Krijoni Kontakt